༠༨།༦།༢༤
ཨོ་ལེམ་པིཀ་དཔལ་འབར་ལྷ་སར་འབྱོར་བ་དང་བསྟུན་དཀར་མཛེས་རྫོང་དུ་ངོ་རྒོལ་བྱས་པ།
ཕྱི་ཟླ་ ༦ ཚེས་ ༢༡ ཉིན་ཨོ་ལེམ་པིཀ་རྩེད་འགྲན་གྱི་དཔལ་འབར་བོད་ཀྱི་རྒྱལ་ས་ལྷ་སར་འབྱོར་བ་དང་སྟབས་བསྟུན་ཏེ་ཁམས་དཀར་མཛེས་སུ་ངོ་རྒོལ་ལས་འགུལ་མང་པོ་ཞིག་སྤེལ་ཡོད་འདུག་ཀྱང་གནས་ཚུལ་ཁ་གསལ་ཞིག་མི་འདུག
དེ་ཉིན་དཀར་མཛེས་རྫོང་མདའ་མདོ་ཤང་ཁ་ཤུལ་གྲོང་ཚོ་ནས་ཡིན་པའི་དགྲ་འགུ་ཞེས་པའི་ཕོ་གཞོན་ཞིག་ནས་དཀར་མཛེས་རྫོང་ཁྲོམ་གཞུང་དུ་བོད་རང་བཙན་ཡིན་ཞེས་སྐད་འབོད་བྱས་པར་སྤྱི་བདེ་ཉེན་རྟོག་པས་ཁོ་པའི་རྐང་ལག་བསྡམས་བཀྱིག་གིས་འཛིན་བཟུང་བྱས་ཡོད་འདུག ཁོ་པས་རས་དཀར་པོའི་ཐོག་ལ་བོད་རང་བཙན་ཡིན་ཞེས་བྲིས་པ་ཞིག་མགོ་བོར་གྱོན་ཞིང་། གདོང་གི་མཁུར་ཚོས་གཉིས་སོ་སོར་བོད་ཀྱི་དར་ཆ་རེ་རེ་བྲིས་ཡོད་པ་མ་ཟད། སྐད་འབོད་བྱེད་སྐབས་ཁོ་པས་ཡིག་ཆ་ཧ་ཅང་མང་པོ་བཀྲམས་ཡོད། ཡིག་ཆའི་ནང་རྒྱ་ནག་གཞུང་ལ་དགོས་འདུན་དོན་ཚན་ ༩ བཏོན་ཡོད་པའི་ཁོངས་གཙོ་བོར་༸གོང་ས་མཆོག་བོད་དུ་གདན་འདྲེན་ཞུ་དགོས་པ་དང་། བོད་ནང་འགྲོ་བ་མིའི་ཐོབ་ཐང་དགོས་པ། ཆབ་སྲིད་བཙོན་པ་ཚང་མ་གློད་གྲོལ་གཏོང་དགོས་པ་སོགས་ཡིན་འདུག
ད་དུང་ཉིན་དེར་བོད་མི་གཞོན་སྐྱེས་བཞི་ཙམ་ཞིག་གིས་ཀྱང་ངོ་རྒོལ་སྐད་འབོད་བྱས་ཡོད་འདུག་ཀྱང་། ཞིབ་ཕྲའི་གནས་ཚུལ་ཤེས་རྟོགས་མི་འདུག དཀར་མཛེས་རྫོང་ཁོངས་སུ་དམག་མི་ཁ་སྣོན་བཏང་ཡོད་འདུགདཀར་མཛེས་རྫོང་ཐོག་ཏུ་བེ་རི་དགོན་པའི་གྲྭ་གསུམ་གྱིས་ངོ་རྒོལ་བྱས་པར་འཛིན་བཟུང་བྱུང་བ། ཕྱི་ཟླ་ ༦ ཚེས་ ༡༨ ཉིན་ཁམས་དཀར་མཛེས་རྫོང་ཁོངས་བེ་རི་དགོན་པའི་དབུ་མཛད་བློ་བཟང་དགེ་ལེགས་དང་། དབུ་ཟུར་ཐང་རྙེད། བློ་བཟང་དཔལ་ལྡན་གསུམ་ནས་དཀར་མཛེས་རྫོང་ཐོག་ཏུ་ཞི་བའི་སྐད་འབོད་བྱས་མ་ཐག་སྤྱི་བདེ་ཉེན་རྟོག་པས་འཛིན་བཟུང་བྱས་འདུག ཚེས་ ༡༩ ཉིན་བེ་རི་དགོན་པར་རྒྱལ་གཅེས་རིང་ལུགས་ཀྱི་སློབ་གསོའི་ལས་འགུལ་སྤེལ་ཆེད་རྒྱ་གཞུང་གི་ལས་དོན་རུ་ཁག་ཡོང་སྐབས་དགེ་འདུན་པས་ངོ་རྒོལ་གྱི་རྣམ་འགྱུར་བསྟན་པར་བརྟེན། ལས་དོན་རུ་ཁག་ནས་དགོན་པར་སློབ་གསོའི་ལས་འགུལ་སྤེལ་ཐུབ་མི་འདུག
