ཕྱི་ལོ་ ༢༠༠༨ ཟླ་ ༠༦ ཚེས་ ༢༤ རེས་གཟའ་ལྷག་པ།
༄༅། །བོད་གཞུང་ཤེས་ལས་ཁུངས་ནས་ཨ་རིར་མཐོ་སློབ་ཏུ་སློབ་སྦྱོང་ལ་བསྐྱོད་མཁན་རྣམས་ལ་ལོ་ལྟར་ཟབ་སྦྱོང་གནང་བཞིན་ཡོད་པ་ལྟར་འདི་ལོའི་ཕྱི་ཟླ་ ༨ པའི་ནང་ཨ་རིར་སློབ་སྦྱོང་དུ་བསྐྱོད་མཁན་རྣམས་ལ་གནང་བའི་ཟབ་སྦྱོང་དེ་ ༢༠༠༨ ཟླ་ ༦ ཚེས་ ༢༤ ནས་ཚེས་ ༢༥ བར་བོད་གཞུང་ཕྱི་དྲིལ་ལས་ཁུངས་ཀྱི་ལྷག་པ་ཚེ་རིང་དྲན་རྟེན་ཚོགས་ཁང་དུ་ཚོགས་ཡོད་པ་རེད། ཟབ་སྦྱོང་གྱི་ཉིན་དང་པོའི་སྔ་དྲོ་བོད་གཞུང་ཤེས་རིག་ལས་ཁུངས་ཀྱི་དྲུང་ཆེ་སྐུ་ཞབས་གཡུ་ཐོག་ཀརྨ་དགེ་ལེགས་ལགས་ནས་སློབ་ཡོན་གྱི་ལས་གཞི་དང་འབྲེལ་བའི་གསུང་བཤད་དང་། དེ་རྗེས་ཕྱི་དྲིལ་ལས་ཁུངས་ཀྱི་དྲུང་ཆེ་བོད་གཞུང་མགྲིན་ཚབ་པ་ཐུབ་བསྟན་བསམ་འཕེལ་ལགས་ནས་རྒྱལ་སྤྱིའི་ནང་བོད་ཀྱི་གནང་སྟངས་སྐོར་ལ་གསུང་བཤད། དེ་ནས་ཕྱི་འབྲེལ་དྲུང་ཆེ་དགས་པོ་བསོད་ནམས་ནོར་བུ་ལགས་ནས་དབུ་མའི་ལམ་གྱི་ཐོག་ལ་གསུང་བཤད་གནང་ཡོད་པ་རེད།
དེ་ཉིན་ཕྱི་དྲོ་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་བསྟི་གནས་ཁང་གི་འགན་འཛིན་གཞོན་པ་འཇམ་དཔལ་སྨོན་ལམ་ལགས་ནས་བོད་ནང་གི་འགྲོ་བ་མིའི་ཐོབ་ཐང་སྐོར་ལ་གསུང་བཤད་གནང་ཡོད་པ་དང་། དེ་རྗེས་ཕྱི་དྲིལ་ཁོར་ཡུག་སྡེ་ཚན་གྱི་ལས་བྱེད་ཆོས་སྐྱིད་ལགས་ནས་བོད་ནང་གི་ད་ལྟའི་ཁོར་ཡུག་གི་གནས་སྟངས་སྐོར་ལ་གསུང་བཤད་གནང་ཡོད་འདུག
དེ་རྗེས་ཤེས་རིག་མཐོ་སློབ་སྡེ་ཚན་གྱི་འགན་འཛིན་ཟུང་དྲུང་བཀྲ་ཤིས་སྒྲོལ་མ་ལགས་ནས་ཉིན་གཉིས་ཀྱི་ཟབ་སྦྱོང་ཐོག་བསམ་འཆར་ཇི་ཡོད་བསྡུ་རུབ་དང་ལམ་སྟོན་གནང་རྒྱུ། དེ་རྗེས་ཨ་རིར་སློབ་སྦྱོང་དུ་བསྐྱོད་མྱོང་མཁན་རྣམས་དང་ཕན་ཚུལ་ངོ་སྤྲོད་གནང་ནས་ཉིན་གཉིས་ཀྱི་ཟབ་སྦྱོང་མཇུག་བསྒྲིལ་རྒྱུ་ཡིན་འདུག
བོད་གཞུང་ཤེས་རིག་ལས་ཁུངས་ནས་ཨ་རིར་མཐོ་སློབ་ཏུ་སློབ་སྦྱོང་ལ་བསྐྱོད་མཁན་རྣམས་ལ་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་ཟབ་སྱོང་གནང་བཞིན་པ།
དེ་ཉིན་དགོང་དྲོ་ཟབ་སྦྱོང་ནང་བཞུགས་མཁན་ཚོར་བོད་ཀྱི་ཐེབས་རྩ་ཁང་ནས་དགོང་དྲོའི་གསོལ་ཚིགས་ཤིག་ཀྱང་གོ་སྒྲིག་ཞུས་ཡོད་པ་རེད།།
