ཕྱི་ལོ་ ༢༠༠༨ ཟླ་ ༡༢ ཚེས་ ༡༨ རེས་གཟའ་ཕུར་བུ།
༄༅། །བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་པོ་ལན་ཌེའི་སྲིད་འཛིན་ཟུར་པ་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ལེག་ཝ་ལི་སའི་སློབ་གཉེར་ཁང་(Lech Walesa Institute)དང་། ཇ་གྷི་ལོ་ནན་གཙུག་ལག་སློབ་གཉེར་ཁང་(Jagiellonian University) པོ་ལན་ཌེ་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་ཚོགས་གཙོ། པོ་ལན་ཌེ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པ། པོ་ལན་ཌེ་རྒྱལ་ས་ར་སོར་གྲོང་ཁྱེར་སྲིད་གཞུང་གི་སྲིད་སྐྱོང་དང་གྲོང་ཁྱེར་གྱི་སྤྱི་ཁྱབ་བཅས་ནས་ཇི་ལྟར་གསོལ་འདེབས་ཞུས་པ་ལྟར་ཕྱི་ལོ་ ༢༠༠༨ ཟླ་ ༡༢ ཚེས་ ༥ ཉིན་ནས་ཚེས་ ༡༢ བར་པོ་ལན་ཌེའི་ནང་ཆོས་སྲིད་ཀྱི་མཛད་འཕྲིན་རླབས་ཆེན་ཁག་བསྐྱངས་ཡོད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་པོ་ལན་ཌེའི་སྲིད་འཛིན་ཟུར་པ་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ལེག་ཝ་ལི་ས་མཆོག་རྣམ་གཉིས་མཇལ་འཕྲད་གནང་བཞིན་པ།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་པོ་ལན་ཌེའི་གྲོང་ཁྱེར་ག་ཌན་སེའི་ (Gdansk)གནམ་ཐང་དུ་༸ཞབས་སོར་འཁོད་སྐབས་ལོན་ཌོན་བོད་གཞུང་སྐུ་ཚབ་དོན་གཅོད་ཚེ་རིང་བཀྲ་ཤིས་ལགས་དང་། ལེག་ཝ་ལེ་སའི་སློབ་གཉེར་ཁང་གི་འཐུས་མི་བཅས་ནས་ཕེབས་བསུ་གཟབ་རྒྱས་ཞུས་ཡོད། གནམ་ཐང་དུ་༸གོང་ས་༸སྐྱབས་མགོན་ཆེན་པོ་མཆོག་གིས་གསར་འགོད་པ་ཚོར་ངོས་རང་གྲོང་ཁྱེར་འདིར་ཡོང་རྒྱུའི་གོ་སྐབས་བྱུང་བར་ཧ་ཅང་གི་དགའ་པོ་བྱུང་། གྲོང་ཁྱེར་འདི་ནི་པོ་ལེན་ཌེའི་ལོ་རྒྱུས་ནང་ཆིག་སྒྲིལ་གྱི་ལས་འགུལ་སྤེལ་ས་ཞིག་དང་། སྲིད་འཛིན་ལེག་ཝ་ལི་སའི་ལས་འགུལ་གྱི་བྱེད་སྒོ་ཁག་དབུ་འཛུགས་གནང་ཡུལ་གྱི་གྲོང་ཁྱེར་ཞིག་ཀྱང་རེད། ཅེས་བཀའ་སློབ་སྩལ་ཡོད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཞབས་ལེག་ཝ་ལེ་ས་མཆོག་དང་ལྷན་དུ་ཁོང་གི་འཁྲུངས་གནས་པོ་ལན་ཌེའི་གྲོང་ཁྱེར་ག་ཌན་སེ་ (Gdansk)ནང་ཆིབས་སྒྱུར་བསྐྱངས་ཏེ་སྔོན་ནས་གསོལ་འདེབས་རེ་སྐུལ་ཞུས་པ་ལྟར་རྒྱལ་སྤྱིའི་གསར་འགོད་ལྷན་ཚོགས་ཐོག་འཛམ་གླིང་གཞོན་སྐྱེས་ཀྱི་གླེང་སྟེགས་(World Forum of the Young)ཞེས་པའི་བརྗོད་གཞིའི་ཐོག་བཀའ་སློབ་བཀའ་དྲིན་སྩལ་ཡོད།
