ཕྱི་ལོ་ ༢༠༠༨ ཟླ་ ༦ ཚེས་ ༢༧ རེས་གཟའ་པ་སངས།

༄༅། །རྒྱལ་སྤྱིའི་གསར་ལམ་ཁག་ནས་གནས་ཚུལ་སྤེལ་བར་གཞིགས་ན། ཁ་ཉིན་རེས་གཟའ་མིག་དམར་ཉིན་ཨ་རིའི་གཞུང་ནས་བལ་ཡུལ་དུ་འཛིན་བཟུང་བྱས་པའི་བོད་མིའི་འགོ་ཁྲིད་གསུམ་གྱིས་གཙོས་རྔམ་སྟོན་ཁྲོམ་སྐོར་བྱེད་མཁན་གྱི་བོད་མི་མང་པོ་ཞིག་འཛིན་བཟུང་བྱས་ཡོད་པར་ཐུགས་འཚབ་ཆེན་པོ་ཡོད། ཅེས་གསུངས་ཡོད་པ་རེད།

དེ་ཡང་ཨ་རིའི་གཞུང་གི་མགྲིན་ཚབ་པ་སྐུ་ཞབས་ཊོམ་ཁ་སེའི་( Tom Casey) ཡིས་གསར་འགོད་གསལ་བསྒྲགས་ཤིག་སྤེལ་བའི་ནང་གསུང་དོན། ཨ་རིའི་གཞུངནས་བལ་ཡུལ་གཞུང་ལ་ལས་འགུལ་སྤེལ་མཁན་བོད་མིའི་འགོ་ཁྲིད་སྐལ་བཟང་ཆུང་དང་། བཀྲ་ཤིས་སྒྲོལ་མ། ངག་དབང་བཟང་མོ་བཅས་གསུམ་བཙོན་འཇུག་བྱས་ཡོད་པ་རྣམས་ལ་སེམས་འཚབ་ཆེན་པོ་ཡོད། ཅེས་དང་། ང་ཚོའི་ངོས་ནས་ཁོང་གསུམ་ཆ་རྐྱེན་གང་ཡང་མེད་པའི་ཐོག་ནས་དེ་མ་ཉིད་དུ་གློད་བཀྲོལ་གཏོང་དགོས་པའི་འབོད་སྐུལ་ཞུ་གི་ཡོད། ཅེས་གསུངས་ཡོད་པ་རེད།

ཁོང་གིས་མུ་མཐུད་གསུང་དོན། ང་ཚོའི་ངོས་ནས་བལ་ཡུལ་གཞུང་གིས་བདེ་འཇགས་དང་། ཕྱི་འབྲེལ་གྱི་ཁོར་ཡུག་ལ་སེམས་འཚབ་ཡོད་པར་གུས་པ་དངབསམ་ཤེས་ཐུབ་ཀྱི་ཡོད།

ང་ཚོས་བལ་ཡུལ་གཞུང་ལ་ཞི་བའི་ངོ་རྒོལ་བྱེད་མཁན་ཚོར་སྙིང་དང་ལྡན་པའི་ངང་ནས་སྟངས་འཛིན་གནང་རྒྱུ་དང་། བལ་ཡུལ་དེ་བཞིན་མང་གཙོའི་ལམ་བུའི་ཐོག་མུ་མཐུད་བསྐྱོད་མཁན་གྱི་རྒྱལ་ཁབ་གཅིག་ཡིན་པའི་ཆ་ནས་རྒྱལ་སྤྱིའི་འགྲོ་བ་མིའི་ཐོབ་ཐང་གྱི་དམ་བཅའ་དེར་འགྱུར་བ་མེད་པར་ཉམས་ལེན་བྱེད་རྒྱུའི་འབོད་སྐུལ་ཞུ་བཞིན་ཡོད། ཅེས་གསུངས་ཡོད་པ་རེད།

བལ་ཡུལ་དུ་སྐྱབས་བཅོལ་བོད་མི་ལྔ་བརྒྱ་ཙམ་ནས་རྒྱ་ནག་གཞུང་ཚབ་མདུན་ཨོ་ལེམ་པིཀ་དཔལ་འབར་བོད་དུ་བརྒྱུད་སྤྲོད་བྱེད་རྒྱུར་ངོ་རྒོལ་བྱེད་མཁན་རྣམས་འཛིན་བཟུང་བྱས་ཏེ་དྲི་རྩད་བྱས་ཡོད་པ་མ་ཟད། ཉིན་དེར་ཉེན་རྟོག་པས་རྒྱ་ནག་གཞུང་ལ་ཉེས་འཛུགས་བྱེད་མཁན་གྱི་བོད་མིའི་འགོ་ཁྲིད་གཙོ་བོ་གསུམ་འཛིན་བཟུང་བྱས་ཡོད་པ་རེད།།