ཕྱི་ལོ་ ༢༠༠༨ ཟླ་ ༨ ཚེས་ ༢༨ རེས་གཟའ་ཕུར་བུ།
༄༅། །རྒྱལ་སྤྱིའི་གསར་ལམ་ཁག་ནས་གནས་ཚུལ་སྤེལ་བར་གཞིགས་ན། ཁེ་ན་ཌའི་གྲོང་ཁྱེར་ཀིངསེ་ཊོན་(Kingston)ནང་བཞུགས་མཁན་ཁེ་ན་ཌའི་དེ་སྔའི་རྒྱལ་ཡོངས་གྲུ་གཏོང་མཁན་དངུལ་གྱི་རྟགས་མ་ཐོབ་མྱོང་མཁན་རང་ལོ་ ༢༨ ཕེབས་པའི་སྐུ་ཞབས་ཌ་ཝི་ཌེ་ཀཡ་(David Kay)ཞུ་མཁན་ཞིག་གིས་རྒྱ་ནག་དམར་པོའི་སྲིད་གཞུང་གི་གདུག་རྩབ་ཀྱི་གཉའ་མནོན་འོག་བོད་ནང་གི་བོད་མི་ཚོར་གཞི་རྩའི་འགྲོ་བ་མིའི་ཐོབ་ཐང་གི་རང་དབང་ལོངས་སུ་སྤྱོད་རྒྱུ་མེད་པའི་སྐོར་འཛམ་གླིང་ཡོངས་ལ་གནས་ཚུལ་གོ་རྟོགས་སྤེལ་རྒྱུའི་སླད་ཁེ་ན་ཌའི་ས་གནས་ཁག་ ༤༦ ནང་རྐང་འཁོར་སྐོར་བསྐྱོད་བྱས་པའི་ཐོག་ནས་བོད་དོན་གྱི་དྲིལ་བསྒྲགས་རྒྱ་ཆེ་ཞིག་སྤེལ་ཡོད་པ་རེད།
བོད་མི་ཁག་གཅིག་གིསསྐུ་ཞབས་ཌ་ཝིཌེ་ཀཡ་རྐང་འཁོར་སྐོར་བསྐྱོད་བྱེད་པའི་སྐབས་ཕེབས་བསུ་ཞུ་བཞིན་པ།
དེ་ཡང་ཁོང་གིས་ཁེ་ན་ཌའི་མངའ་སྡེ་བིར་ཊི་ཤི་ཀོ་ལོམ་བི་ཡ་(British Columbia)ཞེས་པའི་ནང་རྐང་འཁོར་སྐོར་བསྐྱོད་ཀྱི་ལས་འགུལ་མཐའ་མ་དེ་གནང་བའི་རྗེས་ཁོ་རང་གི་བཞུགས་ཡུལ་ཀིངསེ་ཊོན་ས་གནས་སུ་ཕྱིར་ལོག་མཚམས་ཁོང་གིས་ཨིག་ཛ་མི་ནར་(Examiner)གསར་ཤོག་གི་གསར་འགོད་པར་གསུང་པར་གཞིགས་ན། ཁོང་གིས་འདི་ལོའི་ཕྱི་ཟླ་ ༧ ཚེས་ ༡༣ ཉིན་ཨསེ་ཊི་ཇོན་ནིའུ་ཕོན་ཌེ་ལན་ཌེ་(St.John’s,Newfoundland)ནས་རྐང་འཁོར་སྐོར་བསྐྱོད་ཀྱི་ལས་འགུལ་མགོ་འཛུགས་གནང་སྟེ་པེ་ཅིང་ཨོ་ལེམ་པིཀ་རྩེད་འགྲན་གྱི་མཇུག་བསྡུའི་ཉིན་རྐང་འཁོར་སྐོར་བསྐྱོད་མཇུག་སྒྲིལ་གནང་རྒྱུའི་དུས་བཀག་ཟོས་པ་ཞིག་ཡིན་པའི་འགྲེལ་བརྗོད་གནང་ཡོད་པ་རེད།
སྐུ་ཞབས་ཌ་ཝཌེ་ཀཡ་ཡིས་རྐང་འཁོར་སྐོར་བསྐྱོད་ཀྱི་ལམ་ནས་རྒྱ་ནག་གིས་བོད་ནང་ཆོས་དད་རང་དབང་དང་། སྨྲ་བརྗོད་རང་དབང་སོགས་སྤྲོད་ཀྱི་མེད་པའི་སྐོར་ཁེ་ན་ཌའི་གྲོང་ཁྱེར་ ༤༦ ལ་བསྐྱོད་དེ་གནས་ཚུལ་གོ་རྟོགས་སྤེལ་གནང་ཡོད་པ་དང་། གྲོང་ཁྱེར་དེ་དག་གི་ནང་བསྐྱོད་དེ་གསར་འགོད་པ་དང་བོད་དོན་ལ་རྒྱབ་སྐྱོར་གནང་མཁན་ཁག་དང་ཐུག་འཕྲད་གནང་ཡོད་པའི་འགྲེལ་བརྗོད་གནང་ཡོད་པ་རེད།
ཁོང་གིས་ཕྱི་ཟླ་ ༧ ཚེས་ ༢༩ ཉིན་ཁེ་ན་ཌའི་གྲོང་ཁྱེར་པི་ཊསེ་བྷག་(Peter Peterborough)ནང་འབྱོར་བའི་སྐབས་རྒྱ་ནག་གཞུང་གིས་ཁྲིམས་འགལ་དུ་ངོས་འཛིན་བྱེད་ཡུལ་རྩ་རླུང་སྒོམ་གྲུབ་ཀྱི་ཉམས་ལེན་བྱེད་མཁན་རྒྱ་རིགས་ཁག་དང་། ཆབ་སྲིད་མི་སྣ། ཆབ་སྲིད་བཙོན་ཟུར་བཅས་དང་ཐུགས་འཕྲད་བྱུང་ཡོད་པའི་འགྲེལ་བརྗོད་ཀྱང་གནང་ཡོད་པ་རེད།
