ཕྱི་ལོ་ ༢༠༠༨ ཟླ་ ༧ ཚེས་ ༡༡ རེས་གཟའ་པ་སངས།

༄༅། །རྒྱལ་སྤྱིའི་གསར་ལམ་ཁག་ནས་གནས་ཚུལ་སྤེལ་གསལ་ལྟར་ན། ལྷོ་ཨ་ཕི་རི་ཀའི་རྒྱལ་ས་པི་ཊོ་རིཡ་(Pretroria)ནང་བོད་མི་གཙོས་བོད་དོན་རྒྱབ་སྐྱོར་བ་མི་གྲངས་ ༥༠ ལྷག་ནས་ཞི་བའི་རྔམ་སྟོན་ཁྲོམ་སྐོར་ཞིག་གནང་ཡོད་པ་རེད། རྔམ་སྟོན་ཁྲོམ་སྐོར་བ་ཚོས་སྟོད་གོས་མཚོན་མདོག་ལ་ཝི་ང་གྱོན་པའི་ཐོག་ཏུ་༼བོད་ནང་ཞི་བདེ་༽ཞེས་དབྱིན་ཡིག་ཐོག་བྲིས་ཡོད་པ་རེད། ལག་ཏུ་བོད་ཀྱི་རྒྱལ་དར་འཁྱེར་ཡོད་པ་དང་། འཕྲེད་དར་དང་ལག་འཆང་ཐོག་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཁྲི་ལོ་བརྟན་པ་ཤོག བོད་ནང་མི་གསོད་ཁྲག་སྦྱོར་དང་སྡུག་སྦྱོང་མཚམས་འཇོག་བྱེད་དགོས། ཆབ་སྲིད་བཙོན་པ་ཡོངས་རྫོགས་གློད་བཀྲོལ་གཏོང་དགོས། ཧུའུ་ཅིང་ཐའོ་ཡིས་༸གོང་ས་༸སྐྱབས་མགོན་ཆེན་པོ་མཆོག་དང་འབྲེལ་མོལ་སྙིང་ཐག་པ་ནས་ཞུ་གི་ཡོད་པ་གསལ་སྟོན་བྱེད་དགོས་སོགས་བཀོད་ཡོད་པ་འཁྱེར་ནས་ལྷོ་ཨ་ཕི་རི་ཀའི་རྒྱལ་ས་པིརིཊོ་རིཡའི་རྒྱ་ནག་གཞུང་ཚབ་ཁང་གི་མདུན་དུ་བསྐྱོད་ཡོད་པ་རེད།

ལྷོ་ཨ་ཕི་རི་ཀའི་བོད་དོན་རྒྱབ་སྐྱོར་བ་ཚོས་བོད་མིར་རྒྱབ་སྐྱོར་མཚོན་སླད་ཞི་བའི་རྔམ་སྟོན་ཁྲོམ་སྐོར་གནང་བཞིན་པ།

ཐེངས་འདིའི་ལས་འགུལ་དེ་སྣེ་འཁྲིད་གནང་མཁན་ནི་ལྷོ་ཨ་ཕི་རི་ཀའི་བོད་དོན་རྒྱབ་སྐྱོར་བ་སྐུ་ཞབས་ཨན་ཌིརསེ་ལ་བུསེ་ཆག་ནི་(Andreas Labuschagne)ལགས་ཡིན་པ་རེད། ལས་འགུལ་དེའི་ནང་ས་ཁུལ་དེའི་ནང་ཡོད་པའི་རྒྱལ་སྤྱིའི་ཉེས་ཡངས་ཚོགས་པའི་ཚོགས་མི་དང་། འབར་མའི་རང་དབང་ལས་འགུལ་ཚོགས་པའི་ཚོགས་མི་རྣམས་ཀྱང་གདུང་སེམས་མཚོན་སླད་མཉམ་ཞུགས་གནང་ཡོད་པ་རེད།

ཞི་བའི་རྔམ་སྟོན་ཁྲོམ་སྐོར་བ་ཚོ་རྒྱ་ནག་གཞུང་ཚབ་ཁང་གི་མདུན་དུ་འབྱོར་བའི་སྐབས་སྐུ་ཞབས་ཨན་ཌིརསེ་ལགས་ཀྱིས་གཞུང་ལམ་གྱི་དཀྱིལ་དུ་ཕེབས་ནས་ཞུ་ཡིག་ཤོག་ལེ་གཉིས་སྒྲོག་སྦྱངས་གནང་ཡོད་པ་དང་དེ་རྗེས་ཞུ་ཡིག་དེ་རྒྱ་ནག་གཞུང་ཚབ་ཁང་ལ་སྤྲད་སྐབས་གཞུང་ཚབ་ཁང་དེའི་དཔོན་རིགས་ཤིག་གིས་རྒྱལ་སྒོའི་མཚམས་ནས་ལེན་ཡོད་པ་རེད་འདུག

