ཕྱི་ལོ་ ༢༠༠༨ ཟླ་ ༨ ཚེས་ ༢༣ རེས་གཟའ་སྤེན་པ།
༄༅། །བོད་མིའི་ཆོས་སྲིད་གཉིས་ཀྱི་བླ་ན་མེད་པའི་མངའ་བདག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕ་རན་སིའི་གྲོང་ཁྱེར་ནན་ཁུལ་གྱི་མཛད་འཆར་མཐའ་དག་ལེགས་གྲུབ་ཟིན་ཆིབས་ཞལ་མ་བསྒྱུར་སྔོན་ཕ་རན་སི་ནང་པའི་ཆོས་བརྒྱུད་མཐུན་ཚོགས་ཤེས་རབ་རྒྱ་མཚོའི་གདན་ཞུའི་གྲ་སྒྲིག་ཚོགས་པས་ཉམ་ཐག་སྐྱེ་འགྲོ་ཀུན་གྱི་སླད་སྐུ་ཚེ་༸ཞབས་པད་བསྐལ་བརྒྱར་བརྟན་པའི་བརྟན་བཞུགས་བསྟར་འབུལ་ཞུས་ཡོད་པ་རེད།
བརྟན་བཞུགས་བསྟར་འབུལ་ལ་བཅར་བའི་མི་མང་རྣམས་ལ་ཕ་རན་སི་ནང་པའི་མཐུན་ཚོགས་ཤེས་རབ་རྒྱ་མཚོའི་གདན་ཞུའི་གྲ་སྒྲིག་ཚོགས་པའི་འགན་འཛིན་སྤྲུལ་སྐུ་པདྨ་དབང་རྒྱལ་ལགས་ཀྱིས་དབྱིན་སྐད་ཐོག་གསུང་བཤད་གནང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕ་རན་སིའི་གྲོང་ཁྱེར་ནན་དུ་ཤེས་རབ་རྒྱ་མཚོའི་གྲ་སྒྲིག་ཚོགས་ཆུང་ནས་ཇི་ལྟར་གསོལ་འདེབས་ཞུས་དོན་ལྟར་ཞལ་བཞེས་བཟང་པོ་ཐོབ་ནས་ཆིབས་སྒྱུར་བཀའ་དྲིན་བསྐྱངས་ནས་ང་ཚོར་གསུང་ཆོས་དང་ལམ་སྟོན་སྩལ་གནང་མཛད་པར་ཐུགས་རྗེ་བཀའ་དྲིན་བླ་མེད་དུ་ཆེ་ཞུས་པ་དང་། ཆབས་ཅིག་མགོན་པོ་གང་ཉིད་སྐུ་ཚེ་༸ཞབས་པད་བསྐལ་བརྒྱར་བརྟན་ཅིང་ཐུགས་ཀྱི་བཞེད་དོན་ལྷུན་གྱིས་གྲུབ་པ་དང་། བོད་ཀྱི་བདེན་མཐའ་མྱུར་དུ་སེལ་ཞིང་འཛམ་གླིང་ཡོངས་ལ་ཞི་བདེ་ཡོང་བའི་གསོལ་འདེབས་སྨོན་ལམ་ཞུས་ཡོད་པ་དང་། ནང་པའི་ཆོས་རྒྱུད་ཐུན་མོང་ནས་༸གོང་ས་༸སྐྱབས་མགོན་ཆེན་པོ་མཆོག་སླར་ཡང་གང་མགྱོགས་ཕ་རན་སིར་ཆིབས་སྒྱུར་བསྐྱང་རྒྱུའི་སྐྱབས་འཇུག་གསོལ་འདེབས་སྨོན་ལམ་བཅས་ཀྱི་གསུང་བཤད་གནང་ཡོད་པ་རེད།།
