༢༠༡༢ ཟླ་ ༨ ཚེས་ ༡༨ རེས་གཟའ་སྤེན་པ།
༄༅། །ཕྱི་ལོ་ ༢༠༡༢ ཟླ་ ༨ ཚེས་ ༡༨ ཉིན་བོད་ཀྱི་དཔེ་མཛོད་ཀྱི་ཚོགས་ཁང་ནང་སྨོན་ལམ་བོད་ཀྱི་ཀུན་བཏུས་གློག་ཀླད་ཚིག་མཛོད་ཆེན་མོའི་སྒྲོམ་གཞི་གཏན་འབེབས་དང་འབྲེལ་བའི་མཁས་པའི་བགྲོ་གླེང་གི་ཚོགས་འདུར་སྐུ་མགྲོན་གཙོ་བོ་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་གིས་ལམ་སྟོན་གསུང་བཤད་གནང་དོན། སྤྱིར་བཏང་ཚིག་མཛོད་ཟེར་བའི་ཐ་སྙད་དེ་ཞིབ་འཇུག་བྱས་ཏེ་རྙེད་པ་མིན་ཀྱང་། རྒྱ་གར་གྱི་གནའ་བོའི་ཐ་སྙད་ཅིག་དང་སྟོན་པ་འཇིག་རྟེན་དུ་མ་བྱོན་སྔོན་ནས་ཚིག་གི་མཛོད་ཕལ་ཆེར་ཡོད་བསམ་གྱི་འདུག འཆི་མེད་སེང་གེས་བརྩམས་པའི་འཆི་མེད་མཛོད་དེ་ཙམ་གྱི་རྙིང་པ་མ་རེད། དེས་ག་རེ་མཚོན་གྱི་ཡོད་དམ་ཞེ་ན། སྔོན་མ་ནས་རྒྱ་གར་ནང་ཚིག་གི་མཛོད་དང་དོན་གྱི་མཛོད་ངོ་བོ་བརྩམ་རྒྱུའི་སྲོལ་རྒྱུན་ཡོད་པ་ཞིག་རྟོགས་ནུས་ཀྱི་ཡོད། ནུབ་ཕྱོགས་པས་གཅིག་བྱས་ན་ང་ཚོ་ཤར་ཕྱོགས་པར་དཔེ་བལྟས་རྗེས་ང་ཚོར་དཔེ་ལྟ་མཁན་དེ་དག་ཡར་རྒྱས་ཆེ་རུ་ཕྱིན། ང་ཚོ་ཐོག་མའི་རིག་པའི་གཞུང་ལུགས་སྲོལ་འབྱེད་མཁན་དེ་དག་གང་ཙམ་ཞིག་ནས་ཐང་ཆད་པའམ་ཉོབ་པ་ལྟ་བུ་བྱས་ཏེ་ཡར་རྒྱས་ཀྱི་འགྲོས་དགག་སྟེ་གང་ལྟར་ཁོང་ཚོ་ནས་ལེགས་ཆ་ཚུར་ལེན་དགོས་རྒྱུ་ཡོད་པ་དེ་ངོས་ལེན་བྱེད་དགོས་པ་ཞིག་རེད།
དེ་དང་ཆབས་ཅིག་ང་རང་ཚོ་གནའ་བོའི་རིག་གཞུང་ཕྱུག་པོ་དང་གཞན་ལ་འགྲམ་ཆུ་ལྡང་བ་མི་དགོས་ཡོད་པ་མཁྱེན་དགོས་རྒྱུ་གལ་ཆེ་རེད་བསམ་གྱི་འདུག དེང་སང་གཞོན་སྐྱེས་མང་པོ་ཞིག་གི་གསར་བསྡུ་རྙིང་དོར་བྱེད་རྒྱུའི་གོམས་གཤིས་འཇགས་ནས་དེ་འདྲའི་བསམ་བློའི་འགྲོས་ཤུགས་ཆེན་པོ་སླེབས་སྐབས། ལྷག་པར་ནང་པའི་གཞུང་ལུགས་ལ་བརྟེན་པའི་བོད་ཀྱི་གནའ་བོའི་རིག་གཞུང་དེ་ཚོ་གང་ཙམ་གྱི་གཏིང་ཟབ་པོ་དང་རྒྱ་ཆེན་པོ་ཡང་དག་པ་ཡིན་པ་མཁྱེན་ཐུབ་རྒྱུ་ཁག་པོ་རེད་བསམ་གྱི་འདུག