ཕྱི་ལོ་ ༢༠༠༨ ཟླ་ ༦ ཚེས་ ༢ རེས་གཟའ་ཟླ་བ།
༄༅། །བོད་གཞུང་ཤེས་རིག་ལས་ཁུངས་ནས་གནང་ནས་ནང་། དབུས་བོད་སློབ་འཛིན་ཚོགས་ཀྱི་འགན་འཛིན་ཚོགས་འདུ་བསྐྱངས་ཐེངས་ ༢༠ པ་དེ་ཕྱི་ལོ་ ༢༠༠༨ ཟླ་ ༥ ཚེས་ ༢༨ ནས་ཚེས་ ༣༠ བར་རྒྱ་གར་རྒྱལ་ས་ལྡི་ལིར་ཚོགས་གནང་ཡོད་པ་རེད། ཚོགས་འདུ་ཉིན་དང་པོར་ཁྱབ་ཁོངས་སློབ་ཁག་གི་ཕྱི་ལོ་ ༢༠༠༧ ལོའི་དགེ་ལས་རྩེ་ཕུད་ཀྱི་གཟེངས་རྟགས་དབུས་བོད་སློབ་འཛིན་ཚོགས་ཀྱི་སྤྱི་ཁྱབ་ཚོགས་གཙོའམ་རྒྱ་གར་གཞུང་གི་ཤེས་རིག་ལས་ཁུངས་ཀྱི་ཟུང་དྲུང་ཨེསེ། སི། ཁུན་ཊི་ཡ་མཆོག་ནས་གཟེངས་རྟགས་གནང་ཡོད་པ་རེད།
གཡོན་ཕྱོགས་ནས་མདུན་གྲལ་དུ་བོད་གཞུང་ཤེས་རིག་དྲུང་འཕར་རི་ཁ་བཀྲིས་ཤིས་ནོར་བུ་ལགས་དང་། ལྡི་ལི་སྐུ་ཚབ་དོན་གཅོད་བཀའ་བློན་བསྟན་པ་ཚེ་རིང་མཆོག དབུས་བོད་སློབ་འཛིན་ཚོགས་ཀྱི་སྤྱི་ཁྱབ། རྒྱ་གར་དབུས་གཞུང་ཤེས་རིག་ལས་ཁུངས་ཀྱི་ཟུང་དྲུང་། དབུས་བོད་སློབ་འཛིན་ཚོགས་ཀྱི་འགན་འཛིན་བཅས་དང་། རྒྱབ་གྲལ་དུ་དགེ་ལས་རྩེ་ཕུད་ཀྱི་གཟེངས་རྟགས་ཐོབ་མི་རྣམས་ཡིན།
གཟེངས་རྟགས་ཐོབ་མཁན་ཁོངས་སུ་རྡོར་གླིང་གཏན་སློབ་ཀྱི་མཐོ་རིམ་སློབ་དགེ་དབང་ཕྱུག་ལགས་དང་། མོན་གྷོ་གཏན་སློབ་ཀྱི་གཞི་རིམ་འོག་མའི་དགེ་ཆེ། མ་ལྷུ་སོ་ལྷན་ནན། མ་སུ་རི་གཏན་སློབ་ཀྱི་ཤིང་བཟོ་སློབ་དགེ། ཨེན། པན་ཌེ། བྷེལ་ཀོབ་བདེ་སྐྱིད་སླར་བཟོ་ཉིན་སློབ་ཀྱི་གཞི་རིམ་འོག་མའི་སློབ་དགེ་བློ་བཟང་སྒྲོལ་མ་ལགས་བཅས་དགེ་རྒན་ཁོངས་དང་། ལས་བྱེད་ཁོངས་ནས་མ་སུ་རི་གཏན་སློབ་ལས་ཁུངས་ཀྱི་ལས་བྱེད་ཨར། ཀེ། པ་ཊཀ་དང་། མོན་གྷོ་གཏན་སློབ་ཀྱི་གད་པ་དང་མཚན་སྲུང་བ་ཇེ། ཨེམ། ནེཀ་བཅས་ལ་གཟེངས་རྟགས་ཐོབ་ཡོད་པ་རེད།
ཚོགས་འདུ་དང་གཟེངས་རྟགས་མཛད་སྒོར་ཤེས་རིག་ལས་ཁུངས་ཀྱི་དྲུང་འཕར་རི་ཁ་བཀྲ་ཤིས་ནོར་བུ་ལགས་དང་ཤེས་ཡོན་འགན་འཛིན་ཚེ་རིང་ཕུན་ཚོགས་ལགས་ཀྱང་ཕེབས་གནང་ཡོད་པ་རེད། ཚོགས་འདུ་ཉིན་གཉིས་པར་ཤེས་རིག་དྲུང་ཆེས་བོད་མིའི་ཤེས་ཡོན་དགོས་དམིགས་དང་ཐབས་བྱུས་སྐོར་ལ་ཆུ་ཚོད་གཉིས་རིང་གི་ཚོགས་ཐེངས་གཅིག་ནང་གསུང་བཤད་གནང་ཡོད་པ་རེད།།
