ཕྱི་ལོ་ ༢༠༠༨ ཟླ་ ༠༦ ཚེས་ ༡༥ རེས་གཟའ་ཟླ་བ།
ཨོ་སི་ཀྲོ་ལེ་ཡའི་གྲོས་ཚོགས་ཀྱི་ཚོགས་མི་སྐུ་ཞབས་ཁེ་རེསེ་ཨི་ཝན་སེ།Crist Evans)
༅༅། །བོད་མིའི་ཆོས་སྲིད་གཉིས་ཀྱི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨོ་སི་ཀྲོ་ལི་ཡའི་ནང་ཆོས་སྲིད་ཀྱི་མཛད་འཕྲིན་དུ་མ་ཞིག་བསྐྱངས་དང་སྐྱོང་བཞིན་པའི་སྐབས་དེར་རྒྱ་ནག་གཞུང་གིས་ངོ་རྒོལ་བྱེད་མིན་ལ་མ་ལྟོས་པར་ཨོ་སི་ཀྲོ་ལེ་ཡའི་སྲིད་བློན་གྱི་ལས་ཚབ་སྐུ་ཞབས་ཁེ་རེསེ་ཨི་ཝན་སེ་(Crist Evans)ཡིས་ ༢༠༠༨ ཕྱི་ཟླ་ ༠༦ ཚེས་ ༡༣ རེས་གཟའ་པ་སངས་ཉིན་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་གནང་ཡོད་པ་དང་། སྐུ་ཞབས་ཁ་རེསེ་ཨི་ཝན་སེ་ནི་ཐེངས་འདིའི་ཆིབས་སྒྱུར་སྐབས་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་ཞུ་མཁན་གྱི་གཞུང་འབྲེལ་དཔོན་རིགས་མཐོ་ཤོས་དེ་ཡིན་པ་རེད།
ཨོ་སི་ཀྲོ་ལི་ཡའི་སྲིད་བློན་ཁི་ཝིན་རུཌེ་(Kevin Rudd) མཆོག་ཨིན་ཌུ་ནི་ཤའི་(Indonesia)ནང་གཟིགས་སྐོར་ལ་ཕེབས་ཏེ་ས་གནས་ལ་བཞུགས་མེད་པའི་ཆ་ནས་སྐུ་ཞབས་ཁེ་རེསེ་ཨི་ཝན་ཡིས་སྲིན་བློན་ངོ་ཚབ་ཀྱི་མཚན་དབང་ཐོག་ནས་༸གོང་ས་མཆོག་དང་མཇལ་འཕྲད་དང་གསུང་མོལ་གནང་བ་ཞིག་ཡིན་འདུག མཇལ་འཕྲད་དེ་གྲུབ་རྗེས་སྐུ་ཞབས་ཁེ་རེསེ་ཨི་ཝན་སེའི་ལས་ཁུངས་ནས་གསལ་བསྒྲགས་ཤིག་སྤེལ་དོན། ཨོ་སི་ཀྲོ་ལི་ཡའི་གཞུང་ནས་བོད་མིའི་༸སྐྱབས་མགོན་ཏཱ་ལའི་བླ་མ་མཆོག་དང་རྒྱ་ནག་གི་དཔོན་རིགས་ནས་བོད་ཀྱི་དཀའ་རྙོག་སེལ་རྒྱུར་གྲོས་མོལ་མུ་མཐུད་གནང་རྒྱུར་སེམས་སྐུལ་བྱེད་ཀྱི་ཡོད། ཅེས་བཀོད་པ་ཡོད་པ་རེད།
༢༠༠༨ ཕྱི་ཟླ་ ༠༦ ཚེས་ ༡༤ རེས་གཟའ་ཉི་མའི་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཀ་མ་ལ་ཤཱི་ལའི་སྒོམ་རིམ་བར་མའི་བཀའ་ཆོས་གནང་བའི་ཞོར་དུ་ནང་ཆོས་སློབ་གཉེར་བྱེད་མཁན་མངའ་སྡེ་ཁག་གི་སློབ་ཕྲུག་རྣམས་དང་མཇལ་འཕྲད་མཛད་ཡོད་པ་རེད། དེ་ཉིན་ཆུ་ཚོད་ ༣ པ་ཡོལ་ཙམ་གྱི་ཐོག་༸གོང་ས་༸སྐྱབས་མགོན་ཆེན་པོ་མཆོག་གི་བཞུགས་གནས་མགྲོན་ཁང་གི་ཚོགས་ཁང་ཆེན་པོ་ཞིག་གི་ནང་ས་གནས་བོད་མི་དང་། སོག་པོ་བཅས་ལ་དམིགས་བསལ་གྱི་མཇལ་ཁ་གནང་བ་དང་སྦྲགས་བོད་སོག་གཉིས་ཀྱི་ལོ་བརྒྱ་ཕྲག་མང་པོའི་རིང་གི་འབྲེལ་ལམ་ཐད་བཀའ་སློབ་གནང་བ་དང་། བོད་དང་སོག་པོ་གཉིས་ནི་ནང་ཆོས་ཀྱི་ཐད་ནས་དམིགས་བསལ་གྱི་འབྲེལ་བ་དང་། སོག་པོའི་རིག་གཞུང་གིས་བོད་ཀྱི་རིག་གཞུང་ནང་ཤུགས་རྐྱེན་ཆེན་པོ་བྱུང་ཡོད་པས་འབྲེལ་ཡོད་མི་རིགས་གཉིས་ཀས་སངས་རྒྱས་པའི་ཆོས་དེར་སློབ་གཉེར་སྔར་ལས་གཏིང་ཟབ་གནང་དགོས་པ་དང་། སྤྱིར་འཛམ་གླིང་ནང་གི་ཤེས་ཡོན་སློབ་གསོ་ཡར་རྒྱས་ཆེན་པོ་ཞིག་ཡོང་གི་ཡོད་པ་ལྟར། ནང་ཆོས་ལའང་སློབ་སྦྱོང་བྱེད་རྒྱུར་དོ་སྣང་སྔར་བས་ཤུགས་ཆེ་བྱེད་དགོས་རེད། ཅེས་དང་སངས་རྒྱས་པའི་ཆོས་དེ་ཆོས་གཅིག་པུ་མ་ཡིན་པར་ཚན་རིག་པས་ཞིབ་འཇུག་བྱེད་ཡུལ་ཞིག་རེད། ཅེས་བཀའ་སྩལ་བ་དང་སྦྲགས་༸གོང་ས་མཆོག་གིས་བོད་ཀྱི་གནང་སྟངས་སྐོར་ལ་བཀའ་སློབ་སྩལ་ཡོད་པ་རེད།
༸གོང་ས་མཆོག་གིས་མུ་མཐུད་བཀའ་སྩལ་དོན། ད་ལྟའི་དུས་ཚོད་དེ་བོད་མིའི་ངོས་ནས་བརྗོད་ན་གཉན་འཕྲང་ཅན་གྱི་དུས་ཚོད་གཅིག་ཡིན་པ་དང་། རང་དབང་ལུང་པའི་ནང་སླེབས་མཁན་ཚོས་སོ་སོའི་འཕྲལ་སེལ་གྱི་ལྟོ་གོས་འགྲིག་ཙམ་དང་བུ་ཕྲུག་ཚོར་ཤེས་ཡོན་སྦྱོང་རྒྱུའི་གོ་སྐབས་བྱུང་བ་ཙམ་ལ་ཆོག་ཤེས་དང་བློ་འཚིམ་ནས་སྡོད་རྒྱུ་ཡོད་མ་རེད། བོད་སྤྱི་པའི་དོན་དེ་ང་ཚོ་ཚང་མའི་འགན་རེད། ལྷག་པར་དུ་བོད་ནང་ཡོད་པའི་རྒྱ་ཆེའི་མི་མང་རྣམས་ནས་ང་ཚོར་རེ་བའི་མིག་ལྟོས་གནང་གི་ཡོད་རེད། ཆོས་ཕྱོགས་ཀྱི་ཐོག་ནས་བརྗོད་ནའང་ང་ཚོ་བོད་མི་སྤྱིའི་གནས་སྟངས་སྐྱོ་པོ་ཞིག་གི་ཐོག་གནས་པའི་སྐབས་དེར་ང་རང་ཚོ་རང་མགོ་རང་ཐོན་གྱི་བསམ་བློ་བཏང་བ་ཡིན་ན་ལས་རྒྱུ་འབྲས་འགྲོ་གི་མ་རེད། འཇིག་རྟེན་ཡ་རབས་ཀྱི་ཆ་ནས་བརྗོད་ནའང་འགྲིག་ཐབས་ཡོད་པ་མ་རེད། དེར་བརྟེན་ད་ལྟ་བར་ཚང་མས་སྤྱི་པའི་དོན་མ་བརྗེད་པར་སེམས་ཤུགས་འཁྱེར་ཀྱི་ཡོད་པ་རེད། དེ་ནི་ཡག་པོ་ཞེ་དྲག་རེད། ད་དུང་ཡང་ཁྱེད་རང་ཚོ་ཚང་མས་སེམས་ཤུགས་མ་ཆགས་པར་བོད་སྤྱི་པའི་དོན་ལ་སེམས་ཁུར་དང་། སོ་སོའི་ས་གནས་ཉེ་འགྱངས་གང་དུ་ཡོད་ཀྱང་ང་རང་བོད་པ་ཡིན་བསམ་པའི་འདུ་ཤེས་མ་བརླག་པའི་ཐོག་ནས་ཚང་མས་ཧུར་ཐག་བྱེད་དགོས་ཀྱིེ་རེད། ཅེས་བཀའ་སློབ་བཀའ་དྲིན་སྩལ་ཡོད་པ་རེད།
༸གོང་ས་མཆོག་གིས་མུ་མཐུད་བཀའ་སྩལ་དོན། ཕྱི་རྒྱལ་ཁག་ཏུ་ཡོད་པའི་བོད་རིགས་རྣམས་ནས་རང་མི་རིགས་ཀྱི་རིག་གཞུང་དང་སྐད་ཡིག་བརྒྱུད་འཛིན་བྱེད་ཆེད་ཕྲུ་གུ་ཚོེར་བོད་ཀྱི་སྐད་ཡིག་སློབ་ཁྲིད་བྱེད་རྒྱུ་དེ་ནི་མ་འོངས་པའི་བོད་མི་དེ་བཞིན་ས་གོ་ལའི་སྟེང་མི་སྟོང་བར་གནས་རྒྱུར་གལ་འགངས་ཤིན་ཏུ་ཆེན་པོ་ཡིན་པའི་འགྲེལ་བརྗོད་དང་སྦྲགས་བཀའ་སློབ་ཟབ་མོ་ཕེབས་ཡོད་པ་རེད།
༸གོང་ས་༸སྐྱབས་མགོན་ཆེན་པོ་མཆོག་གིས། བོད་ཀྱི་དཀའ་རྙོག་དེ་ནི་བོད་རྒྱ་གྲོས་མོལ་གྱི་ལམ་ནས་སེལ་བ་ལས་གཞན་ཐབས་ལམ་གང་ཡང་ཡོད་པ་མ་རེད། དེར་བརྟེན་ང་ཚོས་ཕན་ཚུན་གནས་ཚུལ་ཤེས་རྟོགས་དང་ཡི་ཆེས་ཡོང་ཐབས་སུ་ཕྱི་རྒྱལ་དུ་ཡོད་པའི་བོད་མི་དང་རྒྱ་མིའི་དབར་རྒྱ་བོད་མཛའ་འབྲེལ་ཚོགས་པ་ཞིག་འཛུགས་དགོས་པ་དེ་ནི་གལ་གནད་ཤིན་ཏུ་ཆེན་པོ་ཡིན་པ་དང་། གཞུང་ནི་འགྱུར་བ་ཐེབས་རྒྱུ་ཞིག་ཡིན་པ་དང་མི་རིགས་ནི་མུ་མཐུད་གནས་རྒྱུ་ཡིན་སྟབས་མི་རིགས་མཐུན་སྒྲིལ་གལ་གནད་ཆེན་པོ་ཡིན་པའི་བཀའ་སློབ་ཟབ་མོ་ཕེབས་ཡོད་པ་རེད།
བཀའ་སློབ་ཀྱི་མཐའ་དོན་དུ་༸གོང་ས༸སྐྱབས་མགོན་ཆེན་པོ་མཆོག་གིས་ས་དགེ་བཀའ་རྙིང་ཇོ་ནང་བོན་དང་བཅས་པ་དམ་ཚིག་འོ་ཆུ་ཆིག་སྒྲིལ་གནང་དགོས་པའི་བཀའ་སློབ་ཕེབས་ཡོད་པ་རེད། བཀའ་སློབ་དེ་གྲུབ་རྗེས་གྲོང་ཁྱེར་དེའི་ནང་གི་རྩེད་ཐང་ཆེན་པོ་ཞིག་གི་སྟེང་མིའི་ཚེ་དོན་སྙིང་དང་ལྡན་པ་ཡོང་བ་བྱ་དགོས་སྐོར་མི་མང་སྟོང་ཚོ་བརྒལ་བར་བཀའ་སློབ་སྩལ་ཡོད་པ་རེད།།