ད་དུང་ཁོང་གིས་ཁེ་ན་ཌའི་རྒྱལ་ས་ཨོ་ཊ་ར་(Ottawa)འབྱོར་སྐབས་དེ་སྔའི་ཁེ་ན་ཌའི་གྲོས་ཚོགས་ཀྱི་འཐུས་མི་སྐུ་ཞབས་ཌ་ཝིཌེ་ཁིལ་ཀོ་(David Kilgour)དང་མཇལ་འཕྲད་གནང་ཡོད་ཅིང་སྐུ་ཞབས་ཁིལ་ཀོ་ནི་རྒྱ་ནག་ནང་ཡོད་པའི་རྩ་རླུང་སྒོམ་གྲུབ་ཉམས་ལེན་བྱེད་མཁན་གྱི་རྒྱ་རིགས་ཚོའི་གནས་སྟངས་སྐོར་ལ་ཐུགས་འཁུར་ཆེན་པོ་བཞེས་མཁན་ཞིག་ཡིན་པ་རེད།
སྐུ་ཞབས་ཌ་ཝིཌེ་ཀཡ་ཡིས་རྐང་འཁོར་སྐོར་བསྐྱོད་གནང་བའི་སྐབས་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་རྩོད་པ་དང་། གྲོང་ཁྱེར་མོན་ཊི་རིལ་(Montreal)གྱི་དེ་སྔའི་ཁྲིམས་འཛིན་སྤྱི་ཁྱབ་ཆེན་མོ་སྐུ་ཞབས་ཨིར་ཝིན་ཁོཌི་ལར་(Irwin Cotler)བཅས་དང་མཇལ་འཕྲད་གནང་ཡོད་པ་རེད། དེ་དང་ཕྱོགས་མཚུངས་ཁོང་གིས་ཁེ་ན་ཌའི་གྲོང་ཁྱེར་ཀལ་ཀ་རི་ལ་འབྱོར་སྐབས་བོད་མི་དང་། བོད་དོན་རྒྱབ་སྐྱོར་བ། དེ་བཞིན་རྒྱ་རིགས་མང་གཙོ་དོན་གཉེར་བྱེད་མཁན་བཅས་དང་ཐུག་འཕྲད་གནང་བ་དང་ཆབས་ཅིག་ཁོང་རྣམས་ལྷན་དུ་གྲོང་ཁྱེར་ལས་ཁུངས་ནས་རྒྱ་ནག་གི་གཞུང་ཚབ་བར་གོམ་བགྲོད་གནང་ཡོད་པ་རེད།
སྐུ་ཞབས་ཌ་ཝིཌ་ཀཡ་ཡིས་ཁེ་ན་ཌའི་གྲོང་ཁྱེར་ ༤༦ ཙམ་ལ་རྐང་འཁོར་སྐོར་བསྐྱོད་གནང་བའི་སྐབས་ལམ་བར་དུ་དམིགས་བསལ་གནོད་སྐྱོན་ཆེན་པོ་བྱུང་མེད་ཀྱང་མཚམས་རེ་དྲག་ཆར་རླུང་འཚུབ་སོགས་ཀྱི་རྐྱེན་འདྲ་མིན་འཕྲད་མིན་ལ་མ་ལྟོས་པར་ཁོང་གིས་སྐབས་རེ་ཉིན་གཅིག་ལ་ཆུ་ཚོད་ ༡༤ ཙམ་སྐོར་བསྐྱོད་གནང་ཡོད་པ་རེད།
སྐུ་ཞབས་ཌ་ཝིཌེ་ཀཡ་ཡིས་རྐང་འཁོར་སྐོར་བསྐྱོད་ཀྱི་ལས་འགུལ་དེ་ཁེ་ན་ཌའི་བོད་དོན་རྒྱབ་སྐྱོར་ཚོགས་པས་གོ་སྒྲིག་ཞུས་པ་ཞིག་ཡིན་པའི་འགྲེལ་བརྗོད་གནང་ཡོད་པ་དང་འབྲེལ་ཁོང་གིས། སྔོན་ལོ་བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཁེ་ན་ཌའི་ནང་ཆིབས་སྒྱུར་བསྐྱངས་ནས་མང་ཚོགས་ལ་བཀའ་སློབ་སྩལ་གནང་མཛད་པའི་སྐབས་སྐུ་ཞབས་ཌ་ཝིཌེ་ཀཡ་ལ་གསུང་ཆོས་ཞུ་རྒྱུའི་གོ་སྐབས་བཟང་པོ་ཐོབ་པ་དེའི་སྐབས་ཁོང་ལ་སེམས་འགུལ་ཆེན་པོ་ཐེབས་པ་ལ་བརྟེན་ནས་ཐེངས་འདིར་རྐང་འཁོར་སྐོར་བསྐྱོད་ཀྱི་ལས་འགུལ་སྤེལ་བ་ཡིན། ཞེས་གསུངས་ཡོད་པ་རེད།།
