ཕྱི་ལོ་ ༢༠༠༨ ཟླ་ ༡༠ ཚེས་ ༩ རེས་གཟའ་ཕུར་བུ།
༄༅། །ཕྱི་ལོ་ ༢༠༠༨ ཟླ་ ༡༠ ཚེས་ ༦ རེས་གཟའ་ཟླ་བའི་ཉིན་གྱི་ཕྱི་དྲོའི་ཆུ་ཚོད་ ༤།༣༠ ཙམ་ལ་བོད་ཀྱི་རྒྱལ་ས་ལྷ་ས་ནས་རྒྱང་ཚད་མེ་ལེ་ ༨༢ ཙམ་གྱི་ནུབ་རྒྱུད་ས་ཁུལ་འདམ་གཞུང་རྫོང་དུ་ས་ཡོམ་འགུལ་ཚད་ ༦་༦ བྱས་པ་ཞིག་བརྒྱབ་ནས་སྡོད་ཁང་ ༡༤༧ ཙམ་བརྡལ་བཤིགས་སུ་གྱུར་ཡོད་པ་དང་། མི་གྲངས་ ༩ སྲོག་སྐྱོན་བྱུང་བ། མང་པོ་ཞིག་ལ་རྨས་སྐྱོན་ཕོག་པའི་གནས་ཚུལ་ཐོན་ཡོད་པར་བོད་གཞུང་མང་ཛ་དྲག་ལས་འགུལ་ཚོགས་ཆུང་ནས་ས་ཡོམ་གྱིས་གནོད་འཚེ་འཕོག་ཡུལ་རྣམས་ལ་སེམས་གསོའི་འཚམས་འདྲི་དང་གདུང་སེམས་མཉམ་སྐྱེ་མཚོན་སླད་གཞུང་འབྲེལ་གྱི་གསལ་བསྒྲགས་ཤིག་སྤེལ་བའི་ནང་འཁོད་དོན། གསར་ལམ་ཁག་ནས་གནས་ཚུལ་ཐོས་གསལ་ལྟར་ན་ཕྱི་ལོ་ ༢༠༠༨ ཟླ་ ༡༠ ཚེས་ ༦ ཉིན་གྱི་ཕྱི་དྲོ་ཆུ་ཚོད་ ༤།༣༠ ཙམ་ལ་བོད་ཀྱི་རྒྱལ་ས་ལྷ་སའི་ནུབ་ཕྱོགས་འདམ་གཞུང་རྫོང་ཁོངས་རྒྱལ་དར་ཤང་དུ་ས་ཡོམ་རིམ་པ་ ༦་༦ ཅན་ཞིག་བརྒྱབ་ནས་ཉུང་མཐར་བོད་མི་གྲངས་ ༩ ཙམ་གྱི་ཚེ་སྲོག་ཤོར་བ་དང་། མང་པོ་ཞིག་ལ་རྨས་སྐྱོན་ཕོག་པ། སྡོད་ཁང་བརྒྱ་ཕྲག་གཅིག་ལྷག་ཞིག་སྐྱོན་བྱུང་བ། དེ་བཞིན་བོད་མི་མང་པོ་ཞིག་ཁང་པ་རྡིབས་འོག་ཏུ་མནན་ནས་ཆེས་ཉེན་ཚབས་འོག་ལུས་བཞིན་ཡོད་འདུག་པ་རྣམས་ལ། བོད་གཞུང་མང་ཛ་དྲག་ལས་འགུལ་ཚོགས་ཆུང་གི་ངོས་ནས་ཡིད་སྐྱོའི་བློ་ཕམ་དང་བཅས་གདུང་སེམས་མཉམ་སྐྱེ་ཞུ་བཞིན་ཡོད།
ཆེས་ཡ་ང་བའི་གོད་ཆག་དེའི་འོག་རྐྱེན་འདས་སུ་ཕྱིན་པའི་ཁྱིམ་ཚང་དང་ནང་མི་ལྟོས་བཅས་ཡོངས་ལ་ཐུགས་གསོའི་འཚམས་འདྲི་དང་། གདུང་སེམས་མཉམ་སྐྱད་མཚོན་ཆེད་བཙན་བྱོལ་བོད་མིའི་གཞིས་ཆགས་ཁག་དང་། གཞིས་བྱེས་བོད་མི་འདུ་སྡོད་ཡོངས་ནས་བོད་ས་བྱི་ལོའི་ཟླ་བ་བརྒྱད་པའི་ཚེས་བཅོ་ལྔ་། ཕྱི་ལོ་ ༢༠༠༨ ཟླ་ ༡༠ ཚེས་ ༡༤ ཉིན་མཆོད་འབུལ་གསོལ་འདེབས་དང་། ཚེ་རབས་ཀུན་ཏུ་འཕགས་མཆོག་ཕྱག་ན་པདྨོས་མཉེས་བཞིན་རྗེས་སུ་བཟུང་བ་དང་གངས་ཅན་བོད་ཀྱི་བདེན་མཐའ་མྱུར་དུ་གསལ་བ་བཅས་ཀྱི་ཆེད་དུ་བསྔོ་སྨོན་རྒྱ་གང་ཆེ་ཞུ་དགོས་པའི་གསལ་བསྒྲགས་སུ། ཞེས་པའི་གསལ་བསྒྲགས་ཤིག་སྤེལ་ཡོད་པ་རེད།།
