༄༅། །ཕྱི་ལོ་ ༢༠༠༨ ཟླ་ ༤ ཚེས་ ༢ ཉིན་སྤེལ་བའི་གསར་འགོད་སྙན་ཐོར་གཞིགས་ན་བོད་རང་སྐྱོང་ལྗོངས་ཀྱི་དྲུང་ཆེ་ཀྲང་ཇིང་ལིའི་ཡིས་ཉེ་ལམ་བོད་ཀྱི་ས་ཁུལ་ཁག་ཏུ་འཁྲུག་ཟིང་ནང་ཞུགས་མཁན་ཚང་མ་ཕྱི་ཟླ་ ༤ པའི་ཟླ་མཇུག་ཏུ་དམ་བསྒྲགས་ཤུགས་ཆེ་འོག་ཁྲིམས་ཞིབ་ཐག་གཅོད་དང་བཙོན་འཇུག་བྱེད་རྒྱུ་ཡིན་པའི་ལུང་འདྲེན་གཏམ་བཤད་བྱས་ཡོད་པ་རེད།
ད་ལྟ་ཐོན་བཞིན་པའི་ཚུལ་གཞིགས་ན་ཀྲང་ཇིང་ལིའི་ཡིས་མངའ་སྡེའི་རྫོང་ཁུལ་དང་། དེ་ཡནགྱི་དམར་ཤོག་ཚོགས་པའི་འཛིན་སྐྱོང་མི་སྣ། གཞུང་གི་ལས་བྱེད་པ་བཅས་ཡོད་པའི་ལྷན་འཛོམས་ཀྱི་ཚོགས་འདུ་ཞིག་གི་ཐོག་ཁྱབ་བསྒྲགས་བྱེད་དོན་ལ་གཞུང་ནས་བཀའ་བཀོད་མྱུར་པོ། འཛིན་བཟུང་མྱུར་པོ། ཁྲིམས་གཅོད་མྱུར་པོ་ལ་སོགས་པའི་བྱེད་སྒོ་བཞི་གང་མགྱོགས་དང་ལེན་བྱེད་རྒྱུ་ཡིན་ཞེས་གསལ་བསྒྲགས་བྱས་ཡོད་འདུག ས་གནས་ཀྱི་བཀའ་བཀོད་དེ་དག་ལ་གཞིགས་ན་བོད་ནང་གི་དབང་འཛིན་པ་རྣམས་ཀྱིས་ཁྲིམས་ལུགས་ཀྱི་ལག་བསྟར་དང་མི་མཐུན་པའི་ཁྲིམས་ཐག་མྱུར་པོ་གཅད་དེ་སྲོག་ཐོག་གཏོང་རྒྱུ་ཡིན་པ་གསལ་པོ་རེད། དེར་བརྟེན་ང་ཚོས་རྒྱལ་སྤྱིའི་ཁྲིམས་ལུགས་ཀྱི་མི་སྣ་དང་སྲིད་གཞུང་ལ་འཛིན་བཟུང་བྱས་པ་དེ་དག་གི་སྲོག་སྐྱོབ་ཐབས་དང་ཁོང་ཚོར་ཁྲིམས་མཐུན་གྱི་ཁྲིམས་ཐག་གཅོད་ཐབས་དགོས་པའི་རོགས་རམ་གནང་སྐྱོང་ཡོང་བའི་ཛ་དྲག་གི་འབོད་སྐུལ་ཞུ་གི་ཡོད། འགུལ་སྐྱོད་ཐོག་དམ་བསྒྲགས་ཤུགས་ཆེ་བྱས་རྐྱེན་ལྷག་པར་དགོན་པའི་ནང་དུ་ཡོད་པའི་བོད་མི་ཚོར་ཟས་རིགས་མཁོ་སྒྲུབ་བྱེད་ཐུབ་ཀྱི་མེད་པ་རེད། དེར་བརྟེན་དགོན་པའི་ནང་དུ་དོ་དམ་བྱས་པ་རྣམས་ལ་བཟའ་འཐུང་ཆད་པའི་དཀའ་ངལ་ཤུགས་ཆེ་འཕྲད་པ་མ་ཟད། ལྟོག་ཤི་ཐེབས་རྒྱུའི་ཉེན་ཁའི་མཚམས་སུ་སླེབས་ཡོད་པ་ཁོང་ཚོར་དུས་ཐོག་གི་བཟའ་ཆས་དང་དེ་མིན་གྱི་དགོས་མཁོ་གང་དགོས་སྤྲོད་དགོས་པའི་རོགས་རམ་གནང་རོགས་ཞེས་འབོད་སྐུལ་ཞུ་གི་ཡོད།།