ང་ཚོས་འདས་པའི་ལོ་ཉིས་བརྒྱ་ཡས་མས་ཤིག་གི་བོད་ནང་ཕྱི་བལྟས་སློག་པའི་གནས་སྐབས་དང་། དེ་ཡང་ཆོས་དང་ལེགས་བྱང་གི་གནས་སྐབས་གང་ཡང་མ་རེད།
ཆབ་སྲིད་ཀྱི་གནས་བབ་གཅིག་པུར་གཟིགས་ཏེ་དེའི་སྐབས་ཀྱི་ཞན་ཆ་དེ་དག་བོད་ཀྱི་གནའ་བོའི་གནས་བབས་ཚང་མར་སྦྱར་ཏེ་ཡོངས་རྫོགས་མ་ཚང་བ་ཞིག་ཡིན་པའི་མཐོང་ཚུལ་བྱུང་བ་ཡིན་ན་བོད་པའི་རིག་གཞུང་ལ་གནོད་རྒྱུ་གང་ཡང་མེད་ཀྱང་། སོ་སོའི་མིའི་རིན་ཐང་ཆུང་དུ་འགྲོ་རྒྱུ་དང་རང་གི་རྐང་པའི་སྟེང་རང་ལངས་ཐུབ་རྒྱུའི་སྤོབས་པ་དང་ཡིད་ཆེས་ཉམས་པའི་སྐྱོན་ཡོད། དེ་དང་ཆབས་ཅིག་མིའི་ལད་ཟློས་བྱེད་རྒྱུར་ཧ་ཅང་ཧེབ་ལངས་ཏེ་ལད་ཟློས་བྱེད་སྟངས་མི་ཤེས་པར་སྔར་གྱི་སྲོལ་རྒྱུན་དེའང་བརླག་ན་ཐབས་སྐྱོ་པོ་རེད་བསམ་གྱི་འདུག དེར་བརྟེན་ང་ཚོས་གནའ་བོའི་རིག་གཞུང་གི་རིན་ཐང་མཁྱེན་པ་དགོས་རྒྱུ་ཧ་ཅང་གལ་ཆེན་པོ་རེད། ཅེས་སོགས་དང་། ལྷག་པར་ཁོང་གིས་གསུང་དོན། ང་ཚོའི་སྐད་ཡིག་ཆག་འཇིགས་ཀྱི་སྐད་ཆ་བཤད་པའི་སྐབས། ང་ཚོའི་བསམ་བློར་བོད་ནང་རྒྱ་མིས་བཙན་གནོན་དབང་གིས་བོད་ཀྱི་ཆོས་དང་རིག་གཞུང་སྐད་ཡིག་དང་བཅས་པ་རྩ་མེད་གཏོང་རྒྱུའི་འཆར་གཞི་ལྡན་པའི་ལས་འགུལ་སྤེལ་གྱི་ཡོད་སྟབས། དེའི་དབང་གི་ཉམས་ཆག་འགྲོ་གི་རེད་བསམ་པའི་འཇིགས་སྣང་མ་གཏོགས་དེ་ལས་གཞན་པའི་ལམ་ཁ་གཞན་པ་དེ་དག་བསམ་བློའི་ནང་མ་འཁོར་དེ་འདྲ་ངས་མཐོང་གི་འདུག