༅༅། །ཕྱི་ལོ་ ༢༠༠༨ ཟླ་ ༡༢ ཚེས་ ༥ རེས་གཟའ་པ་སངས།
༅༅། །ཕྱི་ཚེས་ ༢༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་ཟུར་པ་ནོ་བེལ་ཞི་བདེའི་གཟེངས་རྟག
![pics.3](https://154.35.136.131/wp-content/uploads/2010/07/pics.32-300x200.jpg)
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཅེཀ་ སྤྱི་མཐུན་རྒྱལ་ཁབ་ཀྱི་སྲིད་འཛིན་ཟུར་པ་སྐུ་ཞབས་ཝ་སེ་ལཕ་ཧ་ཝལ་མཆོག་དང་མཇལ་ འཕྲད་གནང་བཞིན་པ།
ས་བཞེས་མྱོང་མཁན་སྐུ་ཞབས་ཝ་སེ་ལཕ་ཧ་ཝལ་ (Vaclav Havel) མཆོག་དང་ཕྱི་ལོ་ཉིས་སྟོང་ལོའི་གླེང་སྟེགས་ཞེས་པའི་ཚོགས་པས་ཇི་ལྟར་གདན་ཞུ་ཞུས་པ་བཞིན་༸གོང་ས་མཆོག་ཆེད་གཏོང་གནམ་གྲུའི་ཐོག་མཁའ་ལམ་བརྒྱུད་ཤར་ཡུ་རོབ་ཀྱི་རྒྱལ་ཁབ་ཅེཀ་སྤྱི་མཐུན་རྒྱལ་ཁབ་ཀྱི་རྒྱལ་ས་པ་རག་ཅེས་པའི་གནམ་ཐང་དུ་༸ཞབས་སོར་འཁོད་སྐབས་རྒྱལ་ཁབ་དེར་རྟེན་གཞི་བྱས་པའི་རྒྱ་གར་གཞུང་ཚབ་ཁང་གི་དྲུང་ཆེ་མཆོག་དང་ཕྱི་ལོ་ཉིས་སྟོང་ལོའི་གླེང་སྟེགས་ཞེས་པའི་ཚོགས་པའི་གཙོ་འཛིན་སྐུ་ཞབས་ཨོལ་ཌ་སར་ནི་སོགས་ནས་ཕེབས་བསུ་གཟབ་རྒྱས་དང་སྦྲགས་བཞུགས་གནས་མགྲོན་ཁང་དུ་གདན་འདྲེན་ཞུས་ཡོད་པ་མ་ཟད། བཞུགས་གནས་མགྲོན་ཁང་གི་མདུན་དུ་ཡུལ་དེར་གནས་པའི་རང་རིགས་བོད་མི་རྣམས་དང་བོད་དོན་རྒྱབ་སྐྱོར་ཚོགས་པའི་ཚོགས་མི་བཅས་ནས་ཕེབས་བསུ་གཟབ་རྒྱས་ཞུས་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་ནས་ཅེཀ་རྒྱལ་ཁབ་ཀྱི་རྒྱལ་ཡོངས་བརྙན་འཕྲིན་བརྒྱུད་ལམ་ཐོག་བཀའ་སློབ་ཕེབས་དོན། ཅེཀ་སྤྱི་མཐུན་རྒྱལ་ཁབ་དང་དུས་ཡུན་རིང་པོར་འབྲེལ་ལམ་ཧ་ཅང་ཉེ་པོ་ཡོད་པ་དང་དམིགས་བསལ་སྲིད་འཛིན་ཟུར་པ་ཝ་སེ་ལཕ་མཆོག་དང་འབྲེལ་ལམ་ཉེ་པོ་ཡོད་པའི་སྐོར་དང་། ཉེ་ལམ་པེ་ཅིང་དུ་བོད་རྒྱ་འབྲེལ་མོལ་གནང་བའི་གནད་དོན་སྐོར་སོགས་ཀྱི་བཀའ་སློབ་སྩལ་ཡོད།
![pics.4](https://154.35.136.131/wp-content/uploads/2010/07/pics.48-300x196.jpg)
