༢༠༡༧ ཟླ་ ༦ ཚེས་ ༡༥ རེས་གཟའ་ཕུར་བུ།

༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་མིན་ནེ་སོ་ཊ་མངའ་སྡེའི་གྲོང་ཁྱེར་རུ་ཆེ་སི་ཊར་ Rochester ནང་རྟེན་གཞི་བྱས་པའི་མ་ཡོ་སྨན་ཁང་ Mayo Clinic དུ་ལོ་ལྟར་༸སྐུའི་འཕྲོད་བཞེས་ལ་སྨན་པས་བརྟག་དཔྱད་ཞུ་སྲོལ་ཡོད་པ་ལྟར། ཕྱི་ལོ་ ༢༠༡༧ ཟླ་ ༦ ཚེས་ ༡༣ ཉིན་མགོན་པོ་གང་ཉིད་མཆོག་སྨན་ཁང་དེར་༸ཞབས་སོར་འཁོད་གནང་མཛད་ཡོད།

འདི་གའི་གསར་འགོད་པས་སྐུ་ཚབ་དོན་གཅོད་སྤེན་པ་ཚེ་རིང་མཆོག་ལ་ཞལ་པར་བརྒྱུད་ཨ་རིའི་ནང་གི་མཛད་འཕྲིན་ཁག་དང་ལྷག་པར་༸སྐུའི་འཕྲོད་བཞེས་དང་འབྲེལ་བའི་གནད་དོན་ཐོག་དྲི་བ་ཞུས་པར་ལན་འདེབས་གནང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ཟླ་ ༦ ཚེས་ ༡༣ ནས་ ༢༥ བར་ཨ་རིའི་ཁུལ་གྱི་མཛད་འཆར་ཁོངས་ནས་ཐོག་མར་མ་ཡོ་སྨན་ཁང་དུ་༸སྐུའི་འཕྲོད་བཞེས་བརྟག་དཔྱད་མཛད་རྒྱུ་དེ་རེད།  དེ་ནི་གཙོ་བོ་ལོ་ལྟར་སྨན་ཁང་འདིར་༸སྐུའི་འཕྲོད་བཞེས་ལ་སྨན་པས་བརྟག་དཔྱད་ཞུ་རྒྱུ་དེ་རྒྱུན་ལྡན་གྱི་བྱེད་སྒོ་ལྟ་བུ་ཞིག་ཡིན་སྟབས་མང་ཚོགས་རྣམས་ཀྱིས་ཐུགས་འཚབ་གནང་དགོས་པ་རྩ་བ་ནས་མེད།

 མ་ཡོ་སྨན་ཁང་དུ་ཁ་སང་དང་དེ་རིང་བཞུགས་བཞག་མཛད་ཡོད།  ལྷག་པར་གཏམ་བཟང་གི་གནས་ཚུལ་ཞིག་ལ་སྨན་པས་མགོན་པོ་གང་ཉིད་མཆོག་གི་༸སྐུ་གཟུགས་གནས་སྟངས་ཧ་ཅང་ཡག་པོ་ཡོད་པ་གསུང་བྱུང་།  སྨན་ཁང་ནང་གི་བརྟག་དཔྱད་ལེགས་གྲུབ་རྗེས་སང་སྔ་དྲོར་སེན་ཌི་ཡ་གོ་ས་གནས་སུ་ཉིན་གྲངས་བཞིའི་རིང་མཛད་འཕྲིན་བསྐྱང་གནང་མཛད་རྒྱུ་དང་།  སྐབས་དེར་གཙོ་བོ་མི་གྲངས་ ༢༦༠༠༠ བརྒལ་བར་བཀའ་སློབ་བསྩལ་གནང་མཛད་རྒྱུ་དང་།  ལྷག་པར་སེན་ཌི་ཡ་གོའི་ཀེ་ལོ་ཕོར་ནི་ཡ་མཐོ་སློབ་ University of California San Diego ཏུ་མི་གྲངས་སྟོང་ཕྲག་ ༢༥༠༠༠  ལ་བཀའ་སློབ་བསྩལ་གནང་མཛད་རྒྱུ་རེད།

ཕྱོགས་མཚུངས་གནད་ཡོད་མི་སྣ་ཁག་གཅིག་དང་ལྷན་ཟུར་མཇལ་རིགས་སོགས་མཛད་འཕྲིན་ཁག་གཅིག་ཡོད།   མི་ནི་སོ་ཊ་ Minnesota ས་གནས་སུ་ཉིན་གྲངས་གསུམ་གྱི་མཛད་འཆར་ཡོད་པའི་ནང་ནས་ཕྱི་ཟླ་ ༦ ཚེས་ ༢༤ ཉིན་བོད་རིགས་མང་ཚོགས་ལ་བཀའ་སློབ་བསྩལ་གནང་མཛད་རྒྱུ་དང་ཕྱི་ཚེས་ ༢༥ ཉིན་བྷོ་སི་ཊོན་ས་གནས་སུ་ཉིན་གྲངས་གཅིག་རིང་མཁས་ལས་པ་དང་ལྷན་མཇལ་འཕྲད་མཛད་རྗེས་ཕྱི་ཚེས་ ༢༦ ཉིན་རྒྱ་གར་དུ་ཆིབས་༸ཞལ་སྒྱུར་གནང་མཛད་རྒྱུ་རེད།  ཅེས་གསུངས།།