ཕྱི་ལོ་ ༢༠༠༨ ཟླ་ ༡༢ ཚེས་ ༢ རེས་གཟའ་མིག་དམར།
ལས་འཆར་བཟོ་འགོད་དང་འཛུགས་སྐྲུན་ལག་བསྟར་འོས་སྦྱོང་དབུ་འབྱེད་མཛད་སྒོ་ཚོགས་བཞིན་པ།
༄༅། །བཙན་བྱོལ་བོད་མིའི་གཞོན་སྐྱེས་ཚོར་ཆེད་དུ་དམིགས་ཏེ་ལས་འཆར་བཟོ་འགོད་དང་འཛུགས་སྐྲུན་ལག་བསྟར་བྱེད་རྒྱུའི་མཁོ་གནད་ཆེ་བའི་དམིགས་བསལ་འོས་སྦྱོང་གི་དབུ་འབྱེད་ ༢༠༠༨ ཕྱི་ཟླ་ ༡༢ ཚེས་ ༡ སྔ་དྲོའི་ཆུ་ཚོད་ ༡༠ ཐོག་གངས་ཅན་སྐྱིད་གཤོངས་ལས་བྱེད་གསོལ་ཚིགས་ཁང་གི་ཡང་སྟེང་ཚོགས་ཁང་དུ་སྐུ་མགྲོན་གཙོ་བོ་འཆར་འགོད་ཚོགས་གཞོན་དང་དཔལ་ལྡན་དཔལ་འབྱོར་བཀའ་བློན་གཅིག་ལྕོགས་ཚེ་རིང་དོན་གྲུབ་མཆོག་ནས་སྣང་གསལ་ཞལ་ཕྱེ་གནང་སྟེ་མཛད་སྒོ་དབུ་འབྱེད་གྲུབ་རྗེས་གསོལ་ཇ་དང་འབྲས་བསིལ་འདེགས་འབུལ་ཞུས། དེ་རྗེས་སྤྱི་ཁྱབ་འཆར་འགོད་འགན་འཛིན་འབུམ་རམ་པ་དཀོན་མཆོག་བརྩོན་འགྲུས་ལགས་ནས་ལས་འཆར་བཟོ་འགོད་དང་། འཛུགས་སྐྲུན་དང་འབྲེལ་བའི་སྐོར་ལ་ངོ་སྤྲོད་གནང་བའི་ནང་། འཆར་འགོད་ལས་ཁུངས་དབུ་འཛུགས་ཞུས་ཏེ་འཛུགས་སྐྲུན་གྱི་ལས་གཞི་བཟོ་འགོད་ཆེད་ལག་བསྟར་གྱི་ཉམས་མྱོང་གང་འཚམས་ཡོད་པ་དེ་དག་ཕྱི་རྒྱལ་གྱི་ཁྱད་ལས་མི་སྣ་ཁག་ལ་བརྟེན་མི་དགོས་པར་རང་ངོས་ནས་འོས་སྦྱོང་སྤྲོད་ཐུབ་པའི་ནུས་པ་དེ་དག་བེད་སྤྱོད་གཏོང་རྒྱུའི་དུས་ཚོད་ངེས་ཅན་ཞིག་ལ་སླེབས་ཏེ་ཆེད་ལས་འོས་སྦྱོང་འདི་གོ་སྒྲིག་ཞུས་ཡོད། ཅེས་དང་། ད་ལྟའི་འོས་སྦྱོང་དེ་སློབ་སྦྱོང་གི་བསྟི་གནས་ཁག་དང་། མཐོ་སློབ་ཁག་གི་རྒྱུན་གཏན་སློབ་སྦྱོང་ནང་མ་ཚུད་པའི་དམིགས་བསལ་སྤྱི་ཚོགས་དང་། དཔལ་འབྱོར། འཛུགས་སྐྲུན་ཡར་རྒྱས་གཏོང་རྒྱུའི་ལག་རྩལ་ཁག་ལ་འོས་སྦྱོང་སྤྲོད་རྒྱུ་ཡིན་སྐོར་དང་། ཡིན་ནའང་འོས་སྦྱོང་བ་རྣམས་ནས་ལག་འཁྱེར་ལེན་རྒྱུར་བརྒྱ་ཆ་འོས་འཚམས་ཤིག་མ་བྱུང་ན་ལག་འཁྱེར་ཐོབ་རྒྱུ་དཀའ་བར་སོང་ཚང་མས་ཉིན་མཚན་དུས་དྲུག་ཏུ་འོས་སྦྱོང་གི་ངོ་བོ་བཟུང་སྟེ་འབད་བརྩོན་བྱེད་དགོས་པ་དང་། འོས་སྦྱོང་དེ་བཙན་བྱོལ་སྤྱི་ཚོགས་ཙམ་མ་ཡིན་པར་བོད་ནང་ཡར་རྒྱས་འཛུགས་སྐྲུན་ལས་གཞི་ལག་བསྟར་ཆེད་ཕན་ཐོགས་ཡོད་ངེས་ཅན་ཞིག་ཀྱང་ཡིན། ཞེས་དང་། ད་རེས་ཀྱི་འོས་སྦྱོང་དེ་ཐེངས་དང་པོ་ཆགས་ཡོད་པར་བརྟེན་ལམ་ལྷོངས་བྱུང་ཚེ་མུ་མཐུད་གོ་སྒྲིག་ཞུ་འཆར་ཡོད་སྐོར་སོགས་གསུང་བཤད་གནང་། དེ་རྗེས་འཆར་འགོད་ཚོགས་གཞོན་དང་དཔལ་འབྱོར་བཀའ་བློན་གཅིག་ལྕོགས་ཚེ་རིང་དོན་གྲུབ་མཆོག་ནས་ལམ་སྟོན་
གསུང་བཤད་ནང་། མཐོ་རིམ་སློབ་གྲྭའི་སློབ་ཐོན་པའི་ཤེས་བྱ་དང་། བཙན་བྱོལ་བོད་མིའི་དགོས་མཁོའི་ཆེད་ལས་ཤེས་ཡོན་གཉིས་བར་ཁྱད་ཆེན་པོ་ཆགས་ཡོད། དེར་བརྟེན་ད་ལྟའི་འོས་སྦྱོང་དེ་གལ་གནད་ཆེ་བའི་ལག་རྩལ་དང་། ཆེད་ལས་ཀྱི་འཆར་འགོད་གནང་ཕྱོགས་དེ་དག་གོང་གསལ་གྱི་བར་ཁྱད་དེ་དག་ཉུང་དུ་གཏོང་ཐུབ་རྒྱུའི་ནུས་པ་ལྡན་པའི་འོས་སྦྱོང་ཞིག་ལ་ངོས་འཛིན་ཞུ་གི་ཡོད། ཅེས་དང་། དེ་བཞིན་འདོན་ལ་ཉེ་བའི་གཅིག་བསྡུས་ཡར་རྒྱས་འཆར་གཞི་བཞི་པའི་ལས་འཆར་དང་ལས་གཞི་ལག་བསྟར་ཆེད་ད་ལྟའི་འོས་སྦྱོང་ཐོན་པའི་མི་སྣ་མི་ཉུང་བ་ཞིག་བཙན་བྱོལ་གཞུང་གི་ལས་ཁུངས་མ་ལག་དང་བཅས་པར་དགོས་ངེས་ཅན་ཞིག་ཡིན་སྟབས་ཚང་མས་དུས་རྒྱུན་གྱི་འོས་སྦྱོང་གི་སྦྱོང་བརྡར་ཙམ་ལ་ངོས་འཛིན་མེད་པར། དོ་སྣང་དང་། སེམས་ཁུར་ཆེ་བཞེས་ཐོག་མཉམ་ཞུགས་གནང་རྒྱུ་གལ་འགངས་ཆེན་པོ་ཡིན་སྐོར་སོགས་ལམ་སྟོན་རྒྱ་ཆེ་གནང་གྲུབ་རྗེས་དབུ་འབྱེད་ཀྱི་མཛད་སྒོ་ལེགས་པར་གྲུབ། ཐེངས་དང་པོའི་འོས་སྦྱོང་འདིར་རྒྱ་བལ་འབྲུག་གསུམ་ས་གནས་ནས་མཐོ་སློབ་ཐོན་པའི་སློབ་མ་གྲངས་ ༡༨ དང་། དེ་བཞིན་རྡ་ས་ནས་གཞུང་འབྲེལ་མིན་པའི་ཚོགས་སྐྱིད་ཁག་གི་ལས་བྱེད་བཅས་མཉམ་ཞུགས་གནང་ཡོད། དེ་ཡང་འཛུགས་སྐྲུན་གྱི་བཟོ་རྩལ་འོས་སྦྱོང་དེ་གཞུང་དང་གཞུང་འབྲེལ། ཚན་པ་ཁག་གི་དགོས་མཁོའི་ལས་འཆར་ཙམ་དུ་མ་ཟད། གཞུང་འབྲེལ་མ་ཡིན་པའི་ལས་དོན་དང་དམིགས་ཡུལ་སྒྲུབ་ཆེད་གལ་གནད་ཆེན་པོ་ཡིན་པར་བརྟེན་ཚོགས་སྐྱིད་ཁག་ནས་ཀྱང་འོས་སྦྱོང་དུ་མཉམ་ཞུགས་གནང་བ་བཅས་ཀྱི་གནས་ཚུལ་དུ།།