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཅེཀ་སྤྱི་མཐུན་རྒྱལ་ཁབ་ཀྱི་སྲིད་བློན་མི་རེཀ་ཌོ་པོ་ལ་ནེཀ་མཆོག་དང་ལྷན་དུ་སྲིད་བློན་མཆོག་གི་གཞུང་འབྲེལ་བཞུགས་གནས་སུ་མཇལ་འཛོམས་གནང་བཞིན་པ།
ཕྱི་ཚེས་ ༣༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཅེཀ་སྤྱི་མཐུན་རྒྱལ་ཁབ་ཀྱི་སྲིད་བློན་མི་རེཀ་ཌོ་པོ་ལ་ནེཀ་(Mirek Topolanek)མཆོག་དང་ལྷན་དུ་སྲིད་བློན་མཆོག་གི་གཞུང་འབྲེལ་བཞུགས་གནས་སུ་མཇལ་འཛོམས་གནང་ཐོག་དུས་ཡུན་ཆུ་ཚོད་གཅིག་ཙམ་རིང་ཕན་ཚུན་མཇལ་མོལ་ལྷུག་པོར་གནང་ཡོད་པ་རེད། དབུ་ཁྲིད་རྣམ་གཉིས་དབར་གནད་དོན་སྣ་མང་ཐད་གསུང་མོལ་གནང་བའི་ཁོངས་སུ་ད་ལྟའི་བོད་ནང་གི་གནས་སྟངས་སྐོར་ལ་༸གོང་ས་མཆོག་གིས་ཞིབ་ཕྲའི་གནས་ཚུལ་ངོ་སྤྲོད་གནང་ཡོད་པ་དང་། ཅེཀ་སྤྱི་མཐུན་གྱི་སྲིད་བློན་མཆོག་ནས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ཅེཀ་རྒྱལ་ཁབ་ནང་༸ཞབས་སོར་འཁོད་པར་ཕེབས་བསུ་ཡོད་ཅེས་དང་བོད་ཀྱི་གནད་དོན་ཐད་ཁོང་གིས་ཐུགས་སྣང་ཇི་གནང་སྐོར་སོགས་ཞུས་ཡོད་པ་རེད། ཅེཀ་སྤྱི་མཐུན་གྱི་སྲིད་བློན་མཆོག་དང་ལྷན་དུ་མཇལ་འཕྲད་མ་གནང་གོང་དེར་༸གོང་ས་མཆོག་གིས་ཡུལ་དེའི་མི་མང་གྲངས་ ༣༠༠༠ བརྒལ་བར་བྱམས་བརྩེ་ནི་བདེ་སྐྱིད་ཀྱི་གཞི་རྩ་ཡིན། ཞེས་པའི་བརྗོད་གཞིའི་ཐོག་བཀའ་སློབ་བཀའ་དྲིན་ཆེ་བ་སྩལ་ཡོད། བཀའ་སློབ་ཀྱི་སྙིང་དོན་ནི་བྱམས་བརྩེའི་སེམས་དང་འདོད་ཕྱོགས་བྲལ་བའི་གཞན་ཕན་གྱི་ཀུན་སློང་བཟང་པོ་སོ་སོའི་རྒྱུད་ལ་འཇགས་པ་བྱ་རྒྱུ་ནི་ནང་སེམས་ཀྱི་བདེ་སྐྱིད་འབྱུང་བའི་ཐབས་ལམ་གལ་ཆེན་ཞིག་ཡིན། གཞན་ཕན་དང་བྱམས་བརྩེའི་ཀུན་སློང་གིས་འཛམ་གླིང་འདིའི་དཀའ་སྡུག་སེལ་བའི་ཐབས་ལམ་གཙོ་བོ་དེ་ཡིན་པ་མ་ཟད། གནམ་གཤིས་འགྱུར་ལྡོག་གི་གཙོས་འཛམ་གླིང་ནང་གི་དཀའ་རྙོག་སྣ་ཚོགས་སེལ་ཐབས་ལའང་ཕན་ཐོགས་ཆེན་པོ་ཡོང་རྒྱུ་རེད། ཅེས་