༢༠༡༠ ཕྱི་ཟླ་ ༡ ཚེས་ ༢༩ རེས་གཟའ་པ་སངས།
་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་
་༄༅། །འདི་གར་བོད་མི་མང་ཆབ་སྲིད་སྡེ་ཚན་གྱི་ཚོགས་མི་སྤྱི་འཐུས་དགེ་བཤེས་བེ་རི་འཇིགས་མེད་དབང་རྒྱལ་ལགས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༠༨ ཟླ་ ༣ ཚེས་ ༡༨ ཉིན་རྒྱལ་གཅེས་པ་རིག་འཛིན་སྒྲོལ་མ་ལགས་ཀྱིས་དཀར་མཛེས་རྫོང་ཁུལ་ཁྲོམ་གཞུང་དུ་ཞི་རྒོལ་ནང་མཉམ་ཞུགས་བྱེད་སྐབས་རྒྱ་ནག་གི་དྲག་ཆས་དམག་མིས་མེ་མདའ་བརྒྱབ་སྟེ་བོད་མི་ཞི་རྒོལ་བ་མང་པོ་དམར་གསོད་བཏང་ཡོད་པ་མ་ཟད། ཤུལ་ལུས་འགའ་ཞིག་ལ་ཉེས་རྡུང་ཚད་མེད་གཏོང་བའི་ཁྲོད་རྒྱལ་གཅེས་པ་རིག་འཛིན་སྒྲོལ་མའི་ཕྲག་སྟེང་ལ་དབྱུག་པ་བསྟུད་མར་ཐེངས་འགའ་ཤས་གཞུས་རྐྱེན་ཁོང་མོ་དྲན་པ་ཐོར་ཡོད་པ་རེད། དེ་ནས་དྲན་པ་གསོས་སྐབས་སྲང་ལམ་གྱི་ཟུར་ཞིག་ལ་འགུལ་སྐྱོད་མེད་ཐོག་ཉེན་རྟོག་དང་དམག་མིས་རྡོག་རྫིས་བཏང་ནས་འགྲོ་གི་ཡོད་པ་ཁོ་མོས་ཚོར་བར་བརྟེན། རང་ནུས་གང་ཡོད་ཀྱིས་གོག་ནུད་བྱས་ཏེ་རླངས་འཁོར་ཞིག་གི་རྒྱབ་ཏུ་གབ་ཐུབ་པ་བྱུང་ཡོད། དེ་རྗེས་ངོ་མི་ཤེས་པའི་བོད་མི་ཞིག་གིས་ཁོང་རང་གི་སྟོད་གོས་ཁོ་མོར་གཡོགས་ཏེ་རྒྱབ་ཕྱོགས་ནས་མི་ཚོགས་གསེབ་ཏུ་འཛུལ་ནས་ཁོང་རང་གིས་ཚོང་ཁང་ནང་ལ་ཁྲིད་རྗེས་རི་རྩ་བརྒྱུད་སྟག་ཆུ་འདབས་རྫ་ཆུ་གཙང་འགྲམ་བརྒྱུད་དེ་བྲོས་ནས་སྟག་ཆུ་འདབས་ཀྱི་ཁྱིམ་ཚང་ཞིག་ཏུ་གབ་ཡིབ་བྱས་ཡོད་ཀྱང་སྐབས་དེར་གྲོང་སྡེར་སྔོག་བཤེར་བྱེད་ཀྱི་ཡོད་སྟབས། ཁོ་མོ་ཡང་སྡོད་ཐབས་བྲལ་ཏེ་ལུས་ལ་རྒྱ་ཆས་དང་མགོ་བོར་སྐྲ་རྫུན་སོགས་གྱོན་པ་དང་ཆབས་ཅིག་ཁྱིམ་ཚང་དེར་ཕྲུ་གུ་ཆུང་ཆུང་ཞིག་ཡོད་པ་དེ་སྒལ་པར་ཁུར་ནས་སྟག་ཆུ་འདབས་ལྕགས་ཟམ་ཐོག་རྒྱུན་ལྡན་འགྲོ་སྲོལ་ཡོད་པ་ལྟར་ཕྱིན། ཡང་ཁོ་མོ་དཀར་མཛེས་གསེར་ཆུ་སྟེང་དང་འོ་བཟང་། དེ་བཞིན་རྫ་ཁོག་ཏུ་ཡོད་སྐབས་དགོན་གསར་དགོན་དུ་ཞི་རྒོལ་ནང་གྲྭ་པ་ཞིག་ལ་མེ་མདའ་ཕོག་པ་སོགས་ཀྱི་དོན་རྐྱེན་བྱུང་བར་བརྟེན་དེར་ཡང་སྡོད་ཐབས་བྲལ་ནས་བྲོས་དགོས་བྱུང་ཡོད། ཕྱོགས་མཚུངས་རོང་པ་ཚ་ཁ་འབྲོག་གྲོང་དང་གླིང་འདབས་སོགས་སུ་ལོ་གཅིག་ལྷག་གབ་ཡིབ་བྱེད་དགོས་བྱུང་ཡོད་པ་རེད། དེ་རྗེས་དམ་བསྒྲགས་ཅུང་ལྷོད་དུ་ཕྱིན་པའི་སྐབས་དང་བསྟུན་ནས་གསང་བའི་བཀོད་སྒྲིག་འོག་ཕྱི་ལོ་ ༢༠༠༩ ཟླ་ ༡༠ པའི་ནང་དཀར་མཛེས་ནས་མཚན་མོ་ལྷ་སར་ཕྱིན། ལྷ་སར་གསང་བའི་ཐོག་ཉིན་ ༨ གབ་རྗེས་ཀུ་རུ་ཟམ་ཁ་ནས་རླངས་འཁོར་ཞིག་གི་ནང་གཞིས་རྩེ་བརྒྱུད་ལྷ་རྩེར་འབྱོར་ཡོད་པ་དང་། དེ་ནས་སྦག་སྦག་ཐོག་མཚན་མོར་ས་མཚམས་ལ་བསླེབས་རྗེས་བལ་པོ་མི་ཞིག་གིས་ལམ་ཁྲིད་བྱས་ཏེ་བལ་ཡུལ་དུ་འབྱོར།
བལ་ཡུལ་སྣེ་ལེན་ཁང་གིས་གཟིགས་སྐྱོང་གང་ལེགས་ཐོག་ཕྱི་ལོ་ ༢༠༡༠ ཟླ་ ༡ ཚེས་ ༡༤ ཉིན་རྒྱ་གར་རྡ་རམ་ས་ལའི་བོད་གཞུང་དབུས་སྣེ་ལེན་ཁང་དུ་འབྱོར་ཡོད་པ་རེད། དེ་ཡང་ཁོ་མོས་གསུངས་བའི་ནང་འཁོད་དོན། དཀར་མཛེས་རྫོང་ཁུལ་ཁྲོམ་གཞུང་དུ་ཞི་རྒོལ་ནང་ཞུགས་མཁན་ཇེ་མང་ནས་ཇེ་མང་དུ་ཕྱིན་ཡོད་པ་མ་ཟད། ཞི་རྒོལ་བ་རྣམས་ཀྱིས་༸གོང་ས་མཆོག་བོད་ལ་གདན་འདྲེན་ཞུ་དགོས། དེ་བཞིན་བོད་མིར་འགྲོ་བ་མིའི་ཐོབ་ཐང་དགོས། པཎ་ཆེན་རིན་པོ་ཆེ་མཆོག་གློད་བཀྲོལ་གཏོང་དགོས་སོགས་སྐད་འབོད་ཀྱིས་མང་ཚོགས་མཉམ་དུ་འབོད་ནས་སྟག་ཆུ་འདབས་ནས་སྐྱབས་མགོན་སློབ་གྲྭ་བར་གོམ་བགྲོད་བྱེད་སྐབས་ཁྲོམ་གཞུང་གི་བོད་རིགས་ཡོངས་རྫོགས་ནས་ཞི་རྒོལ་གྱི་གོམ་བགྲོད་ནང་འཚང་ཀ་བརྒྱབ་ནས་འཛུལ་ཞུགས་བྱས་ཡོད་པ་རེད། དེ་ནས་ཆུ་ཚོད་ཕྱེད་ཀ་ལྷག་ཙམ་རིང་གོམ་བགྲོད་བྱས་རྗེས་གློ་བུར་དུ་ཉེན་རྟོག་པ་དང་དྲག་ཆས་དམག་མི་མང་པོ་ཞིག་གིས་ཞི་རྒོལ་སྔོན་བསྐྱོད་པ་དང་མཇུག་མཐུད་བར་གྱི་འགྲོ་ལམ་འཕྲེད་བཀག་གིས་རྗེས་མ་རྣམས་བཀག་བསྐྱིལ་ཐོག་མེ་མདའ་བརྒྱབ་པ་དང་དྲག་རྡུང་བཏང་ཡོད་པ་རེད་འདུག སྐབས་དེ་དུས་རིག་འཛིན་སྒྲོལ་མ་ལགས་སུ་ཡང་ཉེས་རྡུང་དྲག་པོ་ཕོག་རྐྱེན་རྗེས་བྱུང་གི་གནས་ཚུལ་གསལ་པོ་མི་ཤེས་པའི་གནས་སུ་གྱུར་ཡོད་པ་བཅས་སོ། ་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་་
