༢༠༠༩ ཕྱི་ཟླ་ ༡༢ ཚེས་ ༡༡ རེས་གཟའ་ཕུར་བུ།
དྲིལ་བསྒྲགས་དྲུང་ཆེ་ཐུབ་བསྟན་བསམ་འཕེལ་མཆོག་ནས་ངོ་སྤྲོད་གནང་བཞིན་པ།
༄༅། ཕྱི་ལོ་ ༢༠༠༩ ཟླ་ ༡༢ ཚེས་ ༡༠ ཉིན་ཆུ་ཚོད་ ༡༢།༠༠ རྡ་ས་བོད་ཀྱི་འགྲེམས་སྟོན་ཁང་དུ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་བེལ་ཞི་བདེའི་གཟེངས་རྟགས་ཕུལ་ནས་ལོ་ཉི་ཤུ་དང་ཧི་མ་ཅལ་གཞུང་ནས་རྗེས་དྲན་གྱི་དགའ་སྟོན་ཐེངས་བཅུ་བཞི་པ།
ཆ་འཕྲིན་དྲྭ་རྒྱ་བརྒྱུད་པེ་ཅིང་ནས་ཐད་ཀར་རྩོམ་པ་པོ་ཚེ་རིང་འོད་ཟེར་ལགས་ཀྱི་འགྲེལ་བརྗོད་གནང་བཞིན་པ།
རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་བཅས་གལ་ཆེའི་དུས་ཆེན་གསུམ་འཛོམས་འཁེལ་བའི་ཉིན་མོར་ནོར་ཝེ་བོད་དོན་ལྷན་ཚོགས་ནས་གོ་སྒྲིག་ཞུས་པའི་ནོར་ཝེ་བོད་ཀྱི་རོགས་ཚོགས་ནས་པར་སྐྲུན་གནང་བ་དང་སྒྲོལ་དཀར་ལགས་ནས་བོད་ཡིག་ཐོག་བསྒྱུར་བ་བོད་རིགས་རྩོམ་པ་པོ་ཚེ་རིང་འོད་ཟེར་ལགས་ནས་རྒྱ་ཡིག་ཐོག་བརྩམས་པའི་༼གསར་བརྗེ་༽ཞེས་པ་བོད་བསྒྱུར་ཞུས་པའི་དེབ་དཔེ་དེབ་འགྲེམས་སྤེལ་གྱི་གསར་འགོད་གསལ་བསྒྲགས་ཤིག་ཚོགས་ཡོད། དེ་ཡང་གསར་འགོད་ལྷན་ཚོགས་ཀྱི་ཐོག་མར་ཕྱི་དྲིལ་དྲུང་ཆེ་ཐུབ་བསྟན་བསམ་འཕེལ་ལགས་ནས་ངོ་སྤྲོད་དང་། དེ་རྗེས་ནོར་ཝེ་བོད་དོན་ལྷན་ཚོགས་ཀྱི་འགན་འཛིན་ཆུང་བདག་ཀོ་རིན་ལགས་ནས་གསར་བརྗེ་ཞེས་པའི་དེབ་དེ་བོད་བསྒྱུར་ཞུ་སླད་མཐུན་རྐྱེན་བསྐྲུན་དགོས་པའི་དམིགས་ཡུལ་གསུངས་གྲུབ་མཚམས་ཆ་འཕྲིན་དྲྭ་རྒྱ་བརྒྱུད་པེ་ཅིང་ནས་ཐད་ཀར་དཔེ་དེབ་རྩོམ་པ་པོ་ཚེ་རིང་འོད་ཟེར་ལགས་ཀྱི་འགྲེལ་བརྗོད་གནང་དོན། དེ་རིང་གོ་སྐབས་འདི་འདྲ་ཞིག་བྱུང་བར་ང་རང་ཧ་ཅང་དགའ་པོ་བྱུང་། དེ་བཞིན་ངས་ཁྱེད་རྣམས་ལ་འཚམས་འདྲི་དང་བཀྲ་ཤིས་བདེ་ལེགས་ཞུ་རྒྱུ་ཡིན། དཔེ་དེབ་འདི་བོད་ཡིག་ཐོག་འདོན་རྒྱུ་ཧ་ཅང་གལ་ཆེན་པོ་ཡིན་པར་སོང་སྒྱུར་བ་པོ་སྒྲོལ་དཀར་ལགས་དང་མཐུན་རྐྱེན་བསྐྲུན་མཁན་ཆུང་བདག་ཀོ་རིན་ལགས་སུ་ཐུགས་རྗེ་ཆེ་ཞུ་རྒྱུ་ཡིན། རྒྱ་ནག་ནང་རིག་གནས་གསར་བརྗེའི་སྐོར་ཡིག་ཆ་མང་པོ་ཞེ་དྲག་ཡོད། ཡིན་ནའང་བོད་ནང་སྐབས་དེའི་ཡིག་ཆ་ཧ་ཅང་དཀོན་པོ་ཡིན་པར་སོང་།