དེར་འདུས་མི་མང་རྣམས་ལ་བཀའ་སློབ་སྩལ་ཡོད།སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཅེཀ་སྤྱི་མཐུན་རྒྱལ་ཁབ་ཀྱི་སྲིད་བློན་མི་རེཀ་ཌོ་པོ་ལ་ནེཀ་མཆོག་དང་ལྷན་དུ་སྲིད་བློན་མཆོག་གི་གཞུང་འབྲེལ་བཞུགས་གནས་སུ་མཇལ་འཛོམས་གནང་བཞིན་པ། ཉིན་དེའི་ཞོགས་པ་འཛམ་གླིང་ནང་སྙན་གྲགས་ལྡན་པའི་སུད་སིའི་དཔར་པ་མལ་ཀལ་ཁོམ་ཀྲི་(Michel Comte) ཞུ་བ་ཁོང་གིས་༸གོང་ས་མཆོག་མཇལ་ཁ་ཞུས་ཏེ། བཞུགས་སྒར་རྡ་རམ་ས་ལར་རྟེན་གཞི་བྱས་པའི་བོད་གཞུང་སྨན་རྩིས་ཁང་གིས་རྡ་སའི་ཉེ་འཁྲིས་སུ་གསོ་རིག་དང་རྩིས་རིག་སློབ་གཉེར་ཁང་ཞིག་གསར་འཛུགས་བྱ་རྒྱུའི་ལས་འཆར་ལ་ཁོང་ནས་མཐུན་འགྱུར་རོགས་རམ་ཇི་འདྲ་ཞུ་ཐབས་སྐོར་སྙན་སེང་ཞུས་ཡོད་པ་རེད། སྐབས་དེར་ཧང་ག་རི་དང་ཨོ་སི་ཊི་རི་ཡ་སོགས་ནང་གནས་སྡོད་བྱེད་བཞིན་པའི་བོད་མི་ཚོ་དང་རྒྱལ་ཁབ་དེ་དག་ནང་གི་བོད་དོན་རྒྱབ་སྐྱོར་ཚོགས་པའི་ཚོགས་མི་ཁག་གིས་༸གོང་ས་མཆོག་མཇལ་ཁ་ཞུ་སྐབས་༸གོང་ས་མཆོག་ནས། བོད་དོན་རྒྱབ་སྐྱོར་བ་ཚོས་བོད་ཀྱི་རྩ་དོན་ལ་ཕན་པའི་རྒྱབ་སྐྱོར་གནང་བར་ཐུགས་རྗེ་ཆེ། ད་ཆ་བོད་དང་བོད་མི་ཚོ་དཀའ་ངལ་གྱི་གནས་སུ་ལྷུང་ཡོད་པའི་གནས་སྐབས་འདིར་ཁྱེད་ཚོས་རོགས་རམ་དགོས་ཀྱི་ཡོད། ཅེས་སོགས་ཀྱི་བཀའ་སྩལ་ཡོད། དེ་བཞིན་ཉིན་དེར་འདི་ལོ་པེ་ཅིང་ཨོ་ལེམ་པིཀ་རྩེད་འགྲན་སྐབས་བྱ་དགའ་ཐོབ་པའི་ཨི་ཊ་ལིའི་རྩེད་འགྲན་པ་མར་གྷི་རི་ཊ་ག་རན་བ་སི་ (Margherita Granbassi) ནས་༸གོང་ས་མཆོག་གི་ཞལ་མཇལ་དུ་བཅར་ཡོད་པ་རེད། ཐེངས་འདི་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཅེཀ་རྒྱལ་ཁབ་ནང་ཆིབས་སྒྱུར་བསྐྱངས་ཐེངས་བདུན་པ་དེ་ཆགས་ཀྱི་ཡོད་ཅིང་། ཐེངས་འདིའི་ཆིབས་སྒྱུར་གྱི་མཛད་འཆར་ཁག་སྐྱོང་གནང་མཛད་སྐབས་དང་བཞུགས་གནས་མགྲོན་ཁང་སོགས་ཀྱི་ནང་རྒྱལ་ཁབ་དེས་སྐུའི་ཉེན་སྲུང་སླད་ཉིན་མཚན་དུས་དྲུག་ཏུ་ཞབས་ཞུ་ཧ་ཅང་གི་གྲ་སྒྲིག་གཟབ་རྒྱས་ཞུས་ཡོད་པ་དང་། ཡུལ་དེའི་མི་མང་རྣམས་དེ་སྔ་དམར་ཤོག་འོག་དུས་ཡུན་གང་མཚམས་གནས་ཏེ་ཕྱི་ལོ་ ༡༩༨༩ ལོར་དམར་པོའི་རིང་ལུགས་མེད་པར་གྱུར་ཏེ་མང་གཙོའི་གཞུང་དུ་གྱུར་
