ཕྱི་ལོ་ ༢༠༠༨ ཟླ་ ༧ ཚེས་ ༧ རེས་གཟའ་ཟླ་བ།
བོད་གཞུང་མང་གཉིས་ནས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་སྐུའི་འཁྲུངས་སྐར་གྱི་དུས་ཆེན་སྲུང་བརྩི་ཞུ་བཞིན་པ།
༄༅། །འགྲོ་བ་ལྷ་དང་བཅས་པའི་མགོན་སྐྱབས་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྙིགས་དུས་ཀྱི་ཡ་ང་བའི་འགྲོ་བ་ཀུན་གྱི་དོན་དུ་སངས་རྒྱས་ཀྱི་ཞིང་ཁམས་ནས་མིའི་ལུས་ཀྱི་རྣམ་པར་རབ་བྱུང་ ༡༦ པའི་ཤིང་ཕག་བོད་ཟླ་ ༥ ཚེས་ ༥ ཕྱི་ལོ་ ༡༩༣༥ ཟླ་ ༧ ཚེས་ ༦ ཉིན་མཚན་ལྟས་བཟང་པོ་དང་བཅས་སྐུ་བལྟམས་ཏེ་བོད་ལུགས་ལྟར་ན་དགུང་གྲངས་ ༧༤ དང་། ཕྱི་ལུགས་ལྟར་ན་དགུང་གྲངས་ ༧༣ ལ་ཕེབས་པའི་སྐུའི་འཁྲུངས་སྐར་གྱི་སྔ་དྲོ་ཆུ་ཚོད་ ༧།༠༠ པའི་ཐོག་རྡ་སའི་ཁུལ་གནས་སྲི་ཞུའི་ལས་བྱེད་ཆེ་ཕྲ་ཆུང་གསུམ་དང་། སེར་སྐྱ་མི་མང་རྣམས་ནས་བཞུགས་སྒར་ལྷ་རྒྱལ་རིར་སྐུ་ཁམས་དང་མཐུན་པའི་སྐུ་རླུང་དར་འཛུགས་དང་། དར་ཆེན་ཁག་ལ་ན་བཟའ་གསར་སྒྲོན་གནང་བ་དང་ཆབས་ཅིག་ཁྲོ་བོ་ཁམས་གསུམ་དབང་འདུས་དང་། བསྟན་སྲུང་དམར་ནག་གཉིས་ཀྱི་སྤྱན་སྔར་སྐུ་བཅར་རྣམ་གྲྭ་དགེ་འདུན་བཞི་གྲྭས་རྒྱགས་རྔན་ལྷ་བསང་དང་། གནས་གྲྭ་དགེ་འདུན་བརྒྱད་དབུ་ཞུགས་ཐོག་མང་གཙོའི་ཀ་བ་གསུམ་གྱི་མཛད་གཙོ་རྣམ་པས་དབུས་རང་གཞུང་གི་སྲི་ཞུ་བ་ཆེ་ཕྲ་ཆུང་གསུམ། མི་མང་སོགས་ནས་དཀར་ཕྱོགས་སྐྱོང་བའི་ལྷ་སྲུང་མཐུ་བོ་རྣམས་ཀྱི་དབུ་འཕངས་དགུང་ལ་འདེགས་པའི་བསང་མཆོད་ཟབ་རྒྱས་གནང་ཡོད་པ་རེེད། དེ་བཞིན་དུས་ཚོད་དེ་དང་སྟབས་བསྟུན་ནས་བོད་གཞུང་ཆོས་རིག་ལས་ཁུངས་སྐུ་ཕྱྭའི་ཞབས་རིམ་ཆེད་ཉ་སྲོག་བླུ་གནང་བ་དང་། བཞུགས་སྒར་ས་གནས་འགོ་འཛིན་ལས་ཁང་ནས་གོ་སྒྲིག་ཞུས་ཏེ་དགོན་སྡེ་ཁག་གི་དགེ་བཙུན་རྣམས་ནས་སྔ་དྲོའི་ཆུ་ཚོད་ ༧ ནས་ ༨ བར་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་༸རྒྱལ་བའི་སྐུ་ཕྱྭ་དང་བསྟན་སྲིད་དར་སྤེལ་སླད་ཞབས་རིམ་ཁག་སྨིན་སྒྲུབ་ཞུས་གནང་ཡོད་པ་རེད།
དངོས་གཞི་གཞུང་འབྲེལ་མཛད་སྒོ་སྔ་དྲོ་ཆུ་ཚོད་ ༩།༠༠ ཐོག་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་དབུ་འཛུགས་གནང་ཡོད་པ་རེད། དེ་ཡང་བཙན་བྱོལ་བོད་གཞུང་གི་མཛད་གཙོ་རྣམ་པ་དང་། ཡབ་གཤིས་སྐུ་འཁོར་རྣམ་པས་དབུས་སྐུ་མགྲོན་ཁག་བཞུགས་གྲལ་དུ་འཁོད་རྗེས་བོད་གཞུང་ཟློས་གར་ཚོགས་པས་རྔ་རོལ་དང་བཅས་བོད་རྒྱལ་ཁབ་ཆེན་པོའི་རྒྱལ་གླུ་འབུལ་སྐབས་བཀའ་ཁྲི་མཆོག་ནས་གངས་ལྗོངས་བོད་རྒྱལ་ཁབ་ཆེན་པོའི་རྒྱལ་དར་མཁའ་དབྱིངས་སུ་སྒྲེང་འཛུགས་དང་སེར་སྐྱ་མི་མང་རྒན་བྱིས་ཚང་མས་སྐུ་བཞེངས་ཐོག་རྒྱལ་གླུ་བཏང་ཡོད་པ་རེད།
