ཕྱི་ལོ་ ༢༠༠༨ ཟླ་ ༩ ཚེས་ ༡༧ རེས་གཟའ་ལྷག་པ།
༄༅། །འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཟུར་བློ་བཟང་ཉི་མ་མཆོག་ལོ་ཤས་སྔོན་ནས་སྐུ་ཁམས་ཅུང་བདེ་མིན་བཞེས་པར་བརྟེན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་གཞིར་བཟུང་སྐུའི་འཕྲོད་བཞེས་སྨན་བཅོས་དང་ཞབས་རིམ་སོགས་ཞུ་སྒོ་མཐའ་དག་འབྲས་སྤུངས་བློ་གསལ་གླིང་ནས་འབད་སྒྲུབ་ཞུས་ཡོད་པ་དང་། སྐུ་ཁམས་ལ་བསྙུང་ཟུག་སོགས་སྐུ་ངལ་ཆེར་མེད་པར་ཐུགས་དམ་ཉམས་བཞེས་ངང་འཚོ་བཞུགས་ཡོད་པ་དེ་ལྟར་ཡང་། ཉིན་ཤས་ཀྱི་སྔོན་སྐུ་ཁམས་བབ་ཅུང་ཟད་ལྕི་བའི་ཚུལ་བཞེས་འཕྲལ་ལྷོ་ཕྱོགས་སྤེལ་གྷམ་སྨན་ཁང་ཆེན་མོ་ཀེ་ཨེལ་སི(Kles Hospital and MRS,Belgaum)ལ་གདན་ཞུས་ཀྱིས་སྨན་པའི་ལམ་སྟོན་བཞིན་སྨན་ཁང་དེ་ཉིད་དུ་སྐུ་བཞུགས་དང་འབྲེལ་སྨན་བཅོས་འཕྲོད་བཞེས་མཛད་ཅིང་སྨན་ཁང་དུ་བཞུགས་ཡུན་རིང་སྐུ་གཟུགས་ཀྱི་བབ་ཅུང་ཟད་ལྕི་རུ་ཕེབས་པ་ལས་དེ་མིན་སྙུང་ཟུག་སོགས་གང་ཡང་མེད་ནའང་། ཉིན་ཤས་རྗེས་སྨན་པས་བརྟག་དཔྱད་ཞུས་རྗེས་སྐུ་ཕྱྭ་རིང་དུ་འཚོ་གནས་ཐུབ་མིན་བརྗོད་འཕྲལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སྙན་སེང་དང་འབྲེལ་ཐུགས་དམ་ལམ་སྟོན་བཀའ་སློབ་དགོངས་སྐོར་ཞུས་པར་བཀའ་ཕེབས་དོན། གང་སྐུ་སྐུ་འཚོ་རིང་དུ་བཞུགས་དཀའ་ཡང་སྨན་ཁང་དེར་མུ་མཐུད་བཞུགས་དགོས་རྒྱུ་ཞེས་བཀའ་སློབ་བཀའ་དྲིན་ཕེབས་དོན་བཞིན་སྨན་ཁང་དེར་བཞུགས་མུས་ཐོག་ཕྱི་ལོ་ ༢༠༠༨ ཟླ་ ༩ ཚེས་ ༡༤ དང་བོད་ཟླ་ ༧ ཚེས་ ༡༤ མཚན་མོའི་ཆུ་ཚོད་ ༡།༥༥ ཐོག་སྐུར་སྙུང་ཟུག་སོགས་ཀྱི་རྣམ་པ་གང་ཡང་མེད་པར་ཐུགས་ཏིང་ངེ་འཛིན་ལ་མཉམ་པར་འཇོག་གནང་གིས་ཞི་བདེའི་ངང་གདུལ་བྱ་རྟག་འཛིན་ཅན་རྣམས་ཆོས་ལ་སྐུལ་ཕྱིར་རེ་ཞིག་དགོངས་པ་གཞན་དོན་དུ་གཤེགས་པའི་ཚུལ་བསྟན་གནང་ཡོད་འདུག