༢༠༠༨།༦།༢༣
ཁམས་དཀར་མཛེས་རྫོང་དུ་ཉིན་གཅིག་ཏུ་ཞི་རྒོལ་ཐེངས་གསུམ་བྱུང་བ།
ཟླ་ ༦ ཚེས་ ༢༢ ཉིན་སྔ་དྲོའི་བོད་ནང་གི་ཆུ་ཚོད་ ༡༡།༠༠ ཡས་མས་སུ་ཁམས་དཀར་མཛེས་རྫོང་ཁོངས་ཁང་དམར་དགོན་གྱི་གྲྭ་ཚེ་རིང་ཕུན་ཚོགས་དང་། བཀྲ་ཤིས་ཤེས་རབ་གཉིས་ཀྱིས་དཀར་མཛེས་རྫོང་ཐོག་ཏུ་ཞི་བའི་སྐད་འབོད་བྱས་ཡོད་འདུག་པ་དང་། སྐད་འབོད་བྱེད་སྐབས་སྤྱི་བདེ་ཉེན་རྟོག་པ་དང་དྲག་ཆས་ཉེན་རྟོག་པ་ཡོང་སྟེ་ཁོང་གཉིས་པོ་འཛིན་བཟུང་བྱས་ཡོད་འདུག
དེ་མཇུག་ཉིན་རྒྱབ་ཆུ་ཚོད་ ༡།༠༠ ཙམ་ལ་སླར་ཡང་ཁང་དམར་དགོན་གྱི་གྲྭ་གསེར་དགའ་དང་། ཡེ་ཤེས་དར་རྒྱས་ནས་ཞི་བའི་ངོ་རྒོལ་བྱས་པར་བརྟེན། སྤྱི་བདེ་ཉེན་རྟོག་པ་དང་དྲག་ཆས་ཉེན་རྟོག་པས་ཉེས་རྡུང་ཚབས་ཆེ་གཏོང་བཞིན་འཛིན་བཟུང་བྱས་ཡོད་འདུག
ཡང་ཉིན་རྒྱབ་ཆུ་ཚོད་ ༣།༠༠ ཡས་མས་སུ་དཀར་མཛེས་རྫོང་ཁོངས་རྒྱན་བཟང་གྲོང་ཚོ་ནས་ཡིན་པའི་མི་སྐྱ་ཞིག་གིས་སྣེ་ཁྲིད་འོག་ཁྱོན་བོད་མི་བཅུ་ལྷག་ཙམ་གྱིས་རྫོང་ཐོག་ཏུ་ཞི་བའི་སྐད་འབོད་བྱས་རྗེས་སྤྱི་བདེ་ཉེན་རྟོག་པ་དང་དྲག་ཆས་ཉེན་རྟོག་པས་ལམ་སེང་འཛིན་བཟུང་བྱས་འདུག ཞིབ་ཕྲའི་གནས་ཚུལ་ཁ་གསལ་མི་འདུག
གོང་གསལ་རྣམ་པས་སྐད་འབོད་བྱས་པའི་ནང་དོན་གཙོ་བོ་ནི། བོད་རང་བཙན་ཡིན། ༸རྒྱལ་བ་རིན་པོ་ཆེ་སྐུ་ཚེ་ཁྲི་ལོར་བརྟན་པར་ཤོག ༸རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས་ཞེས་སོགས་ཡིན་འདུག
ཁམས་དཀར་མཛེས་རྫོང་དུ་མི་གསུམ་གྱིས་སྐད་འབོད་བརྒྱབ་པ།
ཕྱི་ཟླ་ ༦ ཚེས་ ༡༥ ཉིན་བོད་ནང་གི་སྔ་དྲོ་ཆུ་ཚོད་ ༡༠།༠༠ ཐོག་ཁམསདཀར་མཛེས་རྫོང་མདའ་མདོ་ཤང་ར་ཁ་གྲོང་བུ་ནས་ཡིན་པའི་རང་ལོ་ ༣༡ དུ་སོན་པ་བསོད་ནམས་དབང་རྒྱལ་དང་། རང་ལོ་ ༢༣ དུ་སོན་པ་རྡོ་རྗེ་བློ་རིག རང་ལོ་ ༢༤ སོན་པ་རིན་ཆེན་དོན་གྲུབ་བཅས་གསུམ་ནས་བསམ་པ་གཅིག་མཐུན་གྱིས་རྫོང་ཉེན་རྟོག་ལས་ཁུངས་ཀྱི་སྒོ་འགྲམ་དུ་སོང་ནས་༸གོང་ས་མཆོག་གི་སྐུ་པར་མགོ་བོར་བཞག་སྟེ་ཡིག་ཆ་མང་པོ་གཏོར་འགྲེམས་བྱས་པ་དང་འབྲེལ། ང་ཚོའི་རྩ་བའི་ནོར་བུ་༸རྒྱལ་བ་རིན་པོ་ཆེ་མཆོག་དང་པཎ་ཆེན་རིན་པོ་ཆེ་རྣམ་གཉིས་ཡིན། ༸རྒྱལ་བ་རིན་པོ་ཆེ་ས་མཐར་ཕུད་པ་དང་། པཎ་ཆེན་རིན་པོ་ཆེ་བཙོན་དུ་བཅུག་ཡོད། ༸རྒྱལ་བ་རིན་པོ་ཆེ་བོད་དུ་གདན་འདྲེན་ཞུ་དགོས། པཎ་ཆེན་རིན་པོ་ཆེས་དབུས་པའི་ཆབ་སྲིད་བཙོན་པ་རྣམས་གློད་གྲོལ་གཏོང་དགོས། བོད་ལ་རང་བཙན་དགོས། རྒྱ་མི་བོད་ནས་འགྲོ་དགོས་ཡོད་ཅེས་སྐད་འབོད་བྱས་འདུག ཁོང་ཚོས་སྐད་འབོད་བྱས་རྗེས་སྤྱི་བདེ་ཉེན་རྟོག་པ་དང་དྲག་ཆས་ཉེན་རྟོག་དམག་མིས་ཉེས་རྡུང་ཚད་ལས་འདས་པ་བཏང་སྟེ་འཛིན་བཟུང་བྱས་ཡོད་འདུག་པ་དང་། ད་ལྟའི་ཆར་གང་དུ་འཁྲིད་ཡོད་མེད་ཤེས་རྟོགས་མི་འདུག ཁོང་ཚོ་ཚང་མ་སྤུན་མཆེད་ཡིན་འདུག་ཀྱང་ཕ་མ་གཅིག་གི་སྤུན་མཆེད་རེད་མི་འདུག