བོད་གཞུང་ཟློས་གར་ཚོགས་པས་དྲུག་ཅུའི་དབྱངས་ལྡན་ཞེས་པའི་བསྟོད་གླུ་འབུལ་བཞིན་པ།
དེ་རྗེས་བཀའ་ཁྲི་མཆོག་ནས་སྐུ་པར་མཐོང་གྲོལ་རིན་པོ་ཆེར་མཎྜལ་་རྟེན་གསུམ་འདེགས་འབུལ་གྲུབ་རྗེས་རིམ་པས་ཁྲིམས་ཞིབ་པ་ཆེ་བ་དང་། ཁྲིམས་ཞིབ་པ་གཞན་གཉིས། བོད་མི་མང་སྤྱི་འཐུས་ཚོགས་གཙོ། བཀའ་བློན་རྣམ་པ། ཡབ་གཞིས་སྐུ་འཁོར་རྣམ་པ། སྤྱི་འཐུས་ཚོགས་གཞོན། བཀའ་བློན་ལས་ཟུར་རྣམ་པ། རང་དབང་ལྡན་པའི་སྡེ་ཚན་ཁག་གི་འགན་འཛིན་བཅས་ནས་རྟེན་བྱུང་མཇལ་དར་སྒྲོན་འབུལ་གནང་སྐབས་བོད་གཞུང་ཟློས་གར་ཚོགས་པས་དྲུག་ཅུའི་དབྱངས་ལྡན་ཞེས་པའི་བསྟོད་གླུ་ཕུལ།
དེ་རྗེས་ཞབས་ལོ་ ༢༥ འཁོར་བའི་གཞུང་ཞབས་རྣམས་ལ་གཞུང་ཞབས་འདེམས་ལྷན་གྱིས་ལེགས་སྐྱེས་བཀའ་ཁྲི་མཆོག་ནས་གསོལ་སྩལ་གནང་སྐབས་འདེམས་ལྷན་དྲུང་ཆེ་སྣང་ས་ཆོས་སྒྲོན་ལགས་ནས་གཞུང་ཞབས་ཁོང་རྣམ་པའི་ལོ་རྒྱུས་སྒྲོགས་སྦྱང་གནང། དེ་བཞིན་བཙན་བྱོལ་བོད་གཞུང་གི་གཞུང་ཞབས་ལས་དོན་གཟེངས་ཐོན་གྱི་གཟེངས་རྟགས་ཚོགས་ཆུང་གི་ཚོགས་གཙོ་ངམ་དྲུང་བཀྲིས་ཕུན་ཚོགས་མཆོག་ནས་ལས་དོན་གཟེངས་ཐོན་བྱུང་བའི་གཞུང་ཞབས་ནང་སྲིད་ལས་དོ་རུ་བྱང་དངོས་གྲུབ་འོད་ཟེར་ལགས་ཀྱི་ལོ་རྒྱུས་ངོ་སྤྲོད་གནང་རྗེས་བཀའ་ཁྲི་མཆོག་ནས་གཟེངས་རྟགས་སྩལ་གནང་ཡོད་པ་རེད།
ཨམར་ཨུཇལ། ཞེས་པའི་ཧིན་རྡིའི་གསར་ཤོག་ལས་ཁང་ནས་གོ་སྒྲིག་ཞུས་ཏེ་རྒྱ་གར་ས་གནས་སློབ་ཕྲུག་རྣམས་ནས་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་ལ་འཚམས་ཞུའི་ཤིས་ཤོག་ཕུལ་བ་ཁག་བཀའ་ཁྲི་མཆོག་བརྒྱུད་༸གོང་ས་མཆོག་ལ་འབུལ་ལམ་ཞུས་ཡོད་པ་རེད།
དེ་ནས་ཧི་མ་ལ་ཡའི་མི་མང་གི་སྐུ་ཚབ་དང་། བཀའ་བློན་ཁྲི་པ་མཆོག བོད་མི་མང་སྤྱི་འཐུས་ཚོགས་གཙོ་བཅས་ནས་གསུང་བཤད་གནང་གྲུབ་རྗེས་དངོས་གཞིའི་མཛད་སྒོ་ཁག་རྒྱལ་ཁའི་ངང་གྲུབ་ཡོད་པ་རེད།
དེ་རྗེས་བཀའ་ཁྲི་མཆོག་ནས་ཧི་མ་ལ་ཡའི་རི་བརྒྱུདཀྱི་མི་མང་རྣམས་ནས་གདུང་སེམས་མཉམ་སྐྱེ་དང་ལས་གཞི་འདྲ་མིན་སྤེལ་བར་དགའ་བསུ་དང་ཐུགས་རྗེ་ཆེའི་གསུང་བཤད་གནང་ཡོད་པ་རེེད། དེ་ནས་བཞུགས་སྒར་ས་གནས་འགོ་འཛིན་ལས་ཁང་ནས་གོ་སྒྲིག་ཞུས་པ་ལྟར་སྡེ་ཁག་ཆ་བགོས་ཀྱིས་ཤིང་སྣ་འདེབས་འཛུགས་གནང་བ་བཅས་ཀྱི་གནས་བསྡུས་སུ།།