སྤྱིར་བཏང་དུས་ཚོད་འགྱུར་བའི་ནང་ཉམས་ཆག་མང་པོ་ཞིག་འགྲོ་གི་ཡོད། གོ་ལ་གཅིག་གྱུར་གནས་སྟངས་འདིའི་འོག་ལ་བོད་པ་ཙམ་མིན་པར་མི་རིགས་དང་རྒྱལ་ཁབ་ཆུང་བ་མང་པོའི་སྐད་ཡིག་ཉེན་ཁར་སླེབས་ཡོད། འདས་པའི་ལོ་ལྔ་བཅུ་ལྔ་གྲངས་རིང་ལ་བོད་ནང་མཁས་དབང་དེ་ཚོས་བོད་ཀྱི་སྐད་ཡིག་དང་རིག་གཞུང་ཐོག་རླབས་ཆེན་གྱི་ཕྱག་ལས་གནང་བ་དེ་གཟི་བརྗིད་ཆེན་པོ་རེད་བསམ་གྱི་འདུག ང་ཚོ་རང་དབང་ལུང་པའི་ནང་མཐུན་རྐྱེན་འཛོམས་མཁན་ཚོས་གནང་མ་ཐུབ་མང་པོ་ཞིག་བོད་ནང་བཞུགས་མཁན་ཚོས་གནང་ཡོད།
དེ་དག་ང་ཚོས་ངོས་འཛིན་པའི་ཐོག་དཀའ་ངལ་བརྒྱབ་པ་དེ་དག་དྲིན་དྲན་པ་དང་དྲིན་གཟོ་བ་གཉིས་དགོས་རྒྱུ་ཡ་རབས་བཟང་སྤྱོད་ཆ་ནས་ངེས་པར་དུ་དགོས་ཀྱི་ཡོད། རྒྱ་མིས་ང་ཚོའི་སྐད་ཡིག་རྩ་མེད་གཏོང་རྒྱུ་དེ་ང་ཚོས་མངོན་སུམ་མཐོང་ཆོས་སུ་ཡོད། འོན་ཀྱང་ང་ཚོས་མཐོང་མི་ཐུབ་པ་དེ་དེང་རབས་སྤྱི་ཚོགས་ཀྱི་དཔལ་ཡོན་དང་ཤུགས་སྣོན། མི་རབས་གཞོན་པ་ཚོས་དོ་སྣང་ཐོག་ནས་ཉམས་ཆག་འགྲོ་གི་ཡོད། དེ་དང་ཆབས་ཅིག་སྐད་ཡིག་འགྱུར་འགྲོས་ཐོག་ནས་ཉམས་ཆག་མང་པོ་ཞིག་འགྲོ་གི་ཡོད། སྐད་ཡིག་འགྱུར་འགྲོས་དེ་བསམ་བློའི་འགྱུར་འགྲོས་ལ་མགྱོགས་པ་འགྲོ་རྒྱུ་ཞིག་རེད། དེ་ང་ཚོས་ངོ་ཤེས་པ་དགོས་པ་དང་འགྱུར་འགྲོས་དེར་སྐབས་རེ་མཉམ་རུབ་བྱས་ཏེ་མདུན་སྐྱོད་བྱེད་དགོས་རྒྱུ་དང་། སྐབས་རེ་གདོང་ལེན་བྱས་ཏེ་དགག་པ་རྒྱག་རྒྱུ་ཡོད། ལས་དོན་གཞི་རྒྱ་ཆེ་རུ་དང་ལས་བྱེད་མང་དུ་ཕྱིན་པའི་སྐབས། ཐོག་མའི་མི་གཅིག་གི་རིགས་གཅིག་རྐང་འཛིན་གྱི་ནུས་པ་དེ་མ་ཉམས་པར་སྔོན་ལྟར། ཟླ་གཅིག་ཞག་གཅིག་ཐོག་ནས་གྲུབ་འབྲས་མིག་མཐོང་ལག་ཟིན་ཡོང་རྒྱུ་ཡོད་པ་དེ་ཚོ་གནང་ཐུབ་རྒྱུ་གལ་ཆེན་པོ་རེད་བསམ་གྱི་འདུག ཐུགས་རྗེ་ཆེ། ཞེས་སོགས་ཀྱི་ལམ་སྟོན་གསུང་བཤད་གནང་སྟེ་གྲོལ་ཡོད་པ་བཅས།།
