ཕྱི་ལོ་ ༢༠༠༨ ཟླ་ ༨ ཚེས་ ༢༢ རེས་གཟའ་པ་སངས།
༄༅། །རྒྱལ་སྤྱིའི་གསར་ལམ་ཁག་ནས་གནས་ཚུལ་ནས་སྤེལ་གསལ་ལྟར་ན། དབྱིན་ཡུལ་གྱི་སྲིད་འཛིན་སྐུ་ཞབས་གྷོལ་ཌན་བ་རོན་(Gordon Brown)མཆོག་གིས་ཕྱི་ལོ་ ༢༠༠༨ ཟླ་ ༨ ཚེས་ ༢༡ རེས་གཟའ་ལྷག་པའི་ཉིན་རྒྱ་ནག་གིས་བོད་ནང་ཡོད་པའི་བོད་མི་ཚང་མའི་འགྲོ་བ་མིའི་ཐོབ་ཐང་ལ་མཐའ་གཅིག་ཏུ་གུས་བརྩི་ཞུ་དགོས་པ་དང་། ལྷག་པར་ཨོ་ལེམ་པིཀ་རྩེད་འགྲན་བྱས་ཟིན་པའི་རྗེས་འགྲོ་བ་མིའི་ཐོབ་ཐང་གི་གནད་དོན་ཐད་ཡར་རྒྱས་གཏོང་དགོས་པའི་འབོད་སྐུལ་ཞུས་ཡོད་པ་རེད།
དབྱིན་ཡུལ་སྲིད་འཛིན་སྐུ་ཞབས་གྷོལ་ཌན་བ་རོན་མཆོག
དེ་ཡང་སྐུ་ཞབས་གྷོལ་ཌོན་བ་རོན་མཆོག་རྒྱ་ནག་ཏུ་ཨོ་ལེམ་པིཀ་རྩེད་འགྲན་མཇུག་སྡོམ་གྱི་མཛད་སྟོན་ལ་ཕེབས་པའི་སྐབས་གསར་འགོད་པར། བོད་ནང་ཡོད་པའི་བོད་མི་ཚོའི་འགྲོ་བ་མིའི་ཐོབ་ཐང་ལ་གུས་བརྩི་མཐའ་གཅིག་ཏུ་ཞུ་དགོས་ཀྱི་རེད། ང་ཚོའི་འགྱུར་བ་མེད་པའི་ལངས་ཕྱོགས་ནི་ཕྱི་ཟླ་ ༣ ནང་བྱུང་བའི་གནད་དོན་དེ་འབྲེལ་མོལ་གྱི་ལམ་ནས་སེལ་བ་ལས་དྲག་པོའི་ལམ་ནས་མ་ཡིན། ཞེས་གསུངས་ཡོད་པ་རེད།
སྐུ་ཞབས་གྷོལ་ཌན་བོ་རོན་མཆོག་གི་ལས་ཁུངས་ནས་འགྲེམས་སྤེལ་གནང་བའི་དབྱིན་ཡུལ་Third party Liberal Democrats ཞེས་པའི་འགོ་ཁྲིད་སྐུ་ཞབས་ནིཀ་ཁི་ལཀ་(Nick Clegg)ལ་ཕུལ་བའི་འཕྲིན་ཡིག་ནང་སྐུ་ཞབས་བ་རོན་མཆོག་ནས་བཀོད་གསལ། འགྲོ་བ་མིའི་ཐོབ་ཐང་བློས་བཏང་སྟེ་རྩེད་འགྲན་ལ་རྒྱབ་སྐྱོར་དང་རྒྱ་ནག་གཞུང་དང་འབྲེལ་མཐུད་བྱས་པ་ཞིག་མིན། དེ་ནི་གཙོ་བོ་རྒྱ་ནག་ནང་ཡར་རྒྱས་ཤུགས་ཆེ་ཕྱིན་རྐྱེན་དགོས་བསྐལ་ཞིག་ཡིན་པ་དང་། རྒྱ་ནག་གིས་འདས་ཟིན་པའི་ལོ་ངོ་བཅུ་ཕྲག་གསུམ་གྱི་རིང་སྤྱི་ཚོགས་དང་དཔལ་འབྱོར་ཐོག་ཡར་རྒྱས་ཤུགས་ཆེ་བཏང་ཡོད་པ་རེད། ཡིན་ནའང་ད་དུང་དེ་ལས་ལྷག་པ་ཞིག་བྱ་རྒྱུར་ལྷག་ཡོད། ཅེས་བཀོད་ཡོད་པ་རེད།
