ཕྱི་ལོ་ ༢༠༠༨ ཟླ་ ༡༠ ཚེས་ ༢༤ རེས་གཟའ་པ་སངས།
༄༅། །རྒྱལ་སྤྱིའི་གསར་ལམ་ཁག་ནས་གནས་ཚུལ་སྤེལ་གསལ་ལྟར་ན། ཇར་མན་སྲིད་བློན་ལྕམ་སྐུ་ ཨེན་ཇི་ལ་མེར་ཀལ་(Angela Merkel)མཆོག་ཡུ་རོབ་དང་ཨེ་ཤི་ཡའི་རྒྱལ་ཁབ་ཁག་གི་ཆེས་མཐོའི་དབུ་ཁྲིད་རྣམ་པའི་ལྷན་ཚོགས་དེའི་ནང་ཚོགས་བཞུགས་གནང་རྒྱུའི་སླད་ཕྱི་ལོ་ ༢༠༠༨ ཟླ་ ༡༠ ཚེས་ ༢༣ རེས་གཟའ་ཕུར་བུའི་ཉིན་རྒྱ་ནག་གི་རྒྱལ་ས་པེ་ཅིང་དུ་ཕེབས་འབྱོར་གནང་ཡོད་ཅིང་། ཕྱི་ཟླ་ ༡༠ ཚེས་ ༢༤ དང་ ༢༥ ཉིན་ཚོགས་རྒྱུའི་ཆེས་མཐོའི་ལྷན་ཚོགས་དེའི་ཞོར་དུ་ལྕམ་སྐུ་ཨེན་ཇི་ལ་མེར་ཀལ་མཆོག་གིས་ཕྱི་ཚེས་ ༢༣ ཉིན་རྒྱ་ནག་གི་སྲིད་བློན་ཝན་ཅའོ་བའོ་ལྷན་དུ་ཐུག་འཕྲད་དང་གྲོས་མོལ་གནང་རྒྱུ་དང་།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༢༠༠༧ ཕྱི་ཟླ་ ༩ པའི་ནང་ཇར་མན་ནང་ཆིབས་སྒྱུར་སྐབས་ཇར་མན་སྲིད་འཛིན་ཨེན་ཇི་ལ་མེར་ཀལ་དང་ལྷན་དུ་སྒྲོན་པའི་སྐུ་དཔར།
ཕྱི་ཚེས་ ༢༤ ཉིན་སྲིད་འཛིན་ཧུའུ་ཅིང་ཐའོ་དང་གྲོས་མོལ་གནང་འཆར་ཡོད་འདུག དེར་བརྟེན་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་པ་ཁག་དང་བོད་དོན་རྒྱབ་སྐྱོར་ཚོགས་པ་ཁག་གིས་ལྕམ་སྐུ་ཨེན་ཇི་ལ་མེར་ཀལ་མཆོག་ལ་རྒྱ་ནག་གཞུང་གི་འགོ་ཁྲིད་རྣམས་དང་ཐུག་འཕྲད་གནང་སྐབས་ངེས་པར་དུ་བོད་ཀྱི་གནད་དོན་དང་འགྲོ་བ་མིའི་ཐོབ་ཐང་གི་སྐོར་གླེང་སློང་གནང་དགོས་པའི་འབོད་སྐུལ་ཞུ་གི་ཡོད་པ་རེད།
ཨ་མི་རི་ཁའི་རྒྱལ་ས་་ཤིང་ཊོན་དུ་རྟེན་གཞི་བྱས་པའི་རྒྱལ་སྤྱིའི་བོད་དོན་རྒྱབ་སྐྱོར་ལས་འགུལ་ཁང་གི་དྲིལ་བསྒྲགས་འགན་འཛིན་གྱིས་ཡུ་རོབ་དང་རྒྱ་ནག་གི་འབྲེལ་བ་དེ་འགག་རྩའི་དུས་ཚོད་ཅིག་ལ་སླེབས་པའི་སྐབས་འདིར་རྒྱ་ནག་གཞུང་ནས་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་གི་སྐུ་ཚབ་རྣམ་པ་དང་དོན་ཕན་ལྡན་པའི་གྲོས་མོལ་བྱེད་དགོས་པའི་སྐོར་ལྕམ་སྐུ་མེར་ཀལ་མཆོག་གིས་རྒྱ་ནག་གི་སྲིད་འཛིན་ཧུའུ་ཅིང་ཐའོ་ལ་སྐུལ་ལྕག་ནན་པོ་གནང་དགོས་ཀྱི་རེད། ཅེས་རེ་སྐུལ་ཞུས་ཡོད་པ་རེད།