![pics.5](https://154.35.136.131/wp-content/uploads/2010/07/pics.53.jpg)
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཅེཀ་ སྤྱི་མཐུན་རྒྱལ་ཁབ་ནང་གསར་འགོད་ལྷན་ཚོགས་ཤིག་གི་ཐོག་བཀའ་སློབ་སྩོལ་བཞིན་པ།
བར་སོང་མི་མང་རྣམས་ནས་བོད་དོན་ཐོག་དམིགས་བསལ་དོ་སྣང་དང་རྒྱབ་སྐྱོར་ཆེན་པོ་ཞུ་བཞིན་ཡོད། ཕྱི་ཟླ་ ༡༢ ཚེས་ ༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་གསར་འགོད་ལྷན་ཚོགས་ཐོག་བཅར་བའི་གསར་འགོད་པ་གྲངས་ ༨༠ བརྒལ་བ་བཅར་ཡོད་པ་རྣམས་ལ་བཀའ་སློབ་སྩལ་དོན། ད་ཆ་རྒྱ་ནག་གཞུང་ཕྱོགས་ལ་ཡིད་ཆེས་དེ་ཆུང་དུ་ཆུང་དུ་འགྲོ་བཞིན་འདུག་ནའང་རྒྱ་ནག་མི་མང་ལ་ཡིད་ཆེས་བརྟན་པོ་ཡོད། ངོས་ནས་དུས་རྒྱུན་དུ་བརྗོད་བཞིན་པ་ལྟར་རྒྱ་ནག་ལྟ་བུའི་རྒྱལ་ཁབ་ཆེན་པོ་མཉམ་དུ་འབྲེལ་བ་དམ་ཟབ་དགོས་རྒྱུ་དེ་གལ་གནད་ཆེན་པོ་ཡིན་རུང་དཔལ་འབྱོར་ཁོ་ནའི་དོན་དུ་བྱས་ན་འགྲིག་གི་མེད་ལུགས་དང་། བརྗོད་རང་དབང་དང་འགྲོ་བ་མིའི་ཐོབ་ཐང་། མང་གཙོ་བཅས་ཀྱི་རྩ་དོན་ཐོག་ལངས་ཕྱོགས་བརྟན་པོ་འཛིན་རྒྱུ་དེ་གལ་ཆེན་པོ་ཡིན། གཞན་ཡང་ཁ་ཞེ་གཉིས་མེད་ཀྱི་སྒོ་ནས་མཛའ་གྲོགས་ཀྱི་འབྲེལ་ལམ་ཡོང་རྒྱུར་འགྱུར་བ་མེད་པའི་འབྲེལ་ལམ་གཏན་པོ་ཞིག་གནང་བ་ཡིན་ན་མཐའ་མ་གཞན་གྱིས་བསྔགས་བརྗོད་ཏན་ཏན་བྱེད་ཀྱི་རེད། ཅེས་བཀའ་ཕེབས་ཡོད། ཐེངས་དེའི་གསར་འགོད་ལྷན་ཚོགས་ཐོག་སྩལ་བའི་བཀའ་སློབ་རྣམས་ཅེཀ་རྒྱལ་ཡོངས་བརྙན་འཕྲིན་བརྒྱུད་ལམ་ཐོག་ནས་རྒྱལ་ཡོངས་སུ་ཐད་གཏོང་བྱས་ཡོད་པས་རྒྱལ་སྤྱིའི་སྟེང་ཁྱབ་བསྒྲགས་དང་༸གོང་ས་མཆོག་གི་མཚན་སྙན་དེ་བས་རྒྱ་ཁྱབ་ཏུ་ཁྱབ་ཐུབ་པ་བྱུང་ཡོད། ཉིན་དེའི་ཕྱེད་ཡོལ་ཙམ་ལ་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པས་ཇི་ལྟར་གདན་ཞུའི་གསོལ་འདེབས་ཞུས་པ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་ལ་གཟིགས་སྐོར་གནང་སྐབས་རྒྱལ་ཁབ་དེའི་རྒྱལ་སྲུང་དང་། འགྲོ་བ་མིའི་ཐོབ་ཐང་། ཁོར་ཡུག