ཕྱི་ལོ་ ༢༠༠༨ ཟླ་ ༡༢ ཚེས་ ༥ རེས་གཟའ་པ་སངས།
༄༅། །བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་ཕི་རི་ཁའི་ཡུལ་གྲུ་ནི་ཇི་རི་ཡའི་ནང་རྟེན་གཞི་བྱས་པའི་ཨ་ནི་ཡེམ་ཨོ་སིག་ཝེ་ (Anyiam Osigwe) ཞེས་པའི་ཐེབས་རྩ་ཁང་དང་། ཡུ་རོབ་ནང་ཡོད་པའི་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་ཟུར་པ་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ཝ་སེ་ལཕ་ (Vaclav Havel) མཆོག་དང་ཕྱི་ལོ་ཉིས་སྟོང་ལོའི་གླེང་སྟེགས་ཞེས་པའི་ཚོགས་པ་སོགས་ཕྱི་ནང་དད་ལྡན་པ་མང་པོ་ཞིག་གིས་ཇི་ལྟར་གསོལ་བ་ཕུར་ཚུགས་སུ་བཏབ་པ་བཞིན་༸གོང་ས་ལྷ་མིའི་རྣམ་འདྲེན་ཆེན་པོ་མཆོག་སྟོན་འཁོར་ཧྲག་བསྡུས་བཅས་པ་ཕྱི་ལོ་ ༢༠༠༨ ཕྱི་ཟླ་ ༡༡ ཚེས་ ༢༥ ཉིན་བཞུགས་སྒར་ནས་ག་གྷལ་གནམ་ཐང་དུ་ཆིབས་སྒྱུར་གནང་བ་དང་། དེ་ནས་མཁའ་ལམ་བརྒྱུད་ལྡི་ལིར་ཆིབས་སྒྱུར་གྱིས་ལྡི་ལིར་བཞུགས་ཞག་དང་། ཕྱི་ཚེས་ ༢༦ སྔ་དྲོ་ལྡི་ལི་ནས་མཁའ་ལམ་བརྒྱུད་ནུབ་ཨ་ཕི་རི་ཁའི་གླིང་ཕྲན་ནི་ཇི་རི་ཡའི་ (Nigeria) གྲོང་ཁྱེར། ལ་གོ་སེའི་ (Lagos) གནམ་ཐང་དུ་༸ཞབས་སོར་འཁོད་སྐབས་ཨ་ཕི་རི་ཁའི་ནང་ཡོད་བོད་གཞུང་སྐུ་ཚབ་དོན་གཅོད་དང་། ཆིབས་སྒྱུར་གདན་ཞུའི་མི་སྣ་ཕེབས་བསུར་བཅར་ཏེ་གདན་ཞུས་ཐོག་ཉིན་གྲངས་གཉིས་རིང་ཁུལ་དེར་མཛད་འཆར་ཁག་རྒྱ་ཆེར་བསྐྱངས་ཡོད་པ་མ་ཟད། དེ་རྗེས་ཡུ་རོབ་ཀྱི་ཅེཀ་སྤྱི་མཐུན་རྒྱལ་ཁབ་ནང་མཛད་འཕྲིན་རྒྱ་ཆེ་བསྐྱངས་ཡོད།
༸གོང་ས་༸སྐྱབས་མགོན་ཆེན་པོ་མཆོག་ནས་ཨ་ཕི་རི་ཁའི་གླིང་ཕྲན་ནི་ཇི་རི་ཡའི་ནང་བསྐྱངས་པའི་མཛད་འཕྲིན་སྐོར།
ཕྱི་ཟླ་ ༡༡ ཚེས་ ༢༦ སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་ཕི་རི་ཁའི་གླིང་ཕྲན་ནི་ཇི་རི་ཡའི་ (Nigeria) གྲོང་ཁྱེར། ལ་གོ་སེ་ (Lagos) ཞེས་པའི་གནམ་ཐང་དུ་༸ཞབས་སོར་འཁོད་ཡོད། སྐབས་དེར་གདན་ཞུས་པ་གཙོ་བོ་ཨ་ནི་ཡེམ་ཨོ་སིག་ཝེ་ཞེས་པའི་ཐེབས་རྩ་ཁང་དང་ཨ་ཕི་རི་ཁའི་ནང་ཡོད་བོད་གཞུང་སྐུ་ཚབ་དོན་གཅོད་བཅས་ནས་ཕེབས་བསུ་གཟབ་རྒྱས་ཞུས་ཡོད་པ་རེད། ཕྱི་ཚེས་ ༢༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་མི་མང་ ༢༠༠༠ བརྒལ་བ་འདུ་འཛོམས་སར་ཆིབས་སྒྱུར་བསྐྱངས་ཏེ་བཀའ་སློབ་བཀའ་དྲིན་ཆེ་བ་སྩལ་ཡོད། དེ་ཡང་༸གོང་ས་༸སྐྱབས་མགོན་ཆེན་པོ་མཆོག་ནས། ནི་ཇི་རི་ཡའི་ནང་ཁ་ཆེ་དང་ཡེ་ཤུའི་ཆོས་ལུགས་ཉམས་ལེན་བྱེད་མཁན་ཁྱོན་ཆེན་པོ་ཡོད་པས་མ་ཟད་ཆོས་ལུགས་དེ་གཉིས་ཉམས་ལེན་བྱེད་མཁན་ཚོའི་དབར་གཞི་རྩའི་ཆ་ནས་འཆམ་མཐུན་ཡོད་པ་དེ་ནི་ངོ་མཚར་དང་ལྡན་པ་ཞིག་ཡིན་པས་འཛམ་གླིང་གི་རྒྱལ་ཁབ་གཞན་དག་ཚོ་དང་རྒྱལ་ཁབ་དེ་ཚོའི་ནང་གི་ཆོས་ལུགས་འདྲ་མིན་ཉམས་ལེན་བྱེད་མཁན་ཚོས་ངེས་པར་དུ་ནི་ཇི་རི་ཡའི་ནང་གི་ཆོས་ལུགས་ཕན་ཚུན་དབར་བཟོད་བསྲན་གྱི་གོམས་གཤིས་བཟང་པོ་ལྡན་ཡོད་པ་དེ་ནས་དཔེ་མཚོན་ལེན་འོས་པ་རེད། ཅེས་དང་ཆོས་ལུགས་ཕན་ཚུན་དབར་འཆམ་མཐུན་ཅན་གྱི་འབྲེལ་བ་འདི་འདྲ་བ་ཡོད་པ་དེ་ཁྱེད་ཚོས་རྒྱུན་འཁྱོངས་བྱ་རོགས། ཞེས་དེར་འདུས་ཡུལ་མི་རྣམས་ལ་རེ་སྐུལ་ཞུས་ཡོད། ནི་ཇི་རི་ཡའི་ནང་གི་ཆོས་ཚོགས་ཁག་གིས་ཡུལ་དེའི་ནང་ཆོས་ལུགས་ཕན་ཚུན་འཆམ་མཐུན་ཡོང་ཐབས་བྱེད་བཞིན་པ་ལྟར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཀྱང་ད་ཕན་དགོངས་གཞི་དེ་གའི་ཐོག་ལ་འབད་བརྩོན་གནང་བཞིན་ཡིན་ཞེས་བཀའ་སྩལ་ཡོད། མཛད་སྒོའི་ནང་པོ་ལན་ཌིའི་རྒྱལ་ཁབ་ཀྱི་སྲིད་འཛིན་ཟུར་པ་སྐུ་ཞབས་ཨ་ལི་ཀ་སན་ཌིར་ཡང་གདན་འདྲེན་ཞུས་ཡོད་པ་བཞིན་མཉམ་ཞུགས་གནང་ཡོད་པ་མ་ཟད། ནི་ཇི་རི་ཡའི་ཆོས་ལུགས་དབུ་ཁྲིད་ཁག་དང་གསར་འགྱུར་བརྒྱུད་ལམ་ཁག་སོགས་དང་མཇལ་འཕྲད་མཛད་དེ་གསུང་མོལ་གནང་ཡོད། ༸གོང་ས་༸སྐྱབས་མགོན་ཆེན་པོ་མཆོག་ནི་ཇི་རི་ཡའི་ནང་གི་ཆིབས་སྒྱུར་ཐེངས་དང་པོ་བསྐྱངས་ཡོད་པ་དེ་ཡོངས་སུ་ལེགས་གྲུབ་ཟིན་ཏེ་ཡུ་རོབ་ཀྱི་རྒྱལ་ཁབ་ཅེཀ་སྤྱི་མཐུན་རྒྱལ་ཁབ་ཏུ་ཆིབས་ཞལ་བསྒྱུར་ཡོད་པ་རེད།
