ཕྱི་ལོ་ ༢༠༠༨ ཟླ་ ༨ ཚེས་ ༢༦ རེས་གཟའ་མིག་དམར།
༄༅། །རྒྱལ་སྤྱིའི་གསར་ལམ་ཁག་ནས་གནས་ཚུལ་སྤེལ་བར་གཞིགས་ན། རྒྱ་ནག་གི་རྒྱལ་ས་པེ་ཅིང་ནང་ཉེ་ཆར་ཨོ་ལེམ་པིཀ་རྩེད་འགྲན་ཚོགས་སྐབས་རྩེད་འགྲན་ནང་མཉམ་ཞུགས་གནང་མཁན་ཨི་ཊ་ལིའི་རྩེད་འགྲན་པ་ཁག་གཅིག་གིས་བོད་ཀྱི་གནད་དོན་དང་འགྲོ་བ་མིའི་ཐོབ་ཐང་ལ་རྒྱབ་སྐྱོར་མཚོན་པའི་ཡིད་ངག་གཉིས་ཐོག་ནས་རྣམ་འགྱུར་འདྲ་མིན་གསལ་སྟོན་གནང་ཡོད་པ་རེད།
ཨི་ཊ་ལིའི་སྲུང་སྐྱོབ་བློན་ཆེན་སྐུ་ཞབས་ཨིག་ན་ཛི་ཡོ་ལ་རུ་ས་མཆོག
དེ་ཡང་ཨོ་ལེམ་པིཀ་བུད་མེད་ཀྱི་གྲི་རྩེད་འགྲན་སྡུར་ནང་མཉམ་ཞུགས་གནང་ནས་ཟངས་ཀྱི་རྟགས་མ་ཐོབ་མཁན་ཨི་ཊ་ལིའི་བུད་མེད་མར་གེ་རི་ཊ་ཇེ་རེན་སྦ་སི་(Margherita Granbassi )ཡིས་གྲི་རྩེད་འགྲན་སྡུར་གནང་སྐབས་རང་གི་གདོང་པ་སྲུང་ཆེད་དུ་གྱོན་པའི་གདོང་ཁེབས་དེ་བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་ལ་འབུལ་གྱི་ཡིན། ཞེས་དང་ཡང་ཁོང་གིས་གསུང་དོན། པེ་ཅིང་ནང་ཨོ་ལེམ་པིཀ་གྲི་རྩེད་འགྲན་སྡུར་བྱེད་སྐབས་གདོང་ཁེབས་འདི་ཡིས་ངོས་རང་ལ་སྲུང་སྐྱོབ་ཇི་ལྟར་བྱས་པ་དེ་བཞིན་བོད་མིའི་༸སྐྱབས་མགོན་ཏཱ་ལའི་བླ་མ་མཆོག་གིས་བོད་མི་མང་རྣམས་སྐྱོབ་ཐུབ་པའི་སྨོན་འདུན་ཞུ་ཡི་ཡོད། ཅེས་པེ་ཅིང་ནས་རང་ཡུལ་དུ་ཕྱིར་ལོག་རྗེས་གསར་འགོད་ལྷན་ཚོགས་ཤིག་གི་ཐོག་གསུངས་ཡོད་པ་རེད།
དེ་བཞིན་ཁུ་ཚུར་རྩེལ་འགྲན་ནང་དངུལ་གྱི་རྟགས་མ་ཐོབ་མཁན་ཨི་ཊ་ལིའི་རྩེད་འགྲན་པ་ཁེ་ལེ་མེནཊེ་རུ་སོ་(Clemente Russo )ཡིས་ཕྱི་ལོ་ ༢༠༠༨ ཟླ་ ༨ ཚེས་ ༢༣ རེས་གཟའ་པ་སངས་ཉིན་ཁོང་ལ་ཐོབ་པའི་དངུལ་གྱི་རྟགས་མ་དེ་རྒྱ་ནག་གི་བཙན་གནོན་འོག་ཏུ་དཀའ་སྡུག་མྱོང་མཁན་ཚང་མའི་ཆེད་ལེགས་སྐྱེས་སུ་འབུལ་རྒྱུ་ཡིན། ཞེས་བརྗོད་ཡོད་པ་རེད།
ཡང་རྒྱུག་ཆུའི་ནང་གྲུ་གཏོང་རྒྱུའི་རྒྱུག་རྩལ་འགྲན་སྡུར་ནང་དངུལ་གྱི་རྟགས་མ་བཞེས་མཁན་ཨི་ཊ་ལིའི་བུད་མེད་རྩེད་འགྲན་པ་( Kayaker Josefa Idem) ཡིས་ཁོང་རང་གིས་མཐའ་མའི་འགྲན་སྡུར་སྐབས་གྱོན་པའི་དམིགས་བསལ་གྱི་སྒྲིག་ཆས་དེ་བོད་མིའི་༸སྐྱབས་མགོན་ཏཱ་ལའི་བླ་མ་མཆོག་ལ་འབུལ་གྱི་ཡིན། ཞེས་གསུངས་ཡོད་པ་རེད་ཅེས་ཨི་ཊ་ལིའི་ཉིན་རེའི་གསར་ཤོག་ཁོ་རིཡེར་ལ་སེ་ར་ཞེས་པ་དེའི་ནང་བཀོད་ཡོད་པ་རེད།
དེ་ཡང་ཕྱི་ལོ་ ༢༠༠༨ ཟླ་ ༨ ཚེས་ ༢༤ རེས་གཟའ་ཉི་མའི་ཉིན་ཨི་ཊ་ལིའི་སྲུང་སྐྱོབ་བློན་ཆེན་སྐུ་ཞབས་ཨིག་ན་ཛི་ཡོ་ལ་རུ་ས་(Ignazio La Russa )མཆོག་གིས་གཞུང་འབྲེལ་གསལ་བསྒྲགས་ཤིག་ནང་། ཨི་ཊ་ལིའི་རྩེད་འགྲན་པ་ཚོས་མ་སྐུལ་དང་བླང་གིས་བོད་མིའི་༸སྐྱབས་མགོན་ཏཱ་ལའི་བླ་མ་མཆོག་དང་བོད་མི་མང་ལ་གདུང་སེམས་མཉམ་སྐྱེ་ཡོད་པའི་རྣམ་འགྱུར་གསལ་སྟོན་བྱས་ཡོད་པ་དེར་ངོས་རང་ཧ་ཅང་གིས་དགའ་སྤོབས་བྱུང་། ཞེས་གསུངས་ཡོད་པ་རེད།།