གསར་འགོད་ལྷན་ཚོགས་དེའི་ཐོག་རྒྱལ་སྤྱིའི་གསར་འགོད་པ་གྲངས་ ༣༠༠ ལྷག་ཙམ་འཛོམས་ཡོད་ཅིང་སྐབས་དེར་སྤྱི་ནོར་༸གོང་ས་༸སྐྱབས་མགོན་ཆེན་པོ་དང་ལྷན་སྐུ་ཞབས་ལེག་ཝ་ལེ་ས་ཡང་མཉམ་ཞུགས་གནང་ཡོད་པ་རེད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས། སྐྱེ་བོ་སུ་འདྲ་ཞིག་ཡིན་རུང་བདེ་སྐྱིད་ལྡན་པའི་མི་ཚེ་ཞིག་བསྐྱལ་རྒྱུའི་ཐོབ་ཐང་འདྲ་མཉམ་ཡོད། རྒྱ་ནག་ལ་ཆ་མཚོན་ནའང་མི་འབོར་དང་། དཔལ་འབྱོར། དམག་གི་སྟོབས་ཤུགས་ཕར་ཕུད་པས་འཛམ་གླིང་ནང་གུས་བཀུར་ལྡན་པའི་སྟོབས་ཆེན་རྒྱལ་ཁབ་ཅིག་ཆགས་རྒྱུར་བཟང་སྤྱོད་ཀྱི་ནུས་པ་ལྡན་དགོས་པ་ཡིན། དེ་ནི་ཁྲིམས་ཀྱི་སྐྱོང་བའི་ལམ་ལུགས་དང་། སྨྲ་བརྗོད་རང་དབང་། གསར་འགོད་རང་དབང་སོགས་བརྒྱུད་ནས་གཞན་གྱི་སེམས་ཚོར་ལ་བརྩི་མཐོང་བྱེད་དགོས་པ་དེ་ཡིན། གལ་ཏེ་རྒྱ་ནག་ཕྱི་གསལ་ནང་གསལ་ཅན་གྱི་རྒྱལ་སྤྱིའི་སྤྱི་ཚོགས་ཤིག་ཆགས་པ་ཡིན་ན་བོད་ཀྱི་དཀའ་རྙོག་དེ་ཡང་ཉིན་གཅིག་གཉིས་ནང་སེལ་ཐུབ་ཀྱི་རེད། ཅེས་བཀའ་ཕེབས་ཡོད། གསར་འགོད་ལྷན་ཚོགས་དེར་སྐུ་ཞབས་ལེག་ཝ་ལེ་སས་གསུང་དོན། གལ་ཏེ་སྐུ་ཉིད་བོད་མིའི་༸སྐྱབས་མགོན་ཏཱ་ལའི་བླ་མ་མཆོག་བཞིན་འཁྲུངས་ཡུལ་བོད་དུ་ཡིན་ན་ཁོང་གི་ངོས་ནས་ཀྱང་རྒྱ་ནག་ལ་འཐབ་རྩོད་བྱེད་ངེས་ཡིན་པ་དང་། བོད་ཀྱི་གནད་དོན་དེ་རྒྱལ་ཁའི་ཕྱོགས་སུ་གང་འདྲ་སྣེ་ཁྲིད་བྱེད་རྒྱུ་རེད་དམ་ཞེས་ན་བོད་མིའི་འཐབ་རྩོད་ཀྱི་ལས་འགུལ་ལ་རྒྱལ་ཁ་ཐོབ་རྒྱུའི་གོ་སྐབས་ཡོད་པ་ཞིག་རེད་མ་གཏོགས་གོ་སྐབས་མེད་པའི་གནས་སྟངས་ཤིག་རྩ་བ་ནས་མིན། ང་ཚོས་སོ་སོའི་ཕྱོགས་ནས་ཐབས་ལམ་འདམ་ག་བྱེད་དགོས་ཀྱི་ཡོད། སྐབས་མཐུན་ཆབ་སྲིད་ཀྱི་གོ་སྐབས་དང་བསྟུན་ཏེ་སོ་སོའི་ནུས་ཤུགས་སྤངས་དགོས་ཀྱི་ཡོད། ངས་བོད་ཀྱི་འཐབ་རྩོད་ཀྱི་ལས་འགུལ་གང་འདྲ་བྱེད་དགོས་མིན་དེ་ནང་མོལ་ཐོག་ནས་ཞུ་རྒྱུ་ལས་མི་མང་ལ་བརྗོད་ཀྱི་མིན། ཞེས་དང་མཐའ་དོན་ཁོང་གིས། བོད་མིར་རང་དབང་དང་རྒྱལ་ཁ་ཐོབ་རྒྱུར་རེ་བ་དང་སྨོན་འདུན་ཞུ་གི་ཡོད། ཅེས་གསུངས་ཡོད་པ་རེད།
ཐེངས་འདིར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་པོ་ལན་ཌེ་ནང་ཆིབས་སྒྱུར་བསྐྱངས་དོན་གཙོ་བོ་ནི་ཡུལ་དེའི་གསར་བརྗེའི་ལས་འགུལ་གྱི་དབུ་ཁྲིད་པོ་ལན་ཌེའི་སྲིད་འཛིན་ཟུར་པ་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ལེག་ཝ་ལེ་ས་(Lech Walesa) མཆོག་ལ་ནོ་བེལ་ཞི་བདེའི་གཟེངས་རྟགས་ཕུལ་ནས་ལོ་ངོ་ ༢༥ འཁོར་བའི་དུས་དྲན་གྱི་མཛད་སྒོར་གདན་ཞུ་གསོལ་འདེབས་ཞུས་པ་བཞིན་༸ཞབས་སོར་འཁོད་དེ་གོ་ལ་སྤྱི་ཡི་ཞི་བདེ་ཞེས་པ་ནམ་ཞིག་ཡོང་སྲིད་ (Gobal Peace Ever Possibl) ཅེས་པའི་བརྗོད་གཞིའི་ཐོག་བཀའ་སློབ་སྩལ་ཡོད། མཛད་སྟོན་དེར་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་དབུ་ཁྲིད་གཞན་རྣམས་ཀྱང་ལྷན་ཞུགས་གནང་ཡོད་པ་མ་ཟད། སྐབས་དེར་པོ་ལན་ཌེའི་སྲིད་བློན་ཌོ་ནལ་ཌེ་ཊསེ་(Donald Tusk) མཆོག་ནས་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་ཞུས་ཏེ་གསུང་དོན། པོ་ལན་ཌེའི་མི་མང་མང་པོ་ཞིག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཡིད་ཆེས་དང་། མགོན་པོ་གང་ཉིད་ནས་འཛམ་གླིང་ཞི་བདེ་དང་བོད་དོན་ཐད་སྐུ་ངལ་བསྐྱོན་དང་སྐྱོན་བཞིན་ཡོད་པར་རྒྱབ་སྐྱོར་གནང་གི་ཡོད་ལུགས་འགྲེལ་བརྗོད་གནང་བ་དང་ཆབས་ཅིག་ང་ཚོའི་ངོས་ནས་ཕྱག་རོགས་གང་ཐུབ་ངེས་པར་དུ་ཞུ་རྒྱུ་ཡིན། ཞེས་དང་མགོན་པོ་གང་ཉིད་འདི་གར་ཆིབས་སྒྱུར་བསྐྱངས་པ་འདིས་ང་ཚོར་དགའ་སྤོབས་ཤུགས་ཆེ་བྱུང་། ཞེས་ཞུས་ཡོད་པ་རེད།
༸གོང་ས་༸སྐྱབས་མགོན་ཆེན་པོ་མཆོག་ལ་ཆེས་མཐོའི་མཁས་པའི་གཟེངས་བསྟོད་ཀྱི་ཕྱག་འཁྱེར་ཕུལ་བ།
༸གོང་ས་༸སྐྱབས་མགོན་ཆེན་པོ་མཆོག་ལ་ཇ་གྷི་ལོ་ནན་གཙུག་ལག་སློབ་གྲྭ་ཆེན་མོ་ནས་ཆེས་མཐོའི་མཁས་པའི་གཟེངས་བསྟོད་ཀྱི་ཕྱག་འཁྱེར་འབུལ་བཞེས་གནང་བཞིན་པ།
ཕྱི་ལོ་ ༢༠༠༨ ཟླ་ ༡༢ ཚེས་ ༨ རེས་གཟའ་ཟླ་བ་ཉིན་བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་པོ་ལན་ཌེའི་གྲོང་ཁྱེར་ཀ་ར་ཀོའོ་ (Krakow) ནང་རྟེན་གཞི་བྱས་པའི་པོ་ལན་ཌེའི་སྙན་གྲགས་ཅན་གྱི་ཇ་གྷི་ལོ་ནན་གཙུག་ལག་སློབ་གྲྭ་ཆེན་མོ་(Jagiellonian University) ནས་ཆེས་མཐོའི་མཁས་པའི་གཟེངས་བསྟོད་ཀྱི་ཕྱག་འཁྱེར་འབུལ་བཞེས་གནང་ཡོད་པ་དང་། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་ཕེབས་དོན། དེ་སྔ་ཕྱི་ལོ་ ༡༩༨༠ ནང་པོ་ལན་ཌེའི་མང་ཚོགས་ཀྱིས་འཚེ་མེད་ཞི་བའི་ཐབས་ལམ་ཐོག་ནས་རང་དབང་གི་ལས་འགུལ་སྤེལ་ཏེ་མང་གཙོའི་ལམ་ལུགས་གསར་འཛུགས་གནང་ཡོད་པར་བསྔགས་བརྗོད་གནང་བ་དང་སྦྲགས། ཐེངས་འདིར་ངོས་རང་ལ་པོ་ལན་ཌེའི་སྙན་གྲགས་ཅན་གྱི་གཙུག་ལག་སློབ་གྲྭ་ཆེན་མོའི་ཆེས་མཐོའི་མཁས་པའི་གཟེངས་བསྟོད་ཀྱི་ཕྱག་འཁྱེར་ཞུ་རྒྱུའི་གོ་སྐབས་ཐོབ་པར་རྒྱུ་མཚན་གཉིས་ཀྱི་ཐོག་ནས་དགའ་ཚོར་ཧ་ཅང་ཆེན་པོ་བྱུང་། རྒྱུ་མཚན་དང་པོ་ནི་གཙུག་ལག་སློབ་གྲྭ་དེ་ནི་པོ་ལན་ཌེའི་མཐོ་རིམ་སློབ་གྲྭ་རྙིང་ཤོས་ཤིག་ཡིན་པ་དང་། དེ་ཡང་ལོ་ངོ་ ༦༠༠ ཙམ་ཕྱིན་པའི་ལོ་རྒྱུས་ཡོད་པའི་མཐོ་རིམ་སློབ་གྲྭ་ཞིག་ཡིན། གཉིས་པ་ནི་པོ་ལན་ཌེའི་ཡུལ་མི་རྣམས་དང་ངོས་རང་ཧ་ཅང་གི་སྙིང་ཉེ་པོ་ཡོད། དེ་སྔ་པོ་ལན་ཌེའི་ཡུལ་མི་ཚོས་ཡུལ་དེའི་དམར་པོའི་སྲིད་གཞུང་ལ་ལོ་ངོ་བཅུ་ཕྲག་གཅིག་ཙམ་རིང་ཞི་བའི་ཐོག་ནས་འཐབ་རྩོད་བྱས་ཏེ་མཐར་ཕྱི་ལོ་ ༡༩༨༩ ལོར་ཡུལ་དེའི་དམར་པོའི་སྲིད་གཞུང་མཇུག་སྒྲིལ་ བྱེད་ཐུབ་པ་དེར་མགོན་པོ་གང་ཉིད་སེམས་འགུལ་ཧ་ཅང་གི་ཆེན་པོ་ཐེབས་བྱུང་། ཞེས་དང་དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་ནས་སྐབས་དེར་ངོས་ནས་ཉིན་ལྟར་བྷི་བྷི་སི་གསར་འགྱུར་ཁང་གི་འཛམ་གླིང་གསར་འགྱུར་ཁག་ཉན་ཏེ་པོ་ལན་ཌེའི་གནས་སྟངས་གང་འདྲ་ཆགས་ཡོད་མེད་སྐོར་ལ་དོ་སྣང་ཆེན་པོ་བྱས་པ་ཡིན། ཞེས་དང་། ད་དུང་མགོན་པོ་གང་ཉིད་ཀྱིས་ང་ཚོས་པོ་ལན་ཌེའི་ཡུལ་མིའི་ཚོའི་འགྲམ་ནས་སློབ་གསོ་མང་པོ་ཞིག་ལེན་དགོས་ཀྱི་ཡོད་པའི་བཀའ་ཕེབས་ཡོད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཕ་རན་སིའི་སྲིད་འཛིན་སར་ཀོ་ཛི་མཇལ་འཕྲད་གནང་བ།
༄༅། །རྒྱ་ནག་གཞུང་གིས་ཕ་རན་སིའི་སྲིད་འཛིན་ནི་ཀོ་ལསེ་སར་ཀོ་ཛི་(Nicolas SarKozy)མཆོག་ནས་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་ཞུས་པ་ཡིན་ན་རྒྱ་ནག་དང་ཕ་རན་སིའི་དབར་གྱི་སྒོར་ས་ཡ་དུ་མའི་ཚོང་འབྲེལ་ལ་དོ་འཕོག་ཡོང་གི་རེད། ཅེས་སྡིགས་ར་འདྲ་མིན་སྐུལ་མིན་ལ་མ་ལྟོས་པར་ཕ་རན་སིའི་སྲིད་འཛིན་སར་ཀོ་ཛི་མཆོག་ནས་ཕྱི་ལོ་ ༢༠༠༨ ཟླ་ ༡༢ ཚེས་ ༦ ཉིན་གྱི་ཕྱི་དྲོ་པོ་ལན་སྤྱི་མཐུན་རྒྱལ་ཁབ་ནང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་འཕྲད་ཞུས་ཡོད་པ་མ་ཟད། ལྷག་དོན་ཁོང་གིས་ང་སུ་དང་ཐུག་འཕྲད་བྱེད་མིན་གྱི་རང་དབང་དེ་ང་རང་ལ་རང་དབང་ཡོད། ཅེས་གསུངས་ཡོད་པ་རེད།
༸གོང་ས་༸སྐྱབས་མགོན་ཆེན་པོ་མཆོག་དང་ཕ་རན་སིའི་སྲིད་འཛིན་དང་ཡུ་རོབ་མཐུན་ཚོགས་ཀྱི་ཚོགས་གཙོ་གཅིག་ལྕོགས་སྐུ་ཞབས་ནི་ཀོ་ལསེ་སར་ཀོ་ཛི་མཆོག་རྣམ་གཉིས་མཇལ་འཕྲད་གནང་བཞིན་པ།
