ཕྱི་ལོ་ ༢༠༠༨ ཟླ ༩ ཚེས་ ༡ རེས་གཟའ་ཟླ་བ།
༄༅། །བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་བི་ཧར་མངའ་སྡེའི་ནང་ཆུ་ལོག་གིས་གནོད་འཚེ་འཕོག་ཡུལ་རྣམས་ལ་ཞལ་འདེབས་ཧིན་སྒོར་འབུམ་ ༡༠ དང་ཐུགས་སྨོན་གསོལ་འདེབས་བཀའ་དྲིན་སྩལ་གནང་ཡོད་པ་རེད།
དེ་ཡང་སྤྱི་ནོར་༸གོངས་༸སྐྱབས་མགོན་ཆེན་པོ་མཆོག་གིས་བི་ཧར་མངའ་སྡེའི་བློན་ཆེན་སྐུ་ཞབས་ནི་ཏིཤ་ཀུ་མར་མཆོག་ལ་ཕྱི་ལོ་ ༢༠༠༨ ཟླ་ ༨ ཚེས་ ༢༩ ཉིན་ཕྱག་བྲིས་ཤིག་སྩལ་བའི་ནང་འཁོད་དོན།
མཛའ་བརྩེ་དང་ལྡན་པའི་སྐུ་ཞབས་ནི་ཏིཤ་ཀུ་མར་ལགས།
སྐུ་ཉིད་ཀྱི་མངའ་སྡེའི་ནང་ཆུ་ལོག་གི་གནོད་འཚེ་འཕོག་ནས་ཡུལ་མི་ས་ཡ་བརྒལ་བ་དང་དེ་དག་གི་རྒྱུ་དངོས་རྣམས་ལ་དོ་ཕོག་ཆེན་པོ་བྱུང་བ་གོ་ཐོས་བྱུང་བས་བློ་ཕམ་ཆེན་པོ་བྱུང་། དེར་བརྟེན་ངོས་ཀྱིས་གནོད་འཚེ་འཕོག་ཡུལ་རྣམས་ལ་གདུང་སེམས་མཉམ་སྐྱེ་དང་སེམས་ཁུར་མཚོན་སླད་གདུང་སེལ་ལས་དོན་ཆེད་ཞལ་འདེབས་ཧིན་སྒོར་འབུམ་ ༡༠ ཕུལ་ཡོད། དེས་མ་ཟད་ངོས་ཀྱིས་ཆུ་ལོག་གིས་གོད་ཆགས་དེའི་ནང་འཆི་བ་དང་། རྒྱུ་དངོས་འཕྲོ་བརླག་ཤོར་བ་རྣམས་ལ་སྨོན་ལམ་གསོལ་འདེབས་ཞུ་རྒྱུ་ཡིན།
ད་ལྟའི་ཆར་ངོས་རང་མུམ་བཡི་སྨན་ཁང་དུ་ལུས་པོ་བདེ་མིན་གྱི་བརྟག་དཔྱད་བྱེད་བཞིན་ཡོད་མུས་ཡིན། གང་ལ་ཞེས་ན་འདས་པའི་ཉིན་ཤས་རིང་གཟུགས་གཞི་མི་བདེ་བ་བྱུང་། སྨན་པ་ཚོས་ངོས་ངལ་བ་ཆེ་དྲག་པ་ཡིན་སྐོར་བརྗོད་ནས་སེམས་འཚབ་མི་དགོས་པའི་ཁས་ལེན་གནང་བྱུང་། ཁོང་རྣམ་པས་ངོས་ངལ་གསོ་ཡག་པོ་རྒྱག་དགོས་པའི་ལམ་སྟོན་གནང་བྱུང་།
ངོས་ནས་སྨོན་ལམ་དང་འཚམས་འདྲི་བཅས།
ཏཱ་ལའི་བླ་མས།
ཕྱི་ལོ་ ༢༠༠༨ ཟླ་ ༨ ཚེས་ ༢༩ ལ།།
ཐུགས་སྣང་།
ཕྱག་བྲིས་ངོ་མ་དབྱིན་ཡིག་ཐོག་ཡོད་པ་ནས་འདི་ག་བོད་ཡིག་ཚན་པས་ཕབ་སྒྱུར་ཞུས་པས་ཚིག་དོན་ལ་ཧེ་བག་ཡོད་ཚེ་རྩ་བ་དབྱིན་ཡིག་རང་ལ་རྩ་འཛིན་ཡོད་པ་ཞུ།
