ཕྱི་ལོ་ ༢༠༠༨ ཟླ་ ༡༠ ཚེས་ ༧ རེས་གཟའ་མིག་དམར།
༄༅། །རྒྱ་ནག་གཞུང་གི་ཤིན་ཧ་གསར་ལམ་ཁང་ནས་གནས་ཚུལ་སྤེལ་བར་གཞིགས་ན། ཕྱི་ལོ་ ༢༠༠༨ ཟླ་ ༡༠ ཚེས་ ༦ རེས་གཟའ་ཟླ་བའི་ཉིན་གྱི་ཕྱི་དྲོའི་ཆུ་ཚོད་ ༤།༣༠ ཙམ་ལ་བོད་ཀྱི་རྒྱལ་ས་ལྷ་ས་ནས་རྒྱང་ཚད་མེ་ལེ་ ༨༢ ཙམ་གྱི་ནུབ་རྒྱུད་ཀྱི་ས་ཁུལ་འདམ་གཞུང་རྫོང་དུ་ས་ཡོམ་འགུལ་ཚད་ ༦་༦ བྱས་པ་ཞིག་བརྒྱབ་ཡོད་པའི་གནས་ཚུལ་ཐོན་འདུག
བོད་ཀྱི་ས་ཁུལ་འདམ་གཞུང་ཁུལ་དུ་ས་ཡོམ་བརྒྱབ་པའི་འདྲ་པར།
དེ་ཡང་རང་སྐྱོང་ལྗོངས་ཀྱི་ཏང་ཨུད་ཀྱི་ཧྲུའུ་ཅི་གཞོན་པ་སྲུང་སྐྱོབ་བཀོད་འདོམས་པའི་འགོ་འཛིན་གྱིས་བརྗོད་དོན། འདམ་གཞུང་གཡང་སྐྱིད་གྲོང་སྡེ་དང་དེ་མིན་ཉེ་འཁོར་ས་གནས་སུ་ཁྱོན་བསྡོམས་དུད་ཚང་ ༡༤༧ ཙམ་བརྡལ་བཤིགས་སུ་གྱུར་ཡོད་པ་དང་། སྲུང་སྐྱོབ་མི་སྣ་ཚོས་ཤི་སྐྱོན་བྱུང་བའི་ཕུང་པོ་ ༩ རྙེད་ཡོད་སྐོར་བརྗོད་ཡོད་པ་དང་། དེ་མིན་མི་གྲངས་ ༡༡ ལ་རྨས་སྐྱོན་ཤུགས་ཆེ་བྱུང་ཡོད་པ་དང་། མི་གྲངས་ ༨ ལ་རྨས་སྐྱོན་ཕྲན་བུ་ཕོགས་ཡོད་པ་རེད་འདུག
ས་ཁུལ་དེའི་ནང་ས་ཡོམ་གྱི་གོད་ཆགས་བྱུང་འཕྲལ་རྒྱ་གཞུང་ནས་ཛ་དྲག་གིས་ཡ་ལན་བྱས་ཏེ་དམག་མི་ ༦༠༠ ལྷག་དང་། ཉེན་རྟོགས་པ། མེ་གསོད་རུ་ཁག སྨན་བཅོས་དང་ས་ཁམས་ཐོག་གི་མཁས་དབང་བཅས་ས་ཡོམ་གྱིས་གོད་ཆགས་བྱུང་སའི་ས་ཁུལ་དུ་བཏང་ཡོད་སྐོར་དང་། འཐུང་ཆུ་དང་། ཟས་གོས། སྦྲ་གུར། དེ་མིན་གྱི་དགོས་མཁོའི་ཅ་དངོས་སོགས་གོད་ཆགས་བྱུང་བའི་ས་ཁུལ་དུ་དབོར་འདྲེན་བྱས་ཡོད་ཅེས་བཀོད་འདུག དེ་བཞིན་སྲུང་སྐྱོབ་ཀྱི་ལས་དོན་མུ་མཐུད་བྱེད་བཞིན་ཡོད་པ་མ་ཟད། རྨས་སྐྱོན་འཕོག་པ་རྣམས་ས་གནས་སྨན་ཁང་དུ་སྐྱེལ་གྱི་ཡོད་འདུག
ཤིན་ཧ་གསར་ལམ་ནས་གནས་ཚུལ་མུ་མཐུད་བཀོད་དོན། ས་ཡོམ་དེ་རྒྱལ་ས་ལྷ་སའི་ནང་དུའང་བརྒྱབ་ཡོད་པ་རེད། ཡིན་ནའང་ཕོ་བྲང་པོ་ཏཱ་ལ་དང་། ཇོ་ཁང་གི་དབུས་ཐོག་བརྩེགས་ཅན་གྱི་ཁང་པ་རྣམས་ལ་གནོད་འཚེ་ཆེ་བ་གང་ཡང་བྱུང་མེད། ཅེས་བཀོད་ཡོད་པ་རེད།
