ཕྱི་ལོ་ ༢༠༠༨ ཟླ་ ༧ ཚེས་ ༨ རེས་གཟའ་མིག་དམར།
༄༅། །བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་རྒྱ་ནག་གི་ཕྱི་ཕྱོགས་སུ་གནས་པའི་རྒྱ་མི་རིགས་ཚོས་བོད་ཀྱི་དངོས་ཡོད་ཀྱི་གནས་སྟངས་གང་ཡིན་བདེན་པའི་གནས་ཚུལ་ཤེས་རྟོག་ཡོང་སླད་ཕྱི་རྒྱལ་གྱི་ཡུལ་གྲུ་ཁག་གི་ནང་གནས་སྡོད་བོད་མི་དང་རྒྱ་མི་རིགས་ཕན་ཚུན་འབྲེལ་བ་བྱེད་རྒྱུ་གལ་འགངས་ཆེན་པོ་ཡིན་པའི་ལམ་སྟོན་བཀའ་སློབ་གནང་བ་བཞིན། ཨོ་སི་ཊོ་ལི་ཡའི་ནང་གནས་སྡོད་བྱེད་མཁན་བོད་མི་དང་རྒྱ་མི་རིགས་དབར་འབྲེལ་ལམ་ཡོང་རྒྱུའི་ཆེད་ཚོགས་པ་ཞིག་གསར་འཛུགས་གནང་ཡོད་པ་རེད།
དེ་ཡང་ཕྱི་ཟླ་ ༧ ཚེས་ ༦ རེས་གཟའ་ཉི་མ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༧༣ ལ་ཕེབས་པའི་སྐུའི་འཁྲུངས་སྐར་དུས་ཆེན་གྱི་མཛད་སྒོའི་སྐབས་ཚོགས་པ་དེ་བཙུགས་ཡོད་པའི་གསལ་བསྒྲགས་བྱས་ཡོད་པ་རེད། སྐབས་དེར་ཨ་སི་ཊོ་ལི་ཡའི་བཙན་བྱོལ་བོད་གཞུང་གི་སྐུ་ཚབ་དོན་གཅོད་ཨ་ཏི་ཤ་བསྟན་འཛིན་ཕུན་ཚོགས་ལགས་ཀྱིས་མཐུན་ཚོགས་གསར་འཛུགས་སྐོར་ལ་གསལ་བསྒྲགས་གནང་ཡོད་པ་རེད།
དེ་ཉིན་རྒྱ་རིགས་སྤྱི་ཚོགས་ཀྱི་སྐུ་ཚབ་མིའ་ལིཆི་ཡིས་གཏམ་བཤད་ཅིག་སྤེལ་བའི་ནང་གསུང་དོན། དེ་རིང་ངས་རྒྱ་རིགས་སྤྱི་ཚོགས་ཀྱི་ཚབ་ཞུས་ཏེ་བོད་མི་རྣམས་ཀྱིས་ད་བར་བོད་ནང་དཀའ་སྡུག་མྱངས་བ་དེ་དག་ལ་དགོངས་སེལ་ཞུ་རྒྱུ་ཡིན། རྒྱ་བོད་མི་རིགས་ཀྱི་སྤྱི་ཚོགས་གཉིས་ཕན་ཚུལ་འབྲེལ་ལམ་བཟང་དུ་གཏོང་རྒྱུའི་ཁས་ལེན་བྱ་རྒྱུ་ཡིན། ཅེས་བརྗོད་ཡོད་པ་རེད། ཁོང་གིས་མུ་མཐུད་གསུང་དོན། རྒྱ་ནག་དམར་པོའི་སྲིད་གཞུང་གིས་བོད་དུ་བྱ་སྤྱོད་ངན་པ་ལག་བསྟར་བྱས་པར་བརྟེན་བོད་མི་རྣམས་དཀའ་སྡུག་ཇི་ཙམ་མྱངས་ཡོད་མེད་ཀྱི་སྐོར་ལ་ང་རང་རྒྱ་མི་རིགས་ཤིག་ཡིན་པའི་ཆ་ནས་དངོས་ཡོད་བདེན་པའི་གནས་ཚུལ་ཤེས་རྟོགས་མ་བྱུང་བར་བློ་འགྱོད་ཆེན་པོ་ཡོད། ཅེས་བརྗོད་ཡོད་པ་རེད།
