ཕྱི་ལོ་ ༢༠༠༨ ཟླ་ ༡༠ ཚེས་ ༢༢ རེས་གཟའ་ལྷག་པ།
༄༅། །བོད་གཞུང་བདེ་ལེགས་སྨན་ཁང་དང་། ཨེ་ཊ་ལིའི་རོགས་ཚོགས་ཁར་ཌོ་ལབ་(Cardiolab)ཐུན་མོང་ནས་སྙིང་ཁམས་བརྟག་དཔྱད་གནང་རྒྱུའི་ལས་གཞི་རྒྱ་ཆེ་ཞིག་ལག་བསྟར་གནང་མུས་ལྟར་ ༢༠༠༨ ཕྱི་ཟླ་ ༡༠ ཚེས་ ༢༢ དང་ ༢༣ བཅས་ཉིན་གྲངས་གཉིས་རིང་བཞུགས་སྒར་གནས་སྡོད་སྲི་ཞུ་བར་རྣམ་པར་དམིགས་བསལ་དུས་ཚེས་རྒྱས་བཅད་གནང་སྟེ་སྙིང་ཁམས་དང་འབྲེལ་བའི་བརྟག་དཔྱད་གནང་རྒྱུ་ཡིན་འདུག དེ་ཡང་ཉིན་དང་པོར་སྔ་དྲོ་ཆུ་ཚོད་ ༩།༣༠ ཐོག་བཙན་བྱོལ་བོད་གཞུང་གི་བཀའ་བློན་ཁྲི་ཚབ་དཔལ་ལྡན་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་དབུ་འབྱེད་དུ་གདན་ཞུ་གནང་བ་བཞིན་བཀའ་བློན་མཆོག་ནས་དབུ་འབྱེད་གནང་གྲུབ་རྗེས་ཆེས་མཐོའི་ཁྲིམས་ཞིབ་པ་རྣམ་པ་དང་། སྤྱི་འཐུས་རྒྱུན་ལས་རྣམ་པ། བཀའ་བློན་རྣམ་པ། དྲུང་ཆེ་རྣམ་པ་བཅས་གོ་རིམ་གཞིར་བཟུང་བརྟག་དཔྱད་གནང་རྒྱུ་དབུ་འཛུགས་གནང་ཡོད་པ་རེད། འདི་གའི་གསར་འགོད་པས་དབུ་འབྱེད་ཀྱི་སྐུ་མགྲོན་གཙོ་བོ་དཔལ་ལྡན་བཀའ་བློན་ཁྲི་ཚབ་མཆོག་ལ་བཅར་དྲི་ཞུས་པའི་ལན་དུ།
དཔལ་ལྡན་བཀའ་བློན་ཁྲི་ཚབ་མཆོག་ནས་དབུ་འབྱེད་གནང་གྲུབ་རྗེས་སྐུ་གཟུགས་ལ་བརྟག་དཔྱད་གནང་བཞིན་པ།
བདེ་ལེགས་སྨན་ཁང་གིས་གོ་སྒྲིག་ཞུས་ཏེ་ཨེ་ཊ་ལིའི་རོགས་ཚོགས་འདིར་ཕེབས་ཐུབ་པ་འདི་ནི་ཧ་ཅང་གི་གནད་འགག་ཆེན་པོ་ཞིག་རེད་བསམ་གྱི་ཡོད། ལྷག་པར་དུ་ཁོང་ཚོས་གནང་བཞིན་པའི་ཕྱག་ལས་འདི་འགྲོ་བ་སེམས་ཅན་ཐམས་ཅད་ལ་ཕན་པའི་ལས་གཞི་ཧ་ཅང་གི་ཡག་པོ་ཞིག་རེད། མིའི་སྙིང་དང་གཟུགས་པོར་བརྟག་དཔྱད་བྱེད་རྒྱུ་དེ་འགྲོ་བ་ཀུན་ལ་མེད་དུ་མི་རུང་བ་ཞིག་ཆགས་ཀྱི་ཡོད། དེར་བརྟེན་བདེ་ལེགས་སྨན་ཁང་དང་རོགས་ཚོགས་གཉིས་ཀྱི་ཐུགས་སྣང་གནང་སྟེ་སྤྱིར་བོད་རིགས་ཡོངས་དང་། དེའི་ནང་ནས་མཐོ་རིམ་གྱི་མི་སྣའི་སྐུ་གཟུགས་བརྟག་དཔྱད་དང་། ལྷག་པར་དུ་སྙིང་གི་བརྟག་དཔྱད་་གནང་བར་ཕེབས་པ་དེ་ཧ་ཅང་གི་གནད་འགག་དང་བཀའ་དྲིན་ཆེན་པོ་རེད་བསམ་མུས་ཡིན། དེ་ལ་ངས་བཙན་བྱོལ་བོད་གཞུང་གི་ངོས་ནས་ཐུགས་རྗེ་ཆེ་ཞུ་རྒྱུ་དང་། བོད་རིགས་རྣམས་ནས་ཁོང་ཚོས་འབད་བརྩོན་དང་གྲ་སྒྲིག་གནང་བའི་ལས་གཞི་དེའི་ཐོག་ཆ་ཤས་ལེན་རོགས་ཞུ་རྒྱུ་ཡིན། ཞེས་དང་།
བཀའ་བློན་རྣམ་པ་དང་དྲུང་ཆེ་བཅས་བརྟག་དཔྱད་ཀྱི་གྲལ་དུ་ཕེབས་བཞིན་པ།
ཡང་སྐུ་ངོ་མཆོག་ནས་མི་མང་ལ་རེ་སྐུལ་གནང་དོན། མིའི་གཟུགས་པོར་བརྟག་དཔྱད་བྱེད་རྒྱུ་དེ་ཧ་ཅང་གི་གལ་གནད་ཆེན་པོ་ཞིག་རེད་ལ། དེས་མ་ཟད། མིའི་གཟུགས་པོས་ཆོས། སྲིད། དཔལ་འབྱོར་སོགས་གང་གི་ཐོག་ཕྱག་ལས་གནང་བ་ཡིན་ནའང་འཕྲོད་བསྟེན་ནི་མེད་དུ་མི་རུང་བ་ཞིག་ཡིན་སྟབས་ང་ཚོའི་སྒོ་རྩར་ཚུར་ཕེབས་པའི་སྐབས་འདིར་མི་མང་ཚང་མས་གོ་སྐབས་འདི་བཟུང་སྟེ་རང་རང་སོ་སོའི་སྐུ་གཟུགས་ལ་བརྟག་དཔྱད་ཡག་པོ་གནང་རྒྱུའི་རེ་བ་དང་། སྙིང་གི་ན་ཚ་ནི་ཧ་ཅང་གི་གནད་འགག་ཆེན་པོ་ཞིག་ཡིན་སྟབས་དུས་དང་རྣམ་པ་ཀུན་ཏུ་གཟུགས་པོར་འཕྲོད་བསྟེན་གནང་རྒྱུ་གལ་ཆེན་པོ་ཡིན་སྐོར་དང་། སྔོན་མ་བོད་ནང་ཡིན་ན་དེ་འདྲའི་གོ་སྐབས་མེད་སྟབས་ད་ལྟའི་ཆར་ཆ་རྐྱེན་སོགས་ཕུན་སུམ་ཚོགས་པོ་དེ་འདྲ་འཛོམས་སྐབས་མི་མང་ཚང་མས་ཆ་ཤས་ལེན་རོགས་ཞེས་འབོད་སྐུལ་གནང་གི་འདུག་པ་བཅས།
