ཕྱི་ལོ་ ༢༠༠༨ ཟླ་ ༩ ཚེས་ ༢༥ རེས་གཟའ་ཕུར་བུ།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་གསུང་ཆོས་བཀའ་དྲིན་སྐྱོང་བཞིན་པ།
༄༅། །དད་ལྡན་སིང་གྷ་པུར་མི་མང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གསོལ་བ་ཕུར་ཚུགས་སུ་བཏབ་སྟེ་བཀའ་བཞེས་ཟབ་མོ་སྤྱི་བོར་སྨིན་སྩལ་བྱུང་བ་ལྟར། བོད་རྒྱལ་ལོ་ ༢༡༣༥ ཕྱི་ལོ་ ༢༠༠༨ ཟླ་ ༩ ཚེས་ ༢༥ ནས་ཚེས་ ༢༧ བར་ཉིན་གྲངས་གསུམ་རིང་རྡ་ས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་གསུང་ཆོས་བཀའ་དྲིན་སྐྱོང་བཞིན་ཡོད་པ་དང་། དེ་ཡང་ཉིན་དང་པོ་སྔ་དྲོ་ཆུ་ཚོད་ ༩།༠༠ པ་ཡོལ་ཙམ་ལ་ཕོ་བྲང་ནས་ཐེག་ཆེན་ཆོས་གླིང་གཙུག་ལག་ཁང་དུ་སྤྱན་རྒྱ་སྤོས་སྣེས་སྔོན་བསུས་ཐོག་བཞུགས་ཁྲི་རིན་པོ་ཆེར་༸ཞབས་སོར་འཁོད་རྗེས་ཐའེ་ལན་ཌེའི་དགེ་འདུན་པ་བདུན་ནས་ཐའེ་ལན་ཌའི་ཆོས་ཕྱོགས་ཀྱི་ཆོ་གའི་ཐོག་ནས་ཞལ་འདོན་འདོན་སྐུལ་གནང་གྲུབ་རྗེས་༸གོང་ས་༸སྐྱབས་མགོན་ཆེན་པོ་མཆོག་ནས་དད་ལྡན་ཆོས་ཞུ་བ་ཚོར་གསུང་ཆོས་ཀྱི་སྔོན་འགྲོའི་བཀའ་སློབ་ནང་། འཛམ་གླིང་གོ་ལ་ཧྲིལ་པོའི་སྟེང་འཚོ་གནས་བྱེད་བཞིན་པའི་འགྲོ་བ་ཀུན་ལ་གཞན་ཕན་གྱི་བསམ་བློ་ཞིག་ངེས་པར་དུ་དགོས་ཚུལ་དང་། དེ་བཞིན་འགྲོ་བ་མིའི་ཀུན་སྤྱོད་སོགས་ཀྱི་སྐོར་ལ་བཀའ་སློབ་གནང་གྲུབ་རྗེས་༸གོང་ས་༸སྐྱབས་མགོན་ཆེན་པོ་མཆོག་ནས་རྗེ་ཙོང་ཁ་པ་ཆེན་པོས་མཛད་པའི་བྱང་ཆུབ་ལམ་རིམ་བསྡུས་དོན་དང་འབྲེལ་བའི་སྔོན་འགྲོའི་ཆོས་འཁོར་བཀའ་དྲིན་བསྐྱངས། ཉིན་དང་པོའི་སྔ་དྲོར་ཆོས་ཞུ་བ་ ༣༠༠༠ བརྒལ་བ་བཅར་བཞུགས་གནང་ཡོད་འདུག
དེ་རྗེས་དད་ཅན་ཐེ་ཝན་ཆོས་ཞུ་བ་ཚོར་ཕྱི་ཟླ་ ༩ ཚེས་ ༣༠ ནས་ཕྱི་ཟླ་ ༡༠ ཚེས་ ༤ བར་ཉིན་གྲངས་ ༥ རིང་བྱང་ཆུབ་སེམས་འགྲེལ་དང་། སྒོམ་རིམ་བར་པ་བཅས་ཀྱི་ཆོས་འཁོར་བཀའ་དྲིན་བསྐྱང་རྒྱུ་ཡིན་པའི་གནས་བསྡུས་སུ།།
