ཕྱི་ལོ་ ༢༠༠༩ ཟླ་ ༡ ཚེས་ ༣༡ རེས་གཟའ་སྤེན་པ།

༄༅། །རྒྱ་གཞུང་ནས་གཞུང་འབྲེལ་གསལ་བསྒྲགས་བྱས་པ་ལྟར་རྒྱ་ནག་གི་སྲིད་བློན་ན་ཇའ་བྷའོ་(Wen Jaibao)ཕྱི་ལོ་ ༢༠༠༩ ཟླ་ ༡ ཚེས་ ༣༡ ནས་ཕྱི་ཟླ་ ༢ ཚེས་ ༢ བར་ཉིན་གྲངས་གསུམ་རིང་དབྱིན་ཡུལ་དུ་འབྱོར་རྒྱུ་ཡིན་པ་དང་སྦྲགས་དབྱིན་ཇིའི་སྲིད་བློན་གྷོར་ཌོན་བྷ་རོན་(Gordon Brown)དང་ཐུག་འཕྲད་གནང་རྒྱུ་ཡིན་པ་མ་ཟད་ཕན་ཚུན་ཚོང་འབྲེལ་ཐོག་ལ་གྲོས་མོལ་གནང་འཆར་ཡོད་སྟབས། དབྱིན་ཡུལ་བོད་ཀྱི་སྐུ་ཚབ་དོན་ཁང་ནས་ཕྱི་ལོ་ ༢༠༠༩ ཟླ་ ༡ ཚེས་ ༢༧ ཉིན་དབྱིན་ཇིའི་སྲིད་བློན་སྐུ་ཞབས་གྷོ་ཌོན་བྷ་རོན་མཆོག་ནས་རྒྱ་ནག་གི་སྲིད་བློན་དང་ཐུག་འཕྲད་ཀྱིས་གྲོས་མོལ་གནང་སྐབས་བོད་དོན་གླེང་སློང་ཡོང་བའི་འབོད་སྐུལ་གྱི་ཞུ་ཡིག་ཅིག་ཕུལ་ཡོད་པ་རེད།

སྔ་ལོའི་ཕྱི་ཟླ་ ༥ ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབྱིན་ཡུལ་དུ་ཆིབས་སྒྱུར་བསྐྱངས་སྐབས་དབྱིན་ཇིའི་སྲིད་བློན་ནས་མཇལ་འཕྲད་ཞུ་བཞིན་པ།

དེ་ཡང་དབྱིན་ཡུལ་སྐུ་ཚབ་དོན་གཅོད་སྐུ་ཞབས་ཚེ་རིང་བཀྲ་ཤིས་ལགས་ནས་བོད་ནང་གི་གནས་སྟངས་ལ་བློ་འཚབ་ཆེན་པོ་དང་བཅས་འབོད་སྐུལ་གྱི་ཞུ་ཡིག་ནང་འཁོད་དོན། གནས་སྐབས་ཚོང་འབྲེལ་གྱི་ཁེ་ཕན་ལས་ལྷག་པ་བོད་དང་རྒྱ་ནག་ནང་གི་མི་སྤྱོད་དང་འགྲོ་བ་མིའི་ཐོབ་ཐང་ཐོག་ལ་ཆེས་མཐོང་དེ་བས་ཆེ་བ་གནང་སྟེ་སྲིད་བློན་གྷོ་ཌན་བྷ་རོན་མཆོག་ནས་རྒྱ་ནག་གི་སྲིད་བློན་ལ་བོད་ནང་གི་བོད་མི་ཚོར་སྡུག་སབྱོང་མནར་གཅོད་གཏོང་རྒྱུ་མཚམས་འཇོག་དང་། བོད་རྒྱ་འབྲེལ་མོལ་བསྐྱར་དུ་ཡོང་སླད་འབོད་སྐུལ་ཤུགས་ཆེ་གནང་རོགས། ཞེས་ཞུས་ཡོད་པ་རེད།

དབྱིན་ཡུལ་སྐུ་ཚབ་དོན་ཁང་ནས་ཕྱི་ཚེས་ ༢༩ ཉིན་དབྱིན་ཡུུལ་རྙིང་ཞེན་ཚོགས་པའི་(Coservative Party)ཚོགས་གཙོ་སྐུ་ཞབས་ཌེཝི་ཌེ་ཁ་མི་རོན་(David Cameron)དང་། དབྱིན་ཡུལ་གྱི་གུ་ཡངས་མང་གཙོ་ཚོགས་པའི་(Liberal Democrat)ཚོགས་གཙོ་སྐུ་ཞབས་ནིཀ་ཁ་ལག་(Nick Clegg)རྣམ་གཉིས་ནས་སྲིད་བློན་མཆོག་ལ་བཟང་སྤྱོད་དང་རྒྱལ་རབས་ལོ་རྒྱུས་གཉིས་ཀའི་ཐོག་ནས་དབྱིན་ཡུལ་ལ་འགན་འཁུར་ཡོད་པ་ཐུགས་ལ་བཅངས་ཏེ་བོད་ཀྱི་གནད་དོན་གླེང་སློང་གནང་དགོས་པའི་སྐུལ་མ་གཏོང་དགོས་པའི་འབོད་སྐུལ་གྱི་གནས་འཕྲིན་ཞིག་ཀྱང་ཕུལ་ཡོད་པ་རེད།

དབྱིན་ཡུལ་གྱི་སྲིད་བློན་ཙམ་མ་ཡིན་པར་རྙིང་ཞེན་ཚོགས་པའི་ཚོགས་གཙོ་དང་གུ་ཡངས་མང་གཙོ་ཚོགས་པའི་ཚོགས་གཙོ་རྣམ་གཉིས་ནས་སྔ་ལོའི་ཕྱི་ཟླ་ ༥ ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་འཕྲད་ཞུས་ཏེ་དབུ་མའི་ལམ་གྱི་ཐོག་ནས་བོད་ཀྱི་གནད་དོན་སེལ་རྒྱུར་རྒྱབ་སྐྱོར་ཤུགས་ཆེ་ཡོད་པའི་རྣམ་འགྱུར་གསལ་སྟོན་གནང་ཡོད།།