སྲིད་འཛིན་སར་ཀོ་ཛི་མཆོག་ནས་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་གནང་སྐབས་ཆེས་མཐོང་དང་གུས་བཀུར་ཆེན་པོ་ཞུས་ཡོད། ༸གོང་ས་༸སྐྱབས་མགོན་ཆེན་པོ་མཆོག་ནས་སྲིད་འཛིན་སར་ཀོ་ཛི་མཆོག་ལ། རྒྱ་ནག་གཞུང་ནས་གནོན་ཤུགས་སྤྲད་མིན་ལ་མ་ལྟོས་པར་མགོན་པོ་གང་ཉིད་དང་མཇལ་འཕྲད་གནང་བར་དགའ་སྤྲོ་ཆེན་པོ་བྱུང་བས་ཐུགས་རྗེ་ཆེ། ཞེས་དང་། ༸གོང་ས་༸སྐྱབས་མགོན་ཆེན་པོ་མཆོག་ནས། ལོ་མང་རིང་དབུ་མའི་ལམ་གྱི་ཐོག་ནས་བོད་ཀྱི་གནད་དོན་སེལ་ཐབས་གནང་ཡོད་ཀྱང་རྒྱ་གཞུང་ནས་ཡ་ལན་ཡག་པོ་མ་བྱས་སྟབས་རྒྱ་ནག་གཞུང་ལ་ཡིད་ཆེས་ཆུང་དུ་འགྲོ་བཞིན་ཡོད་ནའང་རྒྱ་ནག་མི་མང་ལ་ཡིད་ཆེས་ཡོད་ལ་རྒྱབ་སྐྱོར་ཡང་གནང་གི་འདུག ལྷག་པར་དུ་ཉེ་ཆར་རྒྱ་ནག་གི་མཁས་དབང་གྲངས་ ༢༠༠ ཙམ་ནས་བོད་དོན་ཐོག་ལ་རྩོམ་ཡིག་བྲིས་པའི་ནང་རྒྱ་ནག་གཞུང་ཕྱོགས་ནས་བོད་ཐོག་འཛིན་པའི་སྲིད་བྱུས་ཡག་པོ་མེད་ལུགས་སོགས་བཀོད་ཡོད་སྐོར་བཀའ་སྩལ་ཡོད།
སྲིད་འཛིན་སར་ཀོ་ཛི་མཆོག་ནས་གསུང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་ཞུ་རྒྱུའི་འཆར་གཞི་འདི་ནི་དེ་སྔ་ནས་ཡོད། དེ་བཞིན་རྒྱ་ནག་གཞུང་ཕྱོགས་ལའང་ལོ་འདི་མ་རྫོགས་གོང་བོད་མིའི་༸སྐྱབས་མགོན་ཏཱ་ལའི་བླ་མ་མཆོག་དང་ཏན་ཏན་མཇལ་འཕྲད་ཞུ་གི་ཡིན་ཞེས་བརྗོད་ཡོད། ཅེས་གསུངས་ཡོད་པ་རེད། ཐེངས་འདིའི་མཇལ་འཕྲད་སྐབས་སྲིད་འཛིན་སར་ཀོ་ཛི་མཆོག་གིས། མཛམ་གླིང་རྒྱལ་ཁབ་དེ་དག་གིས་རྒྱ་ནག་དེ་བཞིན་འཛམ་གླིང་གི་འགྲོ་སྟངས་ནང་མིག་ཕྱེ་པ་ལྟར་བཟོ་དགོས་ཀྱི་འདུག་ཅེས་གསུངས་ཡོད་པ་མ་ཟད། རྒྱ་ནག་ལའང་ཡུ་རོབ་མཐུན་ཚོགས་དགོས་ཀྱི་ཡོད་པ་རེད། ཕ་རན་སི་གཞུང་ནས་རྒྱ་ནག་ལ་རྟེན་པ་གཅིག་པུ་མ་ཡིན་པར་རྒྱ་ནག་ཀྱང་ཕ་རན་སི་དང་ཡུ་རོབ་ལ་རྟེན་དགོས་ཀྱི་ཡོད་པ་རེད། ཅེས་གཏམ་བཤད་ཤུགས་ཆེ་ཞིག་གནང་ཡོད།
ཕ་རན་སིའི་སྲིད་འཛིན་སར་ཀོ་ཛི་མཆོག་ནི་ཡུ་རོབ་མཐུན་ཚོགས་ཀྱི་ཚོགས་གཙོའི་མཛད་འགན་བཞེས་བཞིན་ཡོད་པ་དང་། ལོ་རྒྱུས་ནང་ཡུ་རོབ་མཐུན་ཚོགས་ཀྱི་ཚོགས་གཙོ་དང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་འཕྲད་གནང་བ་ཐོག་མ་དེ་ཆགས་ཡོད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་པོ་ལན་ཌེའི་གྲོང་ཁྱེར་ཁ་ར་ནོའོ་ལ་བརྙན་འཕྲིན་དང་གསར་ཤོག་ཁག་གི་གསར་འགོད་པར་བཀའ་ཕེབས་དོན། ངོས་དང་ཕ་རན་སིའི་སྲིད་འཛིན་སྐུ་ཞབས་ནི་ཀོ་ལསེ་སར་ཀོ་ཛི་མཆོག་མཇལ་འཕྲད་ཡག་པོ་ཞེ་དྲག་བྱུང་། ཁོང་གིས་བོད་དོན་ཐོག་ལ་སེམས་ཁུར་ཆེན་པོ་གནང་གི་འདུག ངོས་ནས་ཁོང་གིས་བོད་དོན་ཐོག་ཐུགས་ཁུར་ཆེ་བཞེས་གནང་བར་ཐུགས་རྗེ་ཆེ་ཞེས་ཞུས་པ་ཡིན། དེ་མིན་༸གོང་ས་༸སྐྱབས་མགོན་ཆེན་པོ་མཆོག་ནས་གསར་འགོད་པའི་དྲི་བར་བཀའ་ལན་གནང་དོན། རྒྱ་ནག་ལ་ཡུ་རོབ་དགོས་ཀྱི་ཡོད་པ་རེད་མ་གཏོགས་ཡུ་རོབ་རྒྱ་ནག་ལ་རྟེན་དགོས་ཀྱི་ཡོད་པ་མ་རེེད། ཅེས་བཀའ་ལན་ཕེབས་ཡོད་པ་རེད།
