ཕྱི་ལོ་ ༢༠༠༨ ཟླ་ ༩ ཚེས་ ༣༠ རེས་གཟའ་མིག་དམར།

༄༅། །བོད་མི་མང་སྤྱི་འཐུས་ལྷན་ཚོགས་ནས་དཀའ་སྡུག་མྱོང་བཞིན་པའི་བོད་མི་ས་ཡ་དྲུག་གི་ཚབ་ཞུས་ཏེ་ཕྱི་ལོ་ ༢༠༠༨ ཟླ་ ༩ ཚེས་ ༢༦ ཉིན་ཨ་རིའི་གྲོས་ཚོགས་གོང་མའི་ཚོགས་གཙོ་སྐུ་ཞབས་ཌིག་ཆེ་ནིའི་(Dick Cheney)མཆོག་ལ་ཨ་རིའི་གྲོས་ཚོགས་གོང་མ་ནས་ཕྱི་ལོ་ ༢༠༠༨ ཟླ་ ༩ ཚེས་ ༡༧ ཉིན་རྒྱ་ནག་གཞུང་ལ་མ་འོངས་བོད་ཀྱི་ཆེད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ལྷག་བསམ་རྣམ་དག་གིས་གྲོས་མོལ་གནང་དགོས་པའི་འབོད་སྐུལ་ཞུ་རྒྱུའི་གྲོས་ཆོད་ཨང་ ༦༤༣ བཞག་ནས་བོད་དོན་རྒྱབ་སྐྱོར་གནང་བར་ཐུགས་རྗེ་ཆེ་ཞུའི་འཕྲིན་ཡིག་ཅིག་ཕུལ་གནང་ཡོད་པ་རེད།

དེ་ཡང་འཕྲིན་ཡིག་ནང་འཁོད་དོན། བོད་མི་མང་སྤྱི་འཐུས་ལྷན་ཚོགས་ནས་དཀའ་སྡུག་མྱོང་བཞིན་པའི་བོད་མི་ས་ཡ་དྲུག་གི་ཚབ་ཞུས་ཏེ་ཨ་རིའི་གྲོས་ཚོགས་གོང་མ་ནས་སྤྱི་མོས་ཀྱིས་ཕྱི་ལོ་ ༢༠༠༨ ཟླ་ ༩ ཚེས་ ༡༧ ཉིན་རྒྱ་ནག་གཞུང་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་སེམས་པ་རྣམ་དག་གིས་བོད་ཀྱི་མ་འོངས་པའི་ཐོག་གྲོས་མོལ་གནང་དགོས་པའི་གྲོས་ཆོད་ཨང་ ༦༤༣ བཞག་པར་ཐུགས་རྗེ་ཆེ་ཞུ་རྒྱུ་ཡིན། སྐུ་ཞབས་གོར་ཌན་སི་མི་ཐ་(Gordon Smith R-OR)དང་སྐུ་ཞབས་ར་སེལ་ཕིན་གོ་ཌེ་(Russell Feingold D-WI)རྣམ་གཉིས་ཀྱིས་དབུ་ཁྲིད་དེ་གྲོས་ཆོད་དེ་གྲོས་ཚོགས་ནང་ངོ་སྤྲོད་གནང་བར་ང་ཚོས་ཁོང་གཉིས་ལའང་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན།

ཐེངས་འདིའི་གྲོས་ཚོགས་ཀྱི་གྲོས་ཆོད་ཨང་ ༦༤༣ དེས་ཕྱི་ལོ་ ༡༩༧༩ ནས་བཟུང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་རྣམས་དང་རྒྱ་ནག་གཞུང་དབར་འབྲེལ་མོལ་བྱས་ཀྱང་རྒྱ་ནག་གཞུང་ཕྱོགས་ནས་སྐད་ཆ་བཤད་པ་ཙམ་ལས་དོན་དང་ལྡན་པ་དང་སེམས་པ་རྣམ་དག་གིས་གྲོས་མོལ་བྱས་མེད་པའི་རྐྱེན་གྱིས་ཡར་རྒྱས་བྱུང་མེད་པར་གསལ་པོར་ངོ་སྤྲོད་གནང་བ་ཞིག་རེད། དེར་བརྟེན་དུས་ལ་བབ་པའི་དུས་ཚོད་འདི་ལྟ་བུར་ཕྱིའི་ཡུལ་གྲུ་ཁག་གི་གྲོས་ཚོགས་དང་གཞུང་ཁག བོད་དང་རྒྱ་ནག་ཐོག་ལ་ཐུགས་སྣང་གནང་མཁན་ཚོས་གྲོས་ཆོད་དེ་ལ་རྒྱབ་སྐྱོར་གནང་ནས་རྒྱ་ནག་གཞུང་ནས་བོད་ཀྱི་གནད་དོན་དེ་བཞིན་ཛ་དྲག་ཅིག་ཡིན་པ་རྟོགས་ཐུབ་རྒྱུར་ཤུགས་གནོན་བསྐྱོན་དགོས་པ་རེད། ཅེས་བཀོད་ཡོད་པ་རེད།།