༠༨།༧།༢༡
རྔ་བ་རྫོང་ཁོངས་ཀྱི་མི་གསུམ་ལ་ཁྲིམས་ཆད་བཏང་བ། ཕྱི་ཟླ་ ༧ ཚེས་ ༡༠ ཡས་མས་སུ་ཟི་ཁྲོན་ཞིང་ཆེན་རྔ་པ་རང་སྐྱོང་ཁུལ་འབྲིང་རིམ་མི་དམངས་ཁྲིམས་ཁང་ནས་མི་གསུམ་ལ་ཟླ་ ༣ ཚེས་ ༡༦ ཉིན་རྔ་བ་ཁུལ་དུ་ངོ་རྒོལ་ནང་ཞུགས་པའི་ཉེས་འཛུགས་འོག་དུས་བཀག་བཙོན་བཅུག་གི་ཁྲིམས་ཐག་བཅད་ཡོད་འདུག དེ་ཡང་རྔ་བ་རྫོང་ཁོངས་ཀྱི་རྔ་སྨད་གློ་རྟ་ཤང་ནས་ཡིན་ཞིང་རང་ལོ་ ༢༣ སོན་པའི་སྐལ་བྷར་ཚེ་བརྩོན་དང་། གྲོང་སྟོད་ཚང་ནས་ཡིན་ཞིང་རང་ལོ་ ༢༥ སོན་པའི་གཏེར་མཛོད་ལ་དུས་བཀག་བཙོན་འཇུག་ལོ་ ༡༥ དེ་བཞིན་གོང་མ་ཚང་ནས་ཡིན་ཞིང་རང་ལོ་ ༢༧ སོན་པའི་ཚེ་ཁོར་དུས་བཀག་བཙོན་འཇུག་ལོ་ ༡༣ བཅས་ཀྱི་ཁྲིམས་ཆད་བཏང་འདུག
སློབ་གསོའི་ལས་འགུལ་རྐྱེན་གྱིས་ཉག་ཆུ་རྫོང་ཁོངས་གྲྭ་བ་ཞིག་གིས་རང་སྲོག་བཅད་པ། ཕྱི་ཟླ་ ༦ ཚེས་ ༡༨ ཉིན་ཁམས་ཉག་ཆུ་རྫོང་ཁོངས་མི་ཉག་འདྲ་པ་ཡང་ལྡན་དགོན་གྱི་གྲྭ་སྤྲང་མ་ཞུ་བ་ཞིག་རྒྱལ་གཅེས་རིང་ལུགས་ཀྱི་སློབ་གསོའི་ལས་འགུལ་ཁྲོད་༸གོང་ས་མཆོག་ལ་མཚན་སྨད་ཞུ་རྒྱུ་དང་། དགོན་པའི་སྟེང་རྒྱ་མིའི་རྒྱལ་དར་སྒྲེང་འཛུགས་བྱ་དགོས་པ་སོགས་དང་ལེན་བྱས་མ་ཐུབ་པར་རང་སྲོག་གཅོད་དགོས་བྱུང་འདུག དོན་རྐྱེན་དེའི་སྐོར་ཕྱི་ཕྱོགས་སུ་བཤད་ཚེ་ལས་དོན་རུ་ཁག་ནས་ལས་སླ་པོར་འཇོག་རྒྱུ་མིན་པའི་འཇིགས་སྐུལ་བྱས་ཡོད་པ་མ་ཟད། ཁོང་གི་མ་རྒན་ཨ་ཆེ་ལའང་དེ་ལྟའི་སྡིགས་ར་བསྐུལ་ཡོད་འདུག གོང་གསལ་དགེ་འདུན་པས་རང་སྲོག་བཅད་རྐྱེན་ལས་དོན་རུ་ཁག་རྣམས་གནས་སྐབས་རིང་ཕྱིར་འཐེན་བྱས་ཡོད་འདུག དགོན་པ་དེར་སློབ་ཕྲུག་ ༣༠ ཙམ་ལྡན་པའི་ནང་དོན་རིག་པའི་སྐོར་སློབ་གཉེར་བྱེད་ཡུལ་སློབ་གྲྭ་ཞིག་ཡོད་པ་དེའང་སློབ་གསོའི་ལས་འགུལ་ཁྲོད་སྒོ་རྒྱབ་བཅུག་ཡོད་འདུག