གསར་འགོད་ལྷན་ཚོགས་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་བོད་ཀྱི་བདེན་མཐའ་དབུ་མའི་ལམ་གྱི་ཐོག་ནས་མུ་མཐུད་སེལ་རྒྱུ་ཡིན། དེ་ཡང་ཉེ་ལམ་ཚོགས་པའི་བོད་མིའི་དམིགས་བསལ་ཚོགས་ཆེན་དང་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་དམིགས་བསལ་ཚོགས་ཆེན་སྐབས་རེ་ཟུང་ཞིག་ནས་ངོ་རྒོལ་བྱེད་མིན་ལ་མ་ལྟོས་པར་མང་མོས་ཐོག་ནས་ལམ་དེའི་སྟེང་མུ་མཐུད་བསྐྱོད་རྒྱུའི་ཐག་གཅོད་བྱུང་བ་རེད། ཅེས་བཀའ་སྩལ་ཡོད།
༸གོང་ས་༸སྐྱབས་མགོན་ཆེན་པོ་མཆོག་ལ་པོ་ལན་ཌེའི་གྲོང་ཁྱེར་རོ་ཀོའོ་སྤྱི་ཁྱབ་ནས་ཡུལ་དེའི་མི་སེར་གྱི་ཕྱག་འཁྱེར་ཕུལ་བ།
ཕྱི་ལོ་ ༢༠༠༨ ཟླ་ ༡༢ ཚེས་ ༡༠ རེས་གཟའ་ཕུར་བུ་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་པོ་ལན་ཌེའི་གྲོང་ཁྱེར་རོ་ཀོལོ་(Wroclaw)ཡི་སྤྱི་ཁྱབ་ནས་ཆེ་བསྟོད་ཀྱིས་ཡུལ་དེའི་མི་སེར་གྱི་ཕྱག་འཁྱེར་འབུལ་བཞེས་གནང་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་ལ་ཕྱག་འཁྱེར་མ་ཕུལ་སྔོན་དུ་ཆེ་བསྟོད་སྒྲོག་སབྱངས་ཤིག་གནང་བའི་ནང་འཁོད་དོན། སྤྱིར་པོ་ལན་ཌེའི་རྒྱལ་ཁབ་དེ་བཞིན་འདས་པའི་དུས་ཡུན་ནང་དཀའ་ངལ་ཆེན་པོ་ཞིག་འཕྲད་ཡོད་ནའང་ད་ཆ་པོ་ལན་ཌེའི་མི་རྣམས་རང་དབང་གི་ལུང་པའི་ནང་འཚོ་སྡོད་བྱེད་བཞིན་ཡོད། རོ་ཀོའོ་ནི་རིག་གཞུང་དང་ཆོས་ལུགས་སྣ་མང་ལྡན་པའི་གྲོང་ཁྱེར་ཞིག་ཡིན། པོབ་ཇོན་པོའུུ་གཉིས་པ་(Pope John Paul 11)མཆོག་གིས་རོ་ཀོའོ་ནི་ཐུག་འཕྲད་དང་ཆིག་སྒྲིལ་བྱ་ཡུལ་གྱི་ས་གནས་ཤིག་ཡིན་ཞེས་གསུངས་ཡོད། བོད་མིའི་༸སྐྱབས་མགོན་ཏཱ་ལའི་བླ་མ་མཆོག་གི་ལྟ་གྲུབ་དེ་བཞིན་དམིགས་བསལ་གྱིས་རོ་ཀོའོ་མི་མང་ལ་མཛའ་བརྩེ་ལྡན་ཡོད། ཅེས་འཁོད་ཡོད་པ་རེད།
༸གོང་ས་༸སྐྱབས་མགོན་ཆེན་པོ་མཆོག་ལ་པོ་ལན་ཌེའི་གྲོང་ཁྱེར་རོ་ཀོའོ་སྤྱི་ཁྱབ་ནས་ཡུལ་དེའི་མི་སེར་གྱི་ཕྱག་འཁྱེར་འབུལ་བཞེས་གནང་བཞིན་པ།
