༠༨།༦།༠༣
ལྷ་སར་གཞོན་སྐྱེས་གསུམ་གྱིས་བོད་རང་བཙན་ཡིན་པའི་སྐད་འབོད་བྱས་པ།
ཕྱི་ཟླ་ ༥ ཚེས་ ༢༤ རེས་གཟའ་སྤེན་པའི་ཉིན་རྒྱབ་ཏུ་ལྷ་སའི་ཁྲོམ་གཟིགས་ཁང་ཁུལ་དུ་བོད་རང་བཙན་གྱི་སྐད་འབོད་བྱས་ཡོད་པའི་གནས་ཚུལ་ཐོན་འདུག དེ་ཡང་གོང་གསལ་དུས་ཚོད་ཐོག་བོད་མི་ཕོ་གསར་གསུམ་གྱིས་ཁྲོམ་གཟིགས་ཁང་དུ་ཁྲོམ་དང་ཚོང་ཁང་སྒོ་ཕྱེས་ཡོད་པའི་བོད་མི་ཁག་ཅིག་ལ། ཁྱེད་ཚོར་རྩམ་པ་བཟའ་རྒྱུ་མེད་དམ། ང་ཚོ་བོད་མི་ཚོས་སྡུག་པོ་དེ་འདྲ་མཐོང་ནས་བསྡད་ཡོད་ཀྱང་ཁྱེད་ཚོས་ཁྲོམ་བཏོན་པ་གང་ཡིན་ཞེས་ཤོད་རེས་བྱས་པ་དང་། དེར་མཐུད་ཕོ་གསར་དེ་ཚོས་བོད་རང་བཙན་ཡིན་ཞེས་སྐད་འབོད་བྱས་སྟབས། ཉེ་འཁོར་གྱི་སྒྲིག་ཆས་གྱོན་པ་དང་མ་གྱོན་པའི་སྤྱི་བདེ་ཉེན་རྟོག་པ་དང་དྲག་ཆས་དམག་མི་སོགས་ཀྱིས་མཉམ་རུབ་བྱས་ཏེ་ཕོ་གསར་གསུམ་པོ་དང་ཕན་ཚུན་ལག་འཛིང་བྱས་འདུག དེའི་རྐྱེན་གྱིས་ཉེ་འཁྲིས་སུ་ཡོད་པའི་མི་མང་ཚང་མ་ཁ་འཐོར་ཏེ་བྲོས་ཕྱིན་པ་དང་། ལག་འཛིང་མུ་མཐུད་བྱེད་པའི་སྐབས་མེ་མདའམ་འབར་གས་ཀྱི་སྒྲ་ཞིག་གྲགས་འདུག དེ་འཕྲལ་བར་བསྐོར་ཉེ་འཁྲིས་ཀྱི་ཚོང་ཁང་ཆ་ཚང་སྒོ་བརྒྱབས་པ་དང་། མི་སྣ་འགྲོ་འོང་བྱེད་མཁན་ཚོར་དྲག་ཆས་དམག་མིས་ཞིབ་བཤེར་བྱེད་ཤུགས་ཆེ་རུ་བཏང་འདུག གནས་ཚུལ་འདི་དག་གི་ཐོག་མར་བྱུང་སྟངས་དང་། སྐད་འབོད་བྱེད་མཁན་ཕོ་གསར་གསུམ་པོའི་ཞིབ་ཕྲའི་ལོ་རྒྱུས། ད་ལྟའི་ཆར་ཁོང་ཚོའི་གནས་སྟངས་ཇི་ཆགས་སོགས་ཞིབ་ཕྲའི་གནས་ཚུལ་ཤེས་རྟོགས་མི་འདུག
གྲྭ་བཙུན་ཁག་ཅིག་གློད་གྲོལ་ཐོབ་རྗེས་དགོན་པར་སྒྲིག་ཞུགས་བྱ་རྒྱུར་འགོག་ཐབས་བྱས་པ།
འཕན་པོ་ཁུལ་དུ་དགའ་ལྡན་ཆོས་འཁོར་དགོན་དང་། ཤར་འབུམ་པ་བཙུན་དགོན་སོགས་ཀྱི་གྲྭ་བཙུན་རྣམས་ནས་ཕྱི་ཟླ་ ༣ པའི་ནང་ཉིན་གཉིས་རིང་ངོ་རྒོལ་བྱས་པར་གྲྭ་བཙུན་ཁག་ཅིག་བཀག་ཉར་བྱུང་བ་རྣམས་ཕྱི་ཟླ་ ༥ ཚེས་ཤར་དུ་གློད་གྲོལ་ཐོབ་ཡོད། འོན་ཀྱང་ཁོང་ཚོ་སོ་སོའི་དགོན་པར་མུ་མཐུད་སྒྲིག་ཞུགས་བྱ་རྒྱུར་ས་གནས་འབྲེལ་ཡོད་ཚན་པས་འགོག་ཐབས་བྱས་པར། ཁུངས་སོ་སོའི་གྲྭ་བཙུན་དང་མང་ཚོགས་ནས་ངོ་རྒོལ་གྱི་རྣམ་འགྱུར་ཤུགས་ཆེ་བསྟན་པའི་དབང་གིས་ཁོང་རྣམས་དགོན་པར་སྒྲིག་ཞུགས་མུ་མཐུད་བྱས་ཆོག་ཡོད་ནའང་། དགོན་པ་སོ་སོར་རྒྱལ་གཅེས་རིང་ལུགས་ཀྱི་སློབ་གསོའི་ལས་འགུལ་མུ་མཐུད་ཤུགས་ཆེ་སྤེལ་འཆར་ཡོད་པའི་གནས་ཚུལ་ཐོན་འདུག