ཞུ་ཡིག་དེའི་ནང་། ཉེ་ཆར་རྒྱ་ནག་ནང་གོད་ཆགས་བྱུང་བར་སྙིང་ཐག་པ་ནས་སྨོན་ལམ་རྒྱག་རྒྱུ་དང་ཆབས་ཅིག་རྒྱ་ནག་གཞུང་གི་ངོས་ནས་བོད་ལ་མིང་དོན་མཚུངས་པའི་རང་སྲིད་རང་སྐྱོང་གི་གནས་འབབ་ཅིག་སྤྲད་དེ། གཞན་གྱིས་ཐེ་བྱུས་གང་ཡང་མེད་པའི་ཐོག་ནས་བོད་མི་ཚོར་སྨྲ་བརྗོད་རང་དབང་དང་། ཆོས་དད་རང་དབང་རྒྱ་ནག་གི་རྩ་ཁྲིམས་ནང་བཀོད་པ་དེ་ཚོ་དངོས་སུ་སྤྲོད་ཕྱོགས་ཐོག་དགོངས་བཞེས་ནན་པོ་གནང་དགོས་པའི་འདུན་པ་སྟོན་ཡོད་པ་རེད།

ཡང་ཞུ་ཡིག་དེའི་ནང་། རྔམ་སྟོན་ཁྲོམ་སྐོར་གནང་མཁན་རྣམས་ཉེ་ལམ་ཕྱི་ལོ་ ༢༠༠༨ ཟླ་ ༣ པའི་ནང་ཞི་བའི་ངོ་རྒོལ་བྱེད་མཁན་ཚོའི་ཐོག་དྲག་མནོན་བྱས་ཏེ་མི་མང་པོ་ཞིག་བསད་རྨས་བྱུང་བའི་གྲངས་འབོར་གྱི་གནད་དོན་ཐད་བློ་འཚབ་ཧ་ཅང་ཆེན་པོ་ཡོད་ལུགས་དང་། མུ་མཐུད་འཁོད་དོན། ང་ཚོའི་ངོས་ནས་རྩོད་པ་ཇི་འདྲ་ཞིག་རུང་རྡུང་རྡེག་ཚ་ནན་གཏོང་རྒྱུ་དང་། རྒྱལ་གཅེས་ཆོས་གཅེས་སློབ་གསོའི་ལས་འགུལ། ཞེས་པའི་སྲིད་བྱུས་དེ་འདྲའི་ལམ་ནས་ཞི་བའི་ལས་ངོ་རྒོལ་བྱེད་མཁན་ཚོ་དྲག་མནོན་ཚབས་ཆེ་བྱེད་རྒྱུའི་ཚབ་ཏུ་གདོང་དང་གདོང་ཐུག་སྐད་ཆ་བཤད་ན་སེལ་ཐུབ་ཀྱི་རེད། ཅེས་བཀོད་ཡོད་རེད།

དེ་བཞིན་བོད་མི་ཚོའི་མདུན་ལམ་ཆེད་༸གོང་ས་༸སྐྱབས་མགོན་ཆེན་པ་མཆོག་དང་རྒྱ་ནག་གི་སྲིད་འཛིན་ཧུའུ་ཅིང་ཐའོ་དབར་གྲུབ་འབྲས་སོན་པའི་ཞི་མོལ་གནང་དགོས་པ་གལ་ཆེན་པོ་ཡིན་ལུགས་སོགས་བཀོད་ཡོད་པ་རེད།

ཞུ་ཡིག་དེའི་འདྲ་བཤུས་ཨ་ཕི་རི་ཀའི་སྲིད་འཛིན་ཐ་བུ་བི་ཀི་(Thabo Mbeki) མཆོག་དང་ཕྱི་སྲིད་བློན་ཆེན་ཌོག་ཊར་ཌ་ལ་མི་ནི་ཛུ་མ་(Dr.Dlamini Zuma)དང་། འཛམ་གླིང་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་དྲུང་ཆེ་བཅས་ལ་ཕུལ་ཡོད་པ་བཅས་ཀྱི་གནས་ཚུལ་སྙིང་བསྡུས་སུ།།