ཕྱི་ལོ་ ༢༠༠༨ ཟླ་ ༧ ཚེས་ ༡༤ རེས་གཟའ་ཟླ་བ།

༄༅། །བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལོ་ ༢༠༠༨ ཟླ་ ༧ ཚེས་ ༡༠ རེས་གཟའ་ཕུར་བུའི་ཉིན་ཨ་རིའི་མངའ་སྡེ་པན་སེལ་ཝེ་ནིཡའི་(Pennsylvania)གྲོང་ཁྱེར་བི་ཐ་ལི་ཧམ་(Bethlehem)ནང་བརྟེན་གཞི་བྱས་པའི་ལི་ཧའི་གཙུག་ལག་སློབ་གཉེར་ཁང་(Lehigh University)དུ་ཆིབས་སྒྱུར་བསྐྱངས་ཡོད་པ་རེད།

༸གོང་ས་༸སྐྱབས་མགོན་ཆེན་པོ་མཆོག་གིས་ལི་ཧའི་གཙུག་ལག་སློབ་གཉེར་ཁང་གི་ཚོགས་ཁང་དུ་བྱང་ཆུབ་ལམ་རིམ་གྱི་གསུང་ཆོས་བཀའ་དྲིན་སྩོལ་བཞིན་པ།

དེ་ཡང་ཨ་རིའི་གྲོང་ཁྱེར་ནིའུ་ཡོག་ནང་བརྟེན་གཞི་བྱས་པའི་སོག་པོའི་དགེ་བཤེས་དབང་རྒྱལ་ལགས་ཀྱིས་བཙུགས་གནང་བའི་ནང་པའི་ཆོས་ཚོགས་ནས་འཇམ་མགོན་བླ་མ་ཙོང་ཁ་ཆེན་པོས་ལྗགས་རྩོམ་མཛད་པའི་བྱང་ཆུབ་ལམ་གྱི་རིམ་པའི་གསུང་ཆོས་གནང་སྐྱོང་ཡོང་བ་ཇི་ལྟར་གསོལ་འདེབས་ཞུས་ཡོད་པ་བཞིན་ཞལ་བཞེས་བཟང་པོ་ཐོབ་སྟེ་ཆིབས་སྒྱུར་བཀའ་དྲིན་ཆེ་བ་བསྐྱངས་གནང་མཛད་ཡོད་པ་རེད།

ལི་ཧའི་གཙུག་ལག་སློབ་གཉེར་ཁང་ནས་༸གོང་ས་༸སྐྱབས་མགོན་ཆེན་པོ་མཆོག་ལ་ཆེས་མཐོའི་མཁས་པའི་གཟེངས་བསྟོད་ཕྱག་འཁྱེར་འབུལ་བཞེས་གནང་བཞིན་པ།

ཆིབས་སྒྱུར་སྐབས་ལི་ཧའི་གཙུག་ལག་སློབ་གཉེར་ཁང་གི་གཙོ་འཛིན་དང་གཙོ་འཛིན་གཞོན་པས་གཙོས་དགེ་ལས་ཡོངས་དང་ས་ཁུལ་དེར་གནས་སྡོད་བོད་མི་བཅས་ནས་ཕེབས་བསུ་གཟབ་རྒྱས་ཞུས་ཡོད་པ་རེད། གསུང་ཆོས་གནང་ཡུལ་ནི་ལི་ཧའི་གཙུག་ལག་སློབ་གཉེར་ཁང་གི་ཚོགས་ཁང་དུ་ཡིན་པ་དང་། གསུང་ཆོས་ཐོག་མ་དེ་རེས་གཟའ་ཕུར་བུ་ཕྱི་ཚེས་ ༡༠ ཉིན་གྱི་ཕྱེད་ཡོལ་ཆུ་ཚོད་ ༢ པ་ནས་དབུ་འཛུགས་མཛད་ཡོད་པ་དང་། ཚེས་ ༡༥ བར་ཉིན་གྲངས་དྲུག་རིང་བསྩལ་རྒྱུ་ཡིན་འདུག

ཐེངས་འདིའི་གསུང་ཆོས་སུ་རྒྱལ་ཁབ་འདྲ་མིན་ཁག་མང་པོ་ཞིག་ནས་དད་ལྡན་ཆོས་ཞུ་བ་སྟོང་ཕྲག་ལྔ་བརྒལ་བ་བཅར་ཡོད་པ་རེད། ཕྱི་ཚེས་ ༡༣ ཉིན་ལི་ཧའི་གཙུག་ལག་སློབ་གཉེར་ཁང་ནས་༸གོང་ས་༸སྐྱབས་མགོན་ཆེན་པོ་མཆོག་ལ་ཆེས་མཐོའི་མཁས་པའི་གཟེངས་བསྟོད་ཕྱག་འཁྱེར་འབུལ་བཞེས་གནང་ཡོད་པ་རེད། དེ་ཉིན་ཕྱེད་ཡོལ་༸གོང་ས་༸སྐྱབས་མགོན་ཆེན་པོ་མཆོག་གིས་མི་མང་ལ་སེམས་བརྒྱུད་བཟང་པོ་བྱེད་ཕྱོགས་ (Generating Good Heart) ཀྱི་བརྗོད་གཞིའི་སྟེང་བཀའ་སློབ་ལམ་སྟོན་ཟབ་རྒྱས་ཕེབས་ཡོད་པ་རེད།

ཕྱི་ཚེས་ ༡༥ ཉིན་ལམ་རིམ་བཀའ་ཆོས་གནང་པའི་མཛད་འཆར་ཉིན་མཐའ་མ་དེ་ཡིན་འདུག