ཕྱི་ལོ་ ༢༠༠༨ ཟླ་ ༦ ཚེས་ ༣༠ རེས་གཟའ་ཟླ་བ།
༄༅། །བཙན་བྱོལ་བོད་གཞུང་གི་གཞུང་ཞབས་ལས་དོན་གཟེངས་ཐོན་རྣམ་པར་གཟེངས་རྟགས་འབུལ་ཕྱོགས་ཀྱི་སྒྲིག་གཞི་དོན་ཚན་ ༧ དགོངས་དོན་བཞིན་ལས་བྱེད་གཟེངས་རྟགས་འདེམས་སྒྲུག་ཚོགས་ཆུང་གི་ཚོགས་གཙོ་འོས་བསྡུའི་སྤྱི་ཁྱབ་འགན་འཛིན་དང་། གཞུང་ཞབས་འདེམས་བསྐོའི་ཚོགས་གཙོ་གཅིག་ལྕོགས་ངམ་རིང་བཀྲིས་ཕུན་ཚོགས་མཆོག་དང་། ཚོགས་མིར་བཀའ་ཤག་གི་སྐུ་ཚབ་དཔལ་འབྱོར་བཀའ་བློན་ཚེ་རིང་དོན་གྲུབ་མཆོག སྤྱི་འཐུས་རྒྱུན་ལས་སྐུ་ཚབ་བསོད་ནམས་དགྲ་འདུལ་ལགས་དང་། སྤྱི་འཐུས་བེ་རི་འཇིགས་མེད་དབང་རྒྱལ་ལགས། ཚོགས་མི་དང་ཚོགས་དྲུང་བཀའ་དྲུང་མི་འགྱུར་རྡོ་རྗེ་ལགས་བཅས་ནས་སྒྲིག་དོན་བཞིན་ ༢༠༠༨ ཕྱི་ཟླ་ ༦ ཚེས་ ༢༣ ཉིན་ལྷན་ཚོགས་ཐོག་ལོ་འདིར་གཞུང་ཞབས་སྡེ་ཚན་དང་། ལས་བྱའི་སྡེ་ཚན་གཉིས་ཀྱི་ཁོངས་ནས་གཞུང་ཞབས་གཉིས་ལ་ལོ་ལྟར་༸སྐུའི་འཁྲུངས་སྐར་སྐབས་གཟེངས་རྟགས་གནང་སྲོལ་ཡོད་པ་ལྟར། འདི་ལོ་ཡང་སྔར་རྒྱུན་བཞིན་འགན་འཛིན་སྡེ་ཚན་ཁོངས་ནས་འོས་དམིགས་བཞི་དང་། ལས་བྱའི་སྡེ་ཚན་ཁོངས་ནས་འོས་དམིགས་གཉིས་བཅས་ཀྱི་མཚན་གཞུང་ལོ་རྒྱུས་དང་བཅས་ཕུལ་འབྱོར་བྱུང་བར་ཚོགས་ཆུང་ནས་གོང་གསལ་གྱི་འོས་དམིགས་དྲུག་རེ་རེ་བཞིན་ཞིབ་བཤེེར་དང་འབྲེལ་བཀའ་སྡུར་དཔྱིས་ཕྱིན་པ་གནང་བའི་མཐའ་འབྲས་སུ་འགན་འཛིན་སྡེ་ཚན་ཁོངས་ནས་ལོ་གཅིག་གི་ནང་གཟེངས་སུ་ཐོན་པའི་ལས་དོན་བྱས་འབྲས་གང་ཡང་བཀོད་མེད་པ་མ་ཟད། ལོ་ཤས་ནང་འཁུར་འཁྲིད་ལས་དོན་ཐོག་ཧུར་བསྐྱེད་ཞུས་ལུགས་སོགས་རྒྱུ་མཚན་བཀོད་འདུག་པར་བརྟེན། སྒྲིག་དོན་ལྟར་མ་ཆགས་པས་ཚོགས་ཆུང་སྤྱི་མོས་ཀྱི་ཐོག་ནས་ལོ་འདིར་འགན་འཛིན་སྡེ་ཚན་ཁོངས་ནས་འདེམས་སྒྲུབ་གནང་མི་འདུག འོན་ཀྱང་ལས་བྱའི་སྡེ་ཚན་ཁོངས་ནས་ནང་སྲིད་ལས་དོ་རུ་བྱང་དངོས་གྲུབ་འོད་ཟེར་ལགས་སུ་གནང་རྒྱུ་སྤྱི་མོས་གཏན་འཁེལ་གནང་བ་བཅས་ཀྱི་གནས་བསྡུས་སུ།།
