ཕྱི་ལོ་ ༢༠༠༨ ཟླ་ ༡༠ ཚེས་ ༨ རེས་གཟའ་ལྷག་པ།
༄༅། །ཕྱི་ལོ་ ༢༠༠༨ ཟླ་ ༩ ཚེས་ ༣༠ ཉིན་བཞུགས་སྒར་རྡ་རམ་ས་ལར་(Snow Hermitage Resort)གངས་རིའི་སྒྲུབ་ཁང་གསོལ་མགྲོན་ཁང་དུ་ཝཱ་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་ཚོགས་པའི་ལྷན་ཚོགས་ཐེངས་ ༡༨ པ་སྔོན་འཆར་ལྟར། ཕྱི་ཡོལ་ཆུ་ཚོད་ ༢ པའི་ཐོག་ལྷན་ཚོགས་ཀྱིས་ཚོགས་འདུའི་གཙོ་སྐྱོང་རྒྱ་གར་དབུས་གཞུང་རིག་གཞུང་བློན་ཆེན་ལས་ཁུངས་ཀྱི་དྲུང་ཆེ་མཆོག་ནས་གནང་བ་དང་འབྲེལ། ཝཱ་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་གི་ངེས་སྟོན་པ་མཆོག་ནས་གཙུག་ལག་སློབ་གཉེར་ཁང་གི་ལོ་འཁོར་ལས་སྡོམ་སྤྱི་དང་། བྱེ་བྲག་ཏུ་ལྷན་ཚོགས་ཐོག་གཙུག་ལག་སློབ་གཉེར་ཁང་འདི་བཞིན་ཐོག་མར་ཕྱི་ལོ་ ༡༩༦༧ ལོར་༸གོང་ས་༸སྐྱབས་མགོན་ཆེན་པོ་མཆོག་དང་། སྐབས་དེའི་རྒྱ་གར་སྲིད་བློན་དམ་པ་སྐུ་ཞབས་ནེཧ་རུ་རྣམ་གཉིས་ཀྱིས། སྟོན་པ་སངས་རྒྱས་ཀྱིས་ཆོས་འཁོར་དང་པོ་བསྐོར་བའི་གནས་ཁྱད་པར་ཅན་ཝཱ་ཎ་རུ། དབུ་བརྙེས་པ་ནས་བཟུང་ལོ་རེ་བཞིན་སློབ་གཉེར་ཁང་འཕེལ་རྒྱས་ཇེ་ཆེར་འགྲོ་བཞིན་ཐོག གཙུག་ལག་སློབ་གྲྭ་ཆེན་མོ་གཞན་ལས་ལྷག་པའི་སློབ་གཉེར་གྱི་གྲུབ་འབྲས་ཐོན་བཞིན་པར་བརྟེན། མིང་དོན་མཚུངས་པའི་མཚན་སྦྱང་སྔོན་ཡོད་འོག་(Deemed University)འགོད་རྒྱུའི་ཆོག་མཆན་དང་།
དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་བཞིན། ནང་ཆོས་དང་དེང་དུས་ཚན་རིག་གཉིས་དབར་མཐུན་མོང་གི་འབྲེལ་བ་ཕྱི་དངོས་པོ་དང་། ནང་སེམས་ཀྱི་གནས་ལུགས་བཅས་བསམ་ཚུལ་བརྗེ་ལེན་བྱུང་ཚེ་སྐྱེ་འགྲོ་ཡོངས་ལ་ཕན་ཐོགས་རྒྱ་ཆེ་འབྱུང་རྒྱུར་ཕེབས་དོན་ལྟར། ནང་ཆོས་དང་ཚན་རིག་གཉིས་ཟུང་འབྲེལ་སློབ་སབྱོང་གནང་ཆེད་ཝ་ཌྷ་དབུས་བོད་ཀྱི་ཆེས་མཐོའི་གཙུག་ལག་སློབ་གྲྭ་ཆེན་མོའི་ཡན་ལག་ཞིག་རྒྱ་གར་ལྷོ་ཕྱོགས་བེངྒ་ལོར་དུ་འཛུགས་འཆར་ཡོད་པའི་འཆར་འབུལ་བཅས་སྙན་སྒྲོན་གནང་། དེ་འཕྲོས་གོང་དོན་གཙོ་གྱུར་ལས་སྡོམ་ཐོག་ཚོགས་མི་རྣམས་ནས་ཞིབ་གསལ་གྲོས་བསྡུར་ཐོག་སྤྱི་མོས་ཀྱིས་བཀའ་འཁྲོལ་སྩལ། མཐོ་སློབ་འདི་བཞིན་རྒྱ་གར་གཞུང་གི་ཁྲིམས་གཞི་ ༡༨༦༠ འོག་ཚོགས་པ་དེབ་སྐྱེལ་བྱས་པའི་ཆེས་མཐོའི་ལྷན་ཚོགས་དེ་ཡིན་ཞིང་། འདིའི་ཚོགས་མིར་རྒྱ་གར་དབུས་གཞུང་ནས་དམིགས་འཛུགས་གནང་བའི་སྐུ་ཚབ་རྒྱ་གར་རིག་གཞུང་བློན་ཆེན་ལས་ཁུངས་ཀྱི་དྲུང་ཆེ་དང་ཟུང་འབྲེལ་དྲུང་ཆེ། མཐོ་སློབ་ཁག་གི་ངེས་སྟོན་པ་དང་གཞུང་འབྲེལ་མིན་པའི་རིག་གཞུང་སྟི་གནས་ཁག་གི་འགན་འཛིན། མཐོ་སློབ་འདིའི་ངེས་སྟོན་པ་དང་འབྲེལ་ཡོད་ཁག ༸གོང་ས་ཆེན་པོས་དམིགས་འཛུགས་གནང་བའི་བཙན་བྱོལ་བོད་གཞུང་ཆོས་རིག་བཀའ་བློན་དང་དྲུང་ཆེ་བཅས་ཞལ་གྲངས་ ༡༧ ཡོད་པ་ལས། སྐབས་འདིར་ཕལ་མོ་ཆེ་ཚོགས་ཕེབས་གནང་དོན་ལྟར། ཆོས་རིག་བཀའ་བློན་དང་དྲུང་ཆེ་བཅས་ལྷན་བཞུགས་གནང་ཡོད།
དེ་ཉིན་དགོང་དྲོ་ཚོགས་མི་རྣམས་ཐོག་མར་དཔལ་ལྡན་བཀའ་ཁྲིའི་མདུན་ཆེད་བཅར་རྗེས་རིམ་བཞིན་རང་གཞུང་བཀའ་ཤག་ནས་ཚོགས་མི་རྣམས་ལ་སྣེ་ལེན་གསོལ་སྟོན་གནང་བ་དང་། དེ་རྗེས་དཔལ་ལྡན་བཀའ་ཁྲི་རིན་པོ་ཆེ་མཆོག་ནས་རྒྱ་གར་དབུས་གཞུང་གི་རིག་གཞུང་དྲུང་ཆེ་མཆོག་གི་གཙོས་སྐུ་མགྲོན་རྣམས་ལ་ལེགས་གསོའི་བསྔགས་བརྗོད་དང་ཐུགས་རྗེ་ཆེ་ཞུས་རྗེས་མཇལ་དར་དང་ལེགས་འབུལ་བཅས་འབུལ་གནང་མཛད།
ཕྱི་ཉིན་ཕྱི་ཟླ་ ༡༠ ཚེས་ ༡ ཉིན་གུང་ཚོགས་མི་ཡོངས་ལ་༸གོང་ས་༸སྐྱབས་མགོན་ཆེན་པོ་མཆོག་གི་གསེར་ཞལ་མཇལ་རྒྱུའི་བཀའ་དྲིན་ཆེ་ཐོག་མགོན་པོ་གང་ཉིད་ནས་ཐོག་མར་བོད་ནང་གི་གནས་བབས་དང་། རྒྱ་གར་དུ་ཐོག་མར་བཙན་བྱོལ་དུ་འབྱོར་སྐབས་བོད་མིའི་ཤེས་ཡོན་གཙོ་གྱུར་གྱིས་རིག་གཞུང་མི་ཉམས་རྒྱུན་འཛིན་ཆེད། ཆོས་སྡེ་ཁག་དང་བོད་རིགས་སློབ་གྲྭ་ཟུར་འཛུགས་གནང་བའི་དམིགས་ཡུལ་དང་ལས་གཞི་ཁག་ངོ་སྤྲོད། དེའི་ཐོག་རྒྱ་གར་གཞུང་མང་བཀའ་དྲིན་ཆེ་ཚུལ་དང་། ལྷག་པར་འབྲེལ་ཡོད་རྒྱ་གར་རིག་གཞུང་བློན་ཆེན་ལས་ཁུངས་ནས་སྔ་རྗེས་ཐུགས་འཁུར་རྒྱབ་སྐྱོར་གནང་བར་ཐུགས་རྗེ་ཆེ་ཞུ་བའི་བཀའ་བཟང་ཕེབས་པ་དང་། མཇལ་བཅར་ཚོགས་མི་རྣམས་ལ་མགུལ་དར་གསོལ་སྩལ་གྱིས་དགྱེས་མཉེས་ཆེན་པོས་སྐུ་དཔར་ལྷན་སྒྲོན་གནང་། དེ་འཕྲོས་གཙུག་ལག་སློབ་གྲྭ་ནས་ཚོགས་མི་རྣམས་ལ་ཉིན་གུང་གསོལ་ཚིགས་གོ་སྒྲིག་གནང་དོན་ལྟར་ལྷོད་བཞེས་རྗེས། འབྲེལ་ཡོད་ནས་ཕེབས་བསྐྱེལ་དང་བཅས་མཛད་རིམ་ཁག་ལེགས་གྲུབ་བྱུང་བའི་གསར་གནས་སྙིང་བསྡུས་སུ།།
