ཕྱི་ལོ་ ༢༠༠༨ ཟླ་ ༨ ཚེས་ ༢༣ རེས་གཟའ་སྤེན་པ།

༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕ་རན་སི་ལྷོ་ཕྱོགས་གྲོང་སྡེ་རོ་ཁུ་རི་ཌོན་ཌི་(Roqueredonde)རྟེན་གཞི་བྱས་པའི་སྤྲུལ་སྐུ་བསོད་རྒྱལ་རིན་པོ་ཆེའི་ཆོས་ཚོགས་ཀྱི་རིག་པ་ལས་རབ་གླིང་པའི་གཙུག་ལག་ཁང་རྟེན་དང་བརྟེན་པ་བཅས་པ་གསར་བཞེངས་ལེགས་གྲུབ་ཟིན་པའི་དབུ་འབྱེད་མཛད་སྒོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གདན་ཞུའི་གསོལ་འདེབས་ཇི་ལྟར་བཏབ་པ་བཞིན་༸གོང་ས་༸སྐྱབས་མགོན་ཆེན་པོ་མཆོག་ས་གནས་དེར་ཞབས་སོར་འཁོད་གནང་མཛད་ཡོད་པ་རེད།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཕ་རན་སིའི་སྲིད་འཛིན་མཆོག་གི་ལྕམ་བ་རུ་ནི་སར་ཀོ་ཛིའི་མཆོག་བཅས་ལྷན་རྒྱས་ཕ་རན་སི་ནང་ཡོད་བོད་ལུགས་ནང་ཆོས་གཙུག་ལག་ཁང་གསར་བཞེངས་དབུ་འབྱེད་མཛད་སྒོར་ཆིབས་སྒྱུར་སྐྱོང་བཞིན་པ།

རིག་པ་ལས་རབ་གླིང་ཆོས་ཚོགས་ཀྱི་གཙུག་ལག་ཁང་གི་དབུ་འབྱེད་མཛད་སྒོའི་ཐོག་ཕ་རན་སིའི་སྲིད་འཛིན་གྱི་སྐུ་ཟླ་ལྕམ་སྐུ་བ་རུ་ནི་སར་ཀོ་ཛིའི་མཆོག་ (Bruni Sarkozy)དང་། ཕ་རན་སི་ཕྱི་སྲིད་བློན་ཆེན་སྐུ་ཞབས་བིར་ནར་ཌེ་ཀུ་ཆར་(Bernard Kouchner)མཆོག ཕ་རན་སི་འགྲོ་བ་མིའི་ཐོབ་ཐང་གི་བློན་ཆེན་ལྕམ་སྐུ་ར་མ་ཡ་ལྷི་(Rama Yade)བཅས་ཕེབས་ཡོད་པ་མ་ཟད། དབུ་འབྱེད་མཛད་རིམ་གྲུབ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཟུར་དུ་མཇལ་འཕྲད་ཞུས་ཡོད་པ་རེད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་ཕེབས་དོན། རྒྱ་ནག་གཞུང་གིས་ཨོ་ལེམ་པིཀ་རྩེད་འགྲན་རིང་བོད་ནང་དྲག་གནོན་ཤུགས་ཆེ་རུ་བཏང་འདུག་པ་དང་། བོད་ཀྱི་མ་འོངས་གནད་དོན་ཐད་རྒྱ་ནག་གི་དབུ་ཁྲིད་ཚོར་བཀའ་མོལ་གནང་རྒྱུར་ཐུགས་འདོད་གནང་གི་ཡོད། ཅེས་བཀའ་སྩལ་ཡོད་པ་རེད།  དབུ་ཁྲིད་རྣམ་པའི་དབར་མཇལ་འཕྲད་གྲུབ་རྗེས་༸གོང་ས་༸སྐྱབས་མགོན་ཆེན་པོ་མཆོག་གི་གསུང་སྒྱུར་མ་ཐིའུ་རི་ཀརཌེ་(Matheu Ricard)གྱིས་གསར་འགོད་པར་གསུང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕ་རན་སི་སྲིད་འཛིན་གྱི་སྐུ་ཟླ་ལྕམ་སྐུ་བ་རུ་ནི་སར་ཀོ་ཛིའི་མཆོག་དང་། ཕྱི་སྲིད་བློན་ཆེན་བིར་ནར་ཌེ་ཀུ་ཆར་མཆོག འགྲོ་བ་མིའི་ཐོབ་ཐང་གི་བློན་ཆེན་ལྕམ་སྐུ་ར་མ་ཡ་ལྷི་བཅས་ཀྱི་ལྷན་དུ་བོད་ཀྱི་གནད་དོན་སྐོར་ལ་བཀའ་སྡུར་གནང་ཡོད་སྐོར་དང་། ༸གོང་ས་༸སྐྱབས་མགོན་ཆེན་པོ་མཆོག་གིས་བོད་ནང་གི་ད་ཡོད་གནས་སྟངས་ལ་ཐུགས་འཚབ་ཆེན་པོ་གནང་གི་ཡོད་པ། རྒྱ་ནག་ནང་ཨོ་ལེམ་པིཀ་རྩེད་འགྲན་བྱེད་འགྲོ་བཞིན་པའི་སྐབས་དེར་བོད་ནང་རྒྱ་ནག་གཞུང་གིས་གདུག་རྩབ་ཆེན་པོས་དྲག་གནོན་བྱེད་བཞིན་ཡོད་པ་རེད། ཕྱི་ཟླ་ ༩ ནང་བོད་མི་མང་སྤྱི་འཐུས་གྲོས་ཚོགས་ཀྱི་ཚོགས་འདུ་གནང་གི་ཡོད་སྐོར། ཕྱི་ཟླ་ ༡༠ ནང་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་རྣམས་དང་རྒྱ་ནག་གཞུང་གི་སྐུ་ཚབ་དང་སླར་ཡང་འབྲེལ་མོལ་ལྷན་འཛོམས་གནང་རྒྱུར་ཐུགས་རེ་གནང་གི་ཡོད་པ་རེད། ཅེས་གསུངས་ཡོད་པ་རེད།

