ཕྱི་ལོ་ ༢༠༠༨ ཟླ་ ༡༢ ཚེས་ ༦ རེས་གཟའ་སྤེན་པ།
བཙན་བྱོལ་བོད་མིའི་སློབ་གྲྭ་ཁག་གི་ཤེས་ཡོན་གནས་ཚད་ཡར་རྒྱས་དང་། རིགས་གཅིག་རྐང་འཛིན་གང་མང་གསོ་སྐྱོང་ཐུབ་ཐབས་སྐོར་དང་འབྲེལ་བའི་ཚོགས་འདུ་སྐོང་ཚོགས་གནང་བཞིན་པ།
༄༅། །བོད་གཞུང་ཤེས་རིག་ལས་ཁུངས་ནས་གོ་སྒྲིག་ཐོག་རྡ་ས་གངས་སྐྱིད་ཕྱི་དྲིལ་ལྷག་པ་ཚེ་རིང་ཚོགས་ཁང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་དུས་དང་རྣམ་པ་ཀུན་ཏུ་བཀའ་ཕེབས་པ་སྤྱི་དང་། ལྷག་པར་དུ་འདི་ལོའི་བོད་ཕྲུག་ཁྱིམ་སྡེ་དབུ་བརྙེས་པའི་དུས་ཆེན་དང་། དམིགས་བསལ་ཚོགས་ཆེན་གྱི་ཚོགས་བཅར་བ་རྣམས་ལ་བཙན་བྱོལ་བོད་མིའི་སློབ་གྲྭ་ཁག་ནང་ཤེས་ཡོན་གོང་མཐོར་གཏོང་ཐབས་དང་། ལོ་མང་སྔོན་ནས་ཐུགས་རེ་གནང་བ་བཞིན་རིགས་གཅིག་རྐང་འཛིན་པ་གང་མང་ཐོན་ཐབས་དང་བཅས་ལོ་སུམ་ཅུ་ཙམ་གྱི་རིང་འཐུས་ཤོར་ཕྱིན་ཡོད་པ་སོགས་ཀྱི་སྐོར་ལ་བཀའ་སློབ་ལྗིད་ནན་ཕེབས་དོན་ལྟར། ཤེས་ཡོན་སྣ་མང་གི་བསམ་བློའི་ཁྱད་ཆོས་ལྡན་པའི་བོད་མི་ན་གཞོན་གོ་ཆོད་གང་མང་ཐོན་ཐབས་དང་། བྱེ་བྲག་ཏུ་རིགས་གཅིག་རྐང་འཛིན་གང་མང་གསོ་སྐྱོང་དང་སྐྱེད་སྲིང་ཐུབ་ཐབས་བཅས་ཀྱི་སྐོར་ལ་ཛ་དྲག་གི་ཐོག་ནས་རྡ་ས་དང་རྡ་སའི་ཉེ་གནས་སུ་ཡོད་པའི་མཁས་མྱོང་ཅན་གདན་ཞུས་ཀྱི་ཕྱི་ལོ་ ༢༠༠༨ ཕྱི་ཟླ་ ༡༢ ཚེས་ ༥ ནས་ཚེས་ ༦ བར་ཉིན་གྲངས་གཉིས་རིང་ལྷན་ཚོགས་གནང་སྟེ་ཁོང་རྣམ་པའི་དགོངས་འཆར་བསྡུ་རུབ་ཐོག་རིམ་པས་ལག་ལེན་བསྟར་བདེའི་འཆར་ཟིན་བཟོ་སྒྲིག་ཞུ་གཏན་འཁེལ་བའི་ཆེད་ཛ་དྲག་གི་ཚོགས་འདུ་ཞིག་སྐོང་ཚོགས་གནང་ཡོད། དེ་ཡང་ཉིན་དང་པོའི་སྔ་དྲོའི་ཆུ་ཚོད་ ༩།༣༠ དཔལ་ལྡན་ཤེས་རིག་བཀའ་བློན་ཐུབ་བསྟན་ལུང་རིགས་མཆོག་གིས་གཙོ་སྐྱོང་དང་ལམ་སྟོན་གསུང་བཤད་གནང་བ་དང་སྦྲགས་ཐེངས་དང་པོའི་དགོངས་འཆར་བསྡུ་རུབ་ཀྱི་ལྷན་ཚོགས་འགོ་འཛུགས་གནང་སྟེ་མཁས་མྱོང་ཅན་རྣམས་ཀྱི་དགོངས་འཆར་རིམ་བཞིན་གོ་བསྡུར་དང་སྦྱངས་བཤད་གནང་མུས་བཅས་ཀྱི་གནས་ཚུལ་དུ།།
