༢༠༡༣ ཟླ་ ༣ ཚེས་ ༢༨ རེས་གཟའ་ཕུར་བུ།
༄༅། །བོད་མི་མང་བཀའ་བརྒྱུད་སྤྱི་འཐུས་ཀརྨ་ཆོས་འཕེལ་ལགས་ནས་སྤྱི་འཐུས་སྒེར་གྱི་གསལ་བཤད་ལས་རིམ་ནང་། རང་ཉིད་ཀྱི་ལངས་ཕྱོགས་རང་དབང་རང་བཙན་གཙང་མ་སླར་གསོ་ཡོང་བར་རྒྱབ་སྐྱོར་བྱེད་རྒྱུ་ལས་དབུ་མའི་ལམ་གྱི་སྲིད་བྱུས་ལ་ད་བར་གྲོས་ཚོགས་ནང་རྒྱབ་སྐྱོར་ཞུས་པ་དེ་དག་དེ་རིང་ནས་ཕྱིར་འཐེན་ཡིན་ན་དེ་དོན་གྲོས་ཚོགས་ནས་ངོས་འཛིན་གསལ་པོ་གནང་རོགས་སོགས་སྤྱི་འཐུས་སྒེར་གྱི་གསལ་བཤད་བྱས་ཡོད་པར་བོད་མི་མང་སྤྱི་འཐུས་ཚོགས་གཙོ་མཆོག་གིས་འགྲེལ་བརྗོད་ཁ་གསལ་གནང་དོན།
བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞི། དོན་ཚན་ཞེ་གཉིས་པའི་ནང་སྤྱི་འཐུས་སྒེར་གྱི་གསལ་བཤད་བྱ་རྒྱུའི་ཐོབ་ཐང་ཡོད། དེའི་ནང་གང་གསལ་ཡོད་དམ་བརྗོད་ན། སྤྱི་འཐུས་སྒེར་གྱི་རང་ཉིད་ཀྱི་གཞུང་དོན་དང་འབྲེལ་བའི་གྲོས་ཚོགས་ལ་གསལ་བཤད་ཞུ་དགོས་ཀྱི་ཡོད་ན། ཚོགས་གཙོའི་བཀའ་འཁྲོལ་དང་སྦྲགས་ཞུ་ཆོག་པ་གསལ་ཡོད།
ད་ལྟ་སྤྱི་འཐུས་སྒེར་གྱི་གསལ་བཤད་ཡིག་ཆ་འདི་ཕེབས་སྐབས་ཚོགས་གཙོ་སྦྲེལ་པོ་གཉིས་ཀ་བློ་བདེ་མ་སོང་བ་གྲོས་ཚོགས་ནང་གསལ་པོ་ཞུ་རྒྱུ་ཡིན། ། བློ་མ་བདེ་བའི་ཐོག་ནས་ལས་རིམ་ཚོགས་ཆུང་ནང་གོ་བསྡུར་གཅིག་ཞུས་པ་རེད།
ལས་རིམ་ཚོགས་ཆུང་གི་དགོངས་ཚུལ་གང་ཡིན་པ་དེ་སྤྱི་འཐུས་སྒེར་གྱི་གསལ་བཤད་གནང་མཁན་ཁོང་ཚོགས་གཙོ་སྦྲེལ་པོའི་སར་ཕེབས་རོགས་ཞུས་ནས་སྐབས་དེར་གསལ་བཤད་ཞུ་དགོས་པ་རྣམས་ཞུས་ཟིན་རྗེས་ད་ལྟ་བསྐྱར་དུ་ཡིག་ཆ་ཕེབས་པ་འདིར་ཚིག་ཕྲན་བུ་འགྱུར་བ་བཏང་ཡོད་ཀྱང་། དངོས་འབྲེལ་བྱས་ན་སླར་ཡང་སྤྱི་འཐུས་སྒེར་གྱི་གསལ་བཤད་གནང་མཁན་ལ་ཡང་བསྐྱར་གོ་བསྡུར་བྱ་རྒྱུའི་གནས་བབ་ཅིག་མཐོང་ནའང་། འགྲེལ་བཤད་ཞུས་ཟིན་པའི་རྗེས་སུའང་ཚིག་གཞི་འདི་འདྲ་ཞིག་གྲོས་ཚོགས་ནང་ཕེབས་དགོས་པའི་དགོས་པ་གཟིགས་བཞིན་ཡོད་ན། འདིི་ལ་དམིགས་བསལ་དམ་པོ་བྱས་ན་ཆོ་གང་ཡང་མི་འདུག་བསམས་ནས་ལས་རིམ་ཚོགས་ཆུང་དང་སླར་ཡང་གོ་བསྡུར་བྱས་ནས་གྲོས་ཚོགས་ནང་སླེབ་སྟངས་འདི་འདྲ་བྱས་བསླེབས་པ་རེད་ཞུ་རྒྱུ་ཡིན། རྩ་བའི་སྤྱི་འཐུས་སྒེར་སུ་ཡིན་རུང་། སོ་སོའི་སྒེར་གྱི་བསམ་ཚུལ་དང་ལངས་ཕྱོགས་དེ་དག་གྲོས་ཚོགས་ནང་ཤོད་རྒྱུའི་སྨྲ་བརྗོད་རང་དབང་དེ་སྔར་ནས་ཡོད་པ་ཞིག་རེད། དེའི་རྒྱུ་མཚན་དབང་གིས་སོ་སོའི་སྒེར་གྱི་ལངས་ཕྱོགས་དེ་གཙོ་འདོན་གྱིས་འབུར་ཐོན་བྱེད་ཐབས་ཀྱིས།
དཔེར་ན། ད་རེས་གྲོས་ཚོགས་འདིའི་ནང་སྒེར་གྱི་གསལ་བཤད་འདི་བརྩིས་པའི་ཐེངས་གསུམ་ཙམ་གསུངས་ཡོད། དེ་འདྲ་གསུངས་པའི་རྒྱུ་མཚན་ལ་བརྟེན་ནས་རྩ་བའི་རེ་བ་དེ་དེ་རིང་སྒེར་གྱི་བསམ་ཚུལ་འདི་གསུངས་པའི་ཐོག་ནས་གཞིས་བྱེས་བོད་མི་རྣམས་ཀྱི་སེམས་ཤུགས་འཕར་རྒྱུའི་གནས་སྟངས་སུ་འགྱུར་བའི་སྨོན་ལམ་འདྲ་པོ་ཞིག་སྒེར་གྱི་གསལ་བཤད་དེའི་མཐའ་མར་བཀོད་ཡོད། ཡིན་ནའང་སྒེར་གྱི་གསལ་བཤད་འདིའི་ནང་གནད་དོན་གལ་ཆེ་ཤོས་གང་བརྗོད་ཡོད་དམ་ཞེ་ན། དབུ་མའི་ལམ་གྱི་སྲིད་བྱུས་ལ་ད་བར་དུ་གྲོས་ཚོགས་ནང་རྒྱབ་སྐྱོར་ཞུས་པ་དེ་དག་དེ་རིང་ནས་ཕྱིར་འཐེན་ཡིན་ན་འདི་གྲོས་ཚོགས་ནས་ངོས་འཛིན་གསལ་པོ་གནང་རོགས། ཞེས་གསུངས་ཡོད།
ཕྱི་ལོ་ ༡༩༩༦ ནས་ད་བར་གྲོས་ཚོགས་ནང་མང་མོས་འོས་བསྡུའི་ལས་དོན་དང་འབྲེལ་བའི་ཐོག་ནས་ཕྱི་ལོ་ ༡༩༩༧ ལོར་སྤྱི་མོས་ཀྱིས་གཏན་ལ་ཕབ་པའི་གྲོས་ཚོགས་ཀྱི་ཡིག་ཆ་དེ་བཞིན་གྲོས་ཚོགས་སྔ་རྗེས་སུ་དབུ་མའི་ལམ་དང་འབྲེལ་བའི་ཐོག་ནས་བཞག་པའི་ཡིག་ཆ་དེ་དག་བོད་མི་མང་སྤྱི་འཐུས་ལྷན་ཚོགས་ཀྱིས་ཕྱོགས་སྒྲིག་བྱས་ནས་དེབ་བཏོན་པ་འདི། སྤྱི་འཐུས་སྒེར་གཅིག་གིས་གསལ་བཤད་ཀྱི་ལམ་ནས་ནུས་མེད་གཏོང་ཐུབ་རྒྱུ་རྩ་བ་ནས་མེད། ཅེས་གྲོས་ཚོགས་འདིའི་ནང་གསལ་པོ་ཞུ་རྒྱུ་ཡིན་འབྱུང་འགྱུར་ཡང་དབུ་མའི་ལམ་གྱི་སྲིད་བྱུས་ཀྱི་ལངས་ཕྱོགས་འདིར་འགྱུར་བ་མ་འགྲོ་བར་དུ་དེའི་གནས་བབ་རང་སོར་གནས་རྒྱུ་རེད་མ་གཏོགས་དེར་འགྱུར་བ་གང་ཡང་འགྲོ་གི་མ་རེད། དབུ་མའི་ལམ་གྱི་ལངས་ཕྱོགས་དེར་འགྱུར་བ་ཕྱིན་པའི་ཉིན་མོ་དེར་འགྱུར་བ་ཕྱིན་པའི་གནས་སྟངས་གང་འདྲ་ཞིག་ཆགས་ཀྱང་དེ་དང་བསྟུན་ནས་འགྲོ་དགོས་པ་རེད། དབུ་མའི་ལམ་གྱི་ལངས་ཕྱོས་དེར་འགྱུར་བ་འགྲོ་རྒྱུའི་བརྒྱུད་རིམ་དེའང་ད་ལྟའང་བསྡད་ཡོད་པའི་ཚོགས་གཙོ་འདི་རང་གིས་གྲོས་ཚོགས་ནང་ལམ་སྟོན་ཐེངས་གཉིས་གསུམ་ཞུས་ཟིན་པ་ཡིན། དབུ་མའི་ལམ་གྱི་ལངས་ཕྱོས་དེར་འགྱུར་བ་འགྲོ་བར།
