ཕྱི་ལོ་ ༢༠༠༨ ཟླ་ ༡༠ ཚེས་ ༦ རེས་གཟའ་ཟླ་བ།
༄༅། །བོད་གཞུང་ཐེ་ཝན་སྐུ་ཚབ་དོན་གཅོད་ཁང་ནས་གོ་སྒྲིག་ཞུས་ཏེ་དད་འདུན་གཡོ་བ་མེད་པའི་ཐེ་ཝན་ནང་པའི་ཆོས་ཚོགས་ཁག་བཅུ་བཞིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གསོལ་བ་ཕུར་ཚུགས་སུ་བཏབ་སྟེ་བཀའ་བཞེས་ཟབ་མོ་སྨིན་སྩོལ་བྱུང་བ་ལྟར། བོད་རྒྱལ་ལོ་ ༢༡༣༥ ཕྱི་ལོ་ ༢༠༠༨ ཕྱི་ཟླ་ ༩ ཚེས་ ༣༠ ནས་ཕྱི་ཟླ་ ༡༠ ཚེས་ ༤ བར་ཉིན་གྲངས་ ༥ རིང་བྱང་ཆུབ་སེམས་འགྲེལ་དང་། སྒོམ་རིམ་བར་པ་བཅས་ཀྱི་ཆོས་འཁོར་བཀའ་དྲིན་བསྐྱངས་གནང་མཛད་ཡོད་པ་རེད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་བྱང་ཆུབ་སེམས་འགྲེལ་དང་སྒོམ་རིམ་བར་པའི་གསུང་ཆོས་བཀའ་དྲིན་སྩོལ་བཞིན་པ།
དེ་ཡང་ཉིན་དང་པོའི་སྔ་དྲོ་ཆུ་ཚོད་ ༩།༣༠ ཐོག་ཕོ་བྲང་ནས་ཐེག་ཆེན་ཆོས་གླིང་གཙུག་ལག་ཁང་དུ་སྤྱན་རྒྱ་སྤོས་སྣེས་སྔུན་བསུས་ཐོག་གདན་ཞུས་ཀྱིས་བཞུགས་ཁྲི་རིན་པོ་ཆེར་༸ཞབས་སོར་འཁོད་རྗེས་༸གོང་ས་༸སྐྱབས་མགོན་ཆེན་པོ་མཆོག་ནས་ཐེ་ཝན་མི་མང་ལ་བཀའ་སློབ་ཕེབས་དོན། ཐེ་ཝན་ནང་པའི་ཆོས་ཚོགས་དང་ང་ཚོ་དམིགས་བསལ་གྱིས་འབྲེལ་བ་ཆགས་ཡོད་པ་རེད། ཁྱེད་ཚོ་སོ་སོའི་ལས་ཀའི་བྲེལ་བ་བཅས་ཡོད་ཀྱང་ཁྱེད་ཚོས་དུས་ཚོད་ཅིག་བཏང་ནས་ཡོང་ཡོད་པས་ང་ཧ་ཅང་གི་དགའ་པོ་བྱུང་། ཐེ་ཝན་ནང་ང་ཐེངས་གཉིས་ཙམ་སླེབས་ཡོད་པ་རེད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་སྤྱན་རས་གཟིགས་ཀྱི་བཀའ་དབང་བཀའ་དྲིན་སྐྱོང་སྐབས་ཆོས་རྭའི་ཟུར་ཆ་གཅིག
མགོ་སྟོད་བྱས་ན་ལོ་རེ་མོས་བྱས་ཏེ་ཐེ་ཝན་མི་མང་སྤྱི་དང་། ལྷག་པར་ནང་པའི་ཆོས་གྲོགས་ཚོར་ཕན་ཐོགས་བྱ་ཐུབ་ན་བསམ་སྟེ་ལོ་རེ་མོས་འགྲོ་རྒྱུའི་རྩིས་རྒྱབ་པ་རེད། ཡིན་ནའང་ ༢༠༠༢ ནས་རྒྱ་ནག་གཞུང་དང་ཐད་ཀའི་འབྲེལ་བ་བསྐྱར་གསོ་བྱེད་ཐུབ་པའི་རྗེས་ལ་དཀའ་ངལ་འཕྲད་པ་རེད། ད་ལྟ་བར་དུ་ཁྱེད་ཚོ་དཀའ་ལས་ཁག་པོའི་ཐོག་ནས་ཡོང་དགོས་པ་ཞིག་མ་གཏོགས་ང་ཐེ་ཝན་དུ་འགྲོ་རྒྱུར་དཀའ་ངལ་ཞིག་འཕྲད་པ་རེད། ཡིན་ནའང་ངས་ཐེ་ཝན་དུ་འགྲོ་ཐུབ་རྒྱུའི་སྨོན་ལམ་བརྒྱབ་ཀྱི་ཡོད། ཁྱེད་ཚོས་ཀྱང་སྨོན་ལམ་བརྒྱབ་རོགས་གནང་། ང་ནང་པའི་དགེ་སློང་ཞིག་ནས་ནང་ཆོས་ལ་དོ་སྣང་ཡོད་མཁན་ཚོར་ཞབས་འདེགས་སྒྲུབ་རྒྱུ་དེ་ངའི་ལས་འགན་ཡིན་པར་བརྟེན། མ་ཤི་བར་དུ་ངས་ལས་འགན་དེ་བསྒྲུབ་དགོས་ཀྱི་རེད། ཅེས་སོགས་བཀའ་སློབ་ཟབ་རྒྱས་གནང་གྲུབ་རྗེས་ཐེ་ཝན་ཆོས་ཕྱོགས་ཀྱི་ཐོག་ནས་ཤེས་རབ་སྙིང་པོ་འདོན་སྐུལ་གནང་བ་དང་།
