ཕྱི་ལོ་ ༢༠༠༨ ཟླ་ ༩ ཚེས་ ༣ རེས་གཟའ་ལྷག་པ།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་བོད་གཞུང་མང་ཡོངས་ལ་མང་གཙོའི་ལམ་སྲོལ་བཟང་པོ་གསོལ་བསྩལ་བཀའ་དྲིན་གནང་སྟེ་མི་ལོ་ཧྲིལ་པོ་ ༤༨ འཁོར་བའི་དུས་དྲན་གྱི་གཞུང་འབྲེལ་མཛད་སྒོ་ཚོགས་བཞིན་པ།
༄༅། །བོད་རྒྱལ་ལོ་ ༢༡༣༥ རབ་བྱུང་རི་ཟླའི་བྱི་ལོ་ཕྱི་ལོ་ ༢༠༠༨ ཟླ་ ༩ ཚེས་ ༢ ཉིན་གངས་ལྗོངས་ཆོས་སྲིད་གཉིས་ཀྱི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་ལྷ་མིའི་རྣམ་འདྲེན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ནས་བོད་གཞུང་མང་ཡོངས་ལ་མང་གཙོའི་ལམ་སྲོལ་བཟང་པོ་གསོལ་སྩལ་བཀའ་དྲིན་གནང་སྟེ་མི་ལོ་ཧྲིལ་པོ་ ༤༨ འཁོར་བའི་དུས་དྲན་གྱི་གཞུང་འབྲེལ་མཛད་སྒོ་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་སྔ་དྲོ་ཚོུད་ ༩ པའི་ཐོག་མང་གཙོའི་ཀ་བ་གསུམ་གྱི་མཛད་གཙོ་རྣམ་པས་དབུས་པའི་དྲུང་ཆེ་ཆུང་རྣམས་ཞུགས་གྲལ་དུ་འཁོད་རྗེས་བོད་གཞུང་ཟློས་གར་ཚོགས་པས་རྔ་རོལ་དང་བཅས་བོད་རྒྱལ་ཁབ་ཆེན་པོའི་རྒྱལ་གླུ་འབུལ་བཞིན་པར་དཔལ་ལྡན་བཀའ་བློན་ཁྲི་ཚབ་མཆོག་ནས་བོད་རྒྱལ་ཁབ་ཆེན་པོའི་རྒྱལ་དར་མཁའ་དབྱིངས་སུ་སྒྲེང་འཛུགས་གནང་སྐབས་མི་མང་ཚང་མ་སྐུ་བཞེངས་ཀྱིས་གུས་འདུད་ཞུས།
བཀའ་བློན་ཁྲི་ཚབ་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་ནས་བོད་རྒྱལ་ཁབ་ཆེན་པོའི་རྒྱལ་དར་མཁའ་དབྱིངས་སུ་སྒྲེང་འཛུགས་གནང་བཞིན་པ།
བོད་གཞུང་ཟློས་གར་ཚོགས་པས་མང་གཙོའི་རོལ་གཞས་འབུལ་རྗེས་བོད་གཞུང་དགའ་ལྡན་ཕོ་བྲང་དབུ་བརྙེས་ནས་ལོ་ངོ་ ༣༦༠ འཁོར་བའི་དུས་ཆེན་སྲུང་བརྩི་ཞུས་པ་ནས་བཟུང་བོད་གཞུང་ཤེས་རིག་ལས་ཁུངས་ནས་རྒྱ་གར་རྒྱལ་ཡོངས་འཛིན་རིམ་བཅུ་གཉིས་ཀྱི་ཡིག་རྒྱུགས་ནང་སློབ་ཚན་སྡེ་ཚན་ཁག་གསུམ་ནས་སློབ་ཕྲུག་ཤེས་ཡོན་རྩེ་ཕུད་སོན་པར་དགའ་ལྡན་ཕོ་བྲང་གི་གཟེངས་རྟགས་གསོལ་སྩལ་སྐབས་ཤེས་རིག་ཤེས་ཡོན་འགན་འཛིན་ཚེ་རིང་བསམ་གྲུབ་ལགས་ནས་ངོ་སྤྲོད་གནང་བ་དང་འབྲེལ་དཔལ་ལྡན་བཀའ་བློན་ཁྲི་ཚབ་མཆོག་ནས་གཟེངས་རྟགས་གསོལ་བསྩལ་གནང་།
དེ་རྗེས་དཔལ་ལྡན་བཀའ་བློན་ཁྲི་ཚབ་མཆོག་ནས་བཀའ་ཤག་གི་གསུང་བཤད་དང་། དཔལ་ལྡན་བོད་མི་མང་སྤྱི་འཐུས་ཚོགས་གཙོ་ཀརྨ་ཆོས་འཕེལ་མཆོག་ནས་སྤྱི་འཐུས་ཀྱི་གསུང་བཤད་གནང་གྲུབ་བསྟུན་མཛད་སྒོ་གྲུབ་རྒྱུ་བཅས་ཀྱི་མཛད་སྒོ་དངོས་གཞི་ལེགས་གྲུབ་ཟིན།
བོད་གཞུང་ཟློས་གར་ཚོགས་པས་མང་གཙོའི་རོལ་གཞས་འབུལ་བཞིན་པ།
རྡ་སའི་སེར་སྐྱ་མི་མང་རྣམས་ནས་མཛད་སྒོ་སྲུང་བརྩི་ཞུ་བཞིན་པ།