སྐུ་གདུང་འབྲས་སྤུངས་ཆོས་སྒར་བླ་བྲང་གཟིམས་ཤག་ཏུ་གདན་ཞུས་ཀྱིས་ད་ལྟའི་ཆར་ཐུགས་དམ་ལས་མ་གྲོལ་བར་བཞུགས་ཡོད་འདུག མཁས་མང་བློ་གསལ་བྱེ་བའི་གླིང་གྲྭ་ཚང་དང་། བློ་གླིང་སྤྲུལ་སྐུ་ལྷན་ཚོགས། འབྲས་སྤྲུངས་ཚ་བ་ཁང་ཚན། གཞན་ཡང་ཞལ་སློབ་དང་བཅས་པས་གསོལ་འདེབས་དང་གསུང་རབ་གསུང་འདོན་མཆོད་འབུལ་ཉིན་མཚན་བར་མེད་དུ་གནང་བཞིན་ཡོད་འདུག
ཞིང་གཤེགས་དམ་པ་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཟུར་བློ་བཟང་ཉི་མ་མཆོག
ཁྲི་ཟུར་རིན་པོ་ཆེ་མཆོག་ནི་བོད་ཁམས་ཚ་བ་རོང་དུ་ཡབ་བློ་བཟང་ཚེ་རིང་དང་ཡུམ་ཡེ་ཤེས་ལྷ་མོ་གཉིས་ཀྱི་སྲས་སུ་ལྟས་བཟང་པོ་དང་བཅས་ཕྱི་ལོ་ ༡༩༢༩ ལོར་སྐུ་འཁྲུངས། ཆུང་དུས་རྙིང་མའི་སློབ་དཔོན་རྒན་ངག་དབང་ཡེ་ཤེས་ལས་ཡི་གེ་འབྲི་ཀློག་དང་རྙིང་མའི་ཆོས་སྤྱོད་རིགས་ལ་སྦྱངས་པ་མཛད། དགུང་ལོ་ ༡༢ སྐབས་བྲག་ཡུལ་འོ་ཐང་དགོན་གྱི་མཁན་རིན་པོ་ཆེ་རྒན་རབ་བརྟན་ལས་རབ་ཏུ་བྱུང་སྟེ་དགོན་པ་དེར་ཆོས་ཞུགས་གནང་། ཕྱི་ལོ་ ༡༩༤༥ ལོར་དགུང་ལོ་ ༡༧ ལ་ཕེབས་སྐབས་བོད་དབུས་ལྷ་ལྡན་ཕྱོགས་སུ་ཕེབས་ནས་དཔལ་ལྡན་འབྲས་སྤུངས་གྲྭ་ཚང་དུ་ཆོས་ཞུགས་མཛད་ཅིང་ཕྱི་ལོ་ ༡༩༥༩ ལོར་སྐྱབས་བཅོལ་དུ་མ་ཕེབས་བར་རིག་གནས་ཆེ་ཕྲ་ཀུན་ལ་གསན་བསམ་མཛད།ཕྱི་ལོ་ ༡༩༥༩ ལོར་བོད་དུ་རྒྱ་ནག་གིས་བཙན་འཛུལ་བྱེད་སྐབས་འབྲུག་ཡུལ་བརྒྱུད་རྒྱ་གར་དུ་བྲོས་བྱོལ་ལ་ཕེབས། སྐབས་དེར་ཐོག་མར་སྦག་ས་ཆོས་སྒར་དུ་བཞུགས་ནས་གཞུང་ཆེན་ཁག་ལ་གསན་བསམ་མུ་མཐུད་གནང་རྗེས། ར་ཌྷ་སམ་པུར་ཨནྣད་མཐོ་རིམ་སློབ་གྲྭ་ལས་ཨཙཱརྱའི་བསླབ་པ་མཐར་སོན་པ་དང་། ཕྱི་ལོ་ ༡༩༧༢ ལོར་དགེ་བཤེས་ལྷ་རམས་པའི་ཨང་རིམ་དང་པོ་བཞེས་ཤིང་དཔལ་ལྡན་སྨད་རྒྱུད་གྲྭ་ཚང་དུ་ཕེབས། རིང་པོར་མ་ལོན་པར་ཕྱི་ལོ་ ༡༩༧༤ ལོར་སྤྱི་ནོར་༸གོང་ས་༧སྐྱབས་མགོན་ཆེན་པོ་མཆོག་གིས་གྲྭ་ཚང་དེའི་མཁན་པོར་བསྐོ་བཞག་མཛད། ཕྱི་ལོ་ ༡༩༧༦ ལོར་རྣམ་རྒྱལ་གྲྭ་ཚང་གི་མཁན་པོར་བསྐོ་བཞག་སྩལ། རྣམ་རྒྱལ་གྲྭ་ཚང་གི་མཁན་པོ་གནང་མུར་ཕྱི་ལོ་ ༡༩༨༣ ལོར་བྱང་རྩེ་ཆོས་རྗེའི་ཁྲིར་འཁོད་ནས་ ༡༩༩༤ ལོར་དགའ་ལྡན་ཁྲི་རབས་བརྒྱ་པའི་ཁྲིར་འཁོད་དེ་ཕྱི་ལོ་ ༢༠༠༢ བར་དགའ་ལྡན་ཁྲི་པའི་ཐུགས་འགན་བཞེས་ཡོད།
རིན་པོ་ཆེ་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་དང་། པཎ་ཆེན་རིན་པོ་ཆེ་མཆོག ༸སྐྱབས་རྗེ་ཡོངས་འཛིན་རྣམ་གཉིས། ༸སྐྱབས་རྗེ་བཅོ་བརྒྱད་ཁྲི་རིན་པོ་ཆེ་མཆོག ༸སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ་མཆོག ༸སྐྱབས་རྗེ་འཁྲུལ་ཞིག་རིན་པོ་ཆེ་མཆོག་སོགས་རིས་མེད་བོད་བརྒྱུད་ནང་བསྟན་གྱི་མཁས་གྲུབ་གཉིས་ལྡན་བླ་ཆེན་མང་པོར་བསྟེན་ནས་མདོ་རྒྱུད་ལ་གསན་བསམ་དང་། དབང་ལུང་མན་ངག་བུམ་པ་གང་ཇོའི་ཚུལ་དུ་གསན་བཞེས་མཛད་པ་དང་། དཔལ་ལྡན་སྨད་རྒྱུད་པའི་ཆོས་འབྱུང་གཡའ་དག་འཕྲུལ་གྱི་མེ་ལོང་དང་། བྱམས་མགོན་བསྟོད་པ། རིག་བྱེད་མའི་བསྟོད་པ། བདེ་ཅན་ཞིང་ཁམས་སུ་སྐྱེ་བའི་སྨོན་ལམ་སོགས་བརྩམས་ཤིང་། སྐུ་འཚོ་བཞུགས་རིང་དཔལ་ལྡན་འབྲས་སྤུངས་སོགས་དགོན་སྡེ་ཁག་ཏུ་སློབ་མ་གྲངས་ཀྱིས་མི་ལངས་པ་རྗེས་སུ་འཛིན་ནས་འདི་ཕྱིའི་ལམ་བཟང་གསལ་བར་མཛད་པ་སོགས་འཆད་རྩོད་རྩོམ་གསུམ་གྱི་འཕྲིན་ལས་བསམ་གྱིས་མི་ལངས་པ་བསྐྱངས་ཡོད། མདོར་ན་རིན་པོ་ཆེ་གང་ཉིད་མཁས་གྲུབ་གཉིས་ལྡན་དང་། ༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་བཞིན་བོད་བསྟན་སྲིད་མིའི་རིགས་དང་བཅས་པར་ཕན་རླབས་འགྲན་པར་དཀའ་བའི་རླབས་ཆེན་མཛད་རྗེས་ཅན་གྱི་སྐྱེས་བུ་དམ་པ་ཞིག་ཡིན་སྟབས། ད་ལྟ་སྙིགས་མའི་དུས་སྐབས་འདིར་སྤྱིར་བོད་བརྒྱུད་ནང་བསྟན་ཡོངས་དང་། ལྷག་པར་རི་བོ་དགེ་ལྡན་པའི་བསྟན་པར་ཤིན་ཏུ་ནས་ཕངས་དགོས་པའི་སྐྱེས་ཆེན་དམ་པ་ཞིག་ཡིན།།