རང་དབང་བཅས་ཀྱི་བློན་ཆེན་སོགས་དང་མཇལ་འཕྲད་གནང་ཡོད་པ་རེད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་མི་གྲངས་ ༡༦ ཡོད་པ་ཁོང་རྣམས་ནས་གྲོས་ཚོགས་སུ་གདན་འདྲེན་ཞུས་པ་བཞིན་གྲོས་ཚོགས་ནང་ཆུ་ཚོད་གཅིག་ལ་ཉེ་བ་བཀའ་སློབ་སྩལ་ཏེ་མཛད་འཕྲིན་ཤིན་ཏུ་རྒྱས་པོ་བྱུང་ཡོད། དེ་ཡང་༸གོང་ས་༸སྐྱབས་མགོན་ཆེན་པོ་མཆོག་ནས་འཐུས་མི་ཁྱེད་རྣམ་པས་བོད་དོན་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞེས་ཞུས་ཡོད་པ་མ་ཟད། བོད་དོན་ལ་རྒྱབ་སྐྱོར་གནང་མཁན་གྱི་མི་མང་དང་། སྲིད་དབང་། གྲོས་ཚོགས་ཀྱི་འཐུས་མི་སོགས་སུ་འདྲ་ཞིག་ཡིན་རུང་བོད་ལ་ཤ་ཞེན་གནང་བ་ཙམ་མ་ཡིན་པར་བདེན་པ་ལ་རྒྱབ་སྐྱོར་གནང་བར་ངོས་འཛིན་ཞུ་གི་ཡོད་སྐོར་བཀའ་ཕེབས་ཡོད་པ་རེད། དེ་བཞིན་ཡུལ་དེའི་སྲིད་འཛིན་ཟུར་པ་སྐུ་ཞབསཝ་་སེ་ལཕ་མཆོག་དང་ལྷན་དུ་སྐུ་ལྷོད་ལྷོད་ངང་མཇལ་མོལ་ཆུ་ཚོད་ཕྱེད་ཀ་ཙམ་གནང་ཡོད་པ་རེད། ཅེཀ་སྤྱི་མཐུན་རྒྱལ་ཁབ་ཀྱི་རྒྱལ་ས་པ་རག་ནང་ཕྱི་ཟླ་ ༡༡ ཚེས་ ༣༠ ནས་བཟུང་ཉིན་གསུམ་རིང་རྒྱལ་ཁབ་དེའི་སྲིད་བློན་མི་ཀལ་མཆོག་དང་མཇལ་འཕྲད་སོགས་ཀྱི་མཛད་འཕྲིན་བསྐྱངས་ཡོད་པ་བཅས་ཐེངས་འདིའི་ཆིབས་སྒྱུར་ནི་ཅེཀ་སྤྱི་མཐུན་རྒྱལ་ཁབ་ནང་ལ་ཆིབས་སྒྱུར་གནང་ཐེངས་བདུན་པ་ཆགས་ཡོད་པ་རེད།
ཕྱི་ཟླ་ ༡༢ ཚེས་ ༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཅེཀ་སྤྱི་མཐུན་རྒྱལ་ཁབ་ཀྱི་ཕྱི་སྲིད་བློན་ཆེན་སྐུ་ཞབས་ཀ་རལ་ཆི་ཝར་ཛིན་བྷག་(Mr.Karel