པེ་ཅིང་དུ་ཕྱི་ལོ་ ༢༠༠༨ ཟླ་ ༡༡ ཚེས་ ༡༠ ཉིན་རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་དོན་ལས་ཁང་གིས་གོ་སྒྲིག་ཞུས་པའི་གསར་འགོད་ལྷན་ཚོགས་ཐོག་རྒྱ་ནག་དམར་ཤོག་ཚོགས་པའི་དབུས་འཐབ་ཕྱོགས་གཅིག་གྱུར་ལས་ཁང་གི་རྒྱུན་ལས་བློན་ཆེན་གཞོན་པ་ཀྲུའུ་ཝེ་ཆོན་གྱིས་སྤེལ་བའི་གསལ་བསྒྲགས་རྣམས་བཀླགས་པ་ཡིན།
ཉི་ཧོང་གི་གསར་འགོད་པས་ལོ་རབས་ ༧༠ དུས་མཇུག་ཏུ་ཏེང་ཞའོ་ཕིང་གིས་ ” བོད་རང་བཙན་མ་གཏོགས་གནད་དོན་གཞན་ཚང་མ་གྲོས་བསྡུར་གྱི་ལམ་ནས་ཐག་གཅོད་བྱེད་ཆོག་ ” ཅེས་གསུངས་ཡོད་ཚུལ་བོད་པའི་ཕྱོགས་ནས་ཡང་ཡང་ཤོད་བཞིན་པ་ལྟར་བཤད་ཡོད་རེད་དམ་ཞེས་དྲིས་པར། ཀྲུའུ་ཝེ་ཆོན་གྱིས་དེ་བདེན་པ་མ་རེད་ཅེས་བཤད་འདུག
” བློ་མཐུན་ཏེང་ཞའོ་ཕིང་གིས་བཀའ་མོལ་དེ་འདྲ་གསུང་མྱོང་མེད། རྒྱ་རིས་རྫུན་བཤད་པ་དེ་བློ་མཐུན་ཏེང་ཞའོ་ཕིང་གི་བཀའ་མོལ་ལ་འཁྱོག་བཤད་ཧ་ཅང་ཆེན་པོ་བྱས་པ་ཞིག་ཡིན། ” ཞེས་བཤད་འདུག
རྒྱ་ནག་གི་འགོ་ཁྲིད་ཚོའི་གསལ་བསྒྲགས་དེ་དག་ཐོས་སྐབས་ང་ཧང་སངས་བྱུང་། གང་ཡིན་ཟེར་ན་དབུ་ཁྲིད་འདས་པོ་ཏེང་ཞའོ་ཕིང་གིས་ ” བོད་རང་བཙན་མ་གཏོགས་གནད་དོན་གཞན་ཚང་མ་གྲོས་བསྡུར་གྱི་ལམ་ནས་ཐག་གཅོད་བྱེད་ཆོག ” ཅེས་ང་ལ་དངོས་སུ་བཤད་ཡོད།
ཏེང་ཞའོ་ཕིང་ད་རིང་སྐུ་འཚོ་བཞུགས་མེད་ཀྱང་། ལོ་རྒྱུས་ཀྱི་དེབ་ཐེར་དུ་འཁོད་ཆེད་རྒྱལ་སྤྱིའི་གསར་འགོད་པའི་མདུན་གསལ་བཤད་ཞུ་རྒྱུར། ཕྱི་ལོ་ ༡༩༧༩ ལོར་ང་རྒྱ་ནག་ཏུ་ཐོག་མ་འགྲོ་སྐབས་ཟླ་ ༣ ཚེས་ ༡༢ ཉིན་དབུ་ཁྲིད་ཏེང་ཞའོ་ཕིང་དང་མཇལ་འཕྲད་ཞུས་པ་ཡིན། དེ་སྐབས་ཁོང་གིས་ ” བོད་རང་བཙན་མ་གཏོགས་གནད་དོན་གཞན་ཚང་མ་གྲོས་བསྡུར་གྱི་ལམ་ནས་ཐག་གཅོད་བྱེད་ཆོག ” ཅེས་གསུངས་བྱུང་།
རྒྱ་ལོ་དོན་གྲུབ།
རྡ་རམ་ས་ལ།
ཕྱི་ལོ་ ༢༠༠༨ ཟླ་ ༡༡ ཚེས་ ༡༩ ལ།།