དེ་རྗེས་བཙན་བྱོལ་བོད་གཞུང་གི་སྐུ་ཚབ་ཨ་ཏི་ཤ་བསྟན་འཛིན་ཕུན་ཚོགས་ལགས་དང་ཨོ་སི་ཊོ་ལི་ཡའི་ནང་བརྟེན་གཞི་བྱས་པའི་བོད་རིགས་སྤྱི་མཐུན་ཚོགས་པའི་སྐུ་ཚབ་བཅས་ཀྱིས་རྒྱ་བོད་མཐུན་ཚོགས་ཀྱི་རྒྱུན་ལས་བརྒྱད་ལ་མཇལ་དར་བསྒྲོན་ཡོད་པ་དང་། སྐབས་དེར་བོད་གཞུང་སྐུ་ཚབ་དོན་གཅོད་ཀྱི་གཏམ་བཤད་ནང་གསུང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་ནག་གི་ཕྱི་ཕྱོགས་སུ་གནས་པའི་རྒྱ་རིགས་མང་ཚོགས་ཀྱིས་བོད་ནང་གི་དངོས་ཡོད་བདེན་པའི་གནས་ཚུལ་ཇི་མ་ཇི་བཞིན་རྟོགས་དགོས་རྒྱུ་ནི་གལ་འགངས་ཆེན་པོ་ཡིན་པ་མ་ཟད། མཐའ་མཇུག་ཏུ་བོད་ཀྱི་དཀའ་རྙོག་དེ་རྒྱ་བོད་མི་རིགས་གཉིས་ཀྱིས་སེལ་དགོས་ཀྱི་ཡོད་པའི་བཀའ་སློབ་ཕེབས་ཡོད་པ་རེད། ཅེས་གསུངས་ཡོད།ཨོ་སི་ཀྲོ་ལི་ཡའི་རྒྱ་བོད་མི་རིགས་ཐུན་ཚོགས་ཀྱི་རྒྱ་མི་རིགས་ཀྱི་སྐུ་ཚབ་མིའ་ལིཆི་ཡིས་གནང་བའི་གཏམ་བཤད་ཆ་ཚང་གཤམ་གསལ།
དེ་རིང་ང་རང་བོད་རིགས་སྤན་ཟླ་ཕོ་མོ་རྣམས་དང་ལྷན་དུ་མཇལ་འཕྲད་བྱུང་སྟེ་རྒྱ་མི་རིགས་དང་བོད་མི་རིགས་དབར་ཕན་ཚུན་སྒྲིག་འཇགས་ཡོང་རྒྱུའི་དོན་དུ་གྲོས་སྡུར་བྱེད་རྒྱུ་བྱུང་བ་དེར་ང་རང་ཧ་ཅང་དགའ་པོ་བྱུང་། ང་རང་རྒྱ་མི་རིགས་གཞན་དང་གཅིག་མཚུངས་ཐོག་མར་ངས་ཕྱོགས་ལྷུང་གི་འདོད་ཚུལ་འཛིན་གྱི་ཡོད་པ་མ་ཟད། བོད་ཀྱི་གནད་དོན་སྐོར་ལ་དངོས་ཡོད་གནས་ཚུལ་མ་ཤེས་པར་གོ་ནོར་ཐེབས་པ་སོགས་བྱུང་ཡོད་ཀྱང་། ཕྱི་ལོ་ ༢༠༠༧ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨོ་སི་ཊོ་ལི་ཡའི་ནང་ཆིབས་སྒྱུར་གནང་བའི་སྐབས་ང་རང་ལ་དུས་ཡུན་ཆུ་ཚོད་གཉིས་ཙམ་རིང་བཀའ་མོལ་ཞུ་རྒྱུའི་སྐལ་བཟང་གི་གོ་སྐབས་ཐོབ་པ་མ་ཟད། མགོན་པོ་གང་ཉིད་ཀྱིས་རྒྱ་མི་རིགས་ཚོར་བཀའ་སློབ་དང་མཇལ་ཁ་གནང་བའི་རྗེས་ང་རང་གིས་དེ་སྔོན་གྱི་བསམ་ཚུལ་ལོག་པ་རྣམས་འཕྲལ་མ་ཉིད་དུ་མེད་པ་ཆགས་སོང་། ཐོག་མ་ངས་མགོན་པོ་གང་ཉིད་ཞལ་མཇལ་ཞུ་བའི་སྐབས་༸གོང་ས་༸སྐྱབས་མགོན་ཆེན་པོ་མཆོག་གི་ཞི་བའི་ངང་ཚུལ་དང་། མཁྱེན་རྒྱ་ཡངས་པའི་རྣམ་དཔྱོད་ཀྱིས་ངའི་ཡིད་དབང་འཕྲོག་སྟེ་༸གོང་ས་མཆོག་ལ་གུས་བརྩི་ཆེན་པོ་ཞུ་གི་ཡོད། སྐབས་དེར་ངའི་སེམས་ནང་སྔོན་མ་ངས་༸གོང་ས་མཆོག་ལ་འཛིན་པའི་ལྟ་ཚུལ་དེ་ནོར་འཁྲུལ་ཅན་ཞིག་ཡིན་པ་ངེས་ཤེས་ཐུབ་སོང་། ངས་༸གོང་ས་མཆོག་གི་དགོངས་ཚུལ་ལྟར་རྒྱ་བོད་མི་རིགས་དབར་སྒྲིག་འཇགས་ཡོང་རྒྱུའི་སླད་ང་རང་ངོས་ནས་འབད་བརྩོན་གང་ཡོད་ཞུ་གི་ཡིན། ངས་རྒྱ་རིགས་མང་པོ་ཞིག་གི་བསམ་ཚུལ་ལ་འགྱུར་བ་གཏོང་ཐུབ་པ་བྱུང་། ཅེས་དང་། ༸གོང་ས་༸སྐྱབས་མགོན་ཆེན་པོ་མཆོག་གིས་བོད་རང་བཙན་རྩོད་ལེན་གནང་གི་མེད། ཅེས་གསུངས་མ་ཐག་རྒྱ་རིགས་མང་དག་ཅིག་གི་ལངས་ཕྱོགས་ལ་འགྱུར་བ་ཕྱིན་ཡོད་པ་རེད། ཅེས་བརྗོད་ཡོད་པ་རེད། ཁོང་གིས་མུ་མཐུད་ནས་གསུང་དོན། རྒྱ་རིགས་མང་པོ་ཞིག་ནས་བོད་ཀྱི་གནད་དོན་ཐོག་གོ་བ་ལོག་སྒྲུབ་བྱས་ཏེ་བོད་མི་རིགས་ལ་སྡང་སེམས་དང་། འཁོན་འཛིན་བྱེད་ཀྱི་ཡོད་པ་དེ་དག་མེད་པ་བཟོ་རྒྱུའི་ཆེད་འབད་བརྩོན་ཡོད་རྒུ་རྩ་དྲུག་བྱ་རྒྱུ་དང་། དེས་རྐྱེན་པས་བོད་མི་རིགས་དང་རྒྱ་མི་རིགས་འབྲེལ་ལམ་བཟང་དུ་འགྲོ་རྒྱུ་དང་། དེ་འདྲ་བྱུང་ན་ཕན་ཚུན་ཞི་བདེ་མཉམ་གནས་བྱེད་ཐུབ་ཀྱི་རེད། ཅེས་བརྗོད་ཡོད་པ་རེད།།