བཙན་བྱོལ་བོད་གཞུང་གི་ཕ་རན་སིའི་སྐུ་ཚབ་དོན་གཅོད་འཇམ་དཔལ་ཆོས་བཟང་ལགས་ཀྱིས་གསར་འགོད་པར་གསུང་དོན། སྲིད་འཛིན་ནི་ཀོ་ལ་སར་ཀོ་ཛིའི་མཆོག་གིས་སྐུ་ཉིད་ཀྱི་སྐུ་ཟླ་བརྒྱུད་ནས་༸གོང་ས་༸སྐྱབས་མགོན་ཆེན་པོ་མཆོག་ལ་འཚམས་འདྲི་ཞུས་གནང་བའི་འགྲེལ་བརྗོད་གནང་བ་དང་། ཕ་རན་སིའི་ཕྱི་སྲིད་བློན་ཆེན་སྐུ་ཞབས་བིར་ནར་ཌེ་ཀུ་ཆར་མཆོག་ནི་ལོ་ངོ་བཅུ་ཕྲག་གཉིས་ཙམ་གྱི་གོང་ནས་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་ཞུ་མྱོང་མཁན་ཞིག་ཡིན་པ་དང་། སྐུ་ཉིད་ཀྱིས་བོད་དོན་ལ་རྒྱབ་སྐྱོར་གནང་གི་ཡོད་པ་དེ་ད་ལམ་བསྐྱར་ནན་གནང་སྟེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕ་རན་སིར་ཆིབས་སྒྱུར་བསྐྱང་རྒྱུར་དུས་རྟག་ཏུ་དགའ་བསུ་ཞུ་གི་ཡོད། ཅེས་གསུངས་ཡོད་པའི་འགྲེལ་བརྗོད་ཀྱང་གནང་ཡོད་པ་རེད།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕ་རན་སིའི་ནང་ཉིན་གྲངས་བཅུ་གཉིས་རིང་ཆོས་སྲིད་ཀྱི་མཛད་འཕྲིན་མཐའ་དག་ལེགས་གྲུབ་ཟིན་ནས་ཕྱི་ལོ་ ༢༠༠༨ ཟླ་ ༨ ཚེས་ ༢༢ ཉིན་ཕ་རན་སི་ནས་ཆིབས་ཞལ་བསྒྱུར་ཏེ་རྒྱ་གར་གྱི་རྒྱལ་ས་ལྡི་ལིར་ཞབས་སོར་འཁོད་ཡོད་པ་རེད།།