ཕྱི་ལོ་ ༡༩༩༩ ནས་ལོ་དྲུག་ཙམ་གྱི་རིང་བོད་ནང་དེབ་འདི་དང་དེབ་གཞན་ཞིག་གི་ཆེད་མི་སྣ་ ༧༠ ཙམ་ལ་བཅའ་འདྲི་ཞུ་སྐབས་ཁོང་རྣམ་པས་དང་ལེན་ཐོག་རྒྱབ་སྐྱོར་གནང་བར་ཐེངས་འདིར་ཐུགས་རྗེ་ཆེ་ཞུ་རྒྱུ་དང་འབྲེལ་རིག་གནས་གསར་བརྗེའི་ལོ་རྒྱུས་དེ་ཚོར་གཅེས་འཛིན་བྱེད་དགོས། ང་ཚོ་བོད་མི་རིགས་ལ་གཏོར་བཤིག་མང་པོ་བཏང་བ་དེ་དག་མ་བརྗེད་པ་གནང་དགོས། དེ་བཞིན་ཁམས་དང་ཨ་མདོ་ཁུལ་གྱི་དངོས་བྱུང་ས་གནས་སོ་སོའི་ལོ་རྒྱུས་ཇི་བྱུང་རྣམས་ང་ཚོས་ཕྱོགས་བསྡུས་བྱེད་ཐུབ་ན་མི་རབས་རྗེས་མ་ཚོར་ཕན་ཐོགས་ཡོད། དེ་བཞིན་དེ་རིང་དེར་སྒྲོལ་དཀར་ལགས་དང་ཆུང་བདག་ལགས་གཙོས་གསར་འགོད་ལྷན་ཚོགས་ཐོག་ཕེབས་པའི་མཁས་པ་རྣམ་པ་དང་གསར་འགོད་པ་རྣམ་པ་ཚང་མར་ཐུགས་རྗེ་ཆེ་ཞུ་རྒྱུ་ཡིན། ཞེས་སོགས་ཀྱི་ཐད་ཀར་འགྲེལ་བརྗོད་གནང་ཡོད། དེ་རྗེས་སྒྲོལ་དཀར་ལགས་ནས་ཕབ་སྒྱུར་ཞུས་པའི་བརྒྱུད་རིམ་ངོ་སྤྲོད་དང་སྦྲགས་དྲི་བ་ཁག་ལ་ལན་འདེབས་གནང་ཡོད། ཚེ་རིང་འོད་ཟེར་ལགས་ཀྱིས་བརྩམས་གནང་བའི་དེབ་འདིའི་ནང་པར་རིགས་ ༣༠༠ ལྷག་ཡོད་པ་དེ་དག་ནི་ཁོང་གི་ཕ་འདས་པོ་ཚེ་རིང་རྡོ་རྗེ་ལགས་ནས་རྒྱ་ནག་གི་མཐོ་རིམ་དམག་དཔོན་ཞིག་གི་མིང་ཐོག་ནས་པར་ལེན་ཞུས་བྱས་པ་གཞིར་བཟུང་ཐོག་རྩོམ་པ་པོས་སྐབས་དེའི་མི་སྣར་བཅའ་འདྲི་ཞུས་ཏེ་བྲིས་པ་ཞིག་དང་ཐོག་མར་ཕྱི་ལོ་ ༢༠༠༦ ལོར་ཐེ་ཝན་ནང་དེབ་འདི་པར་སྐྲུན་ཞུ་ཐུབ་བྱུང་བ་མ་ཟད། ལོ་དེའི་ཐེ་ཝན་གྱི་རྒྱ་ནག་དུས་བབ་ཅེས་པའི་རྒྱ་ཡིག་དེབ་ཡག་ཤོས་བཅུའི་བྱ་དགའ་ཡང་ཐོབ་ཡོད། ལྷ་ས་གཅིག་པུར་བྱུང་བའི་ལོ་རྒྱུས་ཀྱི་དོན་དངོས་པར་རིགས་དེ་དག་གིས་བོད་ཁྱོན་ཡོངས་ལ་གྱོང་རྒུད་ག་ཚོད་བྱུང་བ་རྟོགས་ཐུབ། དེང་སྐབས་རྒྱ་ནག་གཞུང་ནས་ཕྱི་ཕྱོགས་སུ་དྲི་བསྒྲགས་ཤུགས་ཆེ་སྤེལ་ཏེ་བོད་ལ་བཅིངས་བཀྲོལ་བཏང་སྟེ་ཞིང་བྲན་ཁྲི་ཚོ་བརྒྱ་ལ་བདེ་སྐྱིད་ཀྱི་འཚོ་བ་ཐོབ་ལུགས་བརྗོད་ཀྱི་ཡོད་ཀྱང་ལོ་རྒྱུས་འདི་དག་ནམ་ཡང་འགེབས་སྲུང་བྱས་ཏེ་ཟུར་ཙམ་ཡང་གླེང་གི་མེད་པ་མངོན་གསལ་ཡིན།
