ཕྱི་ལོ་ ༢༠༠༨ ཟླ་ ༧ ཚེས་ ༡༡ རེས་གཟའ་པ་སངས།

༄༅། །ཡུ་རོབ་གྲོས་ཚོགས་ཀྱི་ཚོགས་གཙོ་སྐུ་ཞབས་ཧནསེ་གྷརཌེ་པོཊར་རིང་(Hans-Gert Pottering) མཆོག་ནས་གསུང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་རྣམས་དང་རྒྱ་ནག་དབུ་ཁྲིད་དབར་ཕྱི་ཟླ་ ༧ པའི་ཟླ་སྟོད་ཀྱི་ཐུག་འཕྲད་དེ་ལ་ཆ་འཇོག་ཤུགས་ཆེ་བྱས་ཀྱང་བོད་མིའི་༸སྐྱབས་མགོན་ཏཱ་ལའི་བླ་མཆོག་གི་སྐུ་ཚབ་རྣམ་པས་གསར་འགོད་གསལ་བསྒྲགས་སྤེལ་བ་བཞིན་བོད་ལ་ཕན་པའི་གྲུབ་འབྲས་གང་ཡང་བྱུང་མིན་འདུག ཅེས་གསུངས་ཡོད་པ་རེད། ཚོགས་གཙོ་པོཊར་རིང་མཆོག་གིས་ཡུ་རོབ་གྲོས་ཚོགས་ནས་ཕྱི་ལོ་ ༢༠༠༨ ཟླ་ ༤ ཚེས་ ༡༠ ཉིན་ཅི་སྟེ་བོད་མིའི་༸སྐྱབས་མགོན་ཏཱ་ལའི་བླ་མ་མཆོག་དང་རྒྱ་གཞུང་གི་དབུ་ཁྲིད་དབར་འབྲེལ་མོལ་བསྐྱར་མཐུད་མ་བྱུང་ཚེ་མཛད་སྒོར་ཕེབས་རྒྱུ་མིན། ཞེས་ཕྱི་ཟླ་ ༨ ཚེས་ ༨ ཉིན་གྱི་ཨོ་ལེམ་པིཀ་རྩེད་འགྲན་གྱི་དབུ་འབྱེད་མཛད་སྒོ་དང་འབྲེལ་བའི་གྲོས་ཆོད་བཞག་པ་བསྐྱར་བརྗོད་གནང་ཡོད་པ་རེད།

ཁོང་གིས་མུ་མཐུད་གསུང་དོན། ད་བར་འབྲེལ་མོལ་བྱུང་བ་དེ་དག་གྲུབ་འབྲས་སོན་པ་གང་ཡང་བྱུང་མེད་སྟབས་ངོས་ཨོ་ལེམ་པིཀ་རྩེད་འགྲན་གྱི་དབུ་འབྱེད་མཛད་སྒོར་བསྐྱོད་རྒྱུ་མིན་པའི་ཐག་གཅོད་བྱས་པ་ཡིན། ཡིན་ནའང་ངས་བོད་མིའི་༸སྐྱབས་མགོན་ཏཱ་ལའི་བླ་མ་མཆོག་གི་སྐུ་ཚབ་དང་རྒྱ་ནག་གཞུང་གི་དབར་གང་མགྱོགས་དོན་ཕན་ཅན་གྱི་འབྲེལ་མོལ་མུ་མཐུད་ཡོང་རྒྱུར་རེ་བ་ཆེན་པོ་བྱེད་ཀྱི་ཡོད།

བོད་མིའི་༸སྐྱབས་མགོན་ཏཱ་ལའི་བླ་མ་མཆོག་གིས་དུས་རྒྱུན་དུ་ཞི་བའི་ལས་འགུལ་ལ་རྒྱབ་སྐྱོར་གནང་བ་ལས་བོད་རང་བཙན་རྩོད་མཁན་རྣམས་ལ་རྒྱབ་སྐྱོར་གནང་གི་མེད། དེའི་ཚབ་ལ་ཁོང་གིས་དབུ་མའི་ལམ་གྱི་ཐོག་ནས་བོད་ཀྱི་རིག་གཞུང་དང་། ཆོས་དད་རང་མོས་རང་སྲིད་རང་སྐྱོང་གི་གྲོས་འཆར་འདོན་གནང་མཛད་ཡོད་པ་ལས་རྒྱ་ནག་རྒྱལ་ཁབ་ཀྱི་ཆིག་བསྒྲིལ་ལ་དུས་ནམ་ཡང་གནོད་ཚབ་བཟོ་ཡི་མེད་པ་རེད། ཁོང་གི་གྲོས་འཆར་དེར་ཡུ་རོབ་གྲོས་ཚོགས་ཀྱི་རྒྱབ་སྐྱོར་ཆ་ཚང་ཡོད་པ་རེད།

རྒྱ་ནག་གཞུང་གིས་ཐོག་མར་རྒྱ་ནག་ནང་ཨོ་ལེམ་པིཀ་ཚོགས་ཆོག་རྒྱུའི་ཐག་གཅོད་བྱེད་སྐབས་རྒྱ་གཞུང་ནས་ཡོངས་གྲགས་ཀྱིས་འགྲོ་བ་མིའི་ཐོབ་ཐང་དང་། གྲངས་ཉུང་མི་རིགས་ཀྱི་ཐོབ་ཐང་ཁས་ལེན་གསལ་བསྒྲགས་བྱས་པ་དེ་ལ་གུས་བརྩི་ཞུ་རྒྱུར་ང་ཚོས་རེ་བ་ཤུགས་ཆེ་བྱེད་ཀྱི་ཡོད། དེ་ནི་རྒྱ་ནག་གཞུང་གི་ངོས་ནས་བརྗོད་ན་ཁོང་ཚོ་འཛམ་གླིང་ནང་སྒོ་མོ་ཕྱེ་རྒྱུ་དང་། རྒྱལ་སྤྱིའི་ངོས་འཛིན་ཡོད་པའི་གཞི་རྩའི་ཐོབ་ཐང་ལ་ངོས་ལེན་ཡོད་པ་གསལ་འདོན་བྱེད་རྒྱུའི་གོ་སྐབས་བཟང་པོ་ཞིག་རེད། ཅེས་གསུངས་ཡོད་པ་རེད།།