ཕྱི་ལོ་ ༢༠༠༨ ཟླ་ ༧ ཚེས་ ༧ རེས་གཟའ་ཟླ་བ།
༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་རྣམས་དང་རྒྱ་ནག་གཞུང་གི་སྐུ་ཚབ་རྣམས་བོད་རྒྱ་འབྲེལ་མོལ་ཐེངས་བདུན་པ་རྒྱ་ནག་གི་རྒྱལ་ས་པེ་ཅིང་དུ་གནང་བཞིན་པ།
༄༅། །བོད་མིའི་ཆོས་སྲིད་གཉིས་ཀྱི་མངའ་བདག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་མཆོག་ནས་ཕྱི་ལོ་ ༢༠༠༨ ཟླ་ ༧ ཚེས་ ༥ ཉིན་ལས་བྱེད་གསོལ་ཚིགས་ཁང་གི་ཡང་སྟེང་ཚོགས་ཁང་དུ་གསར་འགོད་ལྷན་ཚོགས་མ་གནང་སྔོན་དབྱིན་ཡིག་ཐོག་ནས་གསར་འགོད་གསལ་བསྒྲགས་ཤིག་སྤེལ་དོན།
སྐུ་ཚབ་སྐལ་བཟང་རྒྱལ་མཚན་ངོས་གཉིས་དང་ཕྱག་རོགས་རྒན་པ་བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་མི་དྭགས་པོ་བསོད་ནམས་ནོར་བུ་དང་། བུ་ཆུང་ཚེ་རིང་། ལས་དོན་ཚོགས་ཆུང་གི་ལས་བྱེད་འཇིགས་མེད་པ་སངས་བཅས་ཕྱི་ལོ་ ༢༠༠༨ ཟླ་ ༦ ཚེས་ ༣༠ ནས་ཟླ་ ༧ ཚེས་ ༣ བར་པེ་ཅིང་དུ་བསྐྱོད་པ་ཡིན།
ཕྱི་ཟླ་ ༧ ཚེས་ ༡ ཉིན་ང་ཚོས་རྒྱལ་ཡོངས་ཆབ་སྲིད་གྲོས་ཚོགས་ཀྱི་ཚོགས་གཙོ་གཞོན་པ་དང་དབུས་འཐབ་ཕྱོགས་གཅིག་འགྱུར་གྱི་བློན་ཆེན་ཏའུ་ཆིང་ལིན་དང་ཐུག་འཕྲད་བྱས་པ་ཡིན། དམར་ཤོག་ཚོགས་པའི་ཚོགས་ཆེན་ཐེངས་ ༡༧ པའི་རྗེས་ཏུའུ་ཆིང་ལིན་གྱིས་ད་ལྟའི་ལས་གནས་འདི་བཞེས་པའི་རྗེས་ང་ཚོ་ཁོང་དང་ཐུག་འཕྲད་བྱས་པ་དང་པོ་དེ་ཡིན། ཁོང་གིས་རྒྱ་ནག་གི་ནང་ཁུལ་གནས་ཚུལ་དང་རྒྱལ་སྤྱིའི་གནས་སྟངས། དེ་བཞིན་རྒྱ་ནག་གིས་བོད་ཐོག་འཛིན་པའི་སྲིད་བྱུས་ཁག་སྤྱི་ཡོངས་ངོ་སྤྲོད་གནང་བྱུང་། ང་ཚོས་བོད་ཀྱི་གནད་དོན་ཐག་གཅོད་ཡོང་ཆེད་༸གོང་ས་མཆོག་གི་གཞི་རྩའི་དགོངས་པ་བཞེས་ཕྱོགས་ངོ་སྤྲོད་དང་། དེ་བཞིན་སིི་ཁྲོན་ནང་ས་ཡོམ་གྱིས་གོད་ཆགས་ཕོགས་པ་རྣམས་ལ་ཐུགས་གསོའི་འཚམས་འདྲི་ཞུ་རྒྱུའི་གོ་སྐབས་བླངས་པ་ཡིན།
ང་ཚོ་རྒྱ་ནག་གི་བོད་རིག་པའི་ཞིབ་འཇུག་བསྟི་གནས་ཁང་དུ་བསྐྱོད་སྐབས་ཞིབ་འཇུག་ཁང་གི་འགན་འཛིན་ལྷག་པ་ཕུན་ཚོགས་ལགས་དང་འགན་འཛིན་གཞོན་པ་ཀྲུའུ་ཤའོ་མིང་གཉིས་ནས་སྣེ་ལེན་གནང་བྱུང་། མཁས་པ་ཚོས་ཞིབ་འཇུག་གི་ལས་གཞི་ཁག་འགྲེལ་བརྗོད་དང་འབྲེལ་བའི་ང་ཚོའི་དབར་གྲོས་སྡུར་ཡག་པོ་བྱུང་། ང་ཚོས་མཁས་པ་ཚོའི་ཞིབ་འཇུག་ལས་གཞི་ཁག་ལ་བསྔགས་བརྗོད་ཞུས་པ་མ་ཟད། བོད་ཀྱི་ལོ་རྒྱུས་ཀྱི་མཚོན་པའི་གནད་དོན་ཁག་ལ་ཞིབ་འཇུག་གནང་སྐབས་ཕྱོགས་ཞེན་མེད་པ་དང་བློ་གཟུ་བོར་གནས་པའི་སྒོ་ནས་གནང་ན་བལྟ་ཚུལ་འདྲ་མིན་ཁག་ལ་གོ་རྟོགས་ཡང་དག་པ་ཡོང་བར་ཕན་ཚུན་ནན་བརྗོད་བྱས་པ་ཡིན།ཕྱི་ལོ་ ༢༠༠༨ ཟླ་ ༧ ཚེས་ ༢ ཉིན་བློན་ཆེན་གཞོན་པ་ཀྲུའུ་ཝེན་ཆོན་དང་། བློན་ཆེན་གཞོན་པ་སྲིད་མཐར་མཉམ་གྲོས་སྡུར་ཉིན་འཁྱོངས་བྱས་པ་ཡིན།
ཐེངས་འདིའི་ཐུག་འཕྲད་ནི་ང་ཚོའི་འབྲེལ་བ་ཛ་དྲག་ཆེ་བའི་སྐབས་སུ་བྱུང་བ་ཞིག་རེད། ཉེ་ཆར་བོད་ནང་བྱུང་བའི་དོན་རྐྱེན་དེ་དག་གིས་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱིས་བོད་ཐོག་འཛིན་པའི་སྲིད་བྱུས་ལ་བོད་མི་རྣམས་ཞེ་གཏིང་ནས་འདོད་བློ་མི་ཁེངས་པ་གསལ་གཏོན་བྱས་ཡོད། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་བརྟན་ལྷིང་དང་། ཆིག་བསྒྲིལ། མི་རིགས་ཚང་མ་འཆམ་མཐུན་ཡོང་ཆེད་སྙིང་སྟོབས་དང་འཆར་སྣང་གི་སྒོ་ནས་གནད་དོན་འདིར་ལྷག་བསམ་རྣམ་དག་གིས་འབད་རྩོལ་གནང་རྒྱུའི་ཛ་དྲག་གི་གནས་སྟངས་ཆགས་ཡོད་པ་ནི་གསལ་པོ་རེད། ལྷག་དོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ངོས་ནས་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་སྒྲོམ་གཞིའི་ནང་ཐག་གཅོད་ཡོང་ཐབས་གནང་བཞིན་ཡོད་ཀྱང་། རྒྱལ་སྤྱིའི་ནང་དོ་སྣང་ཤུགས་ཆེ་བྱེད་སའི་གནད་དོན་ཞིག་ཡིན་པ་ནི་དངོས་དོེན་རེད། འདིའི་ཐད་ང་ཚོའི་རེ་བར་ཐེངས་འདིའི་གྲོས་སྡུར་སྐབས་རྒྱ་ནག་གི་དབུ་ཁྲིད་ཚོོས་ང་ཚོའི་འབད་རྩོལ་དང་མཚུངས་པར་དངོས་དོན་གྱི་གོམ་པ་མདུན་སྤོས་གནང་རྒྱུའི་རེ་བ་བྱས་པ་ཡིན། འོན་ཀྱང་དེ་ལས་ལྡོག་སྟེ་ཁོང་ཚོས་ཁྲིམས་མཐུན་གྱི་བདག་དབང་ལ་ཚད་ལས་བརྒལ་བའི་སེམས་ཁུར་བྱས་རྐྱེན་མཐའ་ན་ཕྱོགས་གཉིས་ཀས་འབྲེལ་མོལ་གྱི་ལས་རིམ་ལ་ཁས་ལེན་ཡོང་ཆེད་དུ་དམིགས་པའི་ང་ཚོའི་ཟུང་འབྲེལ་གསལ་བསྒྲགས་སྤེལ་རྒྱུའི་གྲོས་འཆར་ལའང་མོས་མཐུན་བྱས་མ་བྱུང་།
དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་མཆོག་དང་སྐུ་ཚབ་སྐལ་བཟང་རྒྱལ་མཚན་མཆོག་རྣམ་གཉིས་ཀྱིས་ཕྱི་ལོ་ ༢༠༠༨ ཟླ་ ༧ ཚེས་ ༥ ཉིན་ལས་བྱེད་གསོལ་ཚིགས་ཁང་གི་ཡང་སྟེང་ཚོགས་ཁང་དུ་གསར་འགོད་ལྷན་ཚོགས་སྐྱོང་བཞིན་པ།
རྒྱ་ནག་གི་ཕྱོགས་ནས་ཉེ་ཆར་བོད་ནང་བྱུང་བའི་དོན་རྐྱེན་རྣམས་༸གོང་ས་མཆོག་གིས་བསྐུལ་སློང་བྱེད་ཚུལ་དང་། པེ་ཅིང་ཨོ་ལེམ་པིཀ་རྩེད་འགྲན་ལ་གཏོར་རྒོལ་གཏོང་ཚུལ་གྱི་སྐྱོན་འཛུགས་བྱས་པ་རྣམས་ཁུངས་འཁྱོལ་གྱི་མེད་པ་གསལ་པོ་ཆགས་སྟབས། ད་མཚམས་ཁོང་ཚོས་༸གོང་ས་མཆོག་ལ་དྲག་ལས་དང་། འཇིགས་སྐུལ། ཨོ་ལེམ་པིཀ་རྩེད་འགྲན་ལ་གཏོར་རྒོལ་གཏོང་བ་བཅས་ལ་རྒྱབ་སྐྱོར་མི་བྱེད་པའི་འབོད་སྐུལ་བྱེད་ཀྱི་ཡོད། ༸གོང་ས་༸སྐྱབས་མགོན་ཆེན་པོ་མཆོག་དང་བོད་མིའི་འཐབ་རྩོད་ཀྱིས་དྲག་ལས་དང་འཇིགས་སྐུལ་སོགས་ལ་མཐའ་གཅིག་ཏུ་ངོས་ལེན་མི་བྱེད་པ་མ་ཟད་འགག་བྱ་གནང་གི་ཡོད་པ་འཛམ་གླིང་ཡོངས་ཀྱིས་ངོས་འཛིན་བསྔགས་བརྗོད་ཐོབ་ཡོད་སྟབས། སུས་ཀྱང་ང་ཚོར་དེ་འདྲའི་འབོད་སྐུལ་བྱེད་དགོས་མེད་པ་ཤུགས་ཆེན་པོའི་སྒོ་ནས་བཤད་པ་ཡིན། བོད་ཀྱི་གཞོན་ནུ་ལྷན་ཚོགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གི་དབུ་མའི་ལམ་ལ་རྒྱབ་སྐྱོར་མི་བྱེད་པར་བོད་རང་བཙན་གྱི་ལངས་ཕྱོགས་འཛིན་གྱི་ཡོད་ཀྱང་། རྒྱ་ནག་གིས་གཞོན་ནུ་ལྷན་ཚོགས་དྲག་སྤྱོད་པ་དང་འཇིགས་སྐུལ་བའི་སྒྲིག་འཛུགས་ཤིག་ཡིན་པའི་ཉེས་འཛུགས་ལ་གཐའ་གཅིག་ཏུ་ངོས་ལེན་མེད་པའི་ངོ་རྒོལ་བྱས་པ་ཡིན། ༸གོང་ས་༸སྐྱབས་མགོན་ཆེན་པོ་མཆོག་གིས་ཁ་བྲལ་དང་བོད་རང་བཙན་རྩོལ་སྒྲུབ་གནང་གི་མེད་པ་ཡོངས་གྲགས་ཐོག་ལན་མང་བསྐྱར་བརྗོད་གནང་ཟིན་པ་ཞིག་རེད།