དེ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་སློབ་དཔོན་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་དང་། སློབ་དཔོན་པདྨའི་ངང་ཚུལ་གྱིས་མཛད་པའི་སྒོམ་རིམ་བར་པ་བཅས་ཀྱི་གསུང་ཆོས་བཀའ་དྲིན་བསྐྱངས་པ་དང་། ཉིན་གྲངས་མཐའ་མའི་ཆོས་ཐུན་གྱི་སྔ་དྲོ་ཆུ་ཚོད་ ༧།༣༠ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཐེག་ཆེན་ཆོས་གླིང་གཙུག་ལག་ཁང་དུ་༸ཞབས་སོར་བཀའ་དྲིན་བསྐྱངས་ཏེ་སྤྱན་རས་གཟིགས་ཀྱི་བཀའ་དབང་སྒྲུབ་ཞག་གནང་གྲུབ་རྗེས་ཆུ་ཚོད་ ༩ ཡོལ་ཙམ་ལ་སྤྱན་རས་གཟིགས་ཀྱི་བཀའ་དབང་སྩལ་གནང་མཛད་པ་དང་། དགེ་བསྙེན་གྱི་སྡོམ་པ། ཐུབ་པའི་གཟུངས་སྔགས། འཇམ་པའི་དབྱངས་ཀྱི་གཟུངས་སྔགས། སྒྲོལ་མ། རྟ་མགྲིན་བཅས་ཀྱི་གཟུངས་སྔགས་ལྗགས་ལུང་བཀའ་དྲིན་སྩལ་གནང་མཛད་སྐབས་རྒྱལ་བ་ཀརྨ་པ་རིན་པོ་ཆེ་མཆོག་དང་། སྟག་ལུང་ཞབས་དྲུང་རིན་པོ་ཆེ་མཆོག་ཡང་ཆེད་བཅར་གནང་ཡོད་འདུག
ཐེངས་དང་པོ་ཆོས་ཞུར་བཅར་བའི་དད་ལྡན་ཐེ་ཝན་མང་ཚོགས་ལ་༸གོང་ས་༸སྐྱབས་མགོན་ཆེན་པོ་ མཆོག་ནས་བཀའ་རྩད་གནང་སྐབས་ལག་པ་རྐྱོང་བཞིན་པ།
ཉིན་དེའི་ཕྱེད་ཡོལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་སྒྱུར་བསྐྱངས་ཏེ་ཐེ་ཝན་ནང་པའི་ཆོས་ཚོགས་ཀྱི་དད་ལྡན་ཆོས་ཞུ་བ་རྣམས་ནས་༸གོང་ས་༸སྐྱབས་མགོན་ཆེན་པོ་མཆོག་ལ་ཐད་ཀར་དྲི་བ་དྲིས་ལན་ཕུལ་བ་ཁག་ལ་མགོན་པོ་གང་ཉིས་ནས་ཐུགས་དགྱེས་མཉེས་ཆེན་པོའི་ཐོག་ནས་བཀའ་ལན་གནང་བ་སོགས་ཆོས་ཕྱོགས་ཀྱི་མཛད་འཕྲིན་རླབས་ཆེ་བསྐྱངས་གནང་མཛད་ཡོད་པ་རེད
ཐེངས་འདིའི་གསུང་ཆོས་སུ་ཐེ་ཝན་ཆོས་ཚོགས་ཁག་བཅུ་བཞི་ནས་ནས་མི་གྲངས་ ༦༠༠ ལྷག་ཙམ་དང་། དེ་བཞིན་ཚོགས་པ་མིན་པའི་ཐེ་ཝན་ནས་ཕེབས་པའི་དད་ལྡན་ཆོས་ཞུ་བ་མི་གྲངས་ ༡༣༩ དང་། སིང་གྷ་པུར་ནས་མི་གྲངས་ ༨༠ དེ་བཞིན་རྒྱལ་ཁབ་ཁག་དྲུག་བཅུ་ཙམ་དང་། རང་རིགས་སེར་སྐྱ་མི་མང་བཅས་ཁྱོན་བསྡོམས་མི་གྲངས་ ༥༠༠༠ ཙམ་ཆོས་ཞུར་བཅར་ཡོད་འདུག
