ཕྱི་ལོ་ ༢༠༠༨ ཟླ་ ༩ ཚེས་ ༡༧ རེས་གཟའ་མིག་དམར།
༄༅། དཔལ་ལྡན་སྐུ་སྒེར་ཡིག་ཚང་བརྒྱུད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཕྱི་ལོ་ ༢༠༠༨ ཟླ་ ༩ ཚེས་ ༡༡ ཉིན་དཔལ་ལྡན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་བགྲེས་གཞོན་དང་བཀའ་ཤག་ལྷན་རྒྱས་ལ་བོད་ནང་ཛ་དྲག་གི་བྱུང་རྐྱེན་དང་། རྒྱལ་སྤྱིའི་གནས་བབ་བཅས་བོད་ཀྱི་རྩ་དོན་ཐོག་གོ་བསྡུར་བགྲོ་གླེང་ཞིབ་ལྷོད་ཅིག་གནང་ཆེད་བཙན་བྱོལ་བོད་མིའི་བཅའ་ཁྲིམས་དོན་ཚན་ ༥༩ ནང་གསེས་ཁག་གི་ཆ་རྐྱེན་འོག་དམིགས་བསལ་ཚོགས་ཆེན་ཞིག་འདི་ལོའི་ཕྱི་ཟླ་ ༡༡ དང་ ༡༢ གང་རུང་ནང་བསྡུ་བསྐོང་དགོས་རྒྱུ་དང་། ཚོགས་མི་དང་ཚོགས་དུས་གཉིས་ཀྱི་འཆར་གཞི་གང་མྱུང་བཀོད་ནས་སྙན་འབུལ་ཞུ་དགོས་ཞེས་འཁོད་པའི་བཀའ་སྤྱི་ཕེབས་ཡོད་པ་བཞིན། སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པ་ཚོགས་བཞིན་པའི་སྐབས་དང་བསྟུན་བཙན་བྱོལ་བོད་གཞུང་བཀའ་ཤག་ནས་ཚོགས་དུས་ཉིན་བདུན་པ་ཕྱི་ལོ་ ༢༠༠༨ ཟླ་ ༩ ཚེས་ ༡༥ རེས་གཟའ་ཟླ་བ་ཉིན་བཙན་བྱོལ་བོད་མིའི་བཅའ་ཁྲིམས་དོན་ཚན་ ༥༩ འོག་དམིགས་བསལ་ཚོགས་ཆེན་ཐེངས་དང་པོ་ཞེས་པའི་ཚོགས་ཆེན་བསྡུ་བསྐོང་གནང་རྒྱུའི་ལས་རིམ་གྲོས་འཆར་ཞིག་ཕུལ་ཡོད་པ་རེད།
གྲོས་ཚོགས་ནང་བཀའ་སྤྱི་གཉིས་ནས་ཕུལ་བའི་ཚོགས་འདུའི་ལས་རིམ་གྱི་གྲོས་འཆར་ལ་གོ་བསྡུར་སབྱང་བཤད་གནང་བའི་མཐར་ཚོགས་འདུའི་མིང་། བཙན་བྱོལ་བོད་མིའི་བཅའ་ཁྲིམས་དོན་ཚན་ང་དགུ་པའི་འོག་དམིགས་བསལ་ཚོགས་ཆེན་ཐེངས་དང་པོ་ཕྱི་ལོ་ ༢༠༠༨ ཅེས་དང་། ཚོགས་དུས། ཕྱི་ལོ་ ༢༠༠༨ ཟླ་ ༡༡ ཚེས་ ༡༧ རེས་གཟའ་ཟླ་བ་ནས་ཚེས་ ༢༢ སྤེན་པའི་བར་ཉིན་དྲུག་རིང་སྔ་དྲོ་ཆུ་ཚོད་ ༩་༣༠ ནས་ཕྱི་དྲོ་ཆུ་ཚོད་ ༥་༠༠ བར། ཚོགས་ཡུལ་རྡ་སྟེང་བོད་ཁྱིམ་སློབ་གྲྭ། ཚོགས་མིའི་ཡོང་ཁུངས། སྤྱི་འཐུས་ཡོངས་རྫོགས་དང་། སྤྱི་ཟུར་ཡོངས་རྫོགས། བཀའ་བློན་དང་བཀའ་ཟུར་ཡོངས་རྫོགས། རྡ་སར་གནས་འཁོད་གཞུང་ཞབས་ཟུང་དྲུང་ཡན་ཡོངས་རྫོགས། དྲུང་གཞོན་མན་གྱི་འཛིན་སྐྱོང་དང་ལས་བྱའི་སྡེ་ཚན་སོ་སོའི་འཐུས་མི་གཉིས་རེ། ༸གོང་ས་མཆོག་གི་སྐུ་ཚབ་རྣམ་པ་གཉིས། སྐུ་ཚབ་དོན་གཅོད་ཡོངས་རྫོགས། ས་གནས་འགོ་འཛིན་ཡོངས་རྫོགས། ས་གནས་འཐུས་མིའི་ཚོགས་འདུ་ཁག་གི་སྐུ་ཚབ་གཉིས་རེ་དང་། ས་འཐུས་མེད་པའི་ས་གནས་ཁག་ནས་མི་མང་གི་སྐུ་ཚབ་རེ། ས་གནས་རང་བདེན་ཚོགས་ཆུང་ཁག་གི་སྐུ་ཚབ་རེ། ཕྱི་རྒྱལ་ཡུལ་གྲུ་ཁག་གི་བོད་རིགས་སྤྱི་མཐུན་ཚོགས་པ་རྣམས་ཀྱི་སྐུ་ཚབ་རེ། གཞུང་འབྲེལ་མིན་པའི་ཚོགས་པ་ཁག་ནས་སྐུ་ཚབ་གཉིས་རེ། སློབ་གྲྭ་ཁག་གི་འགན་འཛིན་སྐུ་ཚབ་རེ། ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་སོ་སོའི་གྲྭ་བཙུན་སྐུ་ཚབ་དྲུག་རེ། རང་སྐྱོང་སྡེ་ཚན་ཁག་གི་སྐུ་ཚབ་རེ། རྒྱུན་ལྡན་བོད་དོན་ཐོག་ཐུགས་སྣང་དང་འགན་འཁུར་ལས་འགུལ་གནང་མཁན་དགོངས་འཆར་གནང་འདོད་ཡོད་རིགས་ནས་དང་བླངས་ཕེབས་མཁན་གྲངས་རྒྱ་བལ་འབྲུག་གནས་ནས་ ༢༥ དེ་མིན་ནས་ ༢༥ ལས་མ་མང་བ་བཅས་དང་། ཆེས་མཐོའི་ཁྲིབས་ཞིབ་པ་རྣམས་དང་རང་དབང་ལྡན་པའི་སྡེ་ཚན་ཁག་གི་འགན་འཛིན་རྣམ་པ་བཅས་ཚོགས་འདུའི་དབུ་འབྱེད་དང་མཇུག་བསྡོམས་ལ་གདན་ཞུ་བྱ་རྒྱུ། ཚོགས་ཆེན་གྱི་གྲོས་གཞི་༸གོང་ས་མཆོག་གི་བཀའ་ཕེབས་དགོངས་དོན་ལྟར་བར་ལམ་བོད་ནང་ཛ་དྲག་གི་བྱུང་རྐྱེན་དང་། རྒྱལ་སྤྱིའི་གནས་བབ་བཅས་ཀྱི་འོག་བོད་ཀྱི་རྩ་དོན་ཐོག་གོ་བསྡུར་གནང་རྒྱུ་བཅས་སོགས་ཐག་གཅོད་ཀྱིས་མགྱོགས་མྱུར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སྙན་འབུལ་ཞུ་རྒྱུ་ཡིན་འདུག
ཚོགས་ཆེན་འདི་ལྟ་བུ་ཞིག་བསྐོང་ཚོགས་གནང་རྒྱུ་ནི་བཙན་བྱོལ་བོད་མིའི་བཅའ་ཁྲིམས་གཏན་འབེབ་ཟིན་པའི་རྗེས་ལ་ཐེངས་དང་པོ་དེ་ཆགས་ཀྱི་ཡོད་པ་རེད།།