དཔེར་ན། བོད་མི་མང་སྤྱི་ཐུས་ལྷན་ཚོགས་ནང་ལ་མང་མོས་འོས་བསྡུ་དགོས་པའི་གྲོས་འཆར་ཞིག་སྟོན་ནས། གྲོས་ཚོགས་འཚོགས་བཞིན་པའི་སྐབས་སྤྱི་འཐུས་རྩ་འབོར་གསུམ་ཆ་གཉིས་ཀྱི་རྒྱབ་སྐྱོར་བྱུང་བ་ཡིན་ན། ཡང་ན་བཀའ་སྤྱི་གཉིས་ཀྱི་གོ་བསྡུར་ཞུས་པའི་ཐོག་ནས་བཀའ་ཤག་དང་སྤྱི་འཐུས་རྒྱུན་ལས་ཀྱི་རྩ་འབོར་གྱི་བཞི་ཆ་གསུམ་གྱིས་མང་མོས་འོས་བསྡུ་བྱེད་དགོས་འདུག་ཅེས་པའི་དགོངས་ཚུལ་བྱུང་བ་ཡིན་ན། མང་མོས་འོས་བསྡུའི་བརྒྱུད་རིམ་གཅིག་གི་ཐོག་ནས་དབུ་མའི་ལམ་གྱི་སྲིད་བྱུས་དེར་འགྱུར་བ་བཏང་དང་མ་གཏང་གི་གནས་སྟངས་ཆགས་རྒྱུ་རེད། ཅེས་རིམ་པས་ཞུས་ཡོད།
དེ་བཞིན་ཚོགས་གཙོས་ད་ལྟ་ཡར་ལང་ནས་ཞུ་རྒྱུ་གང་ཡིན་བརྗོད་ན།
སྤྱི་འཐུས་སྒེར་གྱི་གསལ་བཤད་ཀྱི་ནང་དོན་གཙོ་བོ་དེ་ད་བར་དུ་སྤྱི་མོས་ཀྱིས་བཏང་བཞག་པ་དེར་ད་རེས་ངོས་འཛིན་མ་གནང་རོགས། ཞེས་བཤད་པ་དེར་གྲོས་ཚོགས་ནས་རྩ་བ་ཉིད་ནས་ངོས་འཛིན་གནང་ཐུབ་ཐབས་མེད་ཅེས་ཐག་ཆོད་པོའི་ཐོག་ནས་ཞུ་རྒྱུ་གི་ཡོད། ལར་ནས་དེ་རིངསྤྱི་འཐུས་སྒེར་གྱིས་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པའི་ཐོག་སྤྱི་འཐུས་སྒེར་གྱི་གསལ་བཤད་བྱས་པའི་ཉེར་ལེན་ལ་བརྟེན་ནས། ད་ལྟ་མུ་མཐུད་ནས་སྤྱི་འཐུས་སུ་གནས་ཡོད་པར་སོང་གཞུང་འབྲེལ་ལས་དོན་ག་འདྲ་ཞིག་ཡིན་ཡང་ངའི་སྒེར་གྱི་ལངས་ཕྱོགས་གསལ་པོ་བཟོས་ཟིན་པ་ཡིན།
དེ་རིང་ནས་བཟུང་དབུ་མའི་ལམ་བརྗོད་རྒྱུ་མིན་ཞེས་པའི་གནས་སྟངས་དེ་ཆགས་ཀྱི་མ་རེད། སྒེར་གྱི་གསལ་བཤད་གནང་ཡང་སྤྱི་འཐུས་གནང་རིང་བོད་མི་མང་སྤྱི་འཐུས་ཀྱི་སྤྱི་མོས་ཀྱི་གཏན་ལ་ཕབ་པའི་སྲིད་བྱུས་གང་ཡིན་པ་དེ་མང་ཚོགས་སམ་ཕྱིའི་མི་རིགས་བཅས་ལ་འགྲེལ་བཤད་དེ་རང་རྒྱག་དགོས་པ་ཡིན། ཞེས་སོགས་ཀྱིས་འགྲེལ་བརྗོད་ཁ་གསལ་གནང་འདུག་པ་བཅས།།
