ཕྱི་ལོ་ ༢༠༠༨ ཟླ་ ༡༢ ཚེས་ ༢༥ རེས་གཟའ་ཕུར་བུ།
༄༅། །བཞུགས་སྒར་དུ་ཕྱི་ཟླ་ ༡༢ ཚེས་ ༡༨ ཉིན་ཀལ་མིག་སྤྱི་མཐུན་རྒྱལ་ཁབ་ཀྱི་སྲིད་བློན་སྟེང་ཞལ་དང་། གྲོས་ཚོགས་ཀྱི་ཚོགས་གཞོན། ཨུ་རུ་སུ་གྲོས་ཚོགས་ཀྱི་འཐུས་མི་བཅས་བཞུགས་སྒར་དུ་ཕེབས་འབྱོར་གནང་སྟེ་ཕྱི་ཚེས་ ༡༩ ཉིན་བོད་མི་མང་སྤྱི་འཐུས་གྲོས་ཚོགས་སུ་ཆེད་ཕེབས་ཀྱིས་སྤྱི་འཐུས་གྲོས་ཚོགས་ཀྱི་ཚོགས་གཙོ་སྦྲེལ་པོ་རྣམ་གཉིས་དང་། རྒྱུན་ལས་བཅས་ལ་མཇལ་མོལ་གནང་ཡོད་པ་རེད།
བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ནས་གསུང་བཤད་གནང་བཞིན་པ།
མཇལ་མོལ་གྲུབ་རྗེས་བོད་ཀྱི་དཔེ་མཛོད་ཁང་དུ་གཟིགས་སྐོར་དང་བཙན་བྱོལ་བོད་གཞུང་ཕྱི་དྲིལ་ལས་ཁུངས་ཀྱི་དྲུང་ཆེ་རྣམ་གཉིས་དང་མཇལ་འཕྲད་གནང་སྟེ་དྲུང་ཆེ་རྣམ་གཉིས་ནས་བོད་རྒྱ་འབྲེལ་མོལ་གྱི་གནས་སྟངས་སྐོར་འགྲེལ་བརྗོད་གནང་བ་དང་སྦྲགས་བཙན་བྱོལ་བོད་གཞུང་ལས་ཁུངས་ཁག་གི་ལས་དོན་བྱེད་ཕྱོགས་བཅས་ཀྱི་སྐོར་ངོ་སྤྲོད་ཀྱང་གནང་ཡོད། དེ་རྗེས་ནོར་གླིང་འགྲེམས་སྟོན་ཚན་པ་དང་། དབུས་སྨན་རྩིས་ཁང་བཅས་སུ་གཟིགས་སྐོར་གནང་ཡོད་པ་རེད། ཕྱི་དྲོ་ཆུ་ཚོད་ ༦།༣༠ ཐོག་གངས་སྐྱིད་ལས་བྱེད་གསོལ་ཚིགས་ཁང་གི་ཡང་སྟེང་ཚོགས་ཁང་དུ་བོད་མི་མང་སྤྱི་འཐུས་གྲོས་ཚོགས་ངོས་ནས་དགོང་དྲོའི་གསོལ་སྟོན་བཤམས་སྐབས་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་། ཀལ་མིག་སྤྱི་མཐུན་རྒྱལ་ཁབ་ཀྱི་སྲིད་བློན་མཆོག གྲོས་ཚོགས་ཀྱི་ཚོགས་མི་སྐུ་ཞབས་ Galchenko Valery བཅས་ནས་གསུང་བཤད་གནང་། དེ་རྗེས་འདི་ལོ་བོད་ཆོལ་གསུམ་ས་གནས་ཁྱོན་ཡོངས་ནས་ཞི་བའི་སྒེར་ལངས་སྐབས་རྒྱ་ནག་གཞུང་ནས་ཡ་ང་སྙིང་རྗེ་སྤུ་ཙམ་མེད་པར་དྲག་གནོན་ཤུགས་ཆེ་བྱས་ཏེ་བོད་མི་མང་པོའི་ཚེ་སྲོག་འཕྲོག་པ་དང་། དེ་ལས་མང་བར་རྨས་སྐྱོན་བཏང་བ། དེ་ལས་ཀྱང་ཆེས་མང་བ་བཙོན་དོང་ནང་ཉིན་མཚན་འཁྱོལ་དཀའ་བའི་དཀའ་སྡུག་འོག་གནས་བཞིན་པ་རྣམས་ལ་གདུང་སེམས་མཉམ་སྐྱེ་མཚོན་ཆེད་བོད་གཞུང་མང་ཛ་དྲག་ལས་འགུལ་ཚོགས་ཚུང་ནས་གཞས་ཚིག་འགྲན་བསྡུར་གྱིས་རྩེ་ཕུད་རྣམས་ཕྱོགས་བསྒྲིགས་ཞུས་པའི་༼དགའ་སྐྱོའི་གདུང་དབྱངས་༽ཞེས་པའི་འོད་སྡེར་ཞིག་བོད་མི་མང་སྤྱི་འཐུས་རྒྱུན་ལས་དགེ་བཤེས་སྨོན་ལམ་མཐར་ཕྱིན་ལགས་ནས་འགྲེལ་བརྗོད་གནང་སྟེ་ཀལ་མིག་སྤྱི་མཐུན་རྒྱལ་ཁབ་ཀྱི་སྲིད་བློན་མཆོག་ནས་དབུ་འབྱེད་གནང་ཡོད།
