༠༨།༦།༠༤
དཀར་མཛེས་རྫོང་ཐོག་ཏུ་བོུ་ཞིག་གིས་སྐད་འབོད་བྱས་པར་རྡུང་རྡེག་གིས་འཇུ་བཟུང་བྱུང་བ།
ཕྱི་ཟླ་ ༥ ཚེས་ ༣༡ རེས་གཟའ་སྤེན་པའི་ཉིན་གྱི་ཉིན་དགུང་ཆུ་ཚོད་ ༡༢ ཙམ་དུ་ཁམས་དཀར་མཛེས་རྫོང་ཐོག་ཏུ་སླར་ཡང་བྱམས་པ་བདེ་སྐྱིད་ཟེར་བ་ཞིག་ནས་བོད་རང་བཙན་ཡིན་སོགས་ཀྱི་སྐད་འབོད་བྱས་འདུག ཁོང་མོ་རང་ལོ་ ༢༠ སོན་ཞིང་ཐིང་ཀ་ཤང་ཁོངས་ཀྱི་ཇོ་ཁང་ནང་ཁ་དགོན་ཚང་ནས་ཡིན་པ་རེད། ཁོང་མོས་སྐད་འབོད་བྱས་མ་ཐག་སྤྱི་བདེ་ཉེན་རྟོག་པ་དང་དྲག་ཆས་ཉེན་རྟོག་དམག་མི་ཡོང་སྟེ་འཇུ་བཟུང་བྱེད་སྐབས་ཁོང་མོའི་མགོ་བོར་བཞུས་ཏེ་ཁྲག་ཕོན་ཆེ་ཐོན་འདུག་ཀྱང་། དེ་མཇུག་འཁྲིད་ཕྱིན་པའི་གནས་ཚུལ་ཐོན་འདུག
དཀར་མཛེས་རྩིས་ཚང་དགོན་གྱི་གྲྭ་བ་ཞིག་གིས་སྐད་འབོད་བྱས་པར་འཛིན་བཟུང་བྱུང་བ།
ཕྱི་ཟླ་ ༥ ཚེས་ ༢༢ ཉིན་ཁམས་དཀར་མཛེས་རྫོང་དུ་དཀར་མཛེས་རྩིས་ཚང་དགོན་པའི་གྲྭ་ཨོ་རྒྱན་བཀྲིས་ཞུ་བ་རང་ལོ་ ༡༨ཞིག་གིས་༸གོང་ས་མཆོག་གི་སྐུ་དཔར་ཆེན་པོ་ཞིག་འཁྱེར་ཏེ་ཞི་བའི་སྐད་འབོད་བྱས་པའི་གནས་ཚུལ་ཐོན་རྗེས་སྤྱི་བདེ་ཉེན་རྟོག་པས་ལམ་སེང་འཛིན་བཟུང་བྱས་ཡོད་འདུག
དཀར་མཛེས་རྫོང་ཐོག་ཏུ་ན་གཞོན་ཞིག་གིས་སྐད་འབོད་བྱས་པར་འཛིན་བཟུང་བྱུང་བ།
ཕྱི་ཟླ་ ༥ ཚེས་ ༡༥ ཉིན་ཁམས་དཀར་མཛེས་རྫོང་སེ་ངོ་ཤང་ནས་ཡིན་པའི་རྡོ་རྗེ་བཀྲིས་ཞུ་བ་རང་ལོ་ ༡༨ཞིག་གིས་རྫོང་ཐོག་ཏུ་སྐད་འབོད་བྱས་མ་ཐག་སྤྱི་བདེ་ཉེན་རྟོག་པས་འཛིན་བཟུང་བྱས་ཡོད་པའི་གནས་ཚུལ་ཐོན་འདུག
དཀར་མཛེས་ཁོངས་སུ་དམ་བསྒྲགས་ཤུགས་ཆེ་འོག་ཞི་རྒོལ་བསྟུད་མར་བྱེད་བཞིན་པ།
དཀར་མཛེས་རྫོང་ཐོག་ཏུ་ཟླ་ ༣ ཚེས་ ༡༨ ཉིན་ངོ་རྒོལ་ཤུགས་ཆེ་ཐོག་མར་བྱུང་བ་ནས་བཟུང་དམ་བསྒྲགས་ཤུགས་ཆེ་བྱེད་མུས་ལ་མ་འཇིགས་པར་རྫོང་ཁོངས་ཀྱི་གྲྭ་བཙུན་རྣམས་ནས་རྫོང་གནས་ཡུལ་གཙོ་བོར་གྱུར་བའི་ས་གནས་ཁག་ཏུ་ཞི་བའི་ངོ་རྒོལ་སྔ་རྗེས་རིམ་པར་བྱས་ཡོད་པ་མ་ཟད། ལྷག་པར་ཕྱི་ཟླ་ ༥ པའི་ཟླ་དཀྱིལ་ནས་བཟུང་ངོ་རྒོལ་ཐེངས་འགའ་ཤས་བསྟུད་མར་བྱས་དང་བྱེད་བཞིན་ཡོད་པར་བརྟེན། ད་ཆ་ས་གནས་སུ་དམ་བསྒྲགས་སྔར་ལས་ཧ་ཅང་ཆེ་བ་དང་། གྲྭ་བཙུན་རྣམས་ལ་དམིགས་བསལ་གྱིས་དམ་དྲག་ཤུགས་ཆེ་བྱེད་བཞིན་ཡོད་ནའང་། གཞོན་སྐྱེས་ཚོས་གདུང་སེམས་མཉམ་སྐྱེད་མཚོན་ཆེད་ངོ་རྒོལ་གྱི་ལས་འགུལ་འདྲ་མིན་སྤེལ་བཞིན་པའི་གནས་ཚུལ་མུ་མཐུད་ཐོན་བཞིན་ཡོད་པ་རེད།།