དེ་ཡང་ཉིན་དེའི་ཕྱི་དྲོ་པོ་ལན་ཌེའི་གྲོང་ཁྱེར་ར་སོའོ་(Warsaw)ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་པོ་ལན་ཌེའི་སྲིད་འཛིན་ལིག་ཀཀ་ཛན་སི་ཀིའི་(Lech Kaczynski) རྣམ་གཉིས་སྲིད་འཛིན་གྱི་ཕོ་བྲང་དུ་མཇལ་འཕྲད་གནང་ཡོད། སྐབས་དེར་སྲིད་འཛིན་མཆོག་ནས་༸གོང་ས་༸སྐྱབས་མགོན་ཆེན་པོ་མཆོག་གིས་བོད་ལ་མིང་དོན་མཚུངས་པའི་རང་སྐྱོང་ཞིག་ཡོང་ཐབས་སླད་ཆོད་སེམས་བརྟན་པོའི་ཐོག་ནས་ལས་དོན་གོང་འཕེལ་ཡོང་རྒྱུར་འབད་བརྩོན་གནང་བར་ཁོང་གིས་རྒྱབ་སྐྱོར་ཞུ་གི་ཡོད། ཅེས་ཞུས་ཡོད། ༸གོང་ས་༸སྐྱབས་མགོན་ཆེན་པོ་མཆོག་ནས་བཀའ་ཕེབས་དོན། ཉིན་ཤས་ནང་མགོན་པོ་གང་ཉིད་པོ་ལན་ཌེའི་གྲོང་ཁྱེར་ཁག་ནང་ཆིབས་སྒྱུར་གནང་རིང་པོ་ལན་ཌེའི་མང་ཚོགས་དང་ཐུག་འཕྲད་བྱ་རྒྱུ་བྱུང་བར་དགའ་ཚོར་ཆེན་པོ་བྱུང་། ཞེས་བཀའ་ཕེབས་ཡོད། ཁོང་ཚོས་བོད་མི་ཚོར་གདུང་སེམས་མཉམ་སྐྱེ་ཐོག་ནས་རྒྱབ་སྐྱོར་གྱི་ཚོར་བ་ཤུགས་ཆེ་ཡོད་པར་མགོན་པོ་གང་ཉིད་སེམས་འགུལ་ཆེན་པོ་ཐེབས་བྱུང་། ཞེས་དང་། ཡང་༸གོང་ས་༸སྐྱབས་མགོན་ཆེན་པོ་མཆོག་ནས། ངོས་ཀྱིས་དུས་རྟག་ཏུ་པོ་ལན་ཌེའི་མི་མང་གི་ཆིག་སྒྲིལ་གྱི་ནུས་པར་རྗེས་སུ་ཡི་རངས་དང་ཁོང་ཚོས་རང་གི་རང་དབང་ཐོབ་པར་བྱེད་ནུས་པར་བསྔགས་བརྗོད་ཞུ་གི་ཡོད་ཅེས་སོགས་བཀའ་སྩལ་ཡོད་པ་རེད། ཐེངས་འདིེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་བོད་མིའི་རང་སྐྱོང་གི་བསམ་ཤོག་ཅིག་སྲིད་འཛིན་མཆོག་ལ་གནང་ཡོད་པ་རེད།
ཕྱི་ཚེས་ ༡༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་པོ་ལན་ཌེའི་གྲོས་ཚོགས་གོང་མའི་ཚོགས་གཙོ་དང་། གྲོས་ཚོགས་འོག་མའི་ཚོགས་གཙོ། པོ་ལན་ཌེའི་ཕྱི་སྲིད་ལྷན་ཁང་གི་འཐུས་མི། པོ་ལན་ཌེ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་འཐུས་མི་སོགས་དང་མཇལ་འཕྲད་གནང་ཏེ་བཀའ་སློབ་ཕེབས་དོན། མགོན་པོ་གང་ཉིད་དང་བཙན་བྱོལ་བོད་གཞུང་ཕྱོགས་ནས་བོད་ལ་མིང་དོན་མཚུངས་པའི་རང་སྲིད་རང་སྐྱོང་ཡོང་ཐབས་ཀྱིས་དབུ་མའི་ཐབས་ལམ་གྱི་ཐོག་ནས་བོད་དོན་ཐག་གཅོད་ཡོང་ཐབས་སུ་རྒྱ་ནག་གཞུང་དང་འབྲེལ་མོལ་སྔ་རྗེས་རིམ་པ་ཞིག་བྱས་ཏེ་འབད་བརྩོན་གང་ཐུབ་གནང་ཡོད་ཀྱང་རྒྱ་ནག་གཞུང་ཕྱོགས་ནས་དེ་དག་ལ་བཟང་ཕྱོགས་ཀྱི་དང་ལེན་གང་ཡང་མ་བྱས་པའི་རྐྱེན་གྱིས་ད་ཆ་བོད་མི་རྣམས་འུ་ཐུག་གི་གནས་སྟངས་འོག་ཏུ་གནས་ཡོད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་པོ་ལན་ཌེའི་གྲོས་ཚོགས་སུ་ཆིབས་སྒྱུར་སྐྱོང་བཞིན་པ།