ཁོང་གིས་མུ་མཐུད་གསུང་དོན། ཐེངས་འདིར་རྒྱ་ནག་ནང་དུ་ཡུ་རོབ་དང་ཨེ་ཤི་ཡའི་དབུ་ཁྲིད་ཚོའི་ཆེས་མཐོའི་ལྷན་འཛོམས་གནང་བ་དེ་ནི་བོད་ནང་ཞི་བའི་སྒོ་ནས་རྒྱ་ནག་གི་དབང་སྒྱུར་ལ་ངོ་རྒོལ་བྱེད་མཁན་གྱི་བོད་མིའི་ཐོག་རྒྱ་ནག་གཞུང་གིས་དྲག་གནོན་ཚབས་ཆེ་བྱས་པའི་སྐབས་དེར་འཁེལ་བ་ཞིག་ཡིན་པས་ཇར་མན་སྲིད་བློན་གྱིས་གཙོས་པའི་ཚོགས་འདུར་ཕེབས་པའི་རྒྱལ་ཁབ་ཁག་གི་དབུ་ཁྲིད་རྣམས་ནས་ཐེངས་འདིའི་ཚོགས་ཆེན་གྱི་མཐའ་མའི་ཕྱི་བསྒྲགས་ནང་ད་ལྟའི་བོད་ཀྱི་གནས་སྟངས་སྐོར་དང་། བོད་མིའི་འགྲོ་བ་མིའི་ཐོབ་ཐང་ལ་བརྩི་སྲུང་ཞུ་དགོས་པའི་སྐོར་སོགས་ངེས་པར་དུ་ཚུད་ཐབས་གནང་དགོས་ཀྱི་རེད། ཅེས་གསུངས་ཡོད་པ་རེད།
འདི་ལོའི་གསུམ་བཅུའི་དུས་དྲན་ནས་འགོ་ཚུགས་ཏེ་བོད་ས་ཁྱོན་ཡོངས་ཀྱི་ནང་བོད་མིས་རྒྱ་ནག་གི་དབང་སྒྱུར་ལ་ཞི་བའི་སྒོ་ནས་གྱེན་ལངས་བྱས་པའི་ལས་འགུལ་ཞི་རྒྱ་ཧ་ཅང་ཆེན་པོ་ཞིག་སྤེལ་ཡོད་པ་དེའི་ཐོག་ནས་འདས་པའི་ལོ་ ༥༠ ཙམ་གྱི་རིང་རྒྱ་ནག་གི་དབང་སྒྱུར་འོག་བཙན་གནོན་དང་གདུག་རྩབ་ཚད་མེད་མྱོང་དགོས་བྱུང་བའི་གཞི་ལུས་བོད་མི་རྣམས་ད་ཆ་འུ་ཐུག་པའི་རྣམ་འགྱུར་གསལ་པོ་མཚོན་པ་ཞིག་ཡིན་སྟབས། སྐབས་དེར་ལྕམ་སྐུ་མེར་ཀལ་མཆོག་དང་། དབྱིན་ཡུལ་གྱི་སྲིད་འཛིན་གྷོལ་ཌན་བྷ་རོན་མཆོག ཕ་རན་སིའི་སྲིད་འཛིན་ནི་ཀོ་ལསེ་སར་ཀོ་ཛིའི་གཙོས་པའི་ཡུ་རོབ་ཀྱི་དབུ་ཁྲིད་མང་པོས་རྒྱ་ནག་གི་སྲིད་འཛིན་ཧུའུ་ཅིང་ཐའོ་ལ་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཐད་ཀར་མཇལ་འཕྲད་ཞུས་ཏེ་བོད་ཀྱི་གནད་དོན་ཐག་གཅོད་བྱེད་དགོས་པའི་ཐོག་ལ་སྐུལ་ལྕག་ནན་པོ་གནང་ཡོད་པ་རེད། དེ་ལྟ་བུའི་རྒྱལ་སྤྱིའི་གནོན་ཤུགས་ཀྱི་འོག་རྒྱ་ནག་གིས་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་རྣམས་དང་རྗེས་སུ་འབྲེལ་མོལ་བྱས་ཡོད་ཀྱང་། འབྲེལ་མོལ་དེ་ཚོའི་ཐོག་རྒྱ་ནག་ཕྱོགས་ནས་ལྷག་བསམ་རྣམ་དག་མ་བྱས་པའི་རྐྱེན་གྱིས་དོན་ཕན་ལྡན་པའི་གྲུབ་འབྲས་གང་ཡང་སོན་ཐུབ་ཀྱི་མེད་ཅིང་། བོད་རྒྱ་འབྲེལ་མོལ་རྗེས་མ་དེ་ཟླ་བ་འདིའི་ཟླ་མཇུག་ཙམ་ལ་བྱེད་རྒྱུའི་འཆར་གཞི་ཡོད་པས་འབྲེལ་མོལ་དེ་དེ་སྔོན་གྱི་འབྲེལ་མོལ་ཁག་དང་མི་འདྲ་བར་དངོས་ཡོད་དོན་ཕན་ལྡན་པ་ཞིག་ཡོང་བ་བྱེད་དགོས་པའི་ཐད་ད་ཐེངས་པེ་ཅིང་དུ་འཛོམས་པའི་ཡུ་རོབ་དང་ཨེ་ཤི་ཡའི་རྒྱལ་ཁབ་ཁག་གི་དབུ་ཁྲིད་རྣམ་པས་རྒྱ་གཞུང་ལ་གནོན་ཤུགས་སྤྲོད་དགོས་ཀྱི་རེད། ཅེས་འགྲོ་བ་མིའི་ཐོབ་ཐང་ཚོགས་པ་ཁག་གི་འབོད་སྐུལ་གནང་ཡོད་པ་རེད།།