ཀལ་མིག་སྤྱི་མཐུན་རྒྱལ་ཁབ་ཀྱི་སྲིད་བློན་མཆོག་ནས་གཞས་སྣ་ཁག་ཕྱོགས་བསྒྲིགས་ཞུས་པའི་འོད་སྡེར་དབུ་འབྱེད་གནང་བཞིན་པ།
དེ་ཉིན་དགོང་དྲོའི་གསོལ་ཚིགས་སུ་ཀལ་མིག་སྤྱི་མཐུན་རྒྱལ་ཁབ་ཀྱི་སྲིད་བློན་སྟེང་ཞལ་དང་། ཀལ་མིག་སྤྱི་མཐུན་རྒྱལ་ཁབ་གྲོས་ཚོགས་ཀྱི་ཚོགས་གཞོན་དང་། ཨུ་རུ་སུ་གྲོས་ཚོགས་ཀྱི་འཐུས་མི་རྣམ་པ། ཏ་ལོ་རིན་པོ་ཆེ། བཙན་བྱོལ་བོད་གཞུང་གྲོས་ཚོགས་ཀྱི་ཚོགས་གཙོ་སྦྲེལ་པོ་རྣམ་གཉིས། བཞུགས་སྒར་དུ་ཡོད་པའི་རྒྱ་གར་ཕྱི་སྲིད་སྣེ་ཤན་ལས་ཁུངས་ཀྱི་འགན་འཛིན་བགྲེས་གཞོན་རྣམ་གཉིས། དཔལ་ལྡན་ཆོས་རིག་ལས་ཁུངས་དང་ཤེས་རིག་ལས་ཁུངས་ཀྱི་བཀའ་བློན་རྣམ་གཉིས། བོད་མི་མང་སྤྱི་འཐུས་རྒྱུན་ལས་རྣམ་པ། བཞུགས་སྒར་དུ་ཡོད་པའི་ཕྱོགས་བཞུགས་སྤྱི་འཐུས་རྣམ་པ། ཀལ་མིག་སྤྱི་མཐུན་རྒྱལ་ཁབ་ཀྱི་བརྒྱུད་ལམ་ཁག་དང་། ཨུ་རུ་སུ། ཡུ་ཀེ་རན།[Ukraine]དེ་བཞིན་རང་རེའི་གསར་འགྱུར་བརྒྱུད་ལམ་ཁག་གི་མི་སྣ་མཉམ་ཞུགས་གནང་ཡོད་པ་རེད།
ཕྱི་ཚེས་ ༢༠ ཉིན་ཀལ་མིག་གྲོས་ཚོགས་ཀྱི་ཚོགས་གཞོན། ཨུ་རུ་སུ་གྲོས་ཚོགས་ཀྱི་ཚོགས་མི་རྣམ་པ། དེ་བཞིན་གསར་འགོད་པ་རྣམ་པ་བཅས་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་གནས་གཟིགས་གནང་བ་དང་སྦྲགས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་འཕྲད་སྐབས་གསར་འགོད་པས་འགྲོ་བ་མིའི་རིན་ཐང་གོང་མཐོར་གཏོང་ཐབས་སྐོར་ལ་བཀའ་དྲི་ཞུས་པ་ཁག་ལ་མགོན་པོ་གང་ཉིད་ནས་ཐུགས་དགྱེས་མཉེས་ཆེན་པོའི་ཐོག་ནས་བླང་དོར་གྱི་ལམ་སྟོན་བཀའ་དྲིན་ཆེ་སྩལ་གནང་གྲུབ་རྗེས་ཨུ་རུ་སུ་གྲོས་ཚོགས་ཀྱི་འཐུས་མི་དང་། གསར་འགྱུར་བརྒྱུད་ལམ་ཁག་གི་མི་སྣ་གྷ་གལ་བརྒྱུད་ཕྱིར་ལོག་གནང་ཡོད་འདུག ཡིན་ནའང་ཀལ་མིག་སྤྱི་མཐུན་རྒྱལ་ཁབ་ཀྱི་སྲིད་བློན་སྟེང་ཞལ་དང་། ཀལ་མིག་གྲོས་ཚོགས་ཀྱི་ཚོགས་གཞོན། ཏ་ལོ་རིན་པོ་ཆེ་བཅས་ཚེས་ ༢༡ ཉིན་དགའ་ལྡན་ལྔ་མཆོད་ཆེན་མོའི་ཚོགས་མགོན་དུ་༸གོང་ས་མཆོག་ཆིབས་སྒྱུར་བསྐྱངས་སྐབས་སྨོན་ལམ་གསུང་འདོན་དུ་མཉམ་ཞུགས་གནང་བ་དང་། ཕྱི་ཚེས་ ༢༢ སྔ་དྲོ་ཀལ་མིག་སྤྱི་མཐུན་རྒྱལ་ཁབ་ཀྱི་སྲིད་བློན་སྟེང་ཞལ་ཕོ་བྲང་དུ་ཆེད་བཅར་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་བཅར་ཞུས་ཏེ་ཉིན་དེའི་ཕྱེད་ཡོལ་ཙམ་ལ་བཞུགས་སྒར་ནས་ཕྱིར་ལོག་གནང་ཡོད་པ་བཅས་ཀྱི་གནས་ཚུལ་དུ།།