རང་དབང་ཅན་གྱི་རྒྱལ་ཁབ་ཚོས་རྒྱ་ནག་དེ་བཞིན་རྒྱལ་སྤྱིའི་ནང་རྒྱལ་ཁབ་ཕལ་ཆེ་བས་ལོངས་སུ་སྤྱོད་བཞིན་པའི་མང་གཙོའི་ལམ་ལུགས་ནང་ཁྲིད་རྒྱུ་དེ་ནི་མིའི་བཟང་སྤྱོད་ཀྱི་སྤྱོད་ཚུལ་ནང་ཡོད་པའི་འོས་འགན་ཞིག་རེད། ད་ལྟའི་རྒྱ་ནག་གི་སྲིད་འཛིན་ཧུའུ་ཅིང་ཐའོས་གུ་ཡངས་ཀྱི་སྲིད་བྱུས་འཛིན་པའི་ཐུགས་རེ་གནང་བ་ཡིན། ཞེས་དང་རྒྱལ་སྤྱིའི་སྤྱི་ཚོགས་ནས་རྒྱ་ནག་དེ་བཞིན་ཁེར་རྐྱང་དུ་མི་འཇོག་པར་ངེས་པར་དུ་རྒྱལ་སྤྱིའི་སྤྱི་ཚོགས་ཀྱི་ལམ་ཆེན་ཐོག་ཁྲིད་དགོས་པ་རེད། ཅེས་བཀའ་ཕེབས་ཡོད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་པོ་ལན་ཌེའི་གྲོས་ཚོགས་དང་ཡུ་རོབ་སྤྱི་མཐུན་རྒྱལ་ཁབ་ལ་འབོད་སྐུལ་གནང་དོན། རྒྱ་ནག་གི་ཁྱབ་ཁོངས་འོག་ཏུ་བོད་མི་མང་གི་འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུར་གདོང་ལེན་གནང་དགོས་པ་དང་། བོད་རྒྱ་འབྲེལ་མོལ་དེ་རེ་བ་བརྟན་པོ་མེད་པ་ཞིག་ཡིན་དུས་ཁྱེད་རྣམ་པའི་ཤུགས་རྐྱེན་དང་འབད་བརྩོན་ནི་ཧ་ཅང་གི་གལ་ཆེན་པོ་ཡིན། བོད་རྒྱ་དབར་གྱི་མ་འོངས་གནད་དོན་ཐོག་གི་འབྲེལ་མོལ་དེ་ནི་ད་ཆ་མཚམས་ཆད་ཡོད་པ་རེད། ཅེས་དང་། མགོན་པོ་གང་ཉིད་ཀྱིས་པོ་ལན་ཌེའི་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གི་ཚོགས་མི་རྣམས་ལ་རྒྱ་ནག་ནས་བོད་ཀྱི་ཐོག་ལངས་ཕྱོགས་མཁྲེགས་བཟུང་གིས་བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་ཀྱི་གྲོས་གཞི་ཁག་བཏོན་པར་རྒྱ་ནག་གིས་ཁས་ལེན་རྩ་བ་ནས་བྱས་མེད། ཅེས་བཀའ་སྩལ་ཡོད། པོ་ལན་ཌེའི་གྲོས་ཚོགས་ཀྱི་ཚོགས་གཙོ་མཆོག་ནས་༸གོང་ས་༸སྐྱབས་མགོན་ཆེན་པོ་མཆོག་ལ་ཞུས་དོན། རེ་བ་མེད་པའི་གནད་དོན་ཡང་གྲོས་མོལ་གྱི་ལམ་ནས་རེ་བ་ཡོད་པ་བྱེད་ཐུབ་ཀྱི་རེད། པོ་ལན་ཌེའི་རྒྱལ་ཁབ་ཀྱིས་དུས་རབས་ཉི་ཤུ་པའི་ནང་ཨུ་རུ་སུའི་དབང་ཤུགས་ལ་གདོང་ལེན་བྱས་པའི་ལོ་རྒྱུས་དེ་དཔང་རྟགས་ཤིག་ཡིན། ཞེས་ཞུས་ཡོད་པ་རེད།སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཡུ་རོབ་ཀྱི་ཡུལ་གྲུ་ཁག་ནང་ཆོས་སྲིད་ཀྱི་རླབས་ཆེན་མཛད་འཆར་ཁག་ལེགས་པར་གྲུབ་ཟིན་མཚམས་ཕྱི་ལོ་ ༢༠༠༨ ཟླ་ ༡༢ ཚེས་ ༡༢ ཉིན་ཡུ་རོབ་ཀྱི་ཡུལ་གྲུ་པོ་ལན་ཌེ་ནས་རྒྱ་གར་རྒྱལ་ས་ལྡི་ལི་དང་དེ་ནས་ཕྱི་ཚེས་ ༡༣ ཉིན་ཕྱེད་ཡོལ་ཆུ་ཚོད་ ༤།༠ བཞུགས་སྒར་ཕོ་བྲང་དུ་ཕེབས་བསུ་གཟབ་རྒྱས་དང་སྦྲགས་༸ཞབས་སོར་བདེ་བར་འཁོད་ཡོད་པ་རེད།།
