ཕྱི་ལོ་ ༢༠༠༨ ཟླ་ ༧ ཚེས་ ༡༡ རེས་གཟའ་པ་སངས།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་དགུང་གྲངས་ ༧༣ ལ་ཕེབས་པའི་སྐུའི་འཁྲུངས་སྐར་དུས་ཆེན་ས་གནས་སྐུ་ཚབ་དོན་ཁང་གི་གོ་སྒྲིག་འོག་སྲུང་བརྩི་བགྱིས་པའི་ཉིན་བོད་མི་དང་། སྐུ་མགྲོན་མི་གྲངས་ ༦༠ སྐོར་འདུ་འཛོམས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བཏང་རྗེས། འདི་ལོའི་གསུམ་དུས་ནས་བཟུང་གཞི་ལུས་རྒྱལ་གཅེས་བོད་མི་བརྒྱ་ཁྲག་བརྒལ་བ་འདས་རྨས་འཇུ་བཟུང་བྱས་ཡོད་པ་དག་གི་དོན་དུ་སྐར་མ་གཅིག་རིང་ངག་བཅད་མྱ་ངན་གུས་བཏུད་ཞུས་ཤིང་། སྐུ་མགྲོན་རྣམས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་དཔར་མཐོང་གྲོལ་རིན་པོ་ཆེར་གུས་བཀུར་ལྡན་པའི་སྒོ་ནས་སྐུ་ཕྱག་ཕུལ་ཏེ་མཇལ་ཁ་ཞུས་ཡོད་པ་རེད།
དེ་རྗེས་སྐུ་མགྲོན་རྣམས་ལ་ས་གནས་སྐུ་ཚབ་དོན་གཅོད་བསོད་ནམས་བསྟན་འཛིན་ལགས་ནས་༸གོང་ས་མཆོག་གི་སྐུ་ཚབ་རྒྱ་ནག་གི་རྒྱལ་ས་པེ་ཅིང་དུ་བསྐྱོད་དེ་ཉིན་གཉིས་རིང་འབྲེལ་མོལ་ཐེངས་བདུན་པ་གནང་ཡོད་པ་ངོ་སྤྲོད་ཞུས་པ་དང་ཆབས་ཅིག་གསུང་དོན་། འདི་ལོ་ཕྱི་ཟླ་ ༣ ནས་བཟུང་གཞིས་ལུས་བོད་མིས་རྒྱ་ནག་གཞུང་གིས་བོད་ཐོག་འཛིན་པའི་སྲིད་བྱུས་ལ་ཞི་རྒོལ་བྱས་རྐྱེན་རྒྱལ་གཅེས་བོད་མི་ ༢༡༠ སྐོར་རྐྱེན་འདས་སུ་གྱུར་ཡོད་པ་དང་། ཆིག་སྟོང་སྐོར་ལ་རྨས་སྐྱོན་བྱུང་ཡོད་པ་མ་ཟད། བོད་མི་ ༥༧༩༢ སྐོར་འཇུ་གཟུང་བཙོན་བཅུག་གིས་མནར་གཅོད་མྱོང་མུས་སུ་མཆིས། ད་དུང་རྒྱ་ནག་གཞུང་གིས་༸གོང་ས་མཆོག་ལ་ཆེད་མངགས་ཉེས་འཛུགས་བྱེད་དང་བྱ་མུས་དེར་གཞི་རྩ་མེད་པ་དང་། བདེན་པ་མིན་པ་ནི་སྤྱིར་རྒྱ་ཆེའི་མང་ཚོགས་དང་ཡང་སྒོས་འཛམ་གླིང་གི་དབུ་ཁྲིད་རྣམ་པ་། དེ་བཞིན་སྲིད་གཞུང་ཁག་ནས་ཀྱང་གནས་ཚུལ་ཡོངས་རྗོགས་མཁྱེན་གྱི་ཡོད་པ་མ་ཟད། འཛམ་གླིང་གི་དབུ་ཁྲིད་རྣམས་ནས་༸གོང་ས་མཆོག་དང་། བཙན་བྱོལ་བོད་གཞུང་ལ་བོད་རྒྱའི་དཀའ་རྙོག་ཞི་བའི་ལམ་ནས་སེལ་ཐབས་སུ་རྒྱ་ནག་གཞུང་ལ་འབྲེལ་མོལ་རྒྱུན་མཐུད་དགོས་པའི་བསྐུལ་མ་བཏང་དང་གཏོང་བཞིན་པར་སོང་༸གོང་ས་མཆོག་གིས་དབུ་མའི་ལམ་གྱི་མཛད་བྱུས་ལ་འགྱུར་མེད་དམ་འཛིན་བགྱིས་མུས་ཡིན་པས་དེར་བཙན་བྱོལ་བོད་མི་མང་སྤྱི་འཐུས་ལྷན་ཚོགས་ནས་མོས་མཐུན་གཏན་འབེབས་མཛད་ཡོད་པ་དང་། རྒྱ་ཆེའི་བོད་མི་མང་ཚོགས་ནས་ཀྱང་རྒྱབ་བསྐྱོར་ཐོབ་ཡོད་པ་རེད་ཅེས། གཏམ་བཤད་གནང་གྲུབ་པའི་མཇུག་ཏུ་སྐུ་མགྲོན་རྣམས་ལ་གུང་ཚིགས་གཤམ་ནས་དེ་ཉིན་མཛད་སྒོ་ལེགས་གྲུབ་བྱུང་ཡོད་པའི་གནས་ཚུལ་སྙིང་བསྡུུས་སུ།།