གྲོས་སྡུར་གྱི་ཐོག་མཐའ་བར་གསུམ་དུ་ང་ཚོའི་དབར་གྱི་གནད་དོན་ནི་བོད་མི་རིགས་ཀྱི་བདེ་དོན་ཡིན་པ་ལས་༸གོང་ས་མཆོག་གི་སྐུ་སྒེར་གྱི་གནས་བབ་དང་ཁོང་གི་སྐོར་རམ། ཡང་ན་བཙན་བྱོལ་བོད་མིའི་སྐོར་མིན་པའི་འགྲེལ་བརྗོད་བསྐྱར་ནན་ཡང་བཤད་བྱས་པ་ཡིན།
གྲོས་སྡུར་གྱི་སྐབས་ང་ཚོས་རྒྱ་ཕྱོགས་ནས་ལྷག་བསམ་རྣམ་དག་མ་བྱས་ན་ད་ཡོད་འབྲེལ་མོལ་གྱི་ལས་རིམ་འདི་མུ་མཐུད་ཉར་རྒྱུའི་དགོས་མཁོ་མེད་སྐོར་ཐད་ཀར་འགྲེལ་བརྗོད་མ་བྱེད་ཐབས་མེད་བྱུང་། གྲོས་མོལ་གྱི་བརྒྱུད་རིམ་ནང་ཁོང་ཚོའི་ངོས་ནས་དོ་འཁུར་དང་ལྷག་བསམ་རྣམ་དག་མེད་ཚེ་ད་ལྟའི་གྲོས་མོལ་དེ་བཞིན་མུ་མཐུད་གནང་ཀྱང་དགོས་དོན་མཚུངས་ཀྱི་མེད་པ་ང་ཚོས་ཁ་གཏད་ལ་གསལ་པོར་མ་བརྗོད་ཐབས་མེད་བྱུང་།
རྒྱ་ཕྱོགས་ནས་ད་བར་འབྲེལ་མོལ་གྲུབ་འབྲས་ལྡན་པ་བྱུང་ཚུལ་དང་། ལོ་བརྒྱ་ཕྲག་ཕྱེད་ཀའི་རྙོག་རྫིང་ལོ་ཤས་ནང་སེལ་ཐབས་མེད་ཚུལ་ཤེས་དགོས་པ་བརྗོད་བྱུང་།
གྲོས་མོལ་གྱི་ལམ་ནས་བོད་ཀྱི་དཀའ་རྙོག་སེལ་རྒྱུའི་བོད་མིའི་དབུ་ཁྲིད་ཀྱི་སྲིད་བྱུས་ལམ་སྟོན་གཞིར་བཟུང་ང་ཚོས་གྲོས་སྡུར་རྗེས་མ་དེ་ཕྱི་ཟླ་ ༡༠ པའི་ནང་བྱ་རྒྱུ་མོས་མཐུན་བྱས་པ་མ་ཟད། དེ་སྐབས་གྲོས་གཞིའི་ས་བོན་ཡོང་ཆེད་དོན་གནད་ཁ་ཤས་ཐོག་གྲོས་སྡུར་ཡང་བྱས་པ་ཡིན།
དེ་རིང་ང་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་བསྡུར་གྱི་ནང་དོན་སྙན་གསན་ཞུས་པ་ཡིན། དེ་རྗེས་བོད་མི་མང་སྤྱི་འཐུས་ཚོགས་གཙོ་ཀརྨ་ཆོས་འཕེལ་མཆོག་དང་། ཚོགས་གཞོན་རྒྱ་རི་སྒྲོལ་མ་མཆོག་གཉིས་ལའང་སྙན་གསན་ཞུས་པ་ཡིན། ཕྱི་ཚེས་ ༤ ཉིན་རྡ་སར་འབྱོར་འཕྲལ་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་ལ་སྙན་གསན་ཞུས་པ་ཡིན།
ང་ཚོའི་མགྲོན་བདག་རྒྱ་ནག་དམར་ཤོག་ཚོགས་པའི་དབུས་འཐབ་ཕྱོགས་གཅིག་འགྱུར་ཁང་གིས་སྣེ་ལེན་དང་མཐུན་གྱུར་གནང་བར་ཐུགས་རྗེ་ཆེ་ཞུ་རྒྱུ་ཡིན།
ཕྱི་ལོ་ ༢༠༠༨ ཟླ་ ༧ ཚེས་ ༥ རྡ་རམ་ས་ལ།ཐུགས་སྣང་།
གསལ་བསྒྲགས་ངོ་མ་དབྱིན་ཡིག་ཐོག་ཡོད་པ་ནས་འདི་ག་བོད་ཡིག་ཚན་པས་ཕབ་སྒྱུར་ཞུས་པས་ཚིག་དོན་ལ་ཧེ་བག་ཡོད་ཚེ་རྩ་བ་དབྱིན་ཡིག་རང་ལ་རྩ་འཛིན་ཡོད་པ་ཞུ།
