ཕྱི་ལོ་ ༢༠༠༨ ཟླ་ ༩ ཚེས་ ༢༤ རེས་གཟའ་ལྷག་པ།
༄༅། །བོད་གཞུང་ཤེས་རིག་ལས་ཁུངས་ནས་ཕྱི་ལོ་ ༢༠༠༨ ཟླ་ ༩ ཚེས་ ༢༣ རེས་གཟའ་མིག་དམར་ཉིན་བོད་མིའི་སློབ་གྲྭ་ཁག་གི་མདུན་ལམ་སློབ་སྟོན་པའི་ལྷན་ཚོགས་ཐེངས་དང་པོ་བོད་ཀྱི་དཔེ་མཛོད་ཁང་གི་ཚོགས་ཁང་དུ་སྐོང་ཚོགས་གནང་ཡོད་པ་རེད།
དེ་ཡང་ལྷན་ཚོགས་དེ་ནི་ཕྱི་ལོ་ ༢༠༠༨ ཟླ་ ༩ ཚེས་ ༢༣ ནས་ཚེས་ ༢༦ བར་ཉིན་གྲངས་བཞིའི་རིང་ཚོགས་རྒྱུ་ཡིན་པ་དང་། དུས་ཡུན་དེའི་རིང་བོད་མིའི་སློབ་གྲྭ་ཁག་ནང་མདུན་ལམ་སློབ་སྟོན་གནང་ཕྱོགས་ དང་། བཙན་བྱོལ་བོད་མིའི་གཞི་རྩའི་ཤེས་ཡོན་སྲིད་བྱུས་ནང་མདུན་ལམ་སློན་སྟོན་པ་ཚོས་ ཆ་ཤས་ལེན་ཕྱོགས་བཅས་ཀྱི་ཐོག་ལ་བགྲོ་གླེང་གནང་རྒྱུ་ཡིན་འདུག
ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་ལགས་ནས་བདུན་ལམ་སློབ་སྟོན་པ་ཚོར་གཞི་རྩའི་ཤེས་ཡོན་སྲིད་བྱུས་ཐོག་ལ་གསུང་བཤད་གནང་བཞིན་པ།
ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་ལགས་ནས་དབུ་འབྱེད་མཛད་སྒོའི་གསུང་གཤད་གནང་ཡོད་ཅིང་། དེ་ཡང་ཁོང་གིས་གསུང་དོན་བོད་མིའི་སློབ་གྲྭ་ཁག་གི་ནང་མདུན་ལམ་སློབ་སྟོན་བྱ་རྒྱུ་དེ་ནི་དགོས་ངེས་ཤིག་དང་གལ་ཆེ་ཞིག་ཡིན་པའི་སྐོར་གསུངས་ཡོད་པ་རེད། དེ་བཞིན་དབུ་འབྱེད་མཛད་སྒོའི་ཐོག་ཤེས་རིག་དྲུང་འཕར་རི་ཁ་བཀྲ་ཤིས་ནོར་བུ་ལགས་དང་ཤེས་ཡོན་འགན་འཛིན་ཚེ་རིང་ཕུན་ཚོགས་ལགས་རྣམ་གཉིས་ཀྱང་ཕེབས་ཡོད་པ་རེད།
ཤེས་རིག་ལས་ཁུངས་ཀྱི་མདུན་ལམ་སློན་སྟོན་པ་སྒྲོལ་དཀར་དབང་མོ་ལགས་ནས་ལྷན་ཚོགས་དེའི་ནང་བཅར་ཞུགས་གནང་མཁན་ཚོར་ཕེབས་བསུའི་གསུང་བཤད་གནང་སྐབས་ཁོང་གིས་ཤེས་རིག་ལས་ཁུངས་ནས་མདུན་ལམ་སློབ་སྟོན་ཐོག་ཡར་རྒྱས་གང་བཏང་ཡོད་སྐོར་ལ་ངོ་སྤྲོད་གནང་ཡོད་པ་རེད།
ལྷན་ཚོགས་དེའི་སྐབས་བོད་གཞུང་ཤེས་རིག་ལས་ཁུངས་ཀྱི་བཀའ་བློན་ཐུབ་བསྟན་ལུང་རིག་མཆོག་དང་ཤེས་རིག་དྲུང་ཆེ་གཡུ་ཐོག་ཀརྨ་དགེ་ལེགས་ལགས་ནས་གཞི་རྩའི་ཤེས་ཡོན་སྲིད་བྱུས་ཐོག་གསུང་བཤད་གནང་རྒྱུ་ཡིན་འདུག་པ་དང་། དེ་མིན་སམ་བྷོ་ཊའི་སྤྱི་ཁྱབ་འགན་འཛིན་ཀརྨ་ཆུང་བདག་ལགས་ནས་ཁྱོན་ཡོངས་ཀྱི་ཤེས་ཡོན་ཐོག་ལ་གསུང་བཤད་གནང་རྒྱུ། བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ནས་སེམས་དང་སེམས་བྱུང་དང་ནང་ཆོས་ངོ་སྤྲོད་བཅས་ཀྱི་སྐོར་ལ་གསུང་བཤད་གནང་རྒྱུ་ཡིན་འདུག
ལྷན་ཚོགས་དེའི་ཐོག་ཤེས་རིག་ལས་ཁུངས་དབུས་དང་། ཤེས་རིག་ཁོངས་གཏོགས་ལྷོ་ཕྱོགས་ཁུལ་དང་། ཤར་ཕྱོགས་ཁུལ་གྱི་མདུན་ལམ་སློབ་སྟོན་པས་གཙོས་བོད་ཕྲུག་ཁྱིམ་སྡེའི་སློབ་གྲྭ་དང་། མ་སུ་རི་བོད་ཁྱིམ་སློབ་གྲྭ་བཅས་སློབ་གྲྭ་ཁག་དགུ་ནས་མདུན་ལམ་སློབ་སྟོན་པ་ཕེབས་ཡོད་པ་རེད། ལྷན་ཚོགས་སྐབས་མདུན་ལམ་སློབ་སྟོན་པ་རྣམས་མེས་དབོན་དཔེ་སྟོན་སློབ་གྲྭར་ཕེབས་རྒྱུ་ཡིན་འདུག ལྷན་ཚོགས་དེ་ཕྱི་ལོ་ ༢༠༠༨ ཟླ་ ༩ ཚེས་ ༢༦ ཉིན་མཇུག་བསྒྲིལ་རྒྱུ་ཡིན་པ་དང་ཤེས་རིག་བཀའ་བློན་མཆོག་ནས་ཕེབས་སྐྱེལ་གསུང་བཤད་གནང་རྒྱུ་ཡིན་འདུག་པ་བཅས།།