Schwarzenberg)མཆོག་སྔ་དྲོ་ཕྱི་སྲིད་ལས་ཁུངས་ནང་མཇལ་འཕྲད་མཛད་ཡོད། དེ་ཡང་ཕྱི་སྲིད་ལས་ཁུངས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཕེབས་བསུ་ཞུ་སྐབས་ཅེཀ་ཕྱི་སྲིད་བློན་ཆེན་མཆོག་ནས། སྐུ་ཉིད་འདི་གར་ཆིབས་སྒྱུར་བསྐྱངས་པ་དེ་ནི་ང་ཚོའི་གཟི་བརྗིད་ཆེ་ཤོས་ཤིག་དང་། སྐུ་ཉིད་ཀྱི་དྲུང་ནས་ནང་སེམས་ལ་བདེ་སྐྱིད་བསྐྲུན་ཆེད་ཀྱི་ཐབས་ཤེས་ཐོབ་ཐབས་བྱེད་ཀྱི་ཡོད་ཅེས་ཞུས་ཡོད་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས། ངོས་ཀྱིས་ཅེཀ་མི་མང་དང་། གཞུང་། སྲིད་འཛིན་ཧ་ཝལ། (Harvel) ཅེཀ་གྲོས་ཚོགས། ཉིས་སྟོང་ལོའི་གླེང་སྟེགས་བཅས་ནས་བོད་མིར་རྒྱབ་སྐྱོར་དང་དུས་རྟག་ཏུ་ཐུགས་ཁུར་གནང་བར་ཡིད་སྨོན་ཞུ་གི་ཡོད། ཅེས་བཀའ་གནང་བ་མ་ཟད། བོད་མིར་ཆ་མཚོན་ན་ད་ལྟའི་གནས་སྐབས་འདི་ནི་ང་ཚོའི་རྒྱལ་རབས་ནང་གི་དཀའ་ངལ་དང་གཉན་འཕྲང་ཆེ་ཤོས་དེ་འགྲིམ་བཞིན་ཡོད། བོད་ཀྱི་ཆོས་དང་རིག་གཞུང་མི་རིགས་དང་བཅས་པ་ཆག་འཇིག་གི་གནས་སུ་ལྷུང་ཡོད་ཅིང་། རྒྱ་ནག་གཞུང་ཕྱོགས་ནས་བོད་ཀྱི་རིག་གཞུང་དེ་ཉེན་ཁ་ཅན་ཞིག་ལ་ངོས་འཛིན་བྱེད་ཀྱི་ཡོད་པ་རེད། ཅེས་བཀའ་སྩལ་ཡོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཕྱི་སྲིད་བློན་ཆེན་རྣམ་གཉིས་ཆུ་ཚོད་ ༡ ཙམ་རིང་གསུང་མོལ་ལྷུག་པོ་གནང་གྲུབ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་པ་རཀ་དམག་མིའི་གནམ་ཐང་དུ་ཆིབས་སྒྱུར་བསྐྱངས་པ་དང་། དེ་ནས་༸གོང་ས་༸སྐྱབས་མགོན་ཆེན་པོ་མཆོག་དང་ཅེཀ་ཕྱི་སྲིད་བློན་ཆེན་མཆོག་ལྷན་རྒྱས་ཆེད་གཏོང་གནམ་གྲུའི་ཐོག་བེལ་ཇི་ཡམ་གྱི་རྒྱལ་ས་བྷ་ར་སལ་ (Brussels) དུ་ཆིབས་ཞལ་བསྒྱུར།སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༢༠༠༨ ཟླ་ ༡༢ ཚེས་ ༢ ནས་ཚེས་ ༥ བར་བྷ་ར་སལ་(Brussels) དུ་ཆོས་སྲིད་ཀྱི་མཛད་འཕྲིན་ཁག་བསྐྱང་རྒྱུ་ཡིན་པ་དང་། དེ་རྗེས་ཕྱི་ཟླ་ ༡༢ ཚེས་ ༥ ནས་ཚེས་ ༡༢ བར་པོར་ལན་ཌེ་ནང་ཆོས་སྲིད་ཀྱི་མཛད་འཕྲིན་ཁག་བསྐྱང་རྒྱུ་ཡིན་འདུག་པ་བཅས་ཀྱི་གནས་ཚུལ་དུ།།