ཕྱི་ལོ་ ༢༠༠༨ ཟླ་ ༠༦ ཚེས་ ༣ རེས་གཟའ་ལྷག་པ།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་སྨོན་ལམ་གསོལ་འདེབས་ཞུ་བཞིན་པ།
༄༅། །ཕྱི་ལོ་ ༢༠༠༨ ཟླ་ ༦ ཚེས་ ༣ ཉིན་བོད་གཞུང་བཀའ་དྲུང་ཡིག་ཚང་ནས་གསལ་བསྒྲགས་བསྐྱངས་པ་བཞིན། རྒྱལ་བསྟན་དར་ཞིང་འགྲོ་ཀུན་བདེ་བ་དང་། ཁྱད་པར་ཉེ་ལམ་ཕྱི་ལོ་ ༢༠༠༨ ཟླ་ ༥ ཚེས་ ༡༢ ཉིན་རྒྱ་ནག་སི་ཁྲོན་ས་ཁུལ་དུ་ས་ཡོམ་གྱི་འཇིགས་པ་ལ་བརྟེན་ནས་མི་གྲངས་ ༦༩༠༡༩ ཙམ་རྐྱེན་འདས་སུ་གྱུར་བ་དང་། མི་མང་ ༣༧༣༥༧༣ ཙམ་སྨས་སྐྱོན། མི་མང་ ༡༨༦༢༧ གར་སོང་ཆ་མེད། མི་མང་ས་ཡ་ ༡༥་༡༥ ཙམ་ས་གནས་གཞན་དུ་གནས་སྤོས་བྱེད་དགོས་བྱུང་བ་སོགས་མདོར་ན་མི་མང་འབུམ་ཚོ་ ༡༥༠ ལྷག་ཙམ་ལ་གོད་ཆག་གི་སྡུག་བསྔལ་བཟོད་དཀའ་བྱུང་བ་རྣམས་ཀྱི་སླད། ཕྱི་ལོ་ ༢༠༠༨ ཟླ་ ༦ ཚེས་ ༤ བོད་ལུགས་ས་ག་ཟླ་བའི་ཚེས་ ༡ ཉིན་གྱི་སྔ་དྲོ་ཆུ་ཚོད་ ༩ པའི་ཐོག་ཆོས་རིག་ལས་ཁུངས་ནས་གོ་སྒྲིག་གནང་བའི་ཐོག་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་རྟེན་མཆོག་སྤྱན་སྔར་མཆོག་སྤྲིན་སྣ་ལྔ་འབུལ་བཤམས་དང་འབྲེལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཚོགས་དབུར་གདན་ཞུས་ཀྱིས་མནྜལ་རྟེན་གསུམ་དང་། སྐྱབས་རྟེན་འབུལ་ཚན་སྟོང་མིན་དང་། དགེ་འདུན་འདུས་པ་རྒྱ་ཚོར་བསྙེན་བཀུར་མང་ཇ་དང་བཞེས་བག དགེ་འདུན་རེར་སྐུ་འགྱེད་ཧིན་སྒོར་ ༡༠༠ རེ་བཅས་འབུལ་ལམ་ཞུས་ཡོད་པ་རེད།
རྡ་སའི་སེར་སྐྱ་མི་མང་རྣམས་ནས་སྨོན་ལམ་གསོལ་འདེབས་ཞུ་བཞིན་པ།