ངོས་རང་ལ་མཐའ་གཅིག་ཏུ་ཡིད་ཆེས་གང་ཡོད་ཞུས་ན། རྒྱ་ནག་གིས་མི་མང་རྣམས་ལ་་བརྗོད་རང་དབང་དང་། ཆོས་དད་རང་མོས། ཚོགས་པ་བཙུགས་ཆོག་པ། ཁོང་ཚོའི་འདོད་པ་གང་ཡོད་བྱ་བཅུག་ནས་གདེང་ཚོད་ལྡན་པའི་ངང་ནས་འཚོ་གནས་བྱེད་དུ་བཅུག་པ་ཡིན་ན་ཁྲིམས་ལུགས་ལ་རང་བཞིན་གྱིས་སྲུང་བརྩི་བྱེད་པ་དང་། དབྱེ་འབྱེད་མེད་པའི་ཐབས་ལམ་དེ་ལེགས་ཤོས་ཤིག་ཡིན་པ་མ་ཟད་དེས་རྒྱ་ནག་གི་གཏན་ལྷིང་དང་ཡར་རྒྱས་གོང་འཕེལ་ལ་ཕན་ཐོག་ཀྱང་ཤུགས་ཆེ་ཞིག་ཡོང་གི་རེད། དེས་ཚང་མའི་འདོད་བློ་ཁེངས་ཐུབ་པ་ཞིག་ཡོང་གི་རེད། ཅེས་བཀོད་ཡོད་པ་དང་མུ་མཐུད་བཀོད་དོན། འགྲོ་བ་མིའི་ཐོབ་ཐང་ཚོགས་པས་རྒྱ་ནག་ལ་ཨོ་ལེམ་པིཀ་རྩེད་འགྲན་མགོ་འཛུགས་མ་བྱས་བར་ཡང་ནས་ཡང་དུ་རྒྱ་ནག་གི་འགྲོ་བ་མིའི་ཐོབ་ཐང་གི་སྙན་ཐོར་སེམས་ཁུར་ཆེན་པ་ོབྱས་ཡོད་པ་རེད། དེ་བཞིན་རྒྱལ་སྤྱིའི་ཉེས་ཡངས་ཚོགས་པས་ཨོ་ལེམ་པིཀ་ཚོགས་པ་དེས་གནས་སྟངས་ཇེ་ཞན་ཇེ་སྡུག་ཏུ་བཏང་བ་ལས་ལེགས་སུ་སོང་མེད། ཅེས་གསུངས་ཡོད་པ་རེད།
ངོས་པི་ཅིང་དུ་འབྱོར་རྗེས་རྒྱ་ནག་གཞུང་གི་དཔོན་རིགས་རྣམས་དང་ལྷན་དུ་གནད་དོན་དེའི་ཐོག་དོན་ཕན་ཅན་གྱི་གྲོས་མོལ་ཞིག་བྱ་ཐུབ་པའི་རེ་བ་བྱེད་ཀྱི་ཡོད། ངོས་ཀྱིས་བོད་མིའི་༸སྐྱབས་མགོན་ཏཱ་ལའི་བླ་མ་མཆོག་དང་རྒྱ་ནག་གཞུང་དབར་འབྲེལ་མོལ་ཡོང་བའི་འབོད་སྐུལ་ཞུས་ནས་ཕྱོགས་གཉིས་ལྷན་འཛོམས་ཐུབ་ཐབས་སུ་རོགས་ཕན་ཞུ་རྒྱུ་ཡིན། ཞེས་བཀོད་ཡོད་པ་རེད།།