འབའ་ཐང་རྫོང་ཁོངས་འབའ་གླིང་ཁ་ཤོད་དང་སྒང་རི་ལུང་པ་གཉིས་ཀྱི་སྐྱེས་པ་རྣམས་རི་མགོར་བྲོས་བྱོལ་དུ་ཕྱིན་པ། ཕྱི་ཟླ་ ༧ ཚེས་ཤར་ཙམ་དུ་འབའ་ཐང་རྫོང་ཁོངས་གླིང་ཁ་ཤོད་དང་སྒང་རི་ལུང་པ་གཉིས་བར་སྔོན་མ་ནས་ས་གྱོད་ཀྱི་རྩོད་རྙོག་ཡོད་པ་དེ། ཉེ་ལམ་ཉིན་གསུམ་བཞིའི་སྔོན་གད་མོའི་བརྒྱ་དཔོན་བྱམས་པ་རྒྱལ་མཚན་ཞེས་པའི་མི་སྐྱ་ཤུགས་རྐྱེན་ཆེན་པོ་ཡོད་པ་ཞིག་གིས་བར་འདུམ་བྱས་ཏེ། གནས་ཚུལ་ཞི་འཇམ་དུ་སོང་ཡོད་ཀྱང་། འབའ་ཐང་རྫོང་གི་ཉེན་རྟོག་པ་ཁག་དང་ལས་བྱེད་ཁག་ཅིག་ས་གནས་སུ་ཡོང་སྟེ། རྒྱ་ནག་གཞུང་ལས་གཞན་སུ་ལའང་ས་གྱོད་འདུམ་སྒྲིག་བྱེད་རྒྱུའི་དབང་ཆ་མེད་ཅེས་བཤད་དེ། རྩོད་གཞིའི་ས་ཆ་དེ་བཞིན་གླིང་ཁ་ཤོད་ལ་སྤྲོད་དགོས་པའི་ཐག་གཅོད་བྱས་པར་བརྟེན། སྒང་རི་ལུང་པའི་མི་རྣམས་ཁོང་ཁྲོ་ལངས་ཏེ། ཁྱོད་ཚོས་དེ་ལྟར་ཐག་གཅོད་བྱས་པ་དྲང་པོ་མིན་པ་དང་། ང་ཚོ་བོད་མིའི་དབར་ཆེད་མངགས་དཀྲུག་ཤིང་རྒྱག་གི་འདུག དེ་འདྲ་ཡིན་ན་ང་ཚོས་ཁྱེད་ཚོ་ལ་ཉན་ཐུབ་པ་མེད། ཁྱེད་ཚོ་མར་རྒྱུགས་ཞེས་བཤད་སྐབས། ཉེན་རྟོག་པས་མེ་མདའ་བསྟན་ཏེ་འཇིགས་སྐུལ་བྱས་པར་བརྟེན་མང་ཚོགས་དེ་བས་ཀྱང་ཁོང་ཁྲོ་ལངས་ཏེ། བོད་ཀྱི་བདག་པོ་བོད་མི་ཡིན། ༸རྒྱལ་བ་རིན་པོ་ཆེ་སྐུ་ཚེ་ཁྲི་ལོར་བརྟན་པར་ཤོག བོད་རང་བཙན་གཙང་མ་ཡིན་སོགས་སྐད་འབོད་བྱས་རྐྱེན་ལས་བྱེད་པ་དང་ཉེན་རྟོག་པ་རྣམས་བྲོས་དགོས་བྱུང་འདུག
དེ་རྗེས་རྫོང་དཔོན་གྱིས་སྣེ་འཁྲིད་པའི་དམག་མིའི་སྣུམ་འཁོར་ཆེ་བ་གཉིས་དང་ལས་དོན་རུ་ཁག་བཅས་ས་གནས་སུ་དྲག་གནོན་བྱེད་པར་འཕྲལ་དུ་སླེབས་ཀྱང་། སྒང་རི་ལུང་པའི་སྐྱེས་པ་ཡོངས་རྫོགས་རི་མགོར་བྲོས་ཡིབ་ཏུ་ཕྱིན་འདུག ད་ལྟ་དམག་མི་དང་ཉེན་རྟོག་པ་ཚོ་སྒང་རི་ལུང་པར་མུ་མཐུད་སྡོད་ཅིང་། རི་མགོར་བྲོས་པའི་སྐྱེས་པ་རྣམས་མགོ་བཏགས་ཞུ་བར་ཡོང་དགོས་པའི་བཀའ་བཏང་འདུག་ཀྱང་། ད་ཕན་སུས་ཀྱང་མགོ་བཏགས་ཞུས་མེད། སྤྱིར་བཏང་སྒང་རི་ལུང་པར་ཁྱིམ་ཚང་བརྒྱ་ལྷག་ཙམ་ཡོད་འདུག