ཐེངས་འདིའི་སྨོན་ལམ་གསོལ་འདེབས་ཐོག་བཀའ་བློན་ཁྲི་པས་དབུས་མང་གཙོའི་ཀ་བ་གསུམ་གྱི་མཛད་གཙོ་རྣམ་པ། ལས་ཁུངས་ཁག་གི་དྲུང་ཆེ་ཆུང་གཙོས་བཙན་བྱོལ་གཞུང་གི་སྲི་ཞུའི་ལས་ཀྱི་སྣེ་མོར་གཏོགས་པ་ཚང་མ། རྡ་ས་ཁུལ་གྱི་སེར་སྐྱ་མང་ཚོགས་སྟོང་ཕྲག་བཞི་ཙམ་བཅས་ལྷན་འཛོམས་ཐོག་སྤྱི་མགྲིན་ནས་སྐྱབས་འགྲོ་སེམས་བསྐྱེད་དང་། བཟང་སྤྱོད་དང་སྤྱོད་འཇུག་སྨོན་ལམ་རྣམ་གཉིས། སློབ་དཔོན་ཐུགས་རྗེ་ཅན་གྱི་ཐུགས་དམ་གནད་བསྐུལ། སྒྲོལ་མ་ཉེར་གཅིག་ཐུབ་བསྟན་རིས་མེད་ཀྱི་སྨོན་ལམ་གསོག་སྒྲུབ་བཅས་སྨོན་ལམ་གསོལ་འདེབས་གཟབ་རྒྱས་གསུངས་གནང་མཛད་ཡོད་པ་རེད།།
སྨོན་ལམ་གསོལ་འདེབས་སྐབས་ཆོས་རིག་བཀའ་བློན་མཆོག་ནས་སྐྱབས་ཐོ་སྙན་སྒྲོན་ཞུས་པ་གཤམ་གསལ།
༄༅། །ལྷར་བཅས་སྲིད་ཞིའི་རྣམ་འདྲེན། འཇིག་རྟེན་ཞི་བདེའི་དེད་དཔོན། གངས་ལྗོངས་བོད་ཀྱི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་༸སྤྱི་ནོར་༸གོང་ས་སྐྱབས་མགོན་རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གིས་དབུས། བསླབ་གསུམ་འཕགས་ནོར་བདུན་གྱིས་ཐུགས་རྒྱུད་ལེགས་པར་གཏམས་པའི་སྐྱབས་གནས་འདུས་པ་རྒྱ་མཚོའི་ཞབས་ཀྱི་པདྨོ་མངོན་པར་མཐོ་བའི་དྲུང་དུ།
སྨོན་ལམ་གསོལ་འདེབས་སྐབས་ཆོས་རིག་བཀའ་བློན་མཆོག་ནས་ སྐྱབས་ཐོ་སྙན་སྒྲོན་ཞུ་བཞིན་པ།
སྒོ་གསུམ་གུས་ལྡན་བཙན་བྱོལ་བོད་གཞུང་བཀའ་ཤག་གིས་ཕྱག་བཅས་ཞུ་གསོལ་འདེབས་སྙིང་། དེ་ཡང་རྒྱལ་བསྟན་དར་ཞིང་འགྲོ་ཀུན་བདེ་བ་དང་། ཁྱད་པར་ཉེ་ལམ་ཕྱི་ལོ་ ༢༠༠༨ ཟླ་ ༥ ཚེས་ ༡༢ ནས་རྒྱ་ནག་སི་ཁྲོན་ས་ཁུལ་དུ་ས་ཡོམ་གྱི་འཇིགས་པ་ལ་བརྟེན་ནས་མི་གྲངས་ ༦༩༠༡༩ ཙམ་རྐྱེན་འདས་དང་། མི་མང་ ༣༧༣༥༧༣ ཙམ་རྨས་སྐྱོན། མི་མང་ ༡༨༦༢༧ གར་སོང་ཆ་མེད། མི་མང་ས་ཡ་ ༡༥་༡༥ ཙམ་ས་གནས་གཞན་དུ་གནས་སྤོས་བྱ་དགོས་སོགས་མདོ་དོན་མི་མང་འབུམ་ཚོ་ ༡༥༠ ལྷག་ཙམ་ལ་གོད་ཆག་གི་སྡུག་བསྔལ་བཟོད་དཀའ་བྱུང་བ་རྣམས་ཀྱི་ཆེད། ཆོས་རིག་ལས་ཁུངས་བརྒྱུད་ཐེག་ཆེན་ཆོས་གླིང་གཙུག་ལག་ཁང་དུ་རྟེན་མཆོག་སྤྱན་སྔར་མཆོད་སྤྲིན་སྣ་ལྔ་འབུལ་བཤམས་དང་འབྲེལ་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ཚོགས་དབུར་གདན་ཞུས་ཀྱིས་མལ་རྟེན་གསུམ་དང་། སྐྱབས་རྟེན་འབུལ་ཚན་སྟོང་མིན་དང་། དགེ་འདུན་འདུས་པ་རྒྱ་མཚོར་བསྙེན་བཀུར་མང་ཇ་དང་བཞེས་བག དགེ་འདུན་རེར་སྐུ་འགྱེད་ཧིན་སྒོར་ ༡༠༠ རེ་བཅས་དད་གདུང་དྲག་པོས་འབུལ་ལམ་ཞུས་པ་ལགས་ན། ཉེ་ཆར་ས་ཡོམ་གྱི་འཇིགས་པས་རྐྱེན་འདས་སུ་སོང་བ་རྣམས་ཀྱིས་མཚོན་སེམས་ཅན་ཚེ་འདས་ཡོངས་ཀྱི་ཚེ་རབས་ཕྲེང་བར་བྱས་བསགས་སྡིག་ལྟུང་མཐའ་དག་བྱང་ཞིང་དག་ནས་དལ་རྟེན་རིམ་བརྒྱུད་སྐུ་བཞིའི་རྒྱལ་བའི་གོ་འཕང་རིན་པོ་ཆེ་མྱུར་དུ་ཐོབ་པ་དང་། རྨས་སྐྱོན་གོད་ཆག་ཕོག་པ་རྣམས་ཀྱང་མྱུར་དུ་དྲག་སྐྱེད་ཀྱིས་ཚེ་ལྷག་དོན་ལྡན་ཡོང་བ། འཇིག་རྟེན་ཀུན་དུ་སྙིགས་ལྔའི་རྒུད་ཚོགས་སྤྱི་དང་ཁྱད་པར་ས་ཡོམ་སོགས་འབྱུང་བཞིའི་འཇིགས་པ་མི་བྱུང་བ། ད་ལམ་ས་ཡོམ་གྱི་ཉེས་སྐྱོན་ཕོག་པ་རྣམས་ལ་རོགས་སྐྱོར་ཕན་གྲོགས་ཉེས་སྐྱོབ་ཀྱི་ཆེད་དུ་དངོས་ཤུགས་བརྒྱུད་གསུམ་ནས་ཕན་གྲོགས་མཐུན་འགྱུར་གནང་མཁན་རྣམས་ཀྱང་ཕྱི་ནང་གི་ཉེར་འཚེ་ཞི་ནས་རྣམ་དཀར་ཆོས་མཐུན་གྱི་བྱ་བ་གེགས་མེད་ལམ་ལྷོང་ཡོང་བ། ཞར་བྱུང་ད་ལམ་མཆོད་འབུལ་བསྙེན་བཀུར་གྱི་རྒྱུ་སྱོར་བ་ཚེ་དང་ལྡན་པ་པི་ཊར་ཀྭོག་དང་། པ་ཊིཀ་མ་གཉིས་ཀྱང་ཚེ་གེགས་བར་ཆད་ཞི་ནས་ཆོས་མཐུན་ཡིད་བསམ་འགྲུབ་པ་བཅས་ཀྱི་བླ་མ་ཡིད་དམ་དགེ་འདུན་ཆོས་སྲུང་རྣམས་ནས་ཐུགས་སྨོན་སྐྱབས་འཇུག་བརྩེ་བས་གཟིགས་པ་ཅི་ནས་མཁྱཻན་མཁྱཻན་མཁྱཻན་མཁྱེན། ཅེས་གསོལ་བ་འདེབས་པ་ལགས།